Kana mubalile ka tokomelo limagazini za Tawala ya Mulibeleli za silimo se? Hamubone nji mwakona kualaba lipuzo zelatelela:

Taba yefumaneha kwa Jakobo 5:11 ya kuli Jehova “unani lilato lelituna” ni “makeke” ilutusa cwañi?

Lwaziba kuli Jehova ulubonisanga makeke ka kuswalela bufosi bwaluna. Liñolo la Jakobo 5:11 lilukolwisa kuli Jehova walutusanga bakeñisa kuli walushwela makeke. Luswanela kumulikanyisa.—w21.01, like. 21.

Ki kabakalañi Jehova halukisize kuli babañwi bafiwe buikalabelo bwa kuba toho?

Naaezize cwalo kabakala kuli unani lilato. Kuba ni toho kutahisa kuli kube ni kozo mwa lubasi lwahae ni kuli lika liezwe ka nzila yeswanela. Mañi ni mañi mwa lubasi uswanela kukuteka tukiso yeo ya kuba ni toho, mi uswanela kulemuha kuli ki mañi yanani maata a kueza katulo ya mafelelezo ni kubona teñi kuli katulo yeo yalatelelwa.—w21.02, like. 3.

Ki kabakalañi Bakreste habaswanela kutokomela mobaitusiseza ma Apps a kulumelana ka ona mashango?

Haiba mutu aikatulela kuitusisa ma Apps ao, uswanela kunyakisisa batu bakaeza siango ni bona. Kutaata kueza cwalo sihulu haiba mutu yo aba mwa sikwata sa batu babañata sa kulumelana ka sona mashango. (1 Tim. 5:13) Kono hape kunani butata bobukona kubateñi haiba babañwi mwa likwata zeo bahasanya litaba zesina hande bupaki, kamba baitusisa likwata zeo kuli bafumanele fateñi masheleñi.—w21.03, like. 31.

Ki kabakalañi Mulimu hanaatuhelezi Jesu kunyanda ni kushwa?

Libaka lapili kikuli, Jesu naakokotezwi fa kota ya linyando ilikuli alukulule Majuda kwa sikuto. (Magal. 3:10, 13) Libaka labubeli kikuli, Jehova naatusa Jesu kuitukiseza musebezi wanaaka eza hanaakaba Muprisita Yapahami. Libaka labulaalu kikuli, Jesu hanaasepahalile kuisa lifu naabonisize kuli batu bakona kuzwelapili kusepahala ku Mulimu niha balikiwa hahulu. (Jobo 1:9-11)—w21.04, make. 16-17.

Muswanela kuezañi haiba musafumani batu fa mandu hamuli mwa bukombwa?

Mulike kubapotela ka nako yebakona kufumaneha fa mandu. Hape mulike kucinca sibaka semukutaleza ku sona. Mi mulike mikutalezo isili, inge cwalo kuñola mañolo.—w21.05, make. 15-16.

Muapositola Paulusi naatalusañi hanaabulezi kuli: “Ka mulao nenishwile kwa neku la mulao”? (Magal. 2:19)

Mulao wa Mushe neupatulula kuli batu habasika petahala mi neulibisa batu ku Kreste. (Magal. 3:19, 24) Taba yeo neitusize Paulusi kuamuhela Kreste. Kabakaleo, Paulusi ‘naashwile kwa neku la mulao,’ mi Mulao neutuhezi kuba ni maata fahalimwaa hae.—w21.06, like. 31.

Jehova ulutomezi mutala mañi wa buitiiso?

Jehova utiyela kusinyiwa kwa libizo lahae, kulwaniswa kwa bubusi bwahae, bana bahae babañwi baiketezi kumukwenuhela, litaba za buhata zazwelapili kuhasanya Satani, kubona manyando a batanga bahae, kuutwa butuku kabakala kukauhana ni batanga bahae babashwile, kubona batu babamaswe habahatelela babañwi, ni kubona lifasi halisinyiwa.—w21.07, make. 9-12.

Josefa ulutomezi mutala mañi omunde wa kuba ni pilu-telele?

Naaitiisize hanaanyandisizwe hahulu ki bahulwani bahae. Hasamulaho, naatamelelizwe taba ya buhata, mi alengiwa mwa tolongo ka nako yetelele mwa Egepita.—w21.08, like. 12.

Liñolo la Hagai 2:6-9, 20-22 lipolofita za kunyungiwa kwa mufuta mañi?

Macaba hasika amuhela lushango lwa Mubuso lolukutaza, kono batu babañata baamuhezi niti. Hona cwale-cwale fa, macaba ao akanyungiwa haakayundiswa.—w21.09, make. 15-19.

Ki kabakalañi halusa swaneli kuzwafa halunze lupeta bukombwa bwaluna?

Jehova walemuhanga buikatazo bolueza, mi lwamutabisanga. Haiba luzwelapili kupeta bukombwa bwaluna lusazwafi, lukafumana bupilo bobusa feli.—w21.10, make. 25-26.

Livitike kauhanyo 19 ikona kulutusa cwañi kusebelisa kelezo yeli: “Mube babakenile mwa muzamao wamina kaufela”? (1 Pit. 1:15)

Kubonahala kuli Pitrosi naakutezi kubulela manzwi a kwa Livitike 19:2. Kauhanyo 19 ibonisa linzila lisikai za molukona kusebeliseza kelezo ye kwa 1 Pitrosi 1:15 mwa bupilo bwaluna.—w21.12, make. 3-4.