Zwelopili ya Bumapanga-Panga Ikona Kuama Cwañi Munahano Wamina?
Batu bazwelangapili kuekeza kwa tuto yabona, ibe kuli baeza cwalo kabakala sikolo, musebezi kamba ka mabaka amañwi. Zwelopili ya bumapanga-panga yakona kutusa batu kuituta. Kacenu batu sebakona kufumana ka bunolo litaba kaufela zebatokwa inze bali fa ndu yabona, kufita mone kuinezi kwamulaho.
Nihakulicwalo, batu babañata babaitusisa hahulu zwelopili ya bumapanga-panga balemuha kuli . . .
-
kubabelanga taata kuisa pilu ku zebabala.
-
bayembululwanga ka bunolo.
-
baikutwanga bulutu kapili habali banosi.
ZEMUSWANELA KUZIBA
KUBALA
Batu babaitusisanga hahulu lipangaliko kuba belanga taata kuba ni pilu-telele kuli bafeze kubala taba kaufela, kacwalo bafita-fitanga feela mwa taba yeo kuli bazibe taba yeambolwa.
Kufita-fita feela mwa taba kukona kutusa feela hamubata kalabo kwa puzo yeñwi kapili-pili. Niteñi, kueza cwalo kukona kumipalelwisa kuutwisisa hande taba haiba mutokwa kuinyakisisa ka butungi.
ZA KUNAHANISISA: Kana mwakona kubala litaba zeñata? Kueza cwalo kukona kumitusa cwañi kuituta hande?—LIPROVERBIA 18:15.
KUISA PILU KWA LIKA
Batu babañwi baikutwa kuli zwelopili ya bumapanga-panga ibatusa kuba ni buikoneli bwa kueza lika zepeli ka nako yeswana, ka mutala bakona kulumela balikani babona tushango inze baituta. Kono bayaululwanga mi bapalelwanga kueza hande lika zepeli zeo.
Nihaike kuli kuisa hahulu pilu kwa nto yeñwi ni kuambuka lika zekona kumiyembulula kukona kuba taata, kueza cwalo kukatahisa kuli mukone kuituta. Musizana wa lilimo ze 14 yabizwa Grace ubulela kuli: “Kueza cwalo kwa kona kutusa mutu kusaeza hahulu mafosisa ni kusalembwala hahulu. Niitutile kuli kusaeza lika zeñata ka nako iliñwi ni kuambuka lika zeyaulula kwatusa luli.”
ZA KUNAHANISISA: Kana zwelopili ya bumapanga-panga imitahisezanga kuli kumibele taata kuisa pilu kwa lika zemueza ni kuhupula zemuitutile?—LIPROVERBIA 17:24.
HAMULI MUNOSI
Batu babañwi habatabelangi kuba banosi, kacwalo baitusisanga zwelopili ya bumapanga-panga kuli ikone kubazwisa bulutu. Musali yomuñwi yabizwa Olivia ubulela kuli: “Niikutwanga hahulu bulutu haniinzi feela nihaiba ka mizuzu yesakwani 15 nisaswali foni yaka, tabuleti, kamba kutukisa TV.”
Nihakulicwalo, kuli batu bakone kuituta hande, batokwa kufumananga nako ya kuba banosi ilikuli banahanisise.
ZA KUNAHANISISA: Kana mwaitusisanga nako yemuli munosi kwa kunahanisisa?—1 TIMOTEA 4:15.
ZEMUKONA KUEZA
MUNYAKISISE MOMUITUSISEZA ZWELOPILI YA BUMAPANGA-PANGA
Ki mwa linzila mañi momukona kuitusisa zwelopili ya bumapanga-panga kuli imituse kuituta? Zwelopili ya bumapanga-panga ikona kumipalelwisa cwañi kuisa pilu kwa lika ni kwa kuituta?
SIKUKA SA MWA BIBELE: “Ubukeleze butali ni maata a kunahana.”—LIPROVERBIA 3: 21.
Hape Mwendi Mwakona Kutabela Litaba Ze
MUZUHE!
Kana Mupatehile Hahulu?
Batu babañata kubabelanga taata kufumana hande nako ya kusebeza kwa mibeleko yabona ni kuba ni lubasi lwabona. Ki lika mañi zetahisanga butata bo? Mi ki lika mañi zekona kumitusa kutatulula butata bo?
