Ki Kabakalañi Batu Habatuhezi Kukuteka Bupilo?

MUBAPALE

LIBAKA KUKUTEKA BUPILO HAKULI KWA BUTOKWA

Kueza lika zekona kusinya buiketo bwamina bwa kwa mubili kamba buiketo bwa babañwi, kubonisa kuli hamukuteki bupilo.

Kuzuba kwai hakutahisi feela kansa, kono kutahisa kuli mubili utuhele kuitwanela. Mafu atahiswanga ki kansa ya kwa maswafu abanga teñi kabakala kuli batu babañwi nebazuba kwai kamba kuli batu bao nebali bukaufi ni bane bazuba.
Batu babañata baikalelwanga hahulu kabakala kubulaiwa kwa batu ka litobolo kokubanga teñi ka silimo. Ba Stanford Univesiti batalusa kuli: “Lipatisiso zeezizwe libonisize kuli nihaiba batu baba balehanga [kwa sikolo ka nako yekukunupiwa] niha basika holofala nihanyinyani, baikalelwanga hahulu mwa munahano ka lilimo zeñata mwa bupilo bwabona.”
Batu babamatisanga limota inze bakozwi kamba inze baitusisa milyani yekola batahisa kuli batu babazamaya kwatuko ni mukwakwa baikalelwe hahulu. Haiba batu babonisa kuli habaangi bupilo kuba bwa butokwa, batu babasina mulatu bakona kuholofala.

ZEMUKONA KUEZA

Musileleze buikangulo bwamina. Musakona kutuhela mikwa yemaswe yecwale ka kuzuba kwai, kunwa hahulu bucwala, kamba kuitabisa ka kuitusisa milyani yekola. Likezo zecwalo zakona kumisinyeza bupilo bwamina mi libonisa kuli hamukuteki bupilo bwa batu babañwi kukopanyeleza cwalo ni bwa lubasi lwamina.

“Haluikeniseñi kwa lika kaufela zesilafaza nama.”—2 Makorinte 7:1.

Munahane momukona kuisileleza ni momukona kusileleza babañwi. Kuli mupime likozi, mubone teñi kuli ndu yamina iiketile hande. Mumatise mota yamina ka tokomelo, mi mubone teñi kuli iinzi mwa mayemo amande. Musike mwatuhelela batu babañwi kumikukueza kueza lika zekatahisa kuli muholofale kamba kushwa.

“Hauyaha ndu yenca, uyahe ni limotanyana lelipotolohile situwa sa ndu yeo, kuli ndu yahao isike yatahelwa ki mulatu wa mali hakuka wa mutu fateñi.”—Deuteronoma 22:8. a

Mubonise sishemo kwa batu babañwi. Kukuteka bupilo kukopanyeleza molungela batu ba litalo la mubala usili, babazwa mwa linaha zeshutana-shutana, ni babanani lisimuluho zeshutana-shutana. Hailifo mane saluluti ni sitoyo kona zetahisa hahulu mifilifili ni lindwa mwa lifasi kacenu.

“Muzwise ku mina mufuta kaufela wa zebaba, buhali, mabifi, kutatauka, ni lipulelo zemaswe, ni nto ifi kamba ifi yeholofaza. Kono mubonisane sishemo.”—Maefese 4:31, 32.

ZEBAEZA LIPAKI ZA JEHOVA

Lipaki za Jehova basusueza batu kupila bupilo bobunde. Tukiso yaluna ya kuituta Bibele ni batu itusize batu kutuhela mikwa ni mupilelo omaswe.

Lulatelelanga likuka zelusileleza halueza misebezi ya kuyaha. Baitateli babatusa mwa musebezi wa kuyaha libaka zaluna za kulapelela ni libaka zeitusiswanga kwa likolo za Bibele, balutiwanga hande kuli baambuke kuholofala. Miyaho yaluna yatatubiwanga nako ni nako ili kubona teñi kuli yalumelelana ni milao ya mwa sibaka.

Lwatusanga batu babatahezwi ki likozi. Mwahalaa likweli ze 12 zefitile, lutusize batu baba mwa likozi zeeza 200 mwa lifasi kaufela, mi luitusisize masheleñi abato eza madola a 12 milioni ili masheleñi afilwe ka linubu za kuitatela kuli atuse batu babatahezwi ki likozi.

Butuku bwa Ebola hane bukalisize kwa Wiko wa Africa mwa (2014) ni mwa Democratic Republic of Congo mwa (2018), nelulutile batu ka mone bakona kuisileleza kwa butuku bobubulaya bo ni mone bakona kutuseza kuli basike bayambukiseza babañwi. Nelulumile bayemeli kuyo ambola ni likwata fa taba yeli “Kuipeya Kuutwa Kwapilisa.” Nelulukisize libaka za kutapela kwa mazoho fa munyako wa libaka za kulapelela mi nelukoñomekile libaka kutapa kwa mazoho ni kueza lika zeñwi za kuisileleza kwa butuku bo hakuli kwa butokwa.

Mwa Sierra Leone, nekufilwe zibiso fa wayalesi ya kulumba Lipaki za Jehova kabakala kutusa Lipaki ni batu babañwi bane basi Lipaki mwa silalanda kuisileleza kwa butuku bwa Ebola.

Sibaka sa kutapela kwa mazoho fa Ndu ya Mubuso ka nako ya butuku bwa Ebola mwa 2014 mwa Liberia

a Kwa naha ya Middle East ya kwaikale, kulatelela taelo yeo nekubonisa kuli mutu waiyakatwa buiketo bwa lubasi lwahae ni bwa babañwi.

MUZUHE!