Ki Kabakalañi Batu Habatuhezi Kubonisa Likute Mwa Lubasi?

MUBAPALE

LIBAKA KUBONISA LIKUTE MWA LUBASI HAKULI KWA BUTOKWA

Mañi ni mañi mwa lubasi habonisa likute, ukatusa kuli mwa lubasi kube ni kozo.

Buka yenani toho ya taba yeli, Likuka ze 7 Zetusa Kuli Linyalo Likonde ibulela kuli haiba batu babanyalani bakutekana, bakabonisa kuli balatana “mwa mupilelo wabona kaufela wa ka zazi ni zazi.”
Patisiso yeñwi ibonisa kuli banana habaituta kubonisa likute ku babañwi bakaangiwa kuba ba butokwa hahulu, bakaba ni silikani sesinde ni bashemi babona mi bakaambuka matuku amañwi a mwa munahano.

ZEMUKONA KUEZA

Sina lubasi, muñole lika zemutokwa kueza. Sapili, mutuse mañi ni mañi mwa lubasi kuutwisisa zekutalusa kubonisa likute. Sabubeli, muñole mikwa yatokwa kubonisa mañi ni mañi mwa lubasi ni mikwa yaswanela kuambuka mañi ni mañi. Sabulaalu, munyakisise lika zemuñozi zeo, ilikuli kaufela mina mwa lubasi muzibe zemutokwa kueza.

“Milelo ya babasebeza ka taata itahisa kuli zabona likonde.”—Liproverbia 21:5.

Mutome mutala omunde. Kana mwanyaza-nyazanga ba lubasi lwamina kabakala mafosisa ebaezize, kubasheununa kabakala litaba zebabulela, kusaisa pilu ku zebabulela kamba mane kubakauleza habaambola ni mina?

Akalezo: Mubonise likute ku bakumina ni bana bamina ibe kuli baswanela kuboniswa likute kamba kutokwa.

“Mube mina bapili kukuteka babañwi.” —Maroma 12:10.

Mubonise likute niha musalumelelani ni mutu yomuñwi. Hamutalusa momuikutwela, muambuke kuitusisanga manzwi a kuli “wena nako kaufela uezanga” kamba “wena nako kaufela hauezangi cwana ni cwana.” Manzwi a cwalo akona kunyemisa ni kuutwisa ba mwa lubasi lwamina butuku mane ni kutahisa kuli mwa lubasi kusike kwaba ni swalisano.

“Kalabo yebunolo ifelisa mabifi, kono manzwi autwisa butuku atahisa buhali.” —Liproverbia 15:1.

ZEBAEZA LIPAKI ZA JEHOVA

Lipaki za Jehova basusuezanga mabasi kubonisana likute, mi baezanga cwalo kakuitusisa lihatiso, libuka, libroshuwa ni mavidio, ili afiwanga feela kusina kulifa sesiñwi.

ZEKONA KUTUSA BATU BABANYALANI: Litaba zeli Litaba Zetusa Mabasi zakona kutusa babanyalani . . .

kuba bateelezi babande
kuambolisananga hande
kusa kananisananga

(Mubate taba yeli “Litaba Zetusa Mabasi” fa jw.org/loz)

ZEKONA KUTUSA BASHEMI: Litaba zeli Litaba Zetusa Mabasi zakona kutusa bashemi kuluta bana babona . . .

kuba bana babautwa
kutusa kwa misebezi ya fa lapa
kubulela ka likute ni kuitumela

(Mubone taba yeli “Kuhulisa Bana” ni “Kuhulisa Bana Babasa Nonoboka” fa jw.org/loz)

Hape mubone Litaba Zeekelizwe zebulela kuli, “Questions Parents Ask,” mwa buka ya sikuwa ya Questions Young People Ask—Answers That Work, Volume 1. (Mubone taba yeli “Questions Parents Ask” fa jw.org)

ZEKONA KUTUSA BABANCA: Kalulo yeli Babanca ni ba Mwa Lilimo za Kunonoboka ye fa jw.org inani litaba zeñwi, mavidio, ni makepe fobakona kuñola lisupo zekona kubatusa . . .

kuswalisana hande ni bashemi ni banyani babona
kuambola ka likute kwa bashemi babona ka za milao
kusepiwa ki bashemi babona

(Mubate taba yeli “Babanca ni ba Mwa Lilimo za Kunonoboka” ye fa jw.org)

Muitusise webusaiti ya jw.org kusina kulifa sesiñwi. Hakutokwahali kulifa masheleñi, kuiñolisa, kuba membala, kamba kufa litaba zeñwi za ka butu.

MUZUHE!