1. Ki likonkwani zecwañi za kwa moya zelukona kuitomela?

 KA KUBA Bakreste ba niti, lwalata Jehova luli. Lubata kumusebeleza ka molukonela kaufela. Kono kuli lueze cwalo, lutokwa kuitomela likonkwani za kwa moya zecwale ka kuba ni tulemeno twa Sikreste, kuituta misebezi yemiñwi yetokwahala, ni kubata linzila zelukona kusebeleza ka zona babañwi. *

2. Ki kabakalañi haluswanela kuitomela likonkwani za kwa moya ni kueza molukonela kaufela kulipeta?

² Ki kabakalañi haluswanela kutabela kueza zwelopili ya kwa moya? Libaka lelituna kikuli, lubata kutabisa Ndataa luna wa kwa lihalimu yalilato. Jehova watabanga haiba luitusisa buikoneli bwaluna kuli lumusebeleze ka kutala. Libaka leliñwi kikuli, lubata kusebeleza hande mizwale ni likaizeli baluna. (1 Mates. 4:9, 10) Kusina taba kuli selubile mwa niti ka nako yekuma kai, kaufelaa luna lwakona kueza zwelopili ya kwa moya. Halunyakisiseñi molukona kuezeza cwalo.

3. Sina mokuboniselizwe kwa 1 Timotea 4:12-16, muapositola Paulusi naasusuelize Timotea kuezañi?

³ Muapositola Paulusi hanaañolezi Timotea liñolo lahae lapili, muzwale yomunde wa mukulwani yo, naasabile muuna-muhulu ka nakonyana. Nihakulicwalo, Paulusi naamususuelize kuzwelapili kuhula kwa moya. (Mubale 1 Timotea 4:12-16.) Hamunze munahanisisa zanaabulezi Paulusi, mukalemuha kuli naasusuelize Timotea kueza zwelopili mwa linzila zepeli ze: kuba ni tulemeno totunde totucwale ka lilato, tumelo,  ni bukeni ni kuekeza kwa buikoneli bwahae bwa kubala fapilaa nyangela, kueleza, ni kuluta. Ka kulikanyisa mutala wa Timotea, halunyakisiseñi mo kuitomela likonkwani zeswanela kukona kulutuseza kueza zwelopili ya kwa moya. Hape lukanyakisisa molukona kuezeza zeñata mwa bukombwa bwaluna.

4. Ka kuya ka Mafilipi 2:19-22, ki kabakalañi Timotea hanaaitusisizwe ki Jehova?

⁴ Ki kabakalañi Timotea hanaaitusisizwe ki Jehova? Ki kabakala tulemeno twahae totunde twa Sikreste. (Mubale Mafilipi 2:19-22.) Litaba zanaabulezi Paulusi ka za Timotea libonisa kuli Timotea naaikokobeza, naasepahala, naasebeza ka taata, mi naaitingwa. Naalata mizwale bahae mi naabaisa pilu luli. Ki lona libaka Paulusi hanaalata Timotea ni hanaa mufile buikalabelo bobutuna. (1 Makor. 4:17) Ka mukwa oswana, Jehova uka lulata haiba luba ni tulemeno totu mutabisa, mi lukatusa hahulu puteho.—Samu 25:9; 138:6.

5. (a) Mukona kuketa cwañi kalemeno kakañwi kemutokwa kusebeleza ku kona? (b) Sina mokuboniselizwe mwa siswaniso, kaizeli yasali yomunca ueza cwañi kuli apete sikonkwani saitomezi sa kubonisa hahulu kutwelo-butuku?

⁵ Muitomele sikonkwani semubata kupeta. Mulapele ku Mulimu mi mumukupe kuli amituse kucinca mikwa yemiñwi yemunani yona. Mukete kalemeno kakañwi kemutokwa kusebeleza ku kona. Ka mutala, mwendi mulemuha kuli mutokwa kubonisa hahulu kutwelo-butuku kamba kuba ni moya wa kutusa mizwale ni likaizeli bamina. Kamba mwendi mulemuha kuli mutokwa kupilisana ka kozo ni babañwi ni kulata kubaswalela. Mukatuseha haiba mukupa mulikanaa mina yomutuna kuli amituse kuziba momukona kuezeza licinceho.—Liprov. 27:6.

6. Ki lika mañi zemutokwa kueza kuli mupete sikonkwani semuitomezi sa kubonisa hahulu kalemeno kakañwi?

⁶ Mueze momukonela kaufela kupeta sikonkwani samina. Mukona kueza cwañi cwalo? Nzila yeñwi yemukona kueza cwalo ka yona, ki ka kueza lipatisiso ka za kalemeno komubata kusebeleza ku kona. Luungeñi kuli mulemuha kuli mutokwa kuba ni moya wa kulata kuswalela babañwi. Mukona kukala ka kubala litaba za batu bababulezwi mwa Bibele bane baswalezi babañwi ni bane basika eza cwalo ni kunahanisisa litaba zeo. Halunyakisiseñi mutala wa Jesu. Naatabela kuswalela babañwi ka pilu kaufela. (Luka 7:47, 48) Hape naasika landalala fa mafosisa abona kono naaisize pilu  ku zene bakona kueza. Kono Bafalisi bane bapila mwa linako za Jesu ‘nebaanga babañwi kuli haki sesiñwi.’ (Luka 18:9) Hamulaho wa kunahanisisa mitala yeo, muipuze kuli: ‘Niinga cwañi babañwi? Ki tulemeno tufi tobanani tona toniisanga hahulu pilu?’ Haiba kumibela taata kuswalela mutu yomuñwi, mulike kuñola tulemeno totunde totuñata twanani tona. Hasamulaho, muipuze kuli: ‘Jesu uunga cwañi mutu yo? Kana naaka muswalela?’ Kueza cwalo kukona kulutusa kucinca mubonelo waluna. Kwa makalelo, mwendi kukona kulubela taata kuswalela mutu yalufoselize. Kono haiba luzwelapili kuikataza kueza cwalo, lukatabela kuswalela baba lufoselize ka pilu kaufela nako hainze iya.

7. Ka kuya ka Liproverbia 22:29, Jehova uitusisa cwañi babeleki ba likwala kacenu?

⁷ Sikonkwani sesiñwi semukona kuitomela ki kuituta musebezi omuñwi otokwahala. Kutokwahala mizwale ni likaizeli babañata mwa musebezi wa kuyaha liofisi za mutai, Libaka za Mikopano, ni Mandu A Mubuso. Mizwale ni likaizeli babañata babaeza misebezi yeo nebaitutile yona ka kubeleka ni mizwale ni likaizeli babañwi babaziba hande misebezi yeo. Sina mokuboniselizwe mwa siswaniso, mizwale ni likaizeli basweli baituta misebezi yetokwahala kuli batuse kubabalela Libaka za Mikopano ni Mandu A Mubuso. Ka kuitusisa babeleki ba likwala bao ni ka linzila zeñwi, Jehova Mulimu, yena “Mulena wa kamita” ni Kreste Jesu, yena “Mulena wa . . . malena,” bapeta lika zende zeñata. (1 Tim. 1:17; 6:15; mubale Liproverbia 22:29.) Luswanela kusebeza ka taata ni kuitusisa buikoneli bwaluna kukanyisa Jehova, isiñi kuipatela libubo.—Joa. 8:54.

8. Mukona kuketa cwañi musebezi omubata kuituta?

⁸ Muitomele sikonkwani semubata kupeta. Ki musebezi mañi omubata kuituta? Mukupe baana-bahulu mwa puteho yamina mi mwendi ni muokameli wa mupotoloho wamina kuli bamitaluseze musebezi obabona kuli mwakona kuituta. Ka mutala, haiba baakaleza kuli muswanela kuekeza kwa buikoneli bwamina bwa kubulela ni kuluta, mubakupe kuli bamitaluseze ka kunonga fomuswanela kusebeleza. Mi mueze momukonela kaufela kuekeza kwa buikoneli bwamina. Mukona kueza cwañi cwalo?

9. Ki lika mañi zeka mitusa kupeta sikonkwani semuitomezi sa kuekeza kwa buikoneli bwamina bwa kuluta?

⁹ Mueze momukonela kaufela kupeta sikonkwani samina. Luungeñi kuli mubata kuekeza kwa buikoneli bwamina bwa kuluta. Mukatokwa kubala ka tokomelo broshuwa ya Muikataze Kubala ni Kuluta. Haiba mufilwe ngambolo mwa mukopano wa mwahalaa sunda, mwakona kukupa muzwale yali muluti yomunde kuli ateeleze kwa ngambolo yamina pili musika ifa kale kwa puteho mi hasamulaho, amife liakalezo zeka mitusa kuekeza kwa buikoneli bwamina bwa kuluta. Muzibahale kuba batu babaitukisezanga hande lingambolo, babasebeza ka taata, ni babaitingwa.—Liprov. 21:5; 2 Makor. 8:22.

10. Mufe mutala obonisa molukona kuekeleza kwa buikoneli bwaluna.

¹⁰ Mukaezañi haiba musebezi omubata kueza utaata hahulu? Musike mwazwafa! Muzwale yabizwa Garry naasakoni kubala hande. Usahupula mwanaaikutwelanga maswabi hanaakupiwanga kubala ka nako ya mikopano ya puteho. Kono naazwezipili kuikataza kubala. Utalusa kuli ka nako ya cwale, sakona kufa lingambolo kwa Ndu ya Mubuso, fa mikopano ya mupotoloho, ni fa mikopano yemituna kabakala tuso yanaafilwe!

11. Ka kuswana ni Timotea, ki nto mañi yekona kulutusa kueza zeñata mwa sebelezo yaluna ku Jehova?

 ¹¹ Kana Timotea naabile mubuleli kamba muluti yomunde hahulu? Bibele haibuleli sesiñwi ka za taba yeo. Kusina kukakanya, kusebelisa kelezo yanaafilwe ki Paulusi neku mutusize kueza hande musebezi wanaafilwe. (2 Tim. 3:10) Ka mukwa oswana, haiba luekeza kwa buikoneli bwaluna, lukakona kueza zeñata mwa sebelezo yaluna ku Jehova.

12. Mutusizwe cwañi ki zeba miezelize batu babañwi?

¹² Kaufelaa luna lwatusiwanga ki zebaeza babañwi. Ka mutala, haluli mwa sipatela, lwaitebuhanga halupotelwa ki baana-bahulu babali mwa Tutengo Totuswalisanisa Lipaki ni ba Sipatela kamba babali mwa Likwata za Kupotela Bakuli. Halukopana ni muinelo omuñwi otaata mwa bupilo bwaluna, lwaitebuhanga haiba muuna-muhulu alubonisa kuli waluisa pilu ka kuteeleza ku luna ni kuluomba-omba. Haiba lutokwa tuso ya mutu yomuñwi haluyo zamaisa tuto ya Bibele, lubanga ni tabo haiba paina yayezi seli alumela kulusindeketa kwa tuto yeo ni kulufa liakalezo hasamulaho. Mizwale ni likaizeli bao kaufela babanga ni tabo haba lutusa. Ni luna lukaba ni tabo haiba luitatela kutusa mizwale ni likaizeli baluna. Jesu naabulezi kuli: “Kunani tabo yetuna mwa kufana yefita ye mwa kufiwa.” (Lik. 20:35) Haiba mubata kueza zeñata mwa sebelezo yamina ku Jehova, ki lika mañi zeka mitusa kupeta likonkwani zamina?

13. Ki nto mañi yeluswanela kuhupulanga haluitomela sikonkwani?

¹³ Mutokomele kuli hamuitomeli sikonkwani sesisika nonga. Ka mutala, mukona kubulela kuli: ‘Nibata kueza zeñata mwa puteho.’ Kono kukona kumibela taata kuziba momukona kupetela sikonkwani seo kamba mwendi mane hamuna kuziba haiba musipetile. Kacwalo, muzibe sikonkwani tenyene semubata kupeta. Mane mwakona kuñola sikonkwani seo ni momubata kusipetela.

14. Ki kabakalañi haluswanela kutabela kueza licinceho ka bunolo haluitomela likonkwani?

¹⁴ Hape luswanela kutabela kueza licinceho ka bunolo haluitomela likonkwani. Kabakalañi? Kabakala kuli haluna maata fa lika zeezahala mwa bupilo bwaluna. Ka mutala, muapositola Paulusi naatusize kutoma puteho mwa muleneñi wa Tesalonika. Mi kusina  kukakanya, naabata kuzwelapili kuina mwa muleneñi wo ni kutusa Bakreste babanca bao. Kono kabakala kuli batu babañwi neba mulwanisa, Paulusi azwa mwa muleneñi wo. (Lik. 17:1-5, 10) Paulusi hanaaka zwelapili kuina mwa muleneñi wo, naakabeya bupilo bwa mizwale bahae mwa lubeta. Kono naasika zwafa. Naazwezipili kueza mwanaakonela kaufela kutusa mizwale bahae. Hasamulaho, aluma Timotea kuli ayo tiisa balumeli babanca bao mwa Tesalonika. (1 Mates. 3:1-3) Kaniti luli, Bakreste ba kwa Tesalonika bao nebatabile hahulu Timotea hanaaitatezi kuyo batusa!

15. Likonkwani zaluna likona kuamiwa cwañi miinelo yaluna mwa bupilo haicinca? Mufe mutala.

¹⁵ Lwakona kuituta ku zanaakopani ni zona Paulusi mwa Tesalonika. Mwendi lusweli lwaeza ka taata kuli lufiwe buikalabelo bobuñwi kono cwale miinelo yaluna ilupaleliswa kufiwa buikalabelo bo. (Muek. 9:11) Haiba mu mwa muinelo wo, muitomele sikonkwani sisili semukona kupeta. Zeo ki zona zene baezize bo Ted ni bakubona bo Hiedi. Nebakupilwe kuzwa fa Betele bakeñisa kuli yomuñwi ku bona naakalile kuba ni mapongo. Kono bakeñisa kuli nebalata Jehova, nebabatile linzila zeñwi za kuekeza ka zona kwa sebelezo yabona ku Jehova. Sapili, nebakalile kusebeza sina mapaina ba kamita. Hamulaho wa nako, baketiwa kusebeza sina mapaina babaipitezi, mi bo Ted balutiwa musebezi wa kuba mutusi wa muokameli wa mupotoloho. Kono cwale kwaba ni cinceho yeama lilimo zaswanela kuba ni zona mutu kuli asebeze sina muokameli wa mupotoloho. Bo Ted ni bakubona bo Hiedi balemuha kuli nebasike bakona kuzwelapili kueza musebezi wo kabakala lilimo zabona. Nihaike kuli nebaikutwile bumaswe kabakala taba yeo, nebalemuhile kuli nebasa kona kusebeleza Jehova mwa linzila zeñwi. Bo Ted batalusa kuli: “Luitutile butokwa bwa kusaisa feela pilu kwa sikonkwani silisiñwi.”

16. Luitutañi kwa kelezo yeñozwi kwa Magalata 6:4?

¹⁶ Haluna maata fa lika kaufela zeezahala mwa bupilo bwaluna. Kacwalo, haluswaneli kuikutwa kuli halu ba butokwa ku Jehova kabakala buikalabelo bwaluna, mi haluswaneli kuibapanya ku babañwi babanani buikalabelo bobuñwi bolusina. Bo Hiedi batalusa kuli: “Haiba luibapanya ku babañwi, haluna kuba ni tabo.” (Mubale Magalata 6:4.) Luswanela kubata linzila zelukona kutusa babañwi ka zona ni zekona kulutusa kusebeleza Jehova. *

17. Ki lika mañi zemukona kueza kuli mukwanise zetokwahala kuli mufiwe buikalabelo?

¹⁷ Haiba munolofaza mupilelo wamina ni kusaba ni likoloti zesatokwahali, kuka mibela  bunolo kueza zeñata mwa sebelezo yamina ku Jehova. Muitomele likonkwani zenyinyani zeka mitusa kupeta likonkwani zamina zetuna. Ka mutala, haiba sikonkwani samina sesituna ki kuba paina wa kamita, mwendi mwakona kukala pili ka kusebeza sina paina wa kutusa kweli ni kweli kuzwa ka nako ya cwale. Haiba sikonkwani samina ki kusebeza sina sikombwa sa puteho, mwendi mwakona kukala ka kutandanga nako yeñata mwa bukombwa ni kupotelanga bakuli ni basupali mwa puteho yamina. Haiba mueza cwalo, mukaba ni yeloseli yeka mitusa kufiwa buikalabelo mwa sebelezo yamina kwapili. Muikatulele kueza hande musebezi ufi kamba ufi omufiwa.—Maro. 12:11.

18. Luitutañi kwa mutala wa bo Beverley? (Mubone ni siswaniso.)

¹⁸ Lwakona kuitomela likonkwani za kwa moya ni kulipeta ibe kuli lu babahulu kamba lu banana. Halunyakisiseñi mutala wa kaizeli yabizwa Beverley yanani lilimo ze 75. Naakula butuku bobuñwi bobutuna, bone bumupaleliswa kuzamaya. Niteñi, naabata kueza mwanaakonela kaufela kutusa mwa mungendenge wa kumemela batu kwa Kupuzo. Kacwalo, aitomela likonkwani zeneka mutusa kueza cwalo. Bo Beverley nebabile ni tabo yetuna hane bapetile likonkwani zabona. Mutala wabona neususuelize babañwi kueza zeñata mwa bukombwa. Jehova waitebuha musebezi obaeza mizwale ni likaizeli baluna ba basupali nihaike kuli miinelo yabona ibapaleliswa kueza zeñata.—Samu 71:17, 18.

19. Ki likonkwani zecwañi zelukona kuitomela?

¹⁹ Muitomele likonkwani zemukona kupeta. Mube ni tulemeno totuka tabisa Jehova. Muitute misebezi yetokwahala yekatusa kuli muitusiswe hahulu ki Mulimu ni kopano yahae. Mubate linzila zemukona kusebeleza ka zona mizwale ni likaizeli bamina ka kutala. * Ka kuswana ni Timotea, Jehova uka mifuyaula mi ‘zwelopili yamina ikalemuhiwa ka kutala ki batu kaufela.’—1 Tim. 4:15.