1. Ki lika mañi zende zebapetile babanca babañata?

 SILIMO ni silimo, Bakreste babañata babasali babanca bakolobezwanga. Kana muungile muhato wo? Haiba ki cwalo, uzibe mutabisize mizwale ni likaizeli bamina, mi Jehova ni yena utabile luli! (Liprov. 27:11) Munahane ka za lika zeñata zende zese mupetile. Mwendi semuitutile Bibele ka tokomelo ka lilimo zeñata. Kueza cwalo mwendi neku mikolwisize kuli Bibele ki Linzwi la Mulimu. Mi sa butokwa nikufita kikuli, kuituta Bibele kumitusize kuziba ni kulata Musimululi wa buka yeo. Lilato lamina ku Jehova nelitiile hahulu kuli mane mwaikatulela kuineela ku yena ni kukolobezwa. Nemuezize katulo yende luli!

2. Lukanyakisisañi mwa taba ye?

 ² Kusina kukakanya, tumelo yamina neilikilwe mwa linzila zeñata musika kolobezwa kale. Kono hamunze muhula, mukakopana ni litiko zeñwi. Satani ukalika kufokolisa lilato lamina ku Jehova ni kumipaleliswa kumusebeleza. (Maef. 4:14) Musike mwamulumeleza kueza cwalo. Ki lika mañi zekona kumitusa kuzwelapili kusepahala ku Jehova ni kupeta buitamo bone muezize hane muineezi ku yena? Muswanela kuzwelapili kueza zwelopili ni ‘kueza ka taata’ kuli mube Bakreste babahulile kwa moya. (Maheb. 6:1) Kono mukona kueza cwañi cwalo? Mwa taba ye, lukanyakisisa momukona kuezeza cwalo.

3. Ki zwelopili yecwañi yebaswanela kueza Bakreste kaufela hamulaho wa kolobezo?

³ Hamulaho wa kolobezo, kaufelaa luna lutokwa kusebelisa kelezo yanaafile muapositola Paulusi kwa Bakreste ba mwa  Efese. Naabasusuelize kuba Bakreste ‘babahulile’ kwa moya. (Maef. 4:13) Fo naatalusa kuli nebaswanela kuzwelapili kueza zwelopili ya kwa moya. Paulusi naabapanyize zwelopili ya kwa moya ku zeezahalanga ku mwanana hanzaa hula. Bashemi babanga ni tabo yetuna hababa ni mbututu. Kono haana kuzwelapili kuba mbututu. Hamulaho wa nako, ukatokwa ‘kutuhela mikwa ya bwanana.’ (1 Makor. 13:11) Bakreste ni bona baswanela kueza nto yeswana. Hamulaho wa kolobezo, luswanela kuzwelapili kueza zwelopili ya kwa moya. Halunyakisiseñi liakalezo zeñwi zeka lutusa kueza cwalo.

4. Ki nto mañi yekona kumitusa kueza zwelopili ya kwa moya? Mutaluse. (Mafilipi 1:9)

⁴ Muzwelepili kutiisa lilato lamina ku Jehova. Ki niti kuli Jehova mwamulata luli. Kono mwakona kumulata hahulu nikufita. Ka mukwa ufi? Muapositola Paulusi ubonisa nzila yeñwi yelukona kueza cwalo ka yona, sina mokuñolezwi kwa Mafilipi 1:9. (Mubale.) Paulusi naalapezi kuli lilato la Bakreste ba kwa Filipi “lizwelepili kuekezeha.” Kacwalo, lilato laluna ku Mulimu lakona kuekezeha. Lukona kueza cwalo ka kuba ni “zibo yenepahezi ni temuho yetezi.” Haiba luziba hande Jehova, luka mulata hahulu mi lukaitebuha butu bwahae ni mwaezeza lika. Lukabata hahulu kumutabisa mi lukatokolomoha nto ifi kamba ifi yatoile. Lukaeza molukonela kaufela kuutwisisa zabata kuli lueze ni molukona kuezeza cwalo.

5-6. Lukona kutiisa cwañi lilato laluna ku Jehova? Mutaluse.

⁵ Lilato laluna ku Jehova likatiya hahulu haiba luziba hande Mwanaa hae, yanaalikanyisize butu bwa Ndatahe ka kutala. (Maheb. 1:3) Nzila yende yelukona kuziba ka yona Jesu ki ka kuituta libuka zeene za Evangeli. Haiba hamusika kalisa kubalanga Bibele zazi ni zazi, neikaba hande hane mukakalisa kueza cwalo honafa. Hamunze mubala litaba ka za Jesu, muise hahulu mamelelo kwa tulemeno twahae. Naaatumeleha; ka lilato naasweli banana mwa mazoho ahae. (Mare. 10:13-16) Naatusize balutiwa bahae kuikutwa kulukuluha; neba mutalusezanga mone baikutwela kaufela. (Mat. 16:22) Ka kueza cwalo, Jesu naalikanyisize Ndatahe wa kwa lihalimu. Jehova ni yena waatumeleha luli. Lwakona kumuatumela ka tapelo. Halulapela ku yena, lwakona kumutaluseza lika kaufela ze mwa pilu yaluna. Lunani buikolwiso bwa kuli haana kuluatula. Walulata, mi waluisa pilu.—1 Pit. 5:7.

⁶ Jesu naashwelanga batu makeke. Muapositola Mateu naañozi kuli: “Habona buñata, abashwela makeke, kakuli nebaziyelehile ni kuhasana sina lingu zesina mulisana.” (Mat. 9:36) Mi Jehova yena uikutwa cwañi? Jesu naabulezi kuli: “Haki nto yetabisa ku Ndate ya kwa lihalimu kuli nihaiba alimuñwi ku babanyinyani bao ashwe.” (Mat. 18:14) Manzwi ao aomba-omba luli! Halunze luziba hande Jesu, lilato laluna ku Jehova likatiya hahulu.

7. Kueza siango ni Bakreste babahulile kwa moya kukona kumitusa cwañi?

⁷ Nto yeñwi yeka mitusa kuli lilato lamina ku Jehova liekezehe ni kuli mueze zwelopili ya kwa moya, ki kutanda nako ni mizwale ni likaizeli bamina mwa puteho babahulile kwa moya ni kubaziba hande. Mulemuhe tabo yebanani yona. Habainyazi kuli nebaikatulezi kusebeleza Jehova. Mubakupe kuli bamitaluseze lika zeñwi zebaikozi mwa sebelezo yabona ku Jehova. Hamubata kueza katulo ya butokwa, mukupe kelezo ku bona. Muhupule kuli “lika zakonda hakunani baelezi babañata.”—Liprov. 11:14.

8. Ki lika mañi zemukona kueza haiba mukakanya litaba zeibulela Bibele?

 ⁸ Mutuhele kukakanya. Sina mokuboniselizwe mwa  paragilafu 2, Satani ukaeza mwakonela kaufela kuli amipaleliswe kueza zwelopili ya kwa moya. Nzila yeñwi yakona kueza cwalo ka yona ki ka kutahisa kuli mukale kukakanya litaba zeñwi za mwa Bibele zemuitutile. Ka mutala, batu babañwi bakona kumitaluseza za tuto ya kuli lika nelitahile ka kuipilaula, ili tuto yeshwaulisa Mulimu. Mwendi hane musali banana, nemusika isa hahulu pilu kwa tuto yeo, kono cwale hase muhulile, mwendi musweli mwalutiwa ka za teñi kwa sikolo. Litaba zeba mitaluseza baluti bamina ka za kuli lika kaufela nelitahile ka kuipilaula likana zautwahala inge kuli ki za niti mi zakolwisa. Nihakulicwalo, mwendi habasika nyakisisa ka tokomelo bupaki bobubonisa kuli kunani Mubupi. Muhupule sikuka sesifumaneha kwa Liproverbia 18:17 sesili: “Yakala kubulela taba yahae ukabonahala inge yabulela niti, kufitela yazeka ni yena ataha ni kuto mubuza lipuzo.” Mwa sibaka sa kulumela feela litaba kaufela zemutalusezwa kwa sikolo kuli ki za niti, muswanela kunyakisisa ka tokomelo litaba za niti zefumaneha mwa Linzwi la Mulimu, yona Bibele. Mueze lipatisiso mwa lihatiso zaluna. Muambole ni mizwale ni likaizeli bane balumelanga kuli lika kaufela nelitahile ka kuipilaula. Mubakupe kutalusa zenee bakolwisize kuli kunani Mubupi yalulata. Lipuisano zecwalo zakona kumitusa kulumela kuli kunani Mubupi.

9. Muitutañi ku zene baipumani ku zona bo Melissa?

⁹ Kaizeli yabizwa Melissa naatusizwe hahulu ki lipatisiso zanaaezize ka za pupo. b Utalusa kuli: “Kwa sikolo, baluti balutanga tuto ya kuli lika kaufela nelitahile ka kuipilaula ka nzila yebonisa inge kuli tuto yeo ki ya niti. Kwa makalelo, nenisa tabeli kueza lipatisiso. Nenisaba kuli mwendi nenika fumana litaba zenepaka kuli tuto ya kuli lika nelitahile ka kuipilaula ki ya niti. Kono Jehova haabati kuli lulumele feela ka za hae kusina bupaki. Kacwalo, naeza lipatisiso kuli nituhele kukakanya. Nabala buka yetalusa ka za haiba kunani Mubupi yaluisa pilu (Is There a Creator Who Cares About You?) ni broshuwa ya Lipuzo ze 5 ka za Mone Bukalezi Bupilo ni yeñwi yebulela ka za simuluho ya lika zepila (Was Life Created?).  Kueza cwalo neku nitusize luli. Niinyaza kuli nenisika eza cwalo kapili.”

10-11. Ki lika mañi zekona kumitusa kuzwelapili kuba ni muzamao okenile? (1 Matesalonika 4:3, 4)

¹⁰ Muambuke muzamao omaswe. Mutu haali mwa lilimo za kunonoboka, ukona kuba ni takazo yetuna ya kueza somano, mi batu babañwi bakona kumukukueza hahulu kuli aikenye mwa muzamao wa buhule. Satani ubata kuli mukulise takazo yamina. Ki lika mañi zekona kumitusa kuzwelapili kuba ni muzamao okenile? (Mubale 1 Matesalonika 4:3, 4.) Hamulapela ku Jehova, mumutaluseze momuikutwela. Mumutaluseze ze mwa pilu yamina kaufela, mi mumukupe kuli amituse kuitiisa. (Mat. 6:13) Muhupule kuli Jehova ubata kumitusa, isiñi kumiatula. (Samu 103:13, 14) Linzwi la Mulimu hape lakona kumitusa. Bo Melissa, bababulezwi kwamulaho, neku babezi taata kutuhela kunahana za buhule. Batalusa kuli: “Kubalanga Bibele zazi ni zazi neku nitusize kuzwelapili kuitiisa kuli nisike nakomiwa ki litakazo zemaswe. Kueza cwalo neku nitusize kuhupula kuli ni mutangaa Jehova ni kuli nitokwa tuso yahae.”—Samu 119:9.

¹¹ Musike mwalika kutatulula butata bomunani bona munosi. Muambole ni bashemi bamina ka za butata bomunani bona. Ki niti kuli kuambola litaba za ka butu zecwalo kutaata, kono kueza cwalo kuka mitusa. Bo Melissa batalusa kuli: “Nenilapezi ku Jehova kuli anife bundume mi hasamulaho, naambola ni bo ndate ka za butata bone ninani bona. Hamulaho wa kueza cwalo, neniikutwile hahulu kuimuluha. Neniziba kuli nenitabisize Jehova.”

12. Ki lika mañi zekona kumitusa kueza likatulo zende?

¹² Muetelelwe ki likuka za mwa Bibele. Nako hainze iya, mukaba ni tukuluho yeñata ya kuikezeza likatulo. Kono kunani lika zeñata zemu satokwa kuituta mwa bupilo. Ki lika mañi zekona kumitusa kusaeza katulo yekasinya silikani samina ni Jehova? (Liprov. 22:3) Kaizeli yabizwa Kari utalusa zene mutusize kueza likatulo zende. Naalemuhile kuli Bakreste babahulile kwa moya habatokwi kufiwa milao mwa miinelo kaufela. Utalusa kuli: “Nenitokwa kuutwisisa likuka za mwa Bibele kufita feela kulatelela milao.” Hamubala Bibele, muipuze kuli: ‘Taba ye, inilutañi ka za mwanahanela Jehova? Kana initusa kuziba likuka zeñwi zeka nitusa kuba ni muzamao omunde? Haiba ki cwalo, kusebelisa likuka zeo kuka nitusa cwañi?’ (Samu 19:7; Isa. 48:17, 18) Haiba mubala Bibele ni kunahanisisa likuka zefumaneha mwateñi, kuka mibela bunolo kueza likatulo zetabisa Jehova. Hamunze mueza zwelopili ya kwa moya, mukalemuha kuli hamutokwi mulao mwa muinelo kaufela bakeñisa kuli mukautwisisa mwaangela Jehova lika.

13. Kuba ni balikani babande kukona kumitusa cwañi? (Liproverbia 13:20)

¹³ Mukete balikani babalata Jehova. Sina mokuboniselizwe mwa paragilafu 7, batu bomueza bulikani ni bona bakona kumitusa kuba Bakreste babahulile kwa moya kamba kutokwa. (Mubale Liproverbia 13:20.) Kaizeli yabizwa Sara naanzaa felelwa ki tabo. Mi cwale kwaezahala nto yeñwi yenetahisize kuli abe ni tabo hape. Bo Sara batalusa kuli: “Nenifumani balikani babande ka nako yeswanela. Na ni kaizeli yomuñwi yasali yomunca neluitukisezanga hamoho tuto ya Tawala ya Mulibeleli sunda ni sunda. Mulikanaaka yomuñwi naanitusize kukalisa kualabanga kwa mikopano ya puteho. Balikani baka neba nitusize kukalisa kuezanga tuto ya ka butu ni kulapelanga kamita. Nakala kutiisa silikani saka ni Jehova mi kueza cwalo neku nitusize kuba ni tabo hape.”

14. Ki lika mañi zenetusize Muzwale Julien kuba ni balikani babande?

 ¹⁴ Ki lika mañi zekona kumitusa kuba ni balikani babaka misusueza kueza lika zende? Muzwale yabizwa Julien, yali muuna-muhulu cwale, utalusa kuli: “Hane nisali mwanana, nenibile ni balikani babande ka nako yene nisebeza ni mizwale ni likaizeli mwa bukombwa. Balikani baka bao nebanani tukufalelo, mi neba nitusize kuikola bukombwa. Naitomela sikonkwani sa kusebeza sina paina. Hape nenilemuhile kuli kutanda nako ni litaka zaka feela neku nipaleliswa kuikola siango sesinde ni kuba ni balikani babañwi babande. Hamulaho wa nako, naba ni balikani babañwi babande fa Betele. Mutala wabona omunde neu nitusize kuketa hande lika za kuitabisa ka zona mi silikani saka ni Jehova satiya hahulu.”

15. Ki temuso mañi yanaafile Paulusi ku Timotea ka za liango? (2 Timotea 2:20-22)

¹⁵ Kono kucwañi haiba mulemuha kuli mutu yomuñwi mwa puteho haki mulikani yomunde? Paulusi naaziba kuli batu babañwi mwa puteho ya Sikreste mwa linako za baapositola nebasa isi pilu kwa lika za kwa moya; kacwalo, alemusa Timotea kutokolomoha batu bao. (Mubale 2 Timotea 2:20-22.) Silikani saluna ni Jehova ki sa butokwa hahulu. Luezize ka taata kuli lube ni silikani sesinde ni Ndataa luna ya kwa lihalimu; kacwalo, haluswaneli kulumeleza mutu ufi kamba ufi kusinya silikani seo.—Samu 26:4.

16. Ki likonkwani zecwañi zemuswanela kuitomela?

¹⁶ Muitomele likonkwani zende. Muitomele likonkwani zekatiisa tumelo yamina ni kumitusa kuhula kwa moya. (Maef. 3:16) Ka mutala, mwakona kuitomela sikonkwani sa kuezanga tuto ya ka butu ni kubalanga Bibele kamita. (Samu 1:2, 3) Kamba mwakona kuitomela sikonkwani sa kulapelanga kamita ni kufa litapelo zezwelela kwatasaa pilu. Mwendi mutokwa kutokomela hahulu lika zemuitabisa ka zona ni momuitusiseza nako yamina. (Maef. 5:15, 16) Jehova ukaba ni tabo hakabona buikatazo bomueza bwa kueza zwelopili ya kwa moya.

17. Mukatusiwa cwañi haiba mutusa babañwi?

 ¹⁷ Kutusa batu babañwi kuka mitusa kuba Bakreste babahulile kwa moya. Jesu naabulezi kuli: “Kunani tabo yetuna mwa kufana yefita ye mwa kufiwa.” (Lik. 20:35) Mukaba ni tabo yetuna haiba muitusisa nako ni maata amina kutusa babañwi. Ka mutala, mwakona kuitomela sikonkwani sa kutusa basupali ni babanani mapongo mwa puteho yamina. Mwendi mwakona kubatusa ka kubalekela lika zeñwi zebatokwa kamba kubatusa kuziba mwakuitusiseza tupangaliko twabona. Haiba mu mizwale, muitomele sikonkwani sa kuba sikombwa sa puteho kuli mutuse mizwale ni likaizeli bamina. (Mafil. 2:4) Hape mukabonisa kuli mwalata batu babasi Lipaki za Jehova ka kukutaza taba yende ya Mubuso ku bona. (Mat. 9:36, 37) Haiba kukonahala, muitomele sikonkwani sa kuba paina wa kamita, kusebeleza fa Betele, kamba kutusa mwa musebezi wa kuyaha miyaho ya Mubuso.

18. Kuba mwa sebelezo ya nako kaufela kukona kumitusa cwañi kuhula kwa moya?

¹⁸ Kuba mwa sebelezo ya nako kaufela kuka mitusa kueza zwelopili ya kwa moya. Kusebeza sina paina kuka mikonisa kukena Sikolo sa Bakutazi ba Mubuso. Hape mwakona kukupiwa kusebeleza fa Betele kamba kutusa mwa musebezi wa kuyaha miyaho ya Mubuso. Kaizeli yasali yomunca yali paina yabizwa Kaitlyn utalusa kuli: “Kutandanga nako mwa bukombwa ni mizwale ni likaizeli babanani yeloseli neku nitusize hahulu kuhula kwa moya hamulaho wa kolobezo. Mutala wabona neu nitusize kuutwisisa hande litaba za mwa Bibele ni kuekeza kwa buikoneli bwaka bwa kuluta.”

19. Ki limbuyoti mañi zemuka ikola haiba muzwelapili kueza zwelopili ya kwa moya?

¹⁹ Hamunze muzwelapili kueza zwelopili ya kwa moya, mukaikola limbuyoti zeñata. Kueza cwalo kuka mitusa kuitusisa hande nako yamina hamusali babanca mi mukatokolomoha lika zesina tuso. (1 Joa. 2:17) Hamuna kuutwa butuku bobautwanga babañwi kabakala kueza likatulo zemaswe. Kono mukakondisa luli mwa bupilo mi mukaba ni tabo. (Liprov. 16:3) Mutala wamina omunde ukasusueza mizwale ni likaizeli bamina kaufela, babahulu ni banana. (1 Tim. 4:12) Kono sa butokwa nikufita kikuli, mukaba ni kozo ya mwa munahano ni tabo kabakala kuli mutabisa Jehova mi munani silikani sesinde ni yena.—Liprov. 23:15, 16.