PUPO YE MAKAZA!

Mufufelo wa ku sa Itusisa Maata A Mañata wa Nyunywani ye Bizwa Albatross

LINYUNYWANI ze lendanga hahulu za kona ku ba mwa moya li sa tokwi ku eza buikatazo bo butuna. Nyunywani ye zwile mubano kwa muezezo wo ki Albatross. Nyunywani ye, ye na ni mafufa a eza limita ze 3.4 ni bukiti bo bu bato eza likilo ze 8.5, ya kona ku fufa ka likilomita ze ñata-ñata ka ku itusisa feela maata a manyinyani. I konanga ku eza cwalo bakeñisa mo i bupehezi ni mufufelo wa yona.

Mu nyakisise taba ye: Ha i fufa, nyunywani ye i itusisanga misifa ya yona ku tiisa mafufa a yona ha bapuzwi ka ku tala, ili nto ye i konisanga ku pumulisa linama za yona. Nto ye ñwi ye konisanga nyunywani ye ku lenda ka lihora ze ñata, ki mo itusisezanga moya wa mwa liwate.

Fa liwate, linyunywani ze, li fufanga ka ku yanga mwahalimu, ku fetuha, ni ku kutela mwatasi, mi ku fufa ka mukwa wo ku li tusa ku itusisa feela maata a manyinyani kabakala kuli li fumana maata a zwelela kwa moya. Ki mwa linako za cwanoñu fa, basayansi ha ba zibile ze tahisa kuli linyunywani ze li kone ku fufa cwalo. Ka ku itusisa lipangaliko ze ñwi ni liprogilamu ze ñwi za fa likompyuta ze ipitezi, basayansi ne ba fumani kuli linyunywani ze, li fumananga maata e li tokwa ha li lendile hahulu, ka ku fetuha ni ku liba ko u ya moya ha li kutela mwatasi. Basayansi ba bulela kuli, ‘li zwelanga pili ku fumana maata ka mukwa o bunolo.’ Ku eza cwalo, ku konisanga linyunywani ze ku lenda ka lihora ze ñata li sa pepelisi mafufa a zona!

Ku ziba mo i fufelanga nyunywani ye, ku kona ku tusa bomanjinela ku panga lifulai ze sa tokwi ku itusisa mafula a mañata, kamba mane ku panga lifulai ze sa tokwi ku itusisa injini.

Mu Bona Cwañi? Kana mufufelo wa ku sa itusisa maata a mañata wa nyunywani ye bizwa Albatross, hamoho ni sibupeho sa yona se si i konisa ku eza cwalo ne li itahezi feela ka ku ipilaula? Kamba kana ne li tahisizwe ki Mubupi?

[Manzwi a bañi ba siswaniso fa likepe 16]

© Minden Pictures/SuperStock