Buikangulo Bobunde Bwa Mubili
Bibele haki buka ya likalafo. Nihakulicwalo, mwa Bibele kunani likuka zekona kulutusa kuba ni buikangulo bobunde bwa mubili. Halunyakisiseñi likuka zeñwi za mwa Bibele zekona kumitusa kuli mube ni buikangulo bobunde bwa mubili.
MUBABALELE MUBILI WAMINA
SIKUKA SA MWA BIBELE: “Hakuna muuna yakile atoya mubili wahae, kono waufepa ni kuukatelwa.”—Maefese 5:29.
ZESITALUSA SIKUKA: Sikuka se sa mwa Bibele silususueza kuli lueze molukonela kaufela kubabalela mubili waluna. Piho yeñwi ibonisa kuli matuku amañata ebakulanga batu atiswa ki mobapilela bupilo bwabona. Kacwalo, kuba ni mupilelo omunde kwakona kulutusa kuba ni buikangulo bobunde.
ZEMUKONA KUEZA:
-
Lico Zende. Mucange lico zekona kumitusa kuba ni buikangulo bobunde mi munwange mezi amañata.
-
Muezange Lipapali Zetiisa Mubili. Kusina taba ni lilimo zamina, kuezanga lipapali zetiisa mubili kwakona kumitusa kuba ni buikangulo bobunde, nihaikaba kuli mu lihole kamba mukula butuku bobusa foli. Nihaike kuli balikani bamina, ba lubasi, kamba baalafi bakona kumisusueza kueza lipapali zetiisa mubili, muswanela kueza buikatazo kuli mutusiwe.
-
Mubange ni Nako Yeñata ya Kupumula. Batu babasa bangi ni nako yeñata ya kupumula bakona kukula matuku amatuna hamulaho wa nako. Batu babañata habalobalangi ka nako yetelele bakeñisa kuli baezanga misebezi yemiñwi ka nako yebaswanela kulobala. Niteñi, kulobala nako yetelele kwakona kumitusa kuba ni buikangulo bobunde.
MUAMBUKE MIKWA YEMASWE
SIKUKA SA MWA BIBELE: “Haluikeniseñi kwa lika kaufela zesilafaza nama ni moya.”—2 Makorinte 7:1.
ZESITALUSA SIKUKA: Lwakona kuba ni mubili oikanguzi hande haiba luambuka lika zekona kulutahiseza butata mwa mubili zecwale ka kwai, ili yona yetahisa hahulu matuku ni mafu.
ZEMUKONA KUEZA: Mukete lizazi lemuka tuhela kuzuba kwai ni kuliñola fa kalenda yamina. Pili lizazi leo lisika fita kale, muyumbe kwai ni lika kaufela zemuitusisanga hamubata kuzuba kwai. Mutuhele kuyanga kwa libaka kokufumaneha batu babazuba kwai. Mutaluseze lubasi lwamina ni balikani bamina kuli muikatulezi kutuhela kuzuba kwai ilikuli bakone kumitusa.
LIKUKA ZEÑWI ZA MWA BIBELE
Mwakona kuikupela Bibele ku yomuñwi wa Lipaki za Jehova yapila mwa silalanda samina
MUEZANGE LIKA KA TOKOMELO
“Hauyaha ndu yenca, uyahe ni limotanyana lelipotolohile situwa sa ndu yeo, kuli ndu yahao isike yatahelwa ki mulatu wa mali hakuka wa mutu fateñi.”—DEUTERONOMA 22:8.
MUAMBUKE KACIMACIMA.
“Yasahalifi kapili unani temuho yetuna, kono wa kacimacima ubonisa bukuba bwahae.”—LIPROVERBIA 14:29.
MUAMBUKE KUCA HAHULU.
‘Usike waina mwahalaa babafunjela.’—LIPROVERBIA 23:20.
Hape Mwendi Mwakona Kutabela Litaba Ze
MUZUHE!
Lika Zetahisa Tabo—Buikangulo Bobunde Bwa Mubili ni Kuitiisa Mwa Butata
Kana kusa ba ni buikangulo bobunde kutahisa kuli mutu asike aba ni tabo?
