MWA libuka, mwa mafilimu, ni mwa lipapali za mavidio a fa kompyuta, kuatile hahulu batu ba mabibo babahulu ni banana, maloi babakukueza batu, ni bikishi-kishi byebibuheha. Ki sika mañi sesitahisa kuli batu batabele lika zecwalo?

Caziba yomuñwi yabizwa Claude Fischer naañozi kuli: “Kulumela mwa bilumba kuatile hahulu mwa linako zaluna. Kwamulaho, mwa batu ba 10 babapila kwa America, alimuñwi ku bona naalumela mwa bilumba, kono ka nako ye, alimuñwi mwa batu babalaalu ulumela mwa bilumba. Mi hape mwa America kufumanwi kuli babanca hababapanywa ni babahulu, buñata bwabona baatumezi banuhi, balumela mwa bilumba, mi balumela kuli kunani bilumba byebikatazanga batu mwa mandu abona.”

Hakukomokisi kuutwa kuli makande a mioya yemaswe yekeni batu, ili asabisa, ki kale aata hape. Mwa mutende obizwa The Wall Street, Michael Calia, naañozi kuli: “Mwa lizo zeñata za kacenu, batu baitabisa hahulu ka lika za budimona, mi libaka leliñwi lelituna lelitahisa cwalo ki litumelo za buhata zebabile ni zona batu mwa lilimo ze 10 zefelile za kulumela mwa lika zesiyo ze cwale ka bingolongoma, bingilinginja, ni bikishi-kishi.”

Piho yeñwi ibiha kuli “25 pesenti kuisa fa 50 pesenti ya batu mwa lifasi, balumela mwa bilumba, mi buñata bwa litaba za bulumba liñolwanga mwa libuka za batu babañata ba lizo zeshutana-shutana.” Mi patisiso yeneezizwe kwa United States ki bababona za mupilelo wa batu, bo Christopher Bader ni bo Carson Mencken, “neibonisize kuli ibato ba 70 pesenti kuisa 80 pesenti ya batu babapila mwa America, balumela hahulu mwa mufuta omuñwi wa mabibo.”

Kana kulumela mwa mioya ni lika za mabibo ki nto feela ya kuitabisa ka yona?