“Sibi [sikeni] mwa lifasi ka mutu alimuñwi ni lifu [litile] ka sibi, mi ka mukwa ocwalo lifu layamba kwa batu kaufela.”—MAROMA 5:12.

Mulimu naabupile bashemi baluna bapili bo Adama ni Eva inze banani minahano ni mibili yepetahalile. Hape naabafile kupila mwa lifasi lelili Paradaisi, ili mwa simu ya Edeni. Naabataluselize kuli bakona kuca kwa likota kaufela za mwa simu, kwandaa kota iliñwi. Kono bo Adama ni Eva baiketela kuca kwa miselo ya kota yeo, mi ka kueza cwalo nebaezize sibi. (Genese 2:15-17; 3:1-19) Bakeñisa kuli nebasika muutwa, Mulimu abaleleka mwa simu mi bupilo bwababela taata. Hamulaho wa nako, baba ni bana mi ni bona bupilo bwababela taata. Kaufelaa bona basupala ni kushwa. (Genese 3:23; 5:5) Bakeñisa kuli lusimuluha ku bo Adama ni Eva, lwakulanga, kusupala, ni kushwa.

“Lifasi kaufela li mwa maata a yamaswe.”—1 JOANI 5:19.

Satani ki yena “yamaswe” yo. Satani ki lingeloi lene likwenuhezi Mulimu. (Joani 8:44; Sinulo 12:9) Hamulaho wa nako mangeloi amañwi ni ona aswalisana ni Satani kukwenuhela Mulimu. Mangeloi ao abizwa madimona. Mangeloi amaswe a, aitusisanga maata aona kupuma batu ni kubakelusa ku Mubupi. Akukuezanga batu babañata kueza lika zemaswe. (Samu 106:35-38; 1 Timotea 4:1) Satani ni madimona batabela kutahiseza batu manyando.

“Kaufela sacala mutu, ki sona hape sakakutula.”—MAGALATA 6:7.

Kaufelaa luna lwanyanda mwa linzila zeshutana-shutana kabakala sibi seluhozize ni kuli Satani usweli kukukueza batu mwa lifasi. Kono ka linako zeñwi batu baitahisezanga manyando. Ka mukwa ufi? Habaezanga lika zemaswe kamba kueza likatulo zefosahalile, hañata batahelwanga ki lika zemaswe. Kono haiba batu baeza likatulo zende habana kutahelwa ki lika zemaswe. Ka mutala, muuna yali toho ya lubasi ili yasepeha, ya beleka ka taata, ni yalata lubasi lwahae ukafumana lika zende zeñata mi ukatahisa kuli lubasi lwahae lube ni tabo. Kono toho ya lubasi yaezanga papali ya kuwina masheleñi, yanwa maswe bucwala, kamba yanani buzwa ukatahisa kuli yena ni lubasi lwahe babe babotana. Kacwalo, lukabonisa butali haiba luutwa Mubupi waluna. Mubupi wa luna ubata kuli luipumanele lika zende zeñata, kukopanyeleza cwalo ni “kozo yetuna.”—Samu 119:165.

“Mwa mazazi a mafelelezo . . . , batu bakaba baitati, babalata masheleñi, . . . babasa utwi bashemi babona, . . . babasina buiswalo, bababuhali, babasa lati bunde.”—2 TIMOTEA 3:1-5.

Kacenu batu babañata banani mikwa yene ipolofitilwe mwa litimana ze. Mikwa yabona ibonisa hande kuli lupila mwa “mazazi a mafelelezo” a lifasi le. Hape Bibele neipolofitile kuli lukaziba kuli lupila mwa mazazi a mafelelezo halubona lindwa, kutaela kwa lico, lizikinyeho zetuna, ni matuku. (Mateu 24:3, 7, 8; Luka 21:10, 11) Lika ze litahisa hahulu manyando ni lifu.