KU BABANCA
11: Kusebeza ka Taata
ZEKUTALUSA KUSEBEZA KA TAATA
Batu babasebeza ka taata habapicukangi musebezi. Kono baikolanga kusebeza ka taata kuli bafumane zebatokwa ni kutusa babañwi, nihaikaba kuli musebezi obaeza uungiwa kuli ki wa kwatasi.
LIBAKA HAMUTOKWA KUSEBEZA KA TAATA
Mañi ni mañi unani kusebeza kuli afumane zatokwa mwa bupilo. Mwa lifasi mokunani batu babañata babasa tabeli kusebeza ka taata, kusebeza ka taata kukona kumitusa hahulu.—Muekelesia 3:13.
“Nilemuhile kuli hausebeza ka taata, ukaikutwa kuli upetile nto yeñwi ya butokwa mi ukaba ni tabo. Tabo yeo initahiselize kuli nitabele hahulu kusebeza. Hape kuba ni mukwa wa kutabela hahulu kusebeza kukamitusa kuli mube ni libubo lelinde.”—Bo Reyon.
SIKUKA SA MWA BIBELE: “Musebezi kaufela oezwa ka taata watusa.”—Liproverbia 14:23.
ZEMUKONA KUEZA
Mube ni mubonelo omunde ka za kusebeza ka taata ka kulatelela linzila zebonisizwe kwatasi.
Mutabele kuezanga hande lika. Ibe kuli mueza misebezi ya fa lapa, musebezi wa kwa sikolo, kamba ki kwa mubeleko, muifane kueza musebezi wo. Hase muzibile kueza hande musebezi, mubate linzila za kueza musebezi wo hande ni kufita, ili kuueza kapili, ni ka nzila yende hahulu. Hamunze muekeza kwa bukwala bwamina bwa kueza musebezi, mukaikola kuezanga musebezi wo.
SIKUKA SA MWA BIBELE: “Kana seulemuhile mutu wa sikwala haeza musebezi wahae? Mutu yo ukayema fapilaa malena; haana kuyema fapilaa batu-tu feela.”—Liproverbia 22:29.
Munyakisise batu babakatusiwa ki musebezi omueza. Hañata haiba mupeta hande misebezi yamina, mukatusa babañwi. Ka mutala, haiba musebeza ka taata kueza misebezi ya fa lapa, babañwi mwa lubasi lwamina habana kuimelwa.
SIKUKA SA MWA BIBELE: “Kunani tabo yetuna mwa kufana yefita ye mwa kufiwa.”—Likezo 20:35.
Mueze misebezi yemiñwi hape. Kufita kueza feela musebezi omufilwe, mueze misebezi yemiñwi hape. Hamueza cwalo, mubonisa kuli mwakona kueza likatulo za butokwa ili kuitatela kueza misebezi yemiñata kusina yamihapelelize.—Mateu 5:41.
SIKUKA SA MWA BIBELE: “Kezo yahao yende isike yaezwa ka kuhapelezwa, kono iezwe ka kulata kwahao.”—Filemoni 14.
Mube ni buitikaneleli. Batu babasebeza ka taata habana buzwa kono hape bapumulanga. Banani buitikaneleli, kacwalo, baikolanga kusebeza ka taata ni kuba ni nako ya kupumula.
SIKUKA SA MWA BIBELE: “Ki hande kupumula hanyinyani kufita kubeleka hahulu ka taata ni kumatisa moya.”—Muekelesia 4:6.
Hape Mwendi Mwakona Kutabela Litaba Ze
TAWALA YA MULIBELELI
Mo lu Kona ku Ikolela ku Beleka ka Taata
Mu nyakisise linzila ze ñwi zeo ka zona Bibele i lu fa kelezo ye sebeza ya mwa ku fumanela tabo mwa musebezi wa luna.
MUZUHE!
Mo mu Kona ku Itusiseza Hande Nako ya Mina
Nzila ye ñwi ya ku itusisa hande nako ya mina ki ka ku nyakisisa bupilo bwa mina ka lika ze peli. Lika zeo, ki lika mañi?
