NIHAIKE kuli kusautwa Mulimu kwa bo Adama ni Eva nekutahisize kuli batu kaufela bahoze sibi ni lifu, taba yeo haisika cinca mulelo wa Mulimu ka za batu. Mwa Linzwi lahae yona Bibele, Mulimu ukuta-kutezi kufa bupaki bobubonisa kuli mulelo wahae hausika cinca.

• “Babalukile bakaluwa lifasi, mi bakapila ku lona kuya kuile.”—Samu 37:29.

• “Ukamiza lifu kuya kuile, mi Mulena Yapahami ka Kufitisisa, yena Jehova, ukatakula miyoko kwa lipata zabona kaufela.”—Isaya 25:8.

• “Sila sa mafelelezo, lona lifu, sikayundiswa.”—1 Makorinte 15:26.

• “Lifu halisana kubateñi, nihaiba kutahelwa ki maswabi kamba kulila kamba kuutwa butuku.”—Sinulo 21:4.

Mulimu “ukamiza” kamba ‘kuyundisa’ lifu sona sila saluna, ka mukwa ufi? Sina molubonezi, Bibele ibulela kuli ‘babalukile bakapila kuya kuile.’ Kono hape Bibele ibulela kuli “hakuna mutu yalukile mwa lifasi yaeza zende nako kaufela.” (Muekelesia 7:20) Kuli Mulimu afelise lifu, kana haana kutokwa kuli batu balatelele litaelo zahae? Batili. Ukatokwa kuli batu baeze cwalo, kakuli ‘Mulimu, haakoni kupuma.’ (Tite 1:2) Kono ki lika mañi zakaeza Mulimu kuli ataleleze mulelo wahae wanaabupezi batu?

Jehova Mulimu naaliuluzi batu kwa lifu ka tiululo ya Mwanaa hae. Tiululo ki tifo yelifiwa ka mulelo wa kukutisa sinca nto yene latehile kamba kuli mutu yomuñwi alukululwe mwa butanga. Bakeñisa kuli batu kaufela ki baezalibi mi baatulezwi lifu, Bibele ibulela ka kuutwahala kuli: “Hakuna wa ku bona yakona kuliulula mwanahabo kamba kufa Mulimu tiululo yeliulula mwanahabo, (teko ya tiululo ya bupilo bwabona ki yetuna hahulu kuli mane habakoni kuilifa nikamuta).”—Samu 49:7, 8.

Mutu yasika petahala haashwa, ukona feela kulifela mulatu wa sibi sahae, haakoni kuitiulula, kamba kulifela mulatu wa libi za babañwi. (Maroma 6:7) Nelutokwa mutu yapetahalile ili yasina sibi kuli afane bupilo bwahae, isiñi kabakala libi zahae, kono kabakala libi zaluna.—Maheberu 10:1-4

Taba yeo ki yona yanaaezize Mulimu. Naalumile Mwanaa hae, yena Jesu, kuzwelela kwa lihalimu ni kuto pepwa fa lifasi inze ali mutu yapetehile yasina sibi. (1 Pitrosi 2:22) Jesu naabulezi kuli naatile ‘kuto fa bupilo bwahae sina tiululo kuli aliulule babañata.’ (Mareka 10:45) Naashwile kuli akone kulifela libi zaluna ni kululukulula kwa sibi ni lifu ilikuli lupile.—Joani 3:16.

Bupolofita bwa Bibele habunze butalelezwa, lupila mwa “linako zetaata, zeziyeza,” ili nto yebonisa kuli lupila mwa “mazazi a mafelelezo” a lifasi lelimaswe le. (2 Timotea 3:1) Mazazi a mafelelezo akafela fa “lizazi la katulo ni la kuyundiswa kwa batu babasa sabi Mulimu.” (2 Pitrosi 3:3, 7) Kono batu babalata Mulimu bakapiliswa mi bakafuyaulwa ni kufiwa “bupilo bobusa feli.”—Mateu 25:46.

Batu babañata babaka zusiwa kwa bafu, bakaba ni kolo ya kupila kuya kuile. Jesu naazusize mutu yashwile hanaayo potela muleneñi wa Naine. Mbelwa yomuñwi naashwezwi ki mwanaa hae anosi, mi Jesu ‘naamushwezi makeke’ ka kuzusa mwana yo kwa bafu. (Luka 7:11-15) Muapositola Paulusi  ni yena naabulezi kuli: “Ninani sepo ku Mulimu . . . ya kuli kukaba ni zuho ya babalukile ni babasika luka.” Kuba ni sepo yeo kubonisa lilato lelituna lanani lona Mulimu kwa batu.—Likezo 24:15.

Batu babañata bakaba ni sepo ya kupila kuya kuile. Bibele ibulela kuli: “Babalukile bakaluwa lifasi, mi bakapila ku lona kuya kuile.” (Samu 37:29) Ka nako yeo, batu bakataba hahulu mi bakatiiswa kubona manzwi anaañozi muapositola Paulusi ibato ba lilimo ze 2,000 kwamulaho, hatalelezwa. Paulusi naabulezi kuli: “Wena lifu, tulo yahao ikai? Wena lifu, maata ahao akai?” (1 Makorinte 15:55) Sila saluna, lona lifu, sikafeliswa!