1. Lukatusiwa cwañi haiba luambola ni babañwi mone kutezi kuli lutahe “mwa niti”?

 KUSINA kukakanya, mwendi batu babañwi seba mibuzize puzo ye hañata-ñata: “Nemutile cwañi mwa niti?” Yeo ki yeñwi ya lipuzo zapili zakona kulubuza muzwale kamba kaizelaa luna yabata kuluziba hande. Lubata kuziba mone kutezi kuli mizwale ni likaizeli baluna baitute ka za Jehova ni kumulata, mi lutabelanga kubataluseza moluungela niti. (Maro. 1:11) Lipuisano zecwalo lilutusanga kuzwelapili kuitebuha niti. Hape lilutusa kuikatulela ‘kuzwelapili kuzamaya mwa niti,’ fo kikuli, kuzwelapili kupila ka nzila yetabisa Jehova ni yetahisa kuli alufuyaule.—3 Joa. 4.

2. Lukanyakisisañi mwa taba ye?

² Mwa taba ye, lukanyakisisa mabaka amañwi atahisa kuli lulate niti. Hasamulaho, lukanyakisisa molukona kuboniseza kuli lwalata mpo ya butokwa ye. Kusina kukakanya, kueza cwalo kuka lutusa kuitebuha hahulu zanaaezize Jehova ka kuluhohela mwa niti. (Joa. 6:44) Hape kuka lutusa kulemuha libaka hakuli kwa butokwa kuluta babañwi niti.

3. Ki lifi libaka la butokwa hahulu halulata niti?

³ Kunani mabaka amañata halulata niti. Libaka la butokwa nikufita kikuli, lulata Jehova Mulimu, yena Simbule sa niti. Linzwi lahae, yona Bibele, lilutusize kumuziba, isiñi feela sina Mubupi yamaata kaufela yabupile lihalimu  ni lifasi kono hape sina Ndataa luna yalilato ya kwa lihalimu, ili yaluisa pilu. (1 Pit. 5:7) Lwaziba kuli Mulimu waluna ki “yanani makeke ni mukekecima, yasaakufi kuhalifa ni yatezi lilato lelisa feli ni niti.” (Exo. 34:6) Jehova ulata katulo yelukile. (Isa. 61:8) Uikutwanga hahulu bumaswe kulubona halunyanda mi unyolelwa hahulu nako yeo yakafelisa manyando kaufela mi ukaeza cwalo ka nako yatomile. (Jer. 29:11) Yeo ikaba nako yende luli! Ki lona libaka halulata hahulu Jehova!

4-5. Ki kabakalañi muapositola Paulusi hanaabapanyize sepo yaluna kwa ankora?

⁴ Ki lifi libaka leliñwi halulata niti? Niti yalutusa luli mwa bupilo bwaluna. Halunyakisiseñi mutala wo. Niti ya mwa Bibele ikopanyeleza ni sepo yaluna ya za kwapili. Kuli abonise butokwa bwa sepo yeo, muapositola Paulusi naañozi kuli: “Sepo yelunani yona ye, iswana sina ankora ya bupilo bwaluna, yesepahala ni yetiile.” (Maheb. 6:19) Sina feela ankora haikona kutusa kuli sisepe sisike sakuka, sepo yaluna ya mwa Bibele ikona kulutusa kuitiisa halukopana ni miinelo yetaata mwa bupilo.

⁵ Mwa liñolo le, Paulusi naatalusa sepo yebanani yona Bakreste babatozizwe ya kuyo pila kwa lihalimu. Kono manzwi ahae hape akona kutusa ni Bakreste babanani sepo ya kupila kuya kuile mwa paradaisi fa lifasi. (Joa. 3:16) Kaniti luli, kuituta za sepo ya bupilo bobusa feli kulutusize kuba ni tabo mwa bupilo.

6-7. Kuituta niti ya za kwapili kutusize cwañi Kaizeli Yvonne?

⁶ Halunyakisiseñi zanaakopani ni zona kaizeli yomuñwi yabizwa Yvonne. Naasika hulisezwa mwa niti, mi naasaba lifu hanaasali mwanana. Usahupula manzwi amañwi anaabalile, ali: “Zazi leliñwi nikashwa.” Utalusa kuli: “Manzwi ao naa nipaleliswanga kulobala fokuñwi bakeñisa kuikalelwa za kwapili. Nenihupulanga kuli ‘kuswanela kuba ni libaka lelupilela.’ Mi nenibata kuziba kuli ‘nipilelañi?’ Nenisaba kushwa!”

⁷ Hasamulaho, Kaizeli Yvonne hanaasali mwa lilimo za kunonoboka, akopana ni Lipaki za Jehova. Utalusa kuli: “Nakala kulumela kuli nenikona kuba ni sepo ya kupila kuya kuile mwa Paradaisi fa lifasi.” Kuituta niti kutusize cwañi kaizeli yo? Utalusa kuli: “Hanisa palelwanga kulobala busihu inze niikalezwi za kwapili ni kusaba kushwa.” Kusina kukakanya, Kaizeli Yvonne uunga niti kuba ya butokwa hahulu ku yena, mi uikolanga hahulu kutaluseza babañwi ka za sepo yahae ya za kwapili.—1 Tim. 4:16.

8-9. (a) Muuna yabulezwi mwa nguli yeñwi yanaafile Jesu naanga cwañi bufumu bwanaafumani? (b) Muunga cwañi niti?

⁸ Niti ya mwa Bibele hape ikopanyeleza ni taba yende ka za Mubuso wa Mulimu. Jesu naabapanyize niti ka za Mubuso wo kwa bufumu bobupatilwe. Kwa Mateu 13:44, Jesu naabulezi kuli: “Mubuso wa mahalimu uswana sina bufumu, bobupatilwe mwa simu, bwanaafumani mutu mi abupata; mi kabakala tabo yanani yona, waya mi uyo lekisa zaluwile kaufela ni kuitekela simu yeo.” Mulemuhe kuli muuna yo naasabati bufumu bo. Kono hasaa bufumani, aitombola lika zeñata kuli abe ni bufumu bo. Mane alekisa lika kaufela zanaanani zona. Kabakalañi? Kabakala kuli naaziba butokwa bwa bufumu bo. Naabuunga kuba bwa butokwa hahulu kufita lika kaufela zanaaitombozi.

⁹ Kana ki mona momuikutwela cwalo ka za niti? Kusina kukakanya muikutwa cwalo! Lwaziba kuli hakuna nto niyekana mwa lifasi le yekona kubapiswa kwa tabo yelunani yona cwale kabakala kusebeleza Jehova, ni sepo ya  kupila kuya kuile haluka busiwa ki Mubuso wa Mulimu. Tohonolo yelunani yona ya kuikola silikani sesinde ni Jehova ki ya butokwa hahulu kufita nto ifi kamba ifi yelukona kuitombola. Lunani tabo yetuna ya ‘kumutabisa ka kutala.’—Makolo. 1:10.

10-11. Ki lika mañi zenesusuelize Muzwale Michael kueza licinceho mwa bupilo bwahae?

¹⁰ Mizwale ni likaizeli babañata baitombozi lika zeñata ilikuli batabise Jehova. Babañwi basiile misebezi yeneka bafumanisa masheleñi amañata. Babañwi batuhezi kundongwama sifumu. Mi babañwi bona bacincize mupilelo wabona ka kutala hamulaho wa kuituta ka za Jehova. Zeo ki zona zanaaezize muzwale yomuñwi yabizwa Michael. Naasika hulisezwa mwa niti. Hanaasali mutangana, naaitutile mulwanelo obizwa karati. Utalusa kuli: “Nenitabela hahulu kuba ni mubili otiile. Fokuñwi neniikutwanga kuli hakuna feela yakona kunikoma.” Kono Muzwale Michael hanaakalile kuituta Bibele, aziba mwaangela Jehova lindwa. (Samu 11:5) Muzwale Michael utalusa cwana ka za bo mutu ni musalaa hae babali Lipaki bane baitutanga ni yena: “Nebasika nibulelela kuli nituhele kuezanga karati; nebazwezi feela pili kunilutanga niti ya mwa Bibele.”

¹¹ Muzwale Michael hanaanzaa aituta zeñata ka za Jehova, lilato lahae ku yena laekezeha. Naasusuelizwe hahulu kubona mo Jehova abonisezanga batanga bahae mukekecima. Hamulaho wa nako, Muzwale Michael alemuha kuli naatokwa kueza licinceho zetuna mwa bupilo bwahae. Utalusa kuli: “Neniziba kuli kutuhela kueza karati neisike yaba nto yebunolo. Hape neniziba kuli kueza cwalo nekuka tabisa Jehova, mi nenikozwi kuli kumusebeleza neli yona nto ya butokwa hahulu kufita nto ifi kamba ifi yene nika itombola.” Muzwale Michael naaitebuhile hahulu niti yanaafumani, mi kueza cwalo nekutahisize kuli aeze licinceho zetuna hahulu mwa bupilo bwahae.—Jak. 1:25.

12-13. Kuituta niti ya mwa Bibele nekutusize cwañi Kaizeli Mayli?

¹² Bibele ibapanya niti kwa lambi yemonyeha mwa lififi, ili kubonisa butokwa bwa niti. (Samu 119:105; Maef. 5:8) Kaizeli wa kwa Azerbaijan yabizwa Mayli uitebuha hahulu litaba zaitutile mwa Linzwi la Mulimu. Bashemi bahae nebasi mwa bulapeli bobuswana. Bo ndatahe neli ba bulapeli bwa Simozilemu, mi bo mahe neli Majuda. Utalusa kuli: “Nihaike kuli ne ni sa kakanyi kuli Mulimu u teñi, ne ku na ni litaba ze ne ni sa utwisisi. Ne ni ipuzanga kuli: ‘Ki kabakalañi Mulimu ha naa bupile batu, mi ku tusañi haiba mutu mwa bupilo bwa hae kaufela u nyandile kono hape kwa mafelelezo u yo tukufazwa mwa lihele ku ya ku ile?’ Bakeñisa kuli batu ba bulelanga kuli lika kaufela li ezahalanga ka tato ya Mulimu, ne ni ipuzanga kuli: ‘Kona kuli Mulimu yena u tahisezanga batu mataata ilikuli a ikole ku buha ha ba nze ba nyanda?’”

¹³ Kaizeli Mayli naazwezipili kubata likalabo kwa lipuzo zahae. Hamulaho wa nako, alumela kuituta Bibele mi aba yomuñwi wa Lipaki za Jehova. Utalusa kuli: “Ku ziba niti ye kolwisa ya mwa Bibele ne ku cincize mubonelo wa ka kaufela wa mwa bupilo. Litaba ze mwa Linzwi la Mulimu ze talusizwe ka ku nepahala hande, li ni tusize ku ba ni kozo.” Ka kuswana ni Kaizeli Mayli, kaufelaa luna lulumbeka Jehova, yena “[yalubizize] kuzwa mwa lififi ni kukena mwa liseli lahae lelinde.”—1 Pit. 2:9.

14. Lukona kutiisa cwañi lilato laluna la kulata niti? (Mubone ni mbokisi yeli, “ Lika Zeñwi Zeibapanyizwe ku Zona Niti.”)

¹⁴ Ye ki mitala isikai feela yebonisa butokwa bwa niti. Kusina kukakanya, mwendi  mwakona kuba ni mitala yemiñwi. Mwakona kuitomela sikonkwani sa kunyakisisa mabaka amañwi haluswanela kulata niti ka nako yemueza tuto yamina ya ka butu. Haiba luzwelapili kulata niti, lukazwelapili kubata linzila za kubonisa ka zona cwalo.

15. Ki ifi nzila yeñwi yelukona kubonisa ka yona kuli lwalata niti?

¹⁵ Lukona kubonisa kuli lwalata niti ka kuitutanga Bibele ni lihatiso zetomile fa Bibele kamita. Kusina taba kuli selubile mwa niti ka nako yekuma kai, lusatokwa kuituta litaba zeñwi. Hatiso yapili ya magazini ye neibulezi kuli: “Niti, sina palisa yenyinyani yemelile mwa lihalaupa, ipotolohilwe ki mufuka oswanisezwa kwa lituto za buhata zebata kuipaleliswa kuzwelapili. Hamubata kuifumana, mutokwa kuzwelapili kuibata. . . . Haiba mubata kuba ni yona, muswanela kuikataza. Musike mwakolwa ka kuba feela ni zibonyana ya lituto za niti. . . . Muzwelepili kuekeza ku zemuziba, muitute zeñata.” Nihaike kuli kuituta kutokwa kuli luikataze, kueza cwalo kuka lutusa.

16. Ki nzila mañi yemuitutanga ka yona Bibele yemubona kuli yatusa? (Liproverbia 2:4-6)

¹⁶ Batu babañwi habatabeli kubala ni kuituta.  Kono Jehova ubata kuli ‘luzwelepili kubata’ niti ni ‘kutundamena kubata’ niti yeo kuli luiutwisise hande. (Mubale Liproverbia 2:4-6.) Haiba luikataza ka nzila yeo, lukatuseha luli. Muzwale yomuñwi yabizwa Corey utalusa kuli yena habalanga Bibele, ubalanga feela timana iliñwi mi hasaa iutwisisize kihona akashimbulukela ku yeñwi. Utalusa kuli: “Ni balanga litaluso za kwatasi kaufela, ni talimanga tutaku kaufela to tu libisa kwa lisupo ze ñwi, mi ni ezanga patisiso ye ekezehile. . . . Muezezo wo u ni tusanga ku utwisisa hande ze ni bala!” Ibe kuli luitusisa muezezo wo kamba muezezo usili, lubonisa kuli lwaitebuha niti halufumana nako ni kueza molukonela kaufela kuituta litaba za niti.—Samu 1:1-3.

17. Kupila ka kuya ka niti yeluitutile kutalusañi? (Jakobo 1:25)

¹⁷ Nihakulicwalo, hakusika likana kuituta feela litaba za niti. Kuli lutusiwe ki litaba za niti zeluituta, luswanela kulisebelisa mwa bupilo bwaluna. Yeo ki yona nzila inosi yekona kulutusa kuba ni tabo ya luli. (Mubale Jakobo 1:25.) Ki lika mañi zeka lutusa kuziba haiba lwasebelisa litaba za niti zeluitutile? Muzwale yomuñwi utalusa kuli nto yeñwi yekona kutusa ki kuitekula kubona lika zelueza hande ni zelusa ezi hande, ni kueza licinceho zetokwahala. Muapositola Paulusi naabulezi kuli: “Ibe kuli luezize zwelopili yekuma kai, haluzweleñipili kuzamaya ka mukwa oswanela mwa nzila yeswana ye.”—Mafil. 3:16.

18. Ki kabakalañi haluswanela kueza molukonela kaufela ‘kuzwelapili kuzamaya mwa niti’?

¹⁸ Munahane feela moluka tusezwa haiba ‘luzwelapili kuzamaya mwa niti’! Lukaba ni tabo mwa bupilo mi lukatabisa Jehova ni mizwale ni kaizeli baluna. (Liprov. 27:11; 3 Joa. 4) Kaniti luli, ao ki ona mabaka a butokwa hahulu haluswanela kulata ni kupila ka niti.