ZE EZAHALA MWA LIFASI

Lifasi

Ba katengo ka World Health Organization ba fumani kuli ku buyela musi o zwa kwa liinjini za mafula a dizulu ku ekeza kwa matuku a kansa ya kwa maswafu ni kansa ya kwa sinya.

Antarctica

Bubeke bwa limela bwa kale-kale bo ne bu fumanwi kwatasaa liwate bu bonisa kuli ka nako ye ñwi sibaka sa Antarctic ne si na ni linzalu ni limela ze ñwi ze fumaneha mwa libaka ze cisa. Batu ba bañata ba lumela kuli lilimo ze ñata-ñata kwamulaho, linako za maliha kwa Antarctic ne li sa bati hahulu mi mufutumala wa kwateñi ne u sa shutani hahulu ni wa mwa libaka ze kwa equator.

Ireland

Piho ye ne hatisizwe mwa silimo sa 2012 ki ba Ireland’s Association of Catholic Priests i bonisa kuli ka ku ya ka patisiso ye ne ezizwe mwa naha ye, 87 pesenti ya Makatolika ba ikutwa kuli baprisita ba swanela ku lumelezwa ku nyala, mi 77 pesenti ya bona ne ba ikutwa kuli basali ba swanela ku lumelezwa ku ba baprisita.

Libaka za Sub-Saharan Africa ni Southeast Asia

Patisiso ye ne ezizwe ya ku nyakisisa milyani ya malaria i bonisa kuli mwa libaka ze ñwi milyani yeo ne i si na maata kamba ne i li ya buhata, kamukwaocwalo ne i sa alafi hande butuku bo kamba mane ne i palelwa ku bu alafa. Mwa libaka za Southeast Asia, ne ku fumanwi kuli 36 pesenti ya milyani ye ne i tatubilwe ne i li ya buhata, mi ni mwa sub-Saharan Africa 20 pesenti ya milyani ne i fumanwi ku ba ya buhata.

El Salvador

Fahalaa kweli ya April mwa silimo sa 2012, makwambuyu ba muuso mwa naha ya El Salvador ne ba zibahalize kwa sicaba ka za lizazi le ne ku si na likezo za bubulai mwahalaa lilimo ze bato ba ze taalu. Mwa silimo sa 2011, ne ku fumanwi kuli mwahalaa batu ba 100,000 batu ba 69 ne ba bulailwe kabakala bukebenga bo ne bu tahisizwe ki ku itusisa milyani ye kola, mi pulao yeo, ne i li ye ñwi ya lipulao ze maswe hahulu mwa lifasi.