KA KU YA KA BIBELE

Satani

Kana Satani u teñi luli?

‘Yena noha ya kale, ya bizwa Diabulosi ni Satani, u kelusa lifasi kaufela.’—Sinulo 12:9.

ZE BA BULELA BATU Batu ba bañwi ba lumela kuli Satani Diabulosi haki sibupiwa sa luli, kono ki bumaswe bo bu fumaneha ku mañi ni mañi.

ZE I BULELA BIBELE Satani u teñi luli. Ki lingeloi le li kwenuhile, ili sibupiwa sa moya se si lwanisa Mulimu. Bibele i biza Satani kuli ki “mubusi wa lifasi le.” (Joani 12:31) U itusisanga “lisupo za buhata” ni “bupumi” kuli a pete milelo ya hae.—2 Matesalonika 2:9, 10.

Bibele i bulela ka za ngambolo ye ne bile teñi kwa lihalimu mwahalaa Satani ni Mulimu. Ha u bona Mulimu naa ambozi ni Satani, kona kuli Satani haki bumaswe bo bu ku mañi ni mañi kakuli Mulimu u petahalile mi ha na bumaswe. (Deuteronoma 32:4; Jobo 2:1-6) Kwa iponahalela hande kuli, Satani u teñi luli mi haki bumaswe feela bo bu fumaneha ku mañi ni mañi.

KI KABAKALAÑI TABA YE HA I LI YA BUTOKWA KU MINA? Satani u bata kuli mu nahane kuli haki sibupiwa sa luli sina feela sikebenga se si ipata ilikuli si kone ku zwelapili ku eza lika ze maswe si sa lemuhiwi. Kuli mu kone ku isileleza ku Satani, pili mu swanela ku lumela kuli u teñi luli.

 Satani u pila kai?

“Bumai ki bwa lifasi . . . kakuli Diabulosi u shetumukezi ku mina.”—Sinulo 12:12.

ZE BA BULELA BATU Buñata bwa batu ba lumela kuli Satani u pila mwa mulilo wa lihele le li mwatasaa lifasi. Ba bañwi hape ba ikutwa kuli u pila mwa lipilu za batu ba ba maswe.

ZE I BULELA BIBELE Satani ki sibupiwa sa moya, kamukwaocwalo u pila mwa sibaka se lu sa koni ku bona. Ka nakonyana feela, Satani naa lumelelizwe ku itamaelanga mwa naa latela kaufela kwa pila Mulimu ni mangeloi a sepahala. (Jobo 1:6) Kono ka nako ya cwale, Satani u lunduzwi kwa inzi Mulimu, mi yena ni libupiwa ze ñwi za moya ze maswe ba lundulezwi mwa lifasi.—Sinulo 12:12.

Kana fo, ku talusa kuli Satani u mwa sibaka si li siñwi feela mwa lifasi? Ka mutala, mwendi se mu balile kuli munzi wa kwaikale wa Pergamo ne u bulelwa kuli kona “kwa pila Satani.” (Sinulo 2:13) Niti kikuli, pulelo yeo ne i ama kwa taba ya kuli mwa muleneñi wo, ne ku atile hahulu bulapeli bwa Satani. Satani ha pili mwa sibaka si li siñwi feela mwa lifasi. Kono Bibele i bulela kuli “mibuso kaufela ya lifasi” ki ya hae.—Luka 4:5, 6.

Kana Satani wa kona ku holofaza batu kamba ku ba zamaisa?

“Lifasi kamukana li mwa maata a ya maswe.”—1 Joani 5:19.

ZE I BULELA BIBELE Buñata bwa batu ba latelezi likukuezo za Satani, kamukwaocwalo se ba zamaiswa ki yena. (2 Makorinte 11:14) Taba ye, i lu tusa ku utwisisa libaka batu ha ba palelwa ku cimbula miinelo ya lifasi.

Bibele hape i talusa ka za miinelo ye miñwi ye maswe hahulu, ili mo Satani kamba mangeloi a mañwi aa kwenuhile naa zamaisize batu ni ku ba holofaza.—Mateu 12:22; 17:15-18; Mareka 5:2-5.

ZE MU KONA KU EZA Ha mu tokwi ku saba Satani kabakala maata a na ni ona. Kuli mu si ke mwa kukuezwa kamba ku zamaiswa ki Satani, mu tokwa ku ziba mwa puma-pumelanga batu, ilikuli mu ‘zibe tushambwe twa hae.’ (2 Makorinte 2:11) Ka ku balanga Bibele, mu ka ba ni zibo ya butokwa ka za tushambwe twa Satani, mi mu ka ambuka ku kukuezwa ki yena.

Mu yumbe lika ze itusiswa kwa bulapeli bwa sidimona. (Likezo 19:19) Lika zeo li kopanyeleza miulu, lihatiso, mavidio, lipina, ni liprogilamu za fa kompyuta ze susueza tumelo ya mioya kamba bunuhi.

Bibele i bulela kuli, “mu hanyeze Diabulosi, mi u ka saba ku mina.” (Jakobo 4:7) Ha mu ka utwa kelezo ye butali ya mwa Bibele, mu ka kona ku isileleza kwa makilikicani a maswe a Satani.—Maefese 6:11-18.