1-2. Ki lika mañi zeluswanela kueza halunze lulibelela lifasi lelinca?

 LWAITEBUHA sepiso ya Jehova ya kuyolisa lifasi le ka lifasi lelinca mokukaba kuluka. (2 Pit. 3:13) Nihaike kuli haluzibi luli foluka pilela mwa lifasi lelinca, bupaki bubonisa kuli sepiso yeo ituha italelezwa.—Mat. 24:32-34, 36; Lik. 1:7.

² Kusina taba kuli selubile mwa niti ka nako yekuma kai, kaufelaa luna luswanela kutiisa tumelo yaluna mwa sepiso yeo. Libaka? Kakuli nihaiba tumelo yetiile yakona kufokola. Mane, muapositola Paulusi naabulezi kuli kutokwa tumelo ki “sibi sesi luswasa ka bunolo.” (Maheb. 12:1) Kuli tumelo yaluna isike yafokola, luswanela kunyakisisanga kamita bupaki bobubonisa kuli sepiso ya kuli kukaba ni lifasi lelinca ituha italelezwa.—Maheb. 11:1.

3. Lukanyakisisañi mwa taba ye?

³ Mwa taba ye, lukanyakisisa lika zetaalu zeluswanela kueza kuli lutiise tumelo yaluna mwa sepiso ya Jehova ya kuli kukaba ni lifasi lelinca: (1) kunahanisisanga mpo ya tiululo, (2) kunahanisisanga maata anani ona Jehova, ni (3) kubanga ni nako ya kueza lika za kwa moya. Hasamulaho, lukanyakisisa mo lushango lwa Jehova ku Habakuki lukona kutiiseza tumelo yaluna kacenu. Kono pili halunyakisiseñi miinelo yelukona kukopana ni yona ka nako ya cwale yetokwa kuli lube ni tumelo yetiile mwa sepiso ya kuli kukaba ni lifasi lelinca.

 MIINELO YETOKWA KULI LUBE NI TUMELO YETIILE

4. Ki likatulo zecwañi zetokwa kuli lube ni tumelo yetiile?

⁴ Zazi ni zazi luezanga likatulo zetokwa kuli lube ni tumelo yetiile. Ka mutala, luezanga likatulo zeama liango, lika za kuitabisa ka zona, tuto yepahami, mutu wa kunyalana ni yena, kuba ni bana kamba kutokwa, ni ka za mubeleko. Kuipuza lipuzo ze kwakona kulutusa: ‘Kana likatulo zaka libonisa kuli nalumela luli kuli lifasi le lituha lifela mi likayoliswa ka lifasi lelinca la Mulimu? Kamba kana niezanga likatulo ka kukukuezwa ki batu babasa lumeli kuli kukaba ni zuho?’ (Mat. 6:19, 20; Luka 12:16-21) Lukaeza likatulo zende haiba luba ni tumelo yetiile ya kuli lifasi lelinca li fakaufi luli.

5-6. Ki kabakalañi halutokwa kuba ni tumelo yetiile halukopana ni miinelo yetaata? Mufe mutala.

⁵ Hape lukopananga ni miliko yetokwa kuli lube ni tumelo yetiile. Lukona kukopana ni nyandiso, kukula butuku bobutuna, kamba miinelo yemiñwi yekona kuluzwafisa. Kwa makalelo, lukona kuikutwa kuli lwakona kutiyela muliko olukopana ni ona. Kono haiba muliko wo uzwelapili sina feela mokubelanga halukopana ni miliko yemiñwi, lukatokwa kuba ni tumelo yetiile kuli lutiyele muliko wo ni kuzwelapili kusebeleza Jehova inze lutabile.—Maro. 12:12; 1 Pit. 1:6, 7.

⁶ Halukopana ni muliko omuñwi, lukona kuikutwa kuli lifasi lelinca lalusepisize Jehova halina kubateñi. Kana taba yeo italusa kuli tumelo yaluna yafokola? Haki cwalo luli. Halunyakisiseñi mutala wo. Haiba ki nako ya maliha mi kubatile hahulu, lukona kuikutwa kuli mwendi mbumbi haina kubateñi. Kono mbumbi yabanga teñi. Ka mukwa oswana, haiba luzwafile hahulu, lukona kuikutwa kuli lifasi lelinca halina kubateñi. Kono haiba tumelo yaluna itiile, lwaziba kuli lisepiso za Mulimu likatalelezwa. (Samu 94:3, 14, 15; Maheb. 6:17-19) Haiba luba ni buikolwiso bobucwalo, lukazwelapili kubeya sebelezo yaluna ku Jehova mwa sibaka sapili mwa bupilo bwaluna.

7. Ki mubonelo mañi oluswanela kutokomela?

⁷ Hape lutokwa kuba ni tumelo yetiile kuli lueze musebezi wa kukutaza. Batu babañata bolukutazanga ku bona “taba yende” ka za lifasi lelinca la Mulimu lelituha litaha habalumeli kuli taba yeo ki ya niti. (Mat. 24:14; Ezek. 33:32) Luswanela kutokomela kuli halukukuezwi ki mubonelo wabona wa kukakanya lisepiso za Mulimu. Kuli taba yeo isike yaezahala, luswanela kuzwelapili kutiisa tumelo yaluna. Halunyakisiseñi lika zetaalu zekona kulutusa kueza cwalo.

MUNAHANISISANGE MPO YA TIULULO

8-9. Kunahanisisa mpo ya tiululo kukona kutiisa cwañi tumelo yaluna?

⁸ Nzila yeñwi yelukona kutiisa ka yona tumelo yaluna ki ka kunahanisisanga mpo ya tiululo. Tiululo ilutusa kukolwa kuli lisepiso za Mulimu likatalelezwa. Haiba lunahanisisa ka tokomelo libaka Jehova hanaa lufile mpo ya tiululo ni zanaaitombozi ka kueza cwalo, lukaba ni tumelo yetiile ya kuli sepiso ya Mulimu ya kulufa bupilo bobusa feli mwa lifasi lelinca ikatalelezwa. Ki kabakalañi halubulela cwalo?

⁹ Ki lika mañi zeneamiwa mwa kufa mpo ya tiululo? Jehova naalumile Mwanaa hae wa mweli yalatwa, yena mulikanaa hae yomutuna ka kufitisisa, kuzwa kwa lihalimu ni kuto pepwa fa lifasi sina mutu yapetahalile. Jesu hanaali fa lifasi, naakopani ni miliko yemiñata. Hasamulaho, naanyandisizwe mi ashwa lifu lelibutuku. Jehova naaezize buitomboli  bobutuna luli! Mulimu waluna yalilato naasike atuhelela Mwanaa hae kunyanda ni kushwa kuli alutuse kupila bupilo bobunde ka nakonyana feela. (Joa. 3:16; 1 Pit. 1:18, 19) Bakeñisa kuli Jehova naaezize buitomboli bobutuna luli, ukabona teñi kuli sepiso yahae ya kulufa bupilo bobusa feli mwa lifasi lelinca yatalelezwa.

MUNAHANISISE MAATA ANANI ONA JEHOVA

10. Ka kuya ka Maefese 3:20, ki lika mañi zakona kueza Jehova?

¹⁰ Nzila yabubeli yelukona kutiisa ka yona tumelo yaluna ki ka kunahanisisa maata anani ona Jehova. Unani maata a kutaleleza lisepiso zahae kaufela. Batu babañata kacenu baikutwa kuli sepiso ya kulufa bupilo bobusa feli mwa lifasi lelinca haina kutalelezwa. Kono Jehova hañata usepisanga kueza lika zebasa koni kueza batu. Wakona kutaleleza lisepiso zahae kakuli ki Mulimu Yamaata Kaufela. (Jobo 42:2; Mare. 10:27) Kacwalo, halukomoki halusepisa kuluezeza lika zende.—Mubale Maefese 3:20.

11. Mufe mutala wa yeñwi ya lisepiso za Mulimu zenebonahala inge kuli nelisike zakona kutalelezwa. (Mubone mbokisi yeli, “ Lisepiso Zeñwi Zenetalelelizwe Zenebonahala Inge Kuli Nelisike Zatalelezwa.”)

¹¹ Halunyakisiseñi lika zeñwi zanaasepisize kuezeza batu bahae kwamulaho Jehova zenebonahala inge kuli nelisike zakonahala kuezahala. Naabulelezi Abrahama ni Sara kuli nebakaba ni mwana wamushimani nihaike kuli nese basupezi. (Gen. 17:15-17) Hape naabulelezi Abrahama kuli bana bahae nebaka fiwa naha ya Kanana kuli bayahe mwateñi. Bana ba Abrahama, bona Maisilaele, nebabile batanga mwa Egepita ka nako yetelele, mi nekukona kubonahala inge kuli sepiso yeo neisike yatalelezwa. Kono neitalelelizwe. Hasamulaho, Jehova naabulezi kuli Elizabeta yanaali musupali naakaba ni mwana. Hape naabulelezi Maria yanaali mwalyanjo kuli naaka mupepela Mwana wamushimani, mi kupepwa kwa Mwana yo nekutalelelize sepiso yanaafile Jehova mwa simu ya Edeni lilimo zeñata-ñata kwamulaho.—Gen. 3:15.

12. Liñolo la Joshua 23:14 ni la Isaya 55:10, 11, libonisañi ka za maata anani ona Jehova?

¹² Haiba lunahanisisa mo Jehova naatalelelize lisepiso zahae kwamulaho, lukaba ni tumelo yetiile ya kuli unani maata a kutaleleza sepiso yahae ya kuli kukaba ni lifasi lelinca. (Mubale Joshua 23:14; Isaya 55:10, 11.) Haiba luba ni tumelo yetiile kuka lubela bunolo kutusa babañwi kuutwisisa kuli sepiso ya kuli kukaba ni lifasi lelinca haki ya kuikupulela feela kono ikatalelezwa. Jehova kasibili naabulezi cwana ka za mahalimu amanca ni lifasi lelinca: “Manzwi a asepahala mi ki a niti.”—Sin. 21:1, 5.

MUBE NI NAKO YA KUEZA LIKA ZA KWA MOYA

13. Mikopano ya puteho ikona kutiisa cwañi tumelo yaluna? Mutaluse.

¹³ Nzila yabulaalu yelukona kutiisa ka yona tumelo yaluna ki ka kubanga ni nako ya kueza lika za kwa moya. Ka mutala, halunyakisiseñi molutusezwa ki mikopano ya puteho. Kaizeli yabizwa Anna, b yasaabile mwa sebelezo ya nako kaufela ka lilimo zeñata ni kuikola matohonolo ashutana-shutana, utalusa kuli: “Mikopano initusa kuzwelapili kuba ni tumelo yetiile. Nihaikaba kuli mubuleli haana hande buikoneli bwa kuluta kamba hakuna litaba zenca zabulela, hañata kunani litaba zeñwi zeniutwanga zenitusanga kuutwisisa hande litaba za mwa Bibele, mi tumelo yaka yatiyanga.” Tumelo yaluna hape ikatiya haiba luteeleza kwa likalabo za mizwale ni likaizeli kwa mikopano.—Maro. 1:11, 12; 10:17.

14. Kukutaza kukona kutiisa cwañi tumelo yaluna?

¹⁴ Hape lukatiisa tumelo yaluna haiba lukutaza. (Maheb. 10:23) Kaizeli yabizwa Barbara yasaasebelelize Jehova ka lilimo zefitelela 70, utalusa kuli: “Nilemuhile kuli musebezi wa kukutaza utiisanga tumelo yaka. Kutaluseza babañwi ka za lisepiso za Jehova zende, kunitusa kuzwelapili kuba ni tumelo yetiile.”

15. Kuba ni tuto ya ka butu kukona kutiisa cwañi tumelo yaluna? (Mubone ni maswaniso.)

¹⁵ Halunyakisiseñi nto yeñwi yekona kutiisa tumelo yaluna, ili tuto ya ka butu. Kaizeli yabizwa Susan utalusa kuli kuba ni tomahanyo yebonisa fa kuezeza tuto ya ka butu kwamutusanga. Utalusa kuli: “La Sunda, niitukisezanga Tuto ya Tawala ya Mulibeleli yekaitutiwa sunda yetatama. La Mande ni la Bubeli, niitukisezanga mukopano wa mwahalaa sunda. Fa mazazi amañwi asiyezi, niitutanga taba yeñwi ka nako yenieza tuto ya ka butu.” Kuba ni tomahanyo ya kuituta sunda ni sunda, kutusanga bo Susan kuzwelapili kutiisa tumelo yabona. Kaizeli yabizwa Irene yasaasebelelize kwa ofisi yetuna yezamaisa musebezi waluna mwa lifasi kaufela ka lilimo zeñata, ulemuhile kuli kunyakisisanga bupolofita bwa mwa Bibele kutiisanga tumelo yahae. Utalusa kuli: “Kubona mobutalelelizwe bupolofita bwa Jehova kutiisanga tumelo yaka.” c

“IKATALELEZWA LULI”

16. Ki kabakalañi sepiso yanaafile Jehova ku Habakuki hai lutusa ni luna kacenu? (Maheberu 10:36, 37)

¹⁶ Batanga ba Jehova babañwi sebalibelezi mafelelezo a lifasi le ka nako yetelele. Batu babañwi bakona kunahana kuli Mulimu waliyeha kutaleleza sepiso yahae. Jehova waziba mobaikutwela batanga bahae, mi naataluselize mupolofita Habakuki kuli: “Pono yeo ilukiselizwe nako yayona yetomilwe, mi iliba ka lubilo kwa mafelelezo ayona, mi haina kupuma. Niha ikaliyeha, uilibelele! Kakuli ikatalelezwa  luli. Haina kuliyeha!” (Hab. 2:3) Kana Mulimu naabulezi manzwi ao kuli atuse feela Habakuki? Kamba kana manzwi ao alutusa ni luna kacenu? Ka kususumezwa ki moya wa Mulimu, muapositola Paulusi naabonisize kuli manzwi ao akona kutusa Bakreste, babalibelela lifasi lelinca. (Mubale Maheberu 10:36, 37.) Kacwalo, niha kukona kubonahala inge kuli sepiso ya kuli lukapiliswa yaliyeha, lwaziba kuli: “Ikatalelezwa luli. Haina kuliyeha!”

17. Kaizeli yomuñwi naasebelisize cwañi kelezo yanaafile Jehova ku Habakuki?

¹⁷ Batanga ba Jehova babañata bazwezipili ‘kulibelela’ ka lilimo zeñata ka kusebelisa kelezo yanaafile Jehova ku Habakuki. Ka mutala, kaizeli yabizwa Louise naakalile kusebeleza Jehova ka 1939. Utalusa kuli: “Ka nako yeo, nenihupula kuli Armagedoni neika taha pili nisika feza kale sikolo sa sekondari. Kono nekusikaba cwalo. Ka lilimo zeñata, nifumani kuli kwatusa kubala litaba zenibiza kuli ‘litaba za batu bane balibelezi’—litaba za mwa Bibele zebulela za Nuwe, Abrahama, Josefa, ni babañwi bane banani kulibelela nako yetelele pili Jehova asika baezeza kale zanaa basepisize. Kulibelela kutusize na ni babañwi kuziba kuli lifasi lelinca li fakaufi luli.” Batanga ba Jehova babañwi babañata base bamusebelelize ka nako yetelele ni bona baikutwa cwalo.

18. Kubuha lika zebupilwe kukona kutiisa cwañi tumelo yaluna ya kuli lifasi lelinca likaba teñi?

¹⁸ Ki niti kuli sepiso ya kuli kukaba ni lifasi lelinca haisika talelezwa kale. Kono munahane za lika zeñwi zeliteñi zecwale ka linaleli, likota, lifolofolo, ni batu. Hakuna mutu yakona kukakanya kuli lika zeo kaufela liteñi, nihaike kuli ka nako yeñwi nelisiyo. Lika zeo liteñi kakuli Jehova ki yena yalibupile. (Gen. 1:1, 26, 27) Mulimu waluna hape ulusepisize kuli ukaeza lifasi lelinca. Ukataleleza sepiso yeo. Mwa lifasi lelinca, batu bakaikola bupilo kuya kuile inze banani mibili yepetahalile. Ka nako yatomile Mulimu, lifasi lelinca likaba teñi sina feela pupo hai liteñi kacenu.—Isa. 65:17; Sin. 21:3, 4.

19. Mukona kutiisa cwañi tumelo yamina?

¹⁹ Ka nako ya cwale, mueze momukonela kaufela kutiisa tumelo yamina. Muitebuhe mpo ya tiululo. Munahanisise maata anani ona Jehova. Mubange ni nako ya kueza lika za kwa moya. Haiba mueza cwalo, mukaba yomuñwi wa batu “babayola lisepiso ka tumelo ni pilu-telele yabona.”—Maheb. 6:11, 12; Maro. 5:5.