KA KU YA KA BIBELE

Ku Lembwala Ku Lembwala

Ku lembwala kiñi?

“Na kotobana, mi na oyoka maswe luli: Lizazi kaufela ni zamaya ni lila.”—Samu 38:6.

ZE BA BULELA BABATISISI Mañi ni mañi wa ikutwanga bumaswe ka linako ze ñwi, kono butuku bwa ku lembwala ki butuku bo bu zwelapili ku fokolisa mutu, ili bo bu mukata ka zazi mwa bupilo. Lu swanela ku lemuha kuli licaziba ba na ni mibonelo ye shutana-shutana ka za muinelo wa ku ikutwa feela bumaswe ni ka za butuku bwa ku lembwala. Nihakulicwalo, kwa utwahala ku bulela kuli batu ba bañwi ba ikutwanga hahulu bumaswe, mi ka linako ze ñwi ha ba ikutwanga cwalo hape ba banga ni maikuto a ku nga kuli ha ba na tuso ni ku ikutwa mulatu ka mukwa o tulile tikanyo.

ZE I BULELA BIBELE Bibele i bulela ka za baana ni basali ba bañata ba ne ba ikutwile bumaswe ka linako ze ñwi. Ka mutala, Anna naa ikutwile ku ‘swaba mwa pilu’—ili manzwi a tolokilwe sina ku “lobeha pilu” ni “ku lembwala maswe” mwa Libibele ze ñwi. (1 Samuele 1:10) Muta o muñwi mupolofita Elia naa ikutwile hahulu bumaswe kuli mane a lapela ku Mulimu kuli a shwe feela!—1 Malena 19:4.

Bakreste ba mwa miteñi ya baapositola ne ba laezwi ku ‘bulela ka nzila ye omba-omba ku ba ba lobehile lipilu.’ (1 Matesalonika 5:14) Ka ku ya ka buka ye ñwi, manzwi a kuli “ba ba lobehile lipilu” a kona ku ama kwa batu “ba ba eshuzwi ki lipilaelo za mwa bupilo ka nakonyana.” Kwa iponahalela hande kuli, nihaiba baana ni basali ba ba sepahala ba mwa Bibele ne ba ikutwanga ku lembwala ka linako ze ñwi.

 Kana mutu ya kula butuku bwa ku lembwala ki mulatu wa hae?

“Ze bupilwe kaufela li zwelapili ku tonga hamoho ni ku utwa butuku hamoho.”—Maroma 8:22.

ZE I BULELA BIBELE Bibele i luta kuli makulano a tahisizwe ki bukwenuheli bwa muuna ni musali ba pili. Ka mutala, Samu 51:5 i bulela kuli: “Ni bupezwi mwa bumaswe, me u ni pepezi mwa sibi.” Mi liñolo la Maroma 5:12 li talusa kuli, ‘sibi si keni mwa lifasi ka mutu a li muñwi [yena mutu wa pili, Adama] mi lifu li tile ka sibi, mi kamukwaocwalo lifu la yamba kwa batu kaufela kakuli kaufelaa bona ba ezize sibi.’ Bakeñisa kuli lu hozize muinelo wa ku sa petahala ku Adama, mañi ni mañi wa luna wa kona ku kula butuku bwa mwa mubili kamba bo bu ama maikuto. Kabakaleo, Bibele i bulela kuli, “ze bupilwe kaufela li zwelapili ku tonga hamoho ni ku utwa butuku hamoho.” (Maroma 8:22) Niteñi, Bibele hape i fa sepo ye lu sa koni ku fumana ku mualafi ufi kamba ufi, ili sepiso ya Mulimu ya lifasi le linca mo ku si ke kwa ba ni makulano a mufuta ufi kamba ufi, hamohocwalo ni ku lembwala.—Sinulo 21:4.

Mu kona ku tiyela cwañi muinelo wa ku lembwala?

“Muñaa Bupilo u fakaufi ni ba ba na ni pilu ye lobehile, mi u pilisa ba ba ikutwa ku swaba mwa moya wa bona.”—Samu 34:18.

KI KABAKALAÑI TABA YE HA I LI YA BUTOKWA KU MINA? Ha mu koni ku ba ni maata fahalimwaa miinelo kaufela ye mu talimana ni yona, mi lika ze maswe li tamehile ku mi ama ka linako ze ñwi. (Muekelesia 9:11, 12) Nihakulicwalo, ku na ni lika ze tusa ze mu kona ku eza, ilikuli mu si ke mwa ikutwanga hahulu bumaswe mwa bupilo.

ZE I BULELA BIBELE Bibele i bulela kuli ba ba kula ba tokwa mualafi. (Luka 5:31) Kamukwaocwalo, haiba mu kula butuku bwa ku lembwala, ha ku si ka fosahala ku ya kwa sipatela. Bibele hape i koñomeka butokwa bwa tapelo. Ka mutala, Samu 55:22 i bulela kuli, “U lwalise Muñaa Bupilo mulwalo wa hao, mi u ka ku tiisa. Ha na ku lumela kuli ya na ni niti a nyanganyiswe.” Tapelo haki mukwa feela wa ku mi tusa ku ikutwa hande; kono ki ku ambola luli ni Jehova Mulimu, yena ya li “fakaufi ni ba ba na ni pilu ye lobehile.”—Samu 34:18.

Hape mwa kona ku tusiwa ki ku taluseza mulikanaa mina maikuto a mina. (Liproverbia 17:17) Kalibe ya bizwa Daniela, ya li yo muñwi wa Lipaki za Jehova, u bulela kuli: “Muuna-muhulu yo muñwi naa ni susuelize ku mu taluseza ka za muinelo wa ka wa ku lembwala. Nihaike kuli ne ni tokolomohanga lingambolo za mufuta o cwalo ka lilimo ze ñata, kapili-pili naa lemuha kuli ku ambola ni mutu yo muñwi kona ze ne ni tokwa ku eza. Ne ni komokisizwe ki mo ne ni ikutwezi ku imuluha hamulaho wa ku eza cwalo.”