LIPILAELO zakona kuimeza pilu yaluna. (Liprov. 12:25) Kana nako yeñwi mukile mwaba ni lipilaelo zeñata mwa bupilo? Kana mukile mwaikutwa kuli nemusike mwakona kuitiisa hane mukopani ni miinelo yemiñwi yene mibilaeza? Haiba ki cwalo, uzibe haki mina munosi. Buñata bwaluna mwendi lukile lwababalela bakuli, kushwelwa ki mutu yomuñwi yelulata, kutahelwa ki kozi ya ka taho, kamba kukopana ni muinelo omuñwi one ulukatalisize hahulu, kulubilaeza, ni kululembwalisa. Kono ki nto mañi yekona kulutiisa haluba ni lipilaelo? *

Kunyakisisa mutala wa Mulena Davida kuka lutusa kuziba zeñata ka za mwakuitiiseza halunani lipilaelo. Naakopani ni miinelo yetaata yemiñata mwa bupilo bwahae, mane fokuñwi bupilo bwahae nebuli mwa lubeta. (1 Sam. 17:34, 35; 18:10, 11) Ki lika mañi zenetusize Davida kuitiisa hanaanani lipilaelo? Lukona kulikanyisa cwañi mutala wahae?

Davida naakopani ni miinelo yetaata yemiñata ka nako yeswana. Ka mutala, halunyakisiseñi muinelo wanaakopani ni ona hanaanzaa baleha bakeñisa kuli Mulena Saule naabata kumubulaya. Davida ni baana bane bali ni yena hane bakutile kwa ndwa, bakomoka hahulu kufumana kuli lila zabona neliuzwize maluwo abona, kucisa mandu abona, ni kuhapa mabasi abona. Davida naaikutwile cwañi? “Davida ni baana bane bali ni yena kiha bakalumuka kulila, kufitela bafelelwa ki maata a kulila.” Davida naaziyelehile hahulu bakeñisa kuli baana banaasepile “nebalelisana kuli bamupobaule ka macwe.” (1 Sam. 30:1-6) Ka nako yeo, Davida naakopani ni miinelo yetaata yemilaalu ka nako yeswana: Bupilo bwa lubasi lwahae nebuli mwa lubeta, baana bane bali ni yena nebabata kumubulaya, mi Mulena Saule naasazuma bupilo bwahae. Kusina kukakanya, Davida naaziyelehile hahulu kabakala miinelo yeo!

Davida naaezizeñi hasamulaho? Honafo feela, “aitiisa ka Jehova Mulimu wahae.” Naaezize cwañi cwalo? Sina kamita, naalapezi ku Jehova kukupa kuli amutuse mi naanahanisisize mo Jehova naamutuselize kwamulaho. (1 Sam. 17:37; Samu 18:2, 6) Davida naaziba kuli naatokwa kukupa Jehova kuli amuetelele; kacwalo, abuza Jehova zanaaswanela kueza. Jehova hasaataluselize Davida za kueza, Davida aanga muhato kapili-pili. Kabakaleo, Davida ni baana bane bali ni yena bafuyaulwa ki Jehova mi bakutisa mabasi abona anaahapilwe ni maluwo abona kaufela anaauzwizwe. (1 Sam. 30:7-9, 18, 19) Kana mulemuhile lika zetaalu zanaaezize Davida? Naalapezi ku Jehova kuli amutuse, naanahanisisize mo Jehova naamutuselize kwamulaho, mi naangile muhato Jehova hanaa mutaluselize za kueza. Lukona kulikanyisa cwañi Davida? Halunyakisisiseñi linzila zetaalu ze.

1. Mulapelange. Lusakala feela kuba ni lipilaelo, lulapelange ku Jehova kuli alutuse ni kulufa butali. Haiba luba ni nako yeñata ya kulapela ku yena ni kumutaluseza ze mwa pilu yaluna kaufela, lukaikutwa kuimuluha. Kamba lwakona kulapela tapelo yekuswani mwa pilu haiba hakukonahali kulapela tapelo yetelele bakeñisa muinelo oluli ku ona. Nako kaufela halukupa Jehova kuli alutuse, lubonisa kuli lumusepile, sina feela mwanaa musepezi Davida, hanaaize: “Jehova ki licwe laka ni musilelezi waka mi ki Yena yanilamulela. Mulimu waka ki licwe laka, nisabela ku yena.” (Samu 18:2)  Kana tapelo yakona kulutusa luli? Kaizeli yali paina yabizwa Kahlia utalusa kuli: “Hamulaho wa kulapela, nibanga ni kozo ya mwa munahano. Tapelo initusanga kuunga lika sina mwaliingela Jehova ni kumusepa hahulu.” Kaniti, tapelo ki mpo yende yezwa ku Jehova yelutusa kuitiisa halunani lipilaelo.

2. Munahanisisange. Hamuiheta kwamulaho, kana kunani miinelo yetaata yemiñwi yene mukopani ni yona yene mukonile feela kutiyela ka tuso ya Jehova? Haiba lunahanisisa mo Jehova naalutuselize ni kutusa batanga bahae kwamulaho, lukaba ni kozo ya mwa munahano ni kumusepa hahulu. (Samu 18:17-19) Muzwale yali muuna-muhulu mwa puteho yabizwa Joshua, utalusa kuli: “Ninani mukoloko oniñozi wa litapelo zaalabile Jehova. Kueza cwalo kunitusize kuhupula mo Jehova naaalabezi litapelo zaka hane nilapezi ku yena ka kunonga.” Kaniti luli, haiba lunahanisisa mwalutuselize Jehova kwamulaho, lukaba ni maata aka lutusa kuitiisa haluba ni lipilaelo.

3. Muunge muhato. Lusika anga kale muhato, luswanela kueza lipatisiso mwa Linzwi la Mulimu kuli lufumane ketelelo yende hahulu. (Samu 19:7, 11) Mizwale ni likaizeli babañata balemuhile kuli kueza lipatisiso fa mañolo amañwi kubatusanga kuutwisisa hande mobakona kusebeliseza mañolo ao mwa bupilo bwabona. Muuna-muhulu mwa puteho yabizwa Jarrod, utalusa kuli: “Kueza lipatisiso fa liñolo leliñwi kunitusanga kuliutwisisa hande ni kuutwisisa zabata Jehova kuli nieze. Kueza cwalo kunitusanga kulumela litaba zenibala ni kulatelela ketelelo ya Jehova.” Halueza lipatisiso mwa Mañolo kuli lufumane ketelelo ya Jehova ni kusebelisa zeluituta mwa bupilo bwaluna, kuka lubela bunolo kuitiisa halunani lipilaelo.

Davida naaziba kuli naatokwa kuitinga ku Jehova kuli amutuse kuitiisa hanaakopana ni miinelo yetaata yene mubilaeza. Naaitebuhile hahulu tuso yanaa mufile Jehova kuli mane naabulezi kuli: “Ka maata a Mulimu nakona kupahama limota. Mulimu wa niti ki yena yaniapesa maata.” (Samu 18:29, 32) Lukona kuikutwa kuli miinelo yelukopana ni yona itaata hahulu kuli mane halukoni kuitiyela mi iswana sina limota lelitelele lelusa koni kupahama. Kono ka tuso ya Jehova, lwakona kutiyela muinelo otaata ufi kamba ufi olukopana ni ona oswana sina limota. Kaniti luli, haiba lulapela ku Jehova kukupa kuli alutuse, lunahanisisa mwalutuselize kwamulaho, ni kuunga muhato ka kulatelela ketelelo yahae, lwakona kukolwa kuli uka lufa maata ni butali bolutokwa kuli luitiise halunani lipilaelo!