Kana kuba ni takazo ya kupila bupilo bobucwalo kufosahalile? Batili. Bibele ilubulelela kuli Mulimu naabeile takazo ya kupila bupilo bobucwalo mwa lipilu zaluna. (Muekelesia 3:11) Bibele hape ibulela kuli “Mulimu ki lilato.” (1 Joani 4:8) Ka kuba Mulimu yalilato, naasike alubupa ni takazo yeo inze aziba kuli halukoni kupila kuya kuile.

Hakuna feela mutu yatabela kushwa. Mane Bibele italusa kuli lifu ki “sila.” (1 Makorinte 15:26) Batu babañwi bakashwa inze basali babanca, babañwi bona bakapila nako yetelele, kono kaufelaa luna lutamehile kushwa. Batu babañata habatabelangi kunahana ka za lifu, mi mane fokuñwi bakenelwangwa ki sabo. Kana lifu likafeliswa nako yeñwi? Kana lifu lakona kufeliswa luli?

Kana mwaziba kuli mulelo wa Mulimu nesi wa kuli batu bashwange? Buka ya mwa Bibele ya Genese ilufa bupaki bobulukolwisa kuli mulelo wa Mulimu neli wa kuli batu bapile kuya kuile fa lifasi. Jehova Mulimu naabupile lifasi ni lika zeñwi kaufela zebatokwa batu kuli bapile ni kuba ni tabo. Hamulaho, Jehova abupa mutu wapili, yena Adama, mi amubeya mwa paradaisi, yona simu ya Edeni. “Hasamulaho, Mulimu atalima lika kaufela zaezize, mi hamubone! Nelilukile hahulu.”—Genese 1:26, 31.

Adama naabupilwe inze ali yapetahalile, ili ka siswaniso sa Mulimu. (Deuteronoma 32:4) Eva, musalaa Adama, ni yena naapetahalile mwa munahano ni kwa mubili. Jehova naabulelezi Adama ni Eva kuli:  “Mupepe mi muate, mutaze lifasi mi mubuse fahalimwaa lona, mi mube ni maata fahalimwaa litapi za mwa mawate ni libupiwa zefufa mwa mbyumbyulu ni libupiwa zepila kaufela zezamaya fa lifasi.”—Genese 1:28.

Kuli Adama ni Eva bataze lifasi ka bana babona, nekuka baangela nako yetelele. Eva naakapepa bana mi bana bao ni bona nebaka pepa bana kufitela lifasi kaufela litala batu sina mwanaalelezi Mulimu. (Isaya 45:18) Jehova naasike abulelela Adama ni Eva kutaza lifasi ka bana babona inze aziba kuli Adama ni Eva nebakashwa hase babile feela ni bana, mwendi ni baikulu, ili kushwa pili basika ziba zeneka ezahala hasamulaho.

Kuzwa fo, munyakisise musebezi wanaafilwe Adama wa kubusa lifolofolo. Jehova naabulelezi Adama kuli afe lifolofolo mabizo, ili musebezi one ukaanga nako yetelele. (Genese 2:19) Kono kuli Adama akone kubusa lifolofolo, naakatokwa kuziba mikwa yazona ni kuziba mwanaaka libabalelela. Kueza cwalo nekukaanga nako yetelele luli.

Kacwalo, Mulimu hanaalaezi Adama ni Eva kuli bataze lifasi ka bana babona ni kuli babuse lifolofolo, naabata kuli bapile nako yetelele. Mane Adama naapilile nako yetelele luli.

Bibele ibonisa kuli batu kwamulaho nebapilile nako yetelele kufita molupilela kacenu. Ibulela kuli: “Mazazi kaufela anaapilile Adama naaeza lilimo ze 930.” Bibele hape ibulela za baana babañwi ba 6, ili bao yomuñwi ni yomuñwi wabona naapilile lilimo zefitelela 900! Baana bao neli Seta, Enoshi, Kenani, Jaredi, Metusela, ni Nuwe. Kaufelaa bona nebapilile pili Muunda wa Nuwe usika fita kale, mi Nuwe naapilile lilimo ze 600 pili Muunda usika fita kale. (Genese 5:5-27; 7:6; 9:29) Ki kabakalañi batu bao hane bapilile nako yetelele cwalo?

Baana bao kaufela nebapilile ka nako yeneli bukaufi ni nako yene bapilile bo Adama ni Eva sina batu babapetahalile. Kubonahala kuli leo ki lona libaka hane bapilile nako yetelele. Kono cwale kupetahala kukona kutusa cwañi mutu kupila nako yetelele? Mi lifu likafeliswa cwañi? Kuli lukone kufumana likalabo za lipuzo zeo, luswanela pili kuutwisisa libaka batu habasupala ni kushwa.