Kunahana Hande
Bibele ilulemusa kuli lusike lwaba ni minahano yemaswe kono ilususueza kunahana hande.
KUHALIFA
SIKUKA SA MWA BIBELE: “Yasahalifi kapili ufita muuna ya maata.”—Liproverbia 16:32.
ZESITALUSA SIKUKA: Lwakona kutuseha haiba luiswala haluhalifile. Nihaike kuli fokuñwi lwanyemanga ka mabaka autwahala, kusaiswala halunyemile kwakona kulutahiseza butata bobutuna. Batu habahalifanga, hañata habanahanangi hande mi bakona kueza lika zekatahisa kuli bainyaze hasamulaho.
ZEMUKONA KUEZA: Muitute kuba ni buiswalo hamunyemile kuli musike mwafosa. Nihaike kuli batu babañwi banahana kuli mutu wa kacimacima unani maata, niti kikuli mutu yacwalo wafokola. Bibele ibulela kuli: “Mutu yasakoni kuiswala hahalifile, uswana sina muleneñi opunyizwe, osina limota.” (Liproverbia 25:28) Nzila yende yemukona kuambuka ka yona kacimacima ki ka kunyakisisanga litaba pili musikanga kale muhato. “Kutwisiso ya mutu ikuyula buhali bwahae.” (Liproverbia 19:11) Lutokwa kunyakisisanga miinelo kaufela pili lusika bulela kale kamba kueza nto yeñwi.
BUITUMELO
SIKUKA SA MWA BIBELE: “Mubonise buitumelo.”—Makolose 3:15.
ZESITALUSA SIKUKA: Kubulelwangwa kuli mutu yanani buitumelo unani tabo. Nihaiba batu babashwezwi ki mutu yebalata kamba kulatehelwa ki nto yeñwi ya butokwa bakona kulumelelana ni taba yeo. Batu bao batalusa kuli nto yebatusize kutiyela muinelo otaata wo, ki kubonisa buitumelo kwa lika zebanani zona kufita kuisa hahulu pilu kwa lika zebalatehezwi.
ZEMUKONA KUEZA: Ka zazi ni zazi, muñolange mukoloko wa lika zemuitumela. Lika zeo halitokwi kuba zetuna feela. Munahanisisange nihaiba lika zenyinyani zecwale ka kubuha lizazi halipazula, kuba ni puisano yende ni mutu yemulata, kamba kuitumela feela kuli mwapila. Lika ze zakona kumitusa kuba ni munahano oikanguzi hande haiba mulinahanisisa ni kuitumela zona.
Kunahanisisa libaka hamuitebuha balikani ni lubasi lwamina kwakona kumitusa luli. Hase muzibile libaka hamuitebuha bona, mwakona kubataluseza ka kubonana ni bona, ka kubañolela liñolo, ka kubañolela e-mail, kamba ka kubañolela kashango ka fa foni. Kueza cwalo kukamitahiseza tabo bakeñisa kuli muezeza batu babañwi lika zende.—Likezo 20:35.
LIKUKA ZEÑWI ZA MWA BIBELE
Mwakona kuikungela litaba za kuteeleza feela za mwa Bibele. Litaba zeo zafumaneha fa jw.org mwa lipuo zebato ba ze 40
MUAMBUKE LIKAÑI.
“Kukalisa ndwa kuswana inge kutibulula mezi a muunda; uikeme pili likomano lisika kalisa kale.”—LIPROVERBIA 17:14.
MUSIKE MWABILAEZWANGWA KI LIKA ZEKAEZAHALA KWAPILI.
“Ka mukwa ocwalo, musike mwabilaela za lizazi lelitatama, kakuli lizazi lelitatama litaha ni lipilaelo zalona. Lizazi ni lizazi linani butata bwalona.”—MATEU 6:34.
KUFITA KUUNGA MUHATO KA KUYA KA MOMUIKUTWELA, MUNAHANISISANGE KA TOKOMELO PILI MUSIKA EZA KALE CWALO.
“Maata a kunahana aka kubabalela, mi temuho ika kusileleza.”—LIPROVERBIA 2:11.
