Ka Ku Ya Ka Bibele

Mu Kona ku Pilisana Cwañi ka Kozo ni ba Bañwi?

BIBELE i bulela cwana ka za batu: “Kaufelaa bona ba ezize sibi mi ha ba fiti fa sipimo sa kanya ya Mulimu.” (Maroma 3:23) Bakeñisa kuli batu ba ba fitelela 7 bilioni ba ba pila fa lifasi ha ba si ka petahala, ba shelananga. Lu kona ku pilisana cwañi mwa kozo ni ba bañwi mwa miinelo yeo?

Lu fumana kelezo ye nde mwa Bibele. Bibele i talusa kuli Mubupi wa lika kaufela, yena Jehova, ki “Mulimu wa kozo.” (Maheberu 13:20; Samu 83:18) Mulimu u bata kuli bana ba hae ba fa lifasi ba pilisane mwa kozo. Mi u file mutala wa mwa ku pilisanela mwa kozo. Bo muuna ni musali ba pili ha ne ba ezize sibi, ili ku sinya kozo ye ne ba na ni yona ni Mulimu, kapili-pili Mulimu a nga muhato wa kuli batu ba kone ku kutela ku yena. (2 Makorinte 5:19) Ha mu nyakisise lika ze taalu ze mu kona ku eza kuli mu pilisane mwa kozo ni ba bañwi.

Mu Swalelane ka Pilu Kaufela

Ki sika mañi se i bulela Bibele? “Mu zwelepili ku tuhelelana ni ku swalelana ka pilu kaufela mutu ni kwa na ni libaka la ku tongoka yo muñwi. Sina Jehova ha mi swalezi ka pilu kaufela, ni mina mu lukela ku eza cwalo.”—Makolose 3:13.

Butata ki bufi? Mwendi mu na ni libaka le li utwahala la “ku tongoka,” mi mu ikutwa kuli mwa swanela ku felisa silikani sa mina ni mutu ya mi foselize. Hape mwendi mu ikutwa kuli mutu ya mi foselize u swanela pili ku kupa swalelo. Kono haiba nji mutu yo ha si ka lemuha bufosi bwa hae, kamba u nahana kuli ki mina ba ba fosize, butata bo bu kana bwa palelwa ku tatululwa.

Mu kona ku ezañi? Mu latelele kelezo ya mwa Bibele ka ku swalela mutu ya mi foselize ka pilu kaufela, sihulu haiba nto ya mi foselize ki ye nyinyani. Mu hupule kuli, Mulimu ha naa ka buluka milatu ya luna, ne lu si ke lwa kona ku ba ba ba lukile fapilaa hae. (Samu 130:3) Bibele i bulela kuli: “Muñaa Bupilo u tezi makeke ni musa, ha halifi kapili, u na ni sishemo se situna. Kakuli u ziba se lu bupilwe ka sona, u nza hupula kuli lu liluli feela.”—Samu 103:8, 14.

Hape mu lemuhe lishitanguti la mwa Bibele le, le li li: “Ngana [kamba temuho] ya mutu i mu tibela ku halifa kapili, mi ha swalela ba ba mu foselize, u ka bubana.” (Liproverbia 19:11) Ku ba ni temuho ku lu tusa ku ziba se si tahisanga kuli mutu a bulele manzwi a bulezi kamba ze tahisanga kuli a eze lika za ezize. Kamukwaocwalo, mu ipuze kuli, ‘Kana mutu ya naa ni foselize, naa katezi, naa kula, kamba naa na ni butata bo buñwi?’ Ku lemuha milelo tota, maikuto luli, ni miinelo tenyene ya ba bañwi kwa kona ku kuyula buhali bwa mina ni ku mi tusa ku hupulanga kuli ba bañwi ba kona ku eza mafosisa.

Mu Ikambote

Ki sika mañi se i bulela Bibele? “Haiba mwanahenu a eza sibi, u ye u yo mu punyeza bufosi bwa hae mu li ba babeli feela. Haiba a ku utwa, u zibe u pilisize mwanahenu.”—Mateu 18:15.

Butata ki bufi? Maikuto a cwale ka sabo, bunyemi, ni maswabi a kona ku mi palelwisa ku atumela mutu ya mi foselize kuli mu tatulule butata bo bu mwahalaa mina. Hape mu kana mwa bata kuli batu ba bañwi ba mi yemele ka ku ba taluseza butata bo, ili nto ye kona ku tahisa kuli butata bo bu yambe ni ku ba bo butuna.

Mu kona ku ezañi? Haiba butata ki bo butuna mi mu ikutwa kuli ha mu koni ku bu tuhelela feela, mu swanela ku atumela mutu ya mi foselize kuli mu ikambote za teñi. Mu like ku tatulula butata bo ka ku latelela liakalezo ze:

(1) Mu nge muhato ka bubebe: Mu si ke mwa kasheza kwa pili za ku tatulula butata bo. Haiba mu eza cwalo, butata bo bwa kona ku hula ni ku ba bo butuna. Mu like ku sebelisa kelezo ya Jesu ye, ye li: “Ha u tisa mpo ya hao kwa aletare mi ha u li kwateñi u hupula kuli mwanahenu wa ku bilaela, u siye mpo ya hao fapilaa aletare, mi u ye.  Pili u yo kutisana pilu ni mwanahenu, mi cwale ha se u kutile, u fe mpo ya hao.”—Mateu 5:23, 24.

(2) Mu tatululele butata kwa mukunda: Mu tokolomohe ku sebela ba bañwi za butata bo. Bibele i li: “Niha u zeka ni muhaenu, u si ke wa punya makunutu a yo muñwi.”—Liproverbia 25:9.

(3) Mu tatulule butata ka kozo: Mu si ke mwa lika ku bata ku ziba kuli ki mañi ya si na mulatu ni kuli ki mañi ya naa fosize. Mulelo wa mina ki wa ku tahisa kozo, isiñi ku wina muzeko. Mu like ku itusisa linzwi le li ama ku mina beñi isiñi le li supa ku mutu ye mu ikambota ni yena. Mwendi ku ka tusa hahulu ku bulelela mutu yo kuli, “Ni ikutwa bumaswe kakuli . . . ” ku fita ku mu bulelela kuli: “U ni utwisize bumaswe!” Bibele i bulela kuli: “Ha lu tundameneñi ze tahisa kozo ni ze yahisa yo muñwi ni yo muñwi.”—Maroma 14:19.

Mu be ni Pilu-Telele

Ki sika mañi se i bulela Bibele? “Mu si ke mwa kutisa bumaswe ka bumaswe. . . . Kono, ‘haiba sila sa hao si lapile, u si fepe; ha si shwile linyolwa, u si fe sa ku nwa.’”—Maroma 12:17, 20.

Butata ki bufi? Haiba mutu ye mu ikambota ni yena a ha na ku kutisana lipilu, mwa kona ku zwafa.

Mu kona ku ezañi? Mu be ni pilu-telele. Batu ba bonisanga maikuto a bona ka ku shutana-shutana mi ni ku hula kwa bona mwa munahano kwa shutana. Ba bañwi ku ba ngelanga nako kuli ba nyemuluhe; mi ba bañwi bona ba sa ituta ku bonisa tulemeno twa Sikreste. Mu zwelepili ku ba bonisa sishemo ni lilato. Bibele i bulela kuli: “U si ke wa tuhelela bumaswe ku ku koma, kono u zwelepili ku koma bumaswe ka bunde.”—Maroma 12:21.

Kuli lu pilisane ka kozo ni ba bañwi, lu tokwa ku ituta ku bonisa buikokobezo, temuho, pilu-telele, ni lilato. Lu swanela ku ikataza cwalo kakuli ku pilisana ni ba bañwi ka kozo ki kwa butokwa hahulu.

KANA MU KILE MWA IPUZA KULI:

● Ki sika mañi se si ka ni tusa ku swalela mutu yo muñwi ka pilu kaufela?—Makolose 3:13.

● Ki sika mañi se si ka ni tusa ku atumela mutu yo muñwi kuli lu ikambote za butata bo bu mwahalaa luna?—Mateu 5:23, 24.

● Ki sika mañi se ni kona ku eza haiba buikatazo bwa ka bwa ku tahisa kozo bu haniwa?—Maroma 12:17-21.

[Manzwi a fa likepe 11]

“Ngana [kamba temuho] ya mutu i mu tibela ku halifa kapili, mi ha swalela ba ba mu foselize, u ka bubana.”—LIPROVERBIA 19:11