Niti ka za Mubuso wa Mulimu
Jesu naalutile balateleli bahae kulapelanga kuli: “Ndataa luna ya kwa mahalimu, libizo lahao likeniswe. Mubuso wahao utahe. Tato yahao iezwe fa lifasi, sina moiezezwa kwa lihalimu.” (Mateu 6:9, 10) Mubuso wa Mulimu ki nto mañi? Ki lika mañi zeusweli kueza Mubuso wo? Mi ki kabakalañi haluswanela kulapela kuli Mubuso wo utahe?
Jesu ki yena Mulena wa Mubuso wa Mulimu.
Luka 1:31-33: “Umubeye libizo la Jesu. Yena ukaba yomutuna mi ukabizwa Mwana wa Yapahami ka Kufitisisa, mi Jehova Mulimu uka mufa lubona lwa Davida ndatahe, mi ukabusa sina Mulena fahalimwaa ba ndu ya Jakobo kuya kuile, mi Mubuso wahae hauna kufela.”
Jesu naakutazanga hahulu za Mubuso wa Mulimu.
Mateu 9:35: “Jesu azamaya apotela mileneñi ni minzi kaufela, inze aluta batu mwa masinagoge abona ni kukutaza taba yende ya Mubuso ni kufolisa mifuta kaufela ya matuku ni buyanga bwa mifuta kaufela.”
Jesu naafile balutiwa bahae sisupo sene sikabatusa kuziba kuli Mubuso wa Mulimu u fakaufi.
Mateu 24:7: “Kakuli sicaba sikalwanisa sicaba sesiñwi, ni mubuso ulwanise mubuso omuñwi, mi lico likataela mi kukaba ni lizikinyeho kuzwa mwa sibaka sesiñwi kuya ku sesiñwi.”
Balutiwa ba Jesu kacenu bakutaza za Mubuso wa Mulimu mwa lifasi kaufela.
Mateu 24:14: “Mi taba yende ye ya Mubuso ikakutazwa mwa lifasi kaufela kuli ibe bupaki kwa macaba kaufela, kihona kukataha mafelelezo.”
Hape Mwendi Mwakona Kutabela Litaba Ze
LITUTO ZA BUTOKWA ZA MWA BIBELE
Mubuso wa Mulimu ki Nto Mañi?
Mwa bukombwa bwahae kaufela, Jesu naalutile hahulu za Mubuso wa Mulimu kufita taba ifi kamba ifi. Balateleli bahae base balapezi ka lilimo-limo kuli Mubuso wo utahe.
