Libaka Hakuli Kwa Butokwa Kuziba Haiba Mubupi Uteñi
Ki kabakalañi hakuli kwa butokwa kuziba haiba kunani Mubupi? Haiba bupaki bolunyakisisize bumikolwisa kuli Mulimu ya maata kaufela uteñi, uzibe mwendi mukatabela kunyakisisa bupaki bobubonisa kuli Bibele iñozwi ka kususumezwa ki moya wahae. Mi haiba musepa zeibulela Bibele, mukatusiwa ka linzila zelatelela.
Mukaikola hahulu bupilo
ZEIBULELA BIBELE: “[Mulimu] naaezize bunde, ka kumifa pula yezwa kwa lihalimu ni linako za siselo, amikulisa ka lico ni kutaza lipilu zamina ka tabo.”—Likezo 14:17.
MOMUKONA KUTUSEZWA: Lika kaufela zemuikola mwa lifasi ki limpo zezwa ku Mubupi. Mukaitebuha hahulu limpo zeo haiba mulemuha mo Mufani wa zona aboniseza kuli wamitokomela.
Mukafumana likelezo zende zekona kumitusa mwa bupilo
ZEIBULELA BIBELE: “Ukautwisisa sesilukile, katulo ya niti, ni sesiswanela, zona linzila kaufela zende.”—Liproverbia 2:9.
MOMUKONA KUTUSEZWA: Ka kuba Mubupi wamina, Mulimu waziba zemutokwa kuli mube ni tabo. Haiba mubala Bibele, mukaituta lika zeñata zekamitusa mwa bupilo.
Mukafumana likalabo kwa lipuzo zamina
ZEIBULELA BIBELE: “Ukafumana zibo ya kuziba Mulimu.”—Liproverbia 2:5.
MOMUKONA KUTUSEZWA: Kuziba kuli kunani Mubupi kwakona kumitusa kufumana likalabo za butokwa zecwale ka: Mulelo wa bupilo ki ufi? Ki kabakalañi hakunani manyando amañata? Ki lika mañi zeezahalanga ku mutu hashwa? Mwakona kufumana likalabo zekolwisa mwa Bibele.
Mukaba ni sepo ya za kwapili
ZEIBULELA BIBELE: “‘Niziba hande mihupulo yeni minahanela,’ kubulela Jehova, ‘ili mihupulo ya kozo, isiñi ya kozi, kuli nimife bupilo bobunde kwapili, ni sepo.’”—Jeremia 29:11.
MOMUKONA KUTUSEZWA:Mulimu usepisa kuli kwapili ukafelisa bumaswe, manyando, mane ni lifu. Haiba mulumela zamisepisize Mulimu kwapili, mukaba ni bundume bwa kutiyela miinelo yetaata.
Hape Mwendi Mwakona Kutabela Litaba Ze
MUZUHE!
Lika Zetahisa Tabo—Kuziba Zelupilela
Kufumana likalabo kwa lipuzo zetuna za mwa bupilo kutusa mutu kuba ni tabo.
MUZUHE!
Bibele I Bulelañi ka za Pupo?
Bibele i bulela ka za mazazi a 6 ili mazazi ao Mulimu naa bupile lika ze pila. Kana ao, ne li mazazi a lihola ze 24?
