Nihakulicwalo, batu babañwi babanyalani baitusisanga maswe zwelopili ya bumapanga-panga, mi batahelwanga ki butata bobulatelela:

• kupalelwa kufumana nako ya kuba hamoho.

• kueza lika za musebezi ka nako yebaswanela kuba ni bakubona.

• kusasepana ni kusasepahala ku mutu yebanyalani ni yena.

HAMULI NI BAKUMINA

Muuna yanyezi yabizwa Michael, ubulela kuli: “Fokuñwi haluinzi hamoho ni bo musalaa ka, habaniisezangi pilu. Bapatehiswanga ki foni yabona, mi babulelanga kuli, ‘Kihona niiswala hona fa.’” Muuna yanyezi yabizwa Jonathan ubulela kuli mwa miinelo yecwalo, “batu babanyalani bakona kuba mwa sibaka silisiñwi kono baikutwa inge kuli bainzi kwa libaka zeshutana.”

ZA KUNAHANISISA: Ki hakai inge mualaba foni kamba kashango ka nako yemuswanela kuambola ni mutu yemunyalani ni yena? —MAEFESE 5:33.

MUSEBEZI WAMINA

Batu babañwi babeleka misebezi yetokwa kuli baalabe mafoni abona kamba tushango twa fa Intaneti nihabali kwa ndu. Babañwi nihabasaezi misebezi yetokwa kuli baeze cwalo basapatehanga kueza musebezi wabona habali kwa ndu. Muuna yanyezi wa libizo la Lee ubulela kuli: “Kunibelenga taata kusa alaba foni kamba kashango ka za musebezi ka nako yenilukisize kuba ni bo musalaa ka.” Musali yanyezwi yabizwa Joy ubulela kuli: “Ni belekela kwandu, kacwalo kunibelenga taata kuziba foniswanela kukotokela. Nitokwa kuikataza kuli nibe ni mubonelo oswanela ka za musebezi waka.”

ZA KUNAHANISISA: Kana mwateelezanga ka tokomelo mutu yemunyalani ni yena haambola ni mina?—LUKA 8:18.

BUSEPAHALI BWAMINA

Patisiso yeñwi ibonisa kuli buñata bwa mifilifili yebanga mwa manyalo itiswa ki lika zebabeyanga batu bao fa Intaneti. Babañwi kubona nebabulezi kuli babeyanga lika zeñwi fa Intaneti zebasa lati kuli libonwe ki bakubona.

Ka libaka leo, batu babañata balumela kuli mawebusaiti a kulumelana ka ona litaba a kona kutahisa butata, mi mane ni kutahisa kuli batu babanyalani bakone kueza bubuki. Hakukomokisi licaziba za mulao babatalima za kufelisa manyalo hababulela kuli mawebusaiti a kulumelana ka ona litaba atahisanga kuli manyalo amañata afele.

ZA KUNAHANISISA: Kana mwapatelanga bakumina hamuikambotanga ni mutu yemusika nyalana ni yena?—LIPROVERBIA 4:23.

MUZIBE LIKA ZA BUTOKWA

Mutu yasalati kuca hana kuzwelapili kuba ni buikangulo bobunde. Ka kuswana, mutu yasalati kutanda nako ni mutu yanyalani ni yena ukatahisa kuli kube ni matata mwa linyalo lahae.—Maefese 5:28, 29.

Muikambote ni bakumina ka za liakalezo zelatelela ili zemubata kuli muitusise, kamba muñole litaba zemunahana kuli lika mitusa kuli zwelopili ya bumapanga-panga isike yamipalelwisa kuisa pilu bakumina.

• Mulike kuca sico hamoho nihaiba feela hañwi ka zazi

• Mulukise kuli ka linako zeñwi hamuitusisi lipangaliko zamina

• Mulukise kuli mube ni nako ya kueza hamoho nto yeñwi yetabisa

• Mutimange lipangaliko zamina busihu ni kulibeya kwahule ni mumbeta wamina

• Mutimange lipangaliko zamina ka mizuzu ye 15 ka zazi kuli mina ni bakumina mukone kuikambota kusina zemifilikanya

• Mulukise nako yemusike mwaitusisa Intaneti ka zazi