Kulela zemuka eza kumitokwa kuli mueze lika zeñwi. Kukopanyeleza kunyakisisa hande lika zemukaeza, kueza licinceho hakutokwahala, ni kusa eza lika ka kumata-mata.

Mwakona kulela zemuka eza hamulaho wa nako yekuswani (mazazi kamba lisunda), nako yetelelenyana (likweli), ni nako yetelele hahulu (silimo silisiñwi kamba kufitelela). Mutokwa kupeta milelo ya nako yekuswani ni ya nako yetelelenyana kuli mukone kupeta milelo yemulela kueza hamulaho wa silimo kamba kufitelela.

Kupeta zene mulelile kueza kukamitusa kuisepa, kutiisa bulikani bwamina ni babañwi, mi kukamitahiseza tabo yetuna.

Kuisepa: Hamupeta milelo yeminyinyani, mukaba ni buikolwiso bwa kuli mwakona kupeta ni milelo yemituna. Hape mukakona kuba ni buikolwiso bwa kutiyela matata emukopana ni ona zazi ni zazi, inge cwalo kuhanela balikani bamina habamihapeleza kueza lika zemaswe.

Bulikani: Batu batabela kuba ni balikani babanani milelo mwa bupilo ili babaziba zebabata ni kubeleka ka taata kuli balifumane. Mane nto yeñwi yekamitusa kutiisa silikani samina ni mutu yomuñwi ki kuba ni milelo yeswana mwa bupilo.

Tabo: Hamulela za kueza ni kulipeta, mukaikutwa hande.

“Nitabela hahulu kulela za kueza. Kueza cwalo kunitusanga kusebeza ka taata ni kunyolelwa kupeta zenilelile. Mi hanipetile zene nilelile, niikutwanga hande hahulu, mi nibulelanga kuli, ‘Nipetile milelo yaka!’”—Bo Christopher.

SIKUKA SA MWA BIBELE: “Hautalitela kufitela moya ni mufutumala liluka, hauna kucala sesiñwi mi hakuna soota kutula.”—Muekelesia 11:4, Bibele Yekenile, hatiso ya 1984.

Mueze lika zelatelela kuli mukone kulela ni kupeta zemulelile.

Muzibe za kulela. Muñole lika za butokwa zemubata kueza, mi mulitatamanise kulikana ni butokwa bwazona, ili kuketa zemulela kueza pili, zemukaeza hasamulaho, ni za mafelelezo.

Mulele zemuka eza. Mueze zelatelela ka za milelo yamina:

• Mutome nako yemuka kona kupeta milelo yeo.

• Munyakisise zemuka tokwa kueza kuli mupete milelo yeo.

• Munyakisise matata akona kumipalelwisa kupeta zemulelile, ni momukona kutatululela matata ao.

Mueze zemulelile. Musike mwalibelela kuli konji hamukaba ni litaba kaufela zebonisa momuswanela kupetela mulelo wamina. Muipuze kuli, ‘Ki nto mañi yeniswanela kueza pili kuli nipete zenilelile?’ Kihona mukaeza zemulelile. Munyakisise zemukonile kueza hamunze mupeta zene mulelile.

SIKUKA SA MWA BIBELE: “Milelo ya babasebeza ka taata itahisa kuli zabona likonde.”—Liproverbia 21:5.