Mubupi Waluna Ululuta Lituto Zelufa Sepo
Mulimu usepisize kuli utuha atahisa licinceho zende. Ukafelisa manyando ni kufa batu bupilo bobunde fa lifasi. (Samu 37:11) Ki kabakalañi halukona kulumela sepiso yeo? Kabakala kuli “Mulimu haswani sina mutu, yabulela buhata.” (Numere 23:19) Halunyakisiseñi lika zeñwi zende zakaeza Mubupi waluna.
Mulimu Ukayundisa Batu Baba Maswe
“Babamaswe habahula inge bucwañi ni batu kaufela babaeza zemaswe habakondisa, kikuli bayundiswe kuya kuile.”—SAMU 92:7.
Sina moluitutezi mwa taba yefelile, bumaswe busweli bwaekezeha. Taba yeo haiswaneli kulukomokisa. Halukomoki kabakala kuli taba yeo neipolofitilwe mwa Bibele kwa 2 Timotea 3:1-5 kuli “mwa mazazi a mafelelezo” batu bakaba baba maswe hahulu. Mazazi a mafelelezo añi? A lifasi le la batu babasa utwi Mulimu. Hona cwale-cwale fa, Mulimu ukayundisa batu babasalati kucinca mikwa yabona yemaswe. Ka nako yeo, ki batu babande feela babautwa Mulimu babakapila fa lifasi. “Babalukile bakaluwa lifasi, mi bakapila ku lona kuya kuile.”—Samu 37:29.
Mulimu Ukayundisa Satani
“Mulimu yafa kozo, atuha apyata Satani.”—MAROMA 16:20.
Satani, madimona ni batu babamaswe hase bayundisizwe, kukaba ni kozo fa lifasi kaufela. Mubupi waluna usepisa kuli: “Hakuna yaka [misabisa].”—Mika 4:4.
Mulimu Ukafelisa Matuku ni Lifu
“Tende ya Mulimu iinzi ni batu . . . Mi ukatakula miyoko kaufela kwa meeto abona, mi lifu halisana kubateñi, nihaiba kutahelwa ki maswabi kamba kulila kamba kuutwa butuku.”—SINULO 21:3, 4.
Manyando ni matuku akafela kakuli Mulimu ukazwisa lika kaufela zemaswe zetahisizwe ki Satani, bo Adama ni Eva, ni kusapetahala kwa luna. Ka libaka leo, nihaiba “lifu halisana kubateñi.” Batu babalata Mubupi ni kumuutwa baka pila kuya kuile. Kono bakapila kai?
Mubupi Waluna Uka Lukisa Lifasi le Kuba Paradaisi
“Lihalaupa ni naha yeomile likanyakalala, mi lihalaupa likawabelwa ni kutubula lipalisa sina safrani.”—ISAYA 35:1.
Mulimu haakafelisa bumaswe, lifasi likaba Paradaisi! Kukaba ni libaka zende za kuitabiseza ku zona ni masimu amande, mi kukaba ni lico zeñata. (Samu 72:16) Mawate, masa, ni linuka likaba zekenile ni mokunani libupiwa zeñata. Mi batu habasana kuhupula kuli lifasi nelibanga ni masila. Batu bakayaha mandu ni kupila mwateñi. Mi hakusana yakatokwa maino, kushwa tala, kamba kuba mubotana.—Isaya 65:21, 22.
Mulimu Ukazusa Batu Babashwile
“Kukaba ni zuho.”—LIKEZO 24:15.
Kana nemuka tabela kubona balatiwa bamina babashwile? Mulimu Yamaata Kaufela uka bazusa ni kubakutiseza kwa bupilo mwa paradaisi fa lifasi. Muka baziba, mi nibona baka miziba. Munahane feela tabo yemukaba ni yona hamuka bonana! Ki kabakalañi halunani buikolwiso bwakuli sepiso ye ikatalelezwa? Kakuli mwa Bibele kunani mitala ya batu babahulu ni banana bane bazusizwe kwa bafu mi nebaswalisani hape ni mabasi abona. Mi hañata, Jesu naazusanga babashwile batu babañata inze baiponela.—Luka 8:49-56; Joani 11:11-14, 38-44.
Hape Mwendi Mwakona Kutabela Litaba Ze
MUZUHE!
Lifasi Litalimana ni Miinelo Yetaata—Musileleze Sepo ya Mina
Bibele ilutusa kutiyela miinelo yetaata yelukopana ni yona mi ilufa sepo ya za kwapili.
LIKALABO KWA LIPUZO ZA BIBELE
Zuho ya Bafu ki Nto Mañi?
Mwendi mukakomoka hahulu hamuka ziba kuli ki bo mañi babaka zusiwa kwa bafu.
LITUTO ZA BUTOKWA ZA MWA BIBELE
Babashwile ba Mwa Muinelo Mañi?
Bibele isepisa kuli ka nako yeñwi batu babañata baka zusiwa kwa bafu, kamba kukutisezwa kwa bupilo, sina feela mone kubezi ku Lazaro.
LIKALABO KWA LIPUZO ZA BIBELE
Ki Lika Mañi Zekona Kunitusa Kuba ni Sepo?
Kufumana simbule sesisepahala kuka lutusa kuba ni bupilo bobunde cwale ni sepo yende kwapili.
