KA KU YA KA BIBELE

Ku Buha Maswaniso A Mapunu Ku Buha Maswaniso a Mapunu

Kana Bibele ya hanisa ku buha maswaniso a mapunu?

“Mutu kaufela ya swalelela ku talima musali mi a mu lakaza u se a bukile kale ni yena mwa pilu ya hae.”—Mateu 5:28.

KI KABAKALAÑI TABA YE HA I LI YA BUTOKWA? Mazazi a, maswaniso a mapunu a atile hahulu mi ku bunolo ku a fumana ku fita mo ne ku inezi kwamulaho. Haiba mu bata ku tabisa Mulimu ni ku pila bupilo bwa tabo, mu swanela ku ziba mwa ikutwela Mulimu ka za ku buha maswaniso a mapunu.

ZE I BULELA BIBELE Bibele ha i buleli ka ku nonga ka za ku buha maswaniso a mapunu. Nihakulicwalo, ku buha maswaniso a mapunu ha ku lumelelani ni ze li bulela likuka ze ñata za Bibele.

Ka mutala, Bibele i fa temuso ye utwahala hande ya kuli muuna ya nyezi ha “swalelela ku talima musali” ya si musalaa hae ka takazo ya ku lobala ni yena, u kona ku fita fa ku eza bubuki. Sikuka sa Bibele se, si kona ku beleka ku mañi ni mañi ibe kuli u nyezi kamba ki likwasha ya “swalelela ku talima” maswaniso a mapunu ka takazo ya ku eza buhule. Kwa iponahalela hande kuli likezo zeo ha li tabisi Mulimu.

 Kana ku buha maswaniso a mapunu ku fosahalile haiba ha ku na ku tahiseza mutu ku eza buhule?

”Hakulicwalo, mu bulaye lilama za mubili wa mina . . . kwa neku la buhule, masila, litakazo za buozwa, litakazo ze maswe, ni mukwañuli.”—Makolose 3:5.

ZE BA BULELA BATU Babatisisi ba bañwi ba kakanya taba ya kuli ku na ni swalisano ye mwahalaa ku buha maswaniso a mapunu ni buhule. Kono, kana ku buha maswaniso a mapunu ku fosahalile?

ZE I BULELA BIBELE Bibele i talusa kuli “lisheha la ze swabisa” li fosahalile. (Maefese 5:3, 4) Ku buha maswaniso a mapunu kona, ku kona ku ba cwañi ko ku si ka fosahala hahulu? Kacenu maswaniso a mapunu hañata a kopanyeleza mafilimu a batu luli ba ba eza likezo za bubuki, kalombe, ni mifuta ye miñwi ya buhule. Kaniti, ku buha likezo za buhule ze cwalo ku fosahalile hahulu ku fita lisheha le li swabisa.

Babatisisi ba zwelapili ku nyakisisa taba ya kuli batu ba kona ku susuezwa ku eza likezo ze maswe kabakala ku buha maswaniso a mapunu. Kono Bibele ya lumelelana ni taba ya kuli ku buha maswaniso a mapunu kwa sinya silikani sa na ni sona mutu ni Mulimu, mi ku fosahalile hahulu mwa meeto a Mulimu. Bibele i fa kelezo ye, ye li: “Hakulicwalo, mu bulaye lilama za mubili wa mina . . . kwa neku la buhule [ni] litakazo za buozwa.” (Makolose 3:5) Batu ba ba buhanga maswaniso a mapunu ha ba lateleli kelezo ye, mwa sibaka sa ku bulaya litakazo za bona, ba li zusulusanga.

Kiñi ze kona ku mi tusa ku sa buhanga maswaniso a mapunu?

“Mu bate bunde isi bumaswe . . . mu toye bumaswe mi mu late bunde.”—Amosi 5:14, 15.

ZE I BULELA BIBELE Bibele i bulela ka za batu ba ne ba banga mahule, macakolwa, ni masholi ili ba ne ba konile ku tuhela likezo ze maswe zeo. (1 Makorinte 6:9-11) Ne ba konile cwañi? Ka ku itusisa butali bo bu fumanwa mwa Linzwi la Mulimu, ne ba konile ku ituta ku toya bumaswe.

Kwa konahala ku ituta ku toya ku buha maswaniso a mapunu ka ku nahanisa ka tokomelo ze maswe ze kona ku zwa mwa kezo yeo. Patisiso ya cwanoñu fa ye ne hatisizwe ki ba Utah State University ne i patuluzi kuli batu ba bañwi ba ba buhanga maswaniso a mapunu ba talimananga ni butata bwa ku “zwafa, ku ikambusa ku ba bañwi, ku sinyeha kwa silikani sa bona ni ba bañwi,” ni lika ze ñwi ze maswe. Mane, sina mo se ku taluselizwe kwamulaho, ku buhanga maswaniso a mapunu ku fosahezi ku Mulimu, mi ku tahisa nto ye ñwi ye maswe hahulu ni ku fita. Ku palelwisa batu ku ba balikani ba Mulimu.

Bibele ya kona ku lu tusa ku ituta ku lata ze nde. Ha lu nze lu bala Bibele, lilato la luna kwa likuka za muzamao li ka hula. Lilato leo li ka lu tusa ku sa buha maswaniso a mapunu ni ku ikutwa sina mwa naa ikutwezi walisamu ya naa ñozi kuli: “Ha ni na ku lumelela nto ye maswe ku taha fapilaa ka.”—Samu 101:3.