Kana lika kaufela za kwa lihalimu ni fa lifasi nelibupilwe ki Mulimu kamba nelitile ka kuipilaula? Manzwi a licaba ba sayansi bababulezwi kwa makalelo a taba ye ni manzwi apili mwa Bibele abonisa likalabo zepeli zeshutana za puzo yeo. Kunani batu babalumela hahulu litaba zebabulela ba sayansi ni babalumela zeibulela Bibele. Nihakulicwalo, batu babañata basakakanya. Batu babañata hababangi ni mihupulo yeswana ka za taba ye mwa libuka zelekiswanga hahulu ni mwa litukiso za fa TV.

Baluti bamina kwa sikolo mwendi nebamilutile ka buikolwiso luli kuli lika kaufela za kwa lihalimu ni fa lifasi nelitile ka kuipilaula, ni kuli hakuna Mubupi. Kono kana nebamifile bupaki bobukolwisa bwa kuli hakuna Mubupi? Kuzwa fo, mwendi mukile mwautwa baeteleli ba bulapeli habaluta kuli kunani Mubupi. Kono kana nebamifile bupaki bobukolwisa bwa litaba zene babulela? Kamba kana nebamibulelezi kuli muswanela feela kulumela kuli Mubupi uteñi kusina bupaki?

Kusina kukakanya, mwaipuzanga ka za puzo ye, mi mwendi muikutwa kuli hakuna mutu yakona kufa bupaki bobukolwisa bwakuli Mubupi uteñi kamba hayo. Hape mwendi mwaipuzanga puzo yeñwi yakuli: Kana kufumana kalabo kwa puzo ye ki kwa butokwa?

Magazini ye ya Muzuhe! ikakala ka kulufa bupaki bobutahisize kuli batu babañata balumele kuli kunani Mubupi. Kihona ikanyakisisa libaka hakuli kwa butokwa kufumana likalabo kwa lipuzo zeama mone litahezi lika kaufela za kwa lihalimu ni fa lifasi.