Ba banca Ba Buza Kuli

Ni kona ku tabela cwañi ku balanga Bibele?

Ki kabakalañi ha ni swanela ku balanga Bibele? Ha mu bone:

Bibele ya kona ku mi tusa ku fumana nto ya butokwa. Buka ye tumile hahulu ye, ili ye se lekilwe hahulu ki batu ba bañata ya kona

● Ku mi bonisa mo mu kona ku bela ni bupilo bo bunde

● Ku mi taluseza litaba ze ka ezahala kwapili ni ze ne ezahezi kwamulaho, ili ze mu si ke mwa fumana ku sili

● Ku mi tusa ku iziba ni ku ba mutu yo munde *

KU BALANGA Bibele ku tokwa buikatazo, kono kwa tusa luli! Kana mwa tabela ku ziba ze konisa mikulwani ba bañwi ku balanga Bibele? Mu pume likepe le li tatama ni ku li puta fahali. Ha mu ka eza cwalo mu ka ba ni kabuka ka makepe a ma ne ka ka na ni litaba za butokwa. Kabuka kao ka ka mi bonisa ka mo litaka za mina ba tulela lika ze kona ku ba palelwisa ku bala Bibele ni ka mo ba tusezwa ki ku ituta Bibele.

Musizana ya bizwa Valerie * u bulela kuli: “Mañi ni mañi wa kona ku fumana nto ya ka tabela mwa Bibele ni ye ka mu tusa. Mwa Bibele ku na ni lika ze ñata hahulu ze lu kona ku ituta!”

Mwa kona ku fumana litaba ze ñata ka za “Ba Banca ba Buza Kuli” fa sibaka sa luna sa fa Intaneti sa www.watchtower.org/ype

[Litaluso za kwatasi]

 [Mbokisi/Maswaniso a fa likepe 13]

MWA KU BALELA BIBELE

Butata bo ni fumana: HA NI TABELI KU BALA

Musizana ya bizwa Lena u li: “Na za ku ina fafasi ku tanda hora inze ni bala haki nto ye tabela ku eza.”

Ze kona ku mi tusa: KU ZIBA BUNDE BWA KU BALA BIBELE

Kuli mu tabele ku balanga Bibele, mu tokwa ku ziba bunde bo mu ka fumana ka ku eza cwalo. Kana mwa tabela ku ba mulikanaa Mulimu? Kana mwa tabela ku utwisisa hahulu ze ezahala mwa lifasi? Kana mwa tabela ku ba mutu yo munde? Bibele ya kona ku mi tusa mwa litaba zeo mane ni mwa litaba ze ñwi ze ñata!

Kalibe ya bizwa Bethany u li: “Mu si ke mwa nahana kuli ku bala Bibele ki musebezi. Mu si ke mwa nga ku bala Bibele sina ya bala lituto za kwa sikolo. Kono mu nge kuli ku bala Bibele ku ka mi tusa ku tiisa hahulu silikani sa mina ni Mulikani yo munde hahulu, yena Jehova Mulimu.”

Kalibe ya bizwa Bianca u li: “Ha mu bala Bibele mu tanda nako ni Jehova Mulimu. Haiba mu tandanga feela nako ni mutu yo muñwi bashemi ba mina ha ba li teñi, kana mutu yo ki mulikanaa mina luli kamba ki mulikanaa bashemi ba mina? Ha mu ka ipalelanga Bibele, Jehova u ka ba mulikanaa mina.” 

Mu lemuhe kuli: Bibele i bulela kuli: “Mañolo kaufela a ñozwi ka susuezo ya moya wa Mulimu, mi a na ni tuso kwa ku luta niti, ku kalimela foso, ku lukisa milatu, ni ku fa likelezo ka [za] bupilo bo bunde.” (2 Timotea 3:16, Bibele ye Kenile, Hatiso ya 1984) Bibele hape ya kona ku mi tusa mwa linzila zeo!

Mucaha ya bizwa Max u li: “Ni likanga ku isa pilu kwa lituso ze ni fumana ha ni bala Bibele. Haiba ku na ni nto ye ni tokwa ku cinca mwa bupilo bwa ka, ku bala Bibele ku ni tusa ku ituta lika ze ni tokwa ku eza kuli ni cince.”

Za ku nahanisisa:

Ki lika mañi ze kona ku mi susueza ku balanga Bibele?

 Butata bo ni fumana: NI UTWANGA BUZWA

Musizana ya bizwa Allison u li: “Ni kalanga ku katala ha se ni balile Bibele ka mizuzu ye 10; mi ha se ni tandile mizuzu ye 20 ni batanga feela ku eza nto ye ñwi i sili; mi ha ni yo kwanisanga mizuzu ye 30 ki kale ni kenelwa ki buzwa bo butuna luli!”

Ze kona ku mi tusa: MU EZE LIKA ZE FAPANA-FAPANA

Mu like ku nahana lika ze kona ku mi tusa, ibe kuli li ama ze mu bala, kamba mo mu balela, kamba sibaka se mu keta ku yo balela.

Mucaha ya bizwa Richard u li: “Mu bange ni nako ya ku eza patisiso fa lipuzo ze mu na ni zona. Ha mu bala za taba ye ne mu nahana, mu ka ikutwa kuli ku na ni ze mu petile ha mu feza ku bala, mi mu ka nyakalala.”

Mutangana ya bizwa Steven u li: “Ha mu bala za taba ye ñwi, mu eze inge kuli ni mina mu mwa taba yeo. Mu nge kuli ki mina ba ba eza lika ze bulelwa mwa taba ye mu bala kamba mu mutu ya sweli ku bona lika zeo ha li ezahala luli. Mu like ku nahana inge kuli mwa bona lika zeo ha li nze li ezahala fapilaa mina.”

Musizana ya bizwa Alexandra u li: “Mu eze lika ze mi tusa ku ikola ku bala Bibele. Mwa kona ku ikinela kwamulaho wa ndu ni ka komoki ka sino se si pangilwe fa mulo wa lemune. Ni tabela ku ca tuco-co cwalo ha ni nze ni bala. Mi ha ku na ya sa tabeli ku eza cwalo!”

Mu lemuhe kuli: Hañata buzwa ha bu tiswi ki mwa ikutwela mutu, kono bu tiswa ki mwa ngela nto ye ñwi. Kamukwaocwalo, mwa sibaka sa ku bulela kuli “ku bala kwa utwisa buzwa,” ki hande ku bulela kuli “ni utwa buzwa.” Ki mina beñi ba ba tahisa kuli mu ikutwe cwalo ka za ku bala Bibele. Ku lemuha taba yeo, ku ka mi tusa ku ba ni maata a ku eza se siñwi ka buzwa bo mu utwa.—Liproverbia 2:10, 11.

Musizana ya bizwa Vanessa u li: “Ku bala Bibele ha ku tahisezi mutu buzwa. Ki mina beñi ba ba kona ku ikutwisa buzwa kamba ba ba kona ku tahisa kuli mu tabele ku bala Bibele.”

Za ku nahanisisa:

Ki lika mañi ze mu kona ku eza kuli mu ikole ku balanga Bibele?

Butata bo ni fumana: HA NI NA NAKO

Musizana ya bizwa Maria u li: “Ni tabela hahulu ku bala Bibele, kono bakeñisa kuli ni patehile hahulu, ha ni na nako ya ku ina fafasi ku bala Bibele!”

Ze kona ku mi tusa: MU EZANGE LIKA ZA BUTOKWA PILI

Ku ba mutu ya hulile ku ama ku ziba ku “lemuha lika za butokwa hahulu ni ku fita.”—Mafilipi 1:10.

Kalibe ya bizwa Natanya u li: “Bo ma ne ba ni tusize ku lemuha kuli ha ku na ko ni ka fumana nako ye ñwi. Kuli ni fumane nako, ne ni tokwa ku tuhela ku eza lika ze ñwi. Ha ne ni kalile ku tabela ku bala Bibele, na kala ku itusisa nako ye ne ni ezanga lika ze ñwi ku bala Bibele.”

Kalibe ya bizwa Yolanda u li: “Ha se ni hulile, ni itutile kuli ni swanela ku toma nako ya ku balanga Bibele, ni kuli ni swanela ku bala Bibele ka yona nako yeo, ku si na taba ni mipateho ye kona ku ba teñi.”

Musizana ya bizwa Diana u li: “Ha mu kala ka ku balanga Bibele mu si ka eza kale lipapali za ku itabisa ka zona, ni sepa kuli mu ka ikola hahulu ku balanga Bibele, mi mu ka ikutwa ku lukuluha ha mu yo bapala.”

Mu lemuhe kuli: Haiba mu sa kali ka ku ezanga lika za butokwa pili, nako ya mina i ka mi bolomoka, mi ha ku na se mu ka kona ku peta mwa nako ye mu ka siyalelwa ni yona. Mu ikatulele ku tuhela ku ezanga lika ze ñwi ilikuli mu itusise nako yeo kwa ku balanga Bibele.—Maefese 5:15, 16.

Mutangana ya bizwa Jordan u li: “Kabakala kuli ni kwa sikolo sa sekondari, ni kona ku patehiswa hahulu ka bunolo ki lika ze ñwi! Kono ni ezize buikatazo bwa kuli nto ya pili fa tomahanyo ya ka ibe ku bala Bibele.”

Za ku nahanisisa:

Mu ka itomela ku balanga Bibele ka nako mañi?

[Mbokisi/Maswaniso a fa likepe 13]

LIAKALEZO ZA LITAKA ZA MINA

Mucaha ya bizwa Zachary u li: Mu si ke mwa bala feela ze ba bala bashemi ba mina kamba ze ba bala ba bañwi. I kona ku ba feela tuto ya mina haiba mu bala litaba ze mu bata ku ziba mina beñi.

Musizana ya bizwa Kaley u li: Mu kale ka ku balanga litaba ze nyinyani. Haiba ha mu na takazo ya ku bala Bibele, mu bale feela ka mizuzu ye ketalizoho, kono mu ezange cwalo zazi ni zazi. Mi hamulaho wa nako mwa kona ku ekeza hanyinyani-hanyinyani kwa nako ye mu tandanga. Mwa kona ku kala ku balanga ka mizuzu ye 10 kamba mane ye 15 . . . Mafelelezo mu ka tabela hahulu ku balanga Bibele!

Kalibe ya bizwa Daniela u li: Lika ze ñwi ni zona za kona ku mi tusa hahulu ku ikola ku balanga Bibele. Mu be ni liñoliso li sikai za mibala ye shutana-shutana, ni kabuka ka kande, kamba mwa kona ku ba ni sibaka fa kompyuta ya mina fo mu ka bulukelanga litaba ze mu ituta mwa Bibele.

Mushimani ya bizwa Jordan u li: Ha ni ketanga taba ye ni tabela, ni balanga Bibele ka nako ye telele. Hape ni tokwanga ku balela mwa sibaka mo ku kuzize. Ha ni koni ku bala ha ku na ni lilata le li ñata.

[Caption on page 12]

(Kuli mu bone mo i hatiselizwe luli, mu bone hatiso)

Mu pume

Mu pute fahali