Ki Kabakalañi Batu Habatuhezi kubonisa Likute?
LIBAKA KUKUTEKA BABAÑWI HAKULI KWA BUTOKWA
Haiba lukuteka babañwi, lukatibela muinelo omaswe kuli usike watotobela.
-
Lishitanguti leliñwi la mwa Bibele lili: “Kalabo yebunolo ifelisa mabifi, kono manzwi autwisa butuku atahisa buhali.” (Liproverbia 15:1) Lipulelo ni likezo za kashwau likona kutahisa kuli kube ni butata bobutuna, mi hañata zezwanga mwateñi haki zende.
-
Jesu naabulezi kuli: “Mulomo ubulela zetezi mwa pilu.” (Mateu 12:34) Lipulelo za kashwau zakona kupatulula butata bobutuna bolunani bona, inge cwalo moluungela batu ba litalo lelishutana ni laluna, ba puo isili, ba mwa naha isili, kamba ba lisimuluho zeshutana ni zaluna.
Mwa lipatisiso zeezizwe cwanoñu fa, kwa batu babafitelela 32,000 mwa linaha ze 28, babaeza 65 pesenti ku bona batalusize kuli batu babañata kacenu habana likute.
ZEMUKONA KUEZA
Ibe kuli mu kwa sikolo kamba kwa mubeleko, mukuteke batu kaufela kusina taba kuli hamulumelelani ni mibonelo yabona. Mulemuhe lika zemukona kulumelelana ni bona. Kueza cwalo kuka mitusa kusa banyaza-nyazanga kamba kubaatula.
Mueze babañwi ka momubatela kuli batu bamiezeze. Haiba mueza babañwi ka sishemo ni kubaeza hande, ni bona bakaeza nto yeswana ku mina.
Muswalele babañwi. Musepe kuli mutu yo naasina mulelo wa kuminyemisa kamba kumieza maswe.
ZEBAEZA LIPAKI ZA JEHOVA
Lipaki za Jehova bakutekanga babañwi mwa lilalanda mo bapila ni mo basebeleza.
Lufanga ketelelo ya mwa Bibele kusina kulifa sesiñwi kwa batu kaufela, kono haluhapilikezangi batu kulumela zelulumela kamba kulumelelana ni maikuto aluna. Kono lulikanga kulatelela kelezo ya mwa Bibele ka kutaluseza babañwi lushango lwaluna “ka bunolo ni ka likute lelituna.”—1 Pitrosi 3:15; 2 Timotea 2:24.
Haluna ketululo mi luamuhela batu balisimuluho zeshutana kaufela babataha kwa mikopano yaluna ya puteho ili bababata kuituta zeiluta Bibele. Lulikanga kupila hande ni batu ni “kubonisa likute lelituna kwa batu kaufela.”—1 Pitrosi 2:17, Bibele ya New International Version.
Lukuteka zamaiso ya ba muuso mwa libaka molupila. (Maroma 13:1) Luutwa mulao ni kulifa mitelo. Nihaike kuli haluikenyangi mwa litaba za bupolitiki, lukuteka litukelo za babañwi ka za likatulo zebakona kueza mwa litaba za bupolitiki.
