1. Ki lipuzo mañi zelukona kuipuza halunahanisisa lika kaufela zabupile Jehova?

HALUNAHANISISA lika kaufela zabupile Jehova, lukaikutwa sina mwanaaikutwezi muñoli wa samu Davida, yanaalapezi kuli: “Hanibona mahalimu ahao, misebezi ya minwana yahao, kweli ni linaleli zeulukisize, nili: mutu ki mañi kuli umuhupule, mi mwanaa mutu ki mañi kuli umubabalele?” (Samu 8:3, 4) Ka kuswana ni Davida, haiba luibapanya kwa linaleli zabupile Jehova, lukalemuha kuli lu babanyinyani hahulu mi lukaitebuha luli kuli Jehova waluisa pilu. Kono sina moluka itutela, Jehova naababalezi batu bapili, bo Adama ni Eva, mi naalukisize kuli babe mwa lubasi lwahae.

2. Jehova naabata kuli bana bahae bapili ba fa lifasi baezeñi?

² Bo Adama ni Eva neli bona bana ba Jehova bapili ba fa lifasi, mi Jehova neli yena Ndataa bona wa kwa lihalimu. Naafile bo mutu ni musalaa hae bao musebezi wa kueza. Mulimu naababulelezi kuli: “Mupepe mi muate, mutaze lifasi mi mubuse fahalimwaa lona.” (Gen. 1:28) Nebaswanela kubabalela bana babona ni lihae lene bapila ku lona. Bo Adama ni Eva hane bakautwa Mulimu ni kueza zanaatokwa, bona hamohocwalo ni bana babona nebaka zwelapili kuba mwa lubasi lwa Jehova kuya kuile.

3. Ki kabakalañi halubulela kuli bo Adama ni Eva nebafilwe tohonolo yetuna ya kuba mwa lubasi lwa Jehova?

³ Bo Adama ni Eva nebanani tohonolo yetuna ya kuba mwa lubasi lwa Jehova. Sina mokuboniselizwe kwa Samu 8:5 ni litaluso ze kwatasi, Davida naabulezi cwana ka za mutu yanaabupilwe ki Jehova: “Umuezize hanyinyani kuba mwatasaa mangeloi, mi umuapesize kuwani ya kanya ni likute.” Ki niti kuli  batu nebasika fiwa maata, butali, ni buikoneli bobuswana ni bwa mangeloi. (Samu 103:20) Nihakulicwalo, Jehova uapesize batu kuwani ya kanya ni likute. Munahane feela taba yeo! Kaniti luli, Jehova naafile bashemi baluna bapili bupilo bobunde.

4. Ki lika mañi zeneezahalile bakeñisa kuli bo Adama ni Eva nebasika utwa Jehova, mi lukanyakisisañi mwa taba ye?

 ⁴ Ka bumai, bo Adama ni Eva nebalatehezwi ki tohonolo ya kuba mwa lubasi lwa Jehova. Taba yeo neitahiselize bana babona butata bobutuna, sina feela moluka itutela mwa taba ye. Kono Jehova haasika cinca mulelo wahae ka za batu. Ubata kuli batu babaipeya kuutwa babe bana bahae kuya kuile. Pili, halunyakisiseñi mo Jehova aboniselize kuli walukuteka. Hasamulaho, lukanyakisisa zelukona kueza cwale kuli lubonise kuli lubata kuba mwa lubasi lwa Mulimu. Kihona lukanyakisisa limbuyoti zebaka ikola bana ba Jehova ba fa lifasi kuya kuile.

5. Lukona kubonisa cwañi kuli lwaitumela ku Mulimu kabakala kulubupa ka siswaniso sahae?

⁵ Jehova ubonisize kuli walukuteka ka kulubupa ka siswaniso sahae. (Gen. 1:26, 27) Bakeñisa kuli lubupilwe ka siswaniso sa Mulimu, lwakona kubonisa tulemeno totunde totuñata twanani tona totucwale ka lilato, mukekecima, busepahali, ni kuluka. (Samu 86:15; 145:17) Haluba ni tulemeno totucwalo, lubonisa kuli lwakuteka Jehova mi lwaitumela ku yena. (1 Pit. 1:14-16) Haiba lupila ka nzila yetabisa Ndataa luna wa kwa lihalimu, lukaba ni tabo. Hape Jehova ulubupile ka siswaniso sahae kuli alutuse kupila ka nzila yemutabisa, ilikuli luzwelepili kuba mwa lubasi lwahae.

6. Jehova naabonisize cwañi kuli naakuteka batu hanaabupa lifasi?

⁶ Jehova ululukiselize lihae lelinde hahulu. Lilimo-limo pili Jehova asika bupa kale mutu wapili, naamulukiselize lihae lelinde, lona lifasi. (Jobo 38:4-6; Jer. 10:12) Bakeñisa kuli Jehova unani sishemo ni bufani, ulufile lika zeñata zende ilikuli luikole bupilo. (Samu 104:14, 15, 24) Ka linako zeñwi, naanahanisisanga lika zanaabupile mi “abona kuli kulukile.” (Gen. 1:10, 12, 31) Naakutekile batu ka kubafa maata a “kubusa” lika kaufela zende zanaabupile fa lifasi. (Samu 8:6) Mulimu ubata kuli batu babapetahalile baikole kubabalela pupo yahae yende kuya kuile. Kana mwaitumelanga ku Jehova kamita kabakala mulelo wahae omunde wo?

7. Liñolo la Joshua 24:15 libonisa cwañi kuli batu banani tukuluho ya kuiketela za kueza?

⁷ Jehova ulufile tukuluho ya kuiketela za kueza. Lwakona kuiketela zeluka eza mwa bupilo. (Mubale Joshua 24:15.) Mulimu waluna yalilato, watabanga haluketa kumusebeleza. (Samu 84:11; Liprov. 27:11) Lwakona kuitusisa hande tukuluho yaluna mwa linzila zeshutana-shutana. Halunyakisiseñi mutala walutomezi Jesu.

8. Jesu naaitusisize cwañi tukuluho yahae ya kuiketela za kueza?

⁸ Lukona kulikanyisa mutala Jesu ka kubeya zebatokwa babañwi mwa sibaka sapili. Zazi leliñwi, Jesu ni baapositola bahae nebakatezi hahulu; kacwalo, baya kwa sibaka sesiñwi sesikuzize kuli bayo ipumulisa. Kono nebasika fumana nako ya kuipumulisa. Buñata bobutuna bwa batu babalatelela kakuli nebabata kulutiwa ki Jesu. Niteñi, Jesu naasika filikanywa ki taba yeo. Kono naabashwezi makeke. Kacwalo, ki lika mañi zanaaezize ka za teñi? “Akala kubaluta lika zeñata.” (Mare. 6:30-34) Haiba lulikanyisa Jesu ka kuitombola nako ni  maata aluna kuli lutuse babañwi, lukakanyisa Ndataa luna ya kwa lihalimu. (Mat. 5:14-16) Hape halueza cwalo lubonisa Jehova kuli lubata kuba mwa lubasi lwahae.

9. Jehova ufile batu buikoneli mañi bobuipitezi?

⁹ Jehova ufile batu buikoneli bwa kuba ni bana, mi hape ubafile buikalabelo bwa kutusa bana kumulata ni kumusebeleza. Haiba mu bashemi, kana mwaitebuha tohonolo yetuna yemufilwe yeo? Nihaike kuli Jehova ufile mangeloi buikoneli bobuñata bobuipitezi, haasika afa tohonolo yeo. Kacwalo, haiba mu bashemi, muitebuhe tohonolo yemunani yona ya kuba ni bana. Bashemi bafilwe buikalabelo bwa butokwa bwa kuhulisa bana babona ka “kalimelo ni kelezo ya Jehova.” (Maef. 6:4; Deut. 6:5-7; Samu 127:3) Kopano ya Mulimu ilukisize liitusiso zeñata zetomile fa Bibele zecwale ka lihatiso, mavidio, lipina, ni litaba za fa Intaneti kuli ituse bashemi. Kaniti luli, Ndataa luna wa kwa lihalimu ni Mwanaa hae baanga babanca kuba ba butokwa. (Luka 18:15-17) Jehova watabanga bashemi habaitinga ku yena ni kueza mobakonela kaufela kubabalela bana bababona babalatwa. Ka kueza cwalo, bashemi bao batusanga bana babona kuli kwapili babe ni tohonolo ya kuba mwa lubasi lwa Jehova kuya kuile!

10-11. Ki tohonolo mañi yelunani yona kabakala kuli Jehova naalufile Mwanaa hae sina tiululo?

¹⁰ Jehova naafile Mwanaa hae wa butokwa hahulu sina tiululo ilikuli lube mwa lubasi lwahae hape. Sina molunyakisiselize mwa  paragilafu 4, bo Adama ni Eva hamohocwalo ni bana babona nebalatehezwi ki tohonolo ya kuba mwa lubasi lwa Jehova. (Maro. 5:12) Bo Adama ni Eva nebaketile kusautwa Mulimu ka bomu; kacwalo, nebaswanela kuzwisiwa mwa lubasi lwahae. Kono ki lika mañi zeneka ezahala kwa bana babona? Jehova ka lilato alukisa kuli bana babona bane bakaipeya kuutwa baañulwe ni kuba mwa lubasi lwahae. Mi naaezize cwalo ka kuluma Mwanaa hae wa libanda, yena Jesu Kreste, kuli afe bupilo bwahae sina tiululo. (Joa. 3:16; Maro. 5:19) Bakeñisa sitabelo sa tiululo sanaafile Jesu, batu babasepahala ba 144,000 baañuzwi sina baana ba Mulimu.—Maro. 8:15-17; Sin. 14:1.

¹¹ Hape batu babañata-ñata babasepahala basweli baipeya kuutwa Mulimu ka kueza tato yahae. Banani sepo ya kuungiwa sina bana ba Mulimu luli hase batiyezi tiko ya mafelelezo hamulaho wa Puso ya Kreste ya Lilimo ze 1,000. (Samu 25:14; Maro. 8:20, 21) Bakeñisa kuli banani sepo yeo, nihaiba ka nako ya cwale, babiza Jehova, yena Mubupi wabona kuli ‘Ndate.’ (Mat. 6:9) Babaka zusiwa kwa bafu ni bona bakafiwa kolo ya kuituta zabata Jehova kuli baeze. Babaka latelela ketelelo yahae ni bona hamulaho wa nako bakafiwa tohonolo ya kuba mwa lubasi lwahae.

12. Ki puzo mañi yeluka nyakisisa cwale?

¹² Sina mose lunyakisiselize, Jehova uezize lika zeñata zebonisa kuli wakuteka batu. Uañuzi kale Bakreste babatozizwe kuba bana bahae, mi ufile “buñata bobutuna bwa batu” tohonolo ya kuba bana bahae luli mwa lifasi lelinca. (Sin. 7:9) Ki lika mañi zeluswanela kueza cwale kuli lubonise Jehova kuli lubata kuba mwa lubasi lwahae kuya kuile?

13. Ki nto mañi yeluswanela kueza kuli lube mwa lubasi lwa Mulimu? (Mareka 12:30)

¹³ Mubonise kuli mwalata Jehova ka kumusebeleza ka pilu yamina kaufela. (Mubale Mareka 12:30.) Mulimu ulufile lika zeñata, kono mpo yetuna ka kufitisisa yalufile ki tohonolo ya kumulapela. Lubonisa Jehova kuli lwamulata ka ‘kumamela milao yahae.’ (1 Joa. 5:3) Jesu naalulaezi kuluta batu kuba balutiwa,  kubakolobeza, sina feela mwanaa mulaelezi Ndatahe. (Mat. 28:19) Hape naalulaezi kuli lulatane. (Joa. 13:35) Jehova ukaamuhela batu kaufela babamamela milao yahae mwa lubasi lwahae lwa mwa lifasi kaufela.—Samu 15:1, 2.

14. Lukona kubonisa cwañi kuli lwalata batu babañwi? (Mateu 9:36-38; Maroma 12:10)

¹⁴ Mubonise kuli mwalata batu babañwi. Lilato ki kona kalemeno ka Jehova ka butokwa hahulu. (1 Joa. 4:8) Jehova naabonisize kuli walulata mane pili luna lusika muziba kale. (1 Joa. 4:9, 10) Lukona kumulikanyisa ka kubonisa babañwi kuli lwabalata. (Maef. 5:1) Nzila yeñwi yende hahulu yelukona kubonisa ka yona kuli lwalata batu ki ka kubatusa kuituta ka za Jehova pili mafelelezo asika taha kale. (Mubale Mateu 9:36-38.) Halueza cwalo, lubatusa kuziba zebaswanela kueza kuli babe mwa lubasi lwa Mulimu. Mutu hasaakolobelizwe, luswanela kuzwelapili kumulata ni kumukuteka. (1 Joa. 4:20, 21) Lukona kueza cwañi cwalo? Nzila yeñwi yelukona kueza cwalo ka yona ki kubonisa kuli lumusepile. Ka mutala, haiba lupalelwa kuutwisisa libaka haezize nto yeñwi, haluna kunahana kuli uezize cwalo kabakala kuli unani buitati kamba kuli unani milelo yemaswe. Kono haiba lumusepa, lukabonisa kuli lwamukuteka ka kuunga kuli uziba hande miinelo kulufita.—Mubale Maroma 12:10; Mafil. 2:3.

15. Ki bo mañi boluswanela kubonisa makeke ni sishemo?

¹⁵ Mubonise makeke ni sishemo kwa batu kaufela. Haiba lubata kuba mwa lubasi lwa Jehova kuya kuile, luswanela kusebelisa zeluituta mwa Linzwi la Mulimu. Ka mutala, Jesu naalutile kuli luswanela kubonisa makeke ni sishemo kwa batu kaufela, kukopanyeleza cwalo ni lila zaluna. (Luka 6:32-36) Kono fokuñwi kukona kulubela taata kueza cwalo. Haiba ki cwalo, luswanela kulikanyisa mubonelo wanaanani ona Jesu ni lika zanaaezanga. Haiba lueza molukonela kaufela kuutwa Jehova ni kulikanyisa Jesu, lukabonisa Ndataa luna wa kwa lihalimu kuli lubata kuba mwa lubasi lwahae kuya kuile.

16. Lukona kubukeleza cwañi libizo la lubasi lwa Jehova?

¹⁶ Mubukeleze libizo la lubasi lwa Jehova. Mwa lubasi, mwanana hañata ulikanyisanga zaeza muhulwanaa hae. Haiba yomuhulu asebelisa likuka za mwa Bibele mwa bupilo bwahae, ukatomela munyanaa hae mutala omunde. Kono haiba yomuhulu aeza lika zemaswe, munyanaa hae ni yena ukona kulikanyisa mutala wahae omaswe. Nto yeswana yakona kuezahala ni mwa lubasi lwa Jehova. Ka mutala, haiba Mukreste yomuñwi yasepahala aba mukwenuheli kamba akala kupila ka muzamao wa buhule kamba kueza lika zeñwi zemaswe, babañwi bakona kulikanyisa mutala wahae omaswe. Batu babaeza cwalo, basinya libizo la lubasi lwa Jehova. (1 Mates. 4:3-8) Lusike lwalikanyisa mutala wa batu babamaswe kamba kutuhelela nto ifi kamba ifi kusinya silikani saluna ni Ndataa luna ya kwa lihalimu yalilato.

17. Ki mubonelo mañi oluswanela kuambuka, mi ki kabakalañi?

¹⁷ Musepe Jehova isiñi lika za kwa mubili. Jehova usepisa kuli uka lutusa kuba ni lico, liapalo, ni malobalo haiba lubata pili Mubuso wahae mwa bupilo bwaluna ni kupila ka likuka zahae zelukile. (Samu 55:22; Mat. 6:33) Haiba lusepa sepiso yahae yeo, haluna kunahana kuli lika za kwa mubili za lifasi le lika lusileleza ni kulutusa kuba ni tabo mwa bupilo. Lwaziba kuli kueza tato ya Jehova mwa bupilo bwaluna ki yona feela nto yekona kulutusa kuba ni kozo ya mwa munahano. (Mafil. 4:6, 7) Niha lukona kuleka lika kaufela zelubata,  luswanela kunyakisisanga haiba lunani nako ni maata a kuitusisa zona ni kulibabalela. Kacwalo, luswanela kuipuza kuli: ‘Kana nilata hahulu lika zeniluwile?’ Luswanela kuhupula kuli Mulimu ulufile musebezi wa kueza mwa lubasi lwahae. Kacwalo, haluswaneli kuyaululwa ki lika lisili. Kaniti, halubati kueza sina mwanaaezelize mutangana yomuñwi yanaahanile memo ya kusebeleza Jehova ni kuañulwa ki yena sina yomuñwi wa bana bahae kabakala kuli naalata hahulu sifumunyana sa lifasi sanaanani ona!—Mare. 10:17-22.

18. Batu babaipeya kuutwa bakaikola tohonolo mañi yetuna, mi ki limbuyoti zecwañi zebaka ikola kuya kuile?

¹⁸ Batu babaipeya kuutwa bakaikola tohonolo yetuna ka kufitisisa, yona ya kulata Jehova ni kumusebeleza kuya kuile! Babanani sepo ya kupila fa lifasi hape bakaikola kubabalela lifasi lelinde le lanaa balukiselize Jehova kuli libe lihae labona. Hona cwale-cwale fa, lifasi le ni lika kaufela zefumaneha ku lona likafetulwa kuba zende hahulu halika busiwa ki Mubuso wa Mulimu. Jesu ukafelisa lika kaufela zemaswe zetahisizwe ki bo Adama ni Eva bane baikatulezi kuzwa mwa lubasi lwa Mulimu. Jehova ukazusa batu babañata-ñata kwa bafu ni kubafa kolo ya kupila kuya kuile fa lifasi lelinde lelili paradaisi inze banani mibili yepetahalile. (Luka 23:42, 43) Batu kaufela babali mwa kalulo ya fa lifasi ya lubasi lwa Jehova habaka petahala, bakaba ni “kanya ni likute” sina feela mwanaabulelezi Davida.—Samu 8:5.

19. Ki nto mañi yeluswanela kunahanisisanga?

¹⁹ Haiba mubalelwa ku ba “buñata bobutuna bwa batu,” uzibe munani sepo yende luli. Mulimu wamilata; ubata kuli mube mwa lubasi lwahae. Kacwalo, mueze momukonela kaufela kumutabisa. Zazi ni zazi munahanisisange lika zamisepisize Mulimu. Haike muitebuhe tohonolo yemunani yona ya kusebeleza Ndataa luna wa kwa lihalimu yalilato ni ya kumulumbeka kuya kuile!