Jehova hanaalaezi batu kuli ‘bataze lifasi ni kubusa fahalimwaa lona,’ naabata kuli lifasi kaufela libe paradaisi. (Gen. 1:28) Babaka luwa lifasi bakatokwa kumamela taelo yeswana yeo. Lifasi halina kuba Paradaisi honafo feela kakuli simu ya Edeni haisaliyo. Kukaba ni musebezi omutuna wa kueza ili wa kulukisa libaka zesinyehile ka nako ya cwale. Kaniti luli, lukaba ni musebezi omuñata wa kueza!

Taba yeo iluhupulisa musebezi omutuna one banani kueza Maisilaele hane bakutezi kwa naha yahabo bona kuzwa kwa Babilona. Hakuna yanaayahile mwa naha yeo ka lilimo ze 70. Kono Isaya naapolofitile kuli Jehova naakafuyaula buikatazo bwabona, mi naha neikaba yende hape. Isaya naapolofitile kuli: “Ukafetula lihalaupa lahae kuba sina Edeni ni libala lahae leliomile kuba sina simu ya Jehova.” (Isa. 51:3) Naha ya Maisilaele neibile yende hape. Ka mukwa oswana, Jehova ukafuyaula buikatazo bwa batu babaka luwa lifasi bwa kutusa kuli lifasi libe paradaisi. Mi mane nihaiba ka nako ya cwale, lwakona kubonisa kuli lubata kuto tusa mwa musebezi wo.

 Nzila yeñwi yemukona kubonisa ka yona kuli mwatabela kueza cwalo ki ka kukenisa ndu yamina ni kubona teñi kuli sibaka samina sikenile. Muswanela kueza cwalo nihaike kuli batu bomuyahile ni bona habakenisi sibaka sabona. Hape mwakona kutusa mwa musebezi wa kukenisa ni kubabalela Ndu ya Mubuso yamina ni Sibaka sa Mikopano. Haiba miinelo yamina yamikonisa, hape mwakona kuitatela kueza musebezi wa kutusa babawezwi ki likozi. Haiba mueza cwalo, mukabonisa kuli muitukiselize kutusa haiba kuba ni kozi. Muipuze kuli: ‘Kana kunani misebezi yemiñwi yenikona kuituta ka nako ya cwale ili yenikato eza haiba Jehova anifa tohonolo ya kuluwa lifasi?’

Hamulaho feela wa kuzusa mwanaa musizana wa Jairusi, Jesu naabulezi kuli mwanana yo afiwe lico. (Mare. 5:42, 43) Kubonahala kuli nekusi taata kubabalela mwanana wa lilimo ze 12 yo. Kono munahane feela musebezi omutuna oluka tokwa kueza Jesu haakataleleza sepiso yahae yeli: “Batu kaufela babali mwa mabita a kupulo bakautwa linzwi lahae ni kuzwa mwateñi.” (Joa. 5:28, 29) Nihaike kuli Bibele haibuleli litaba zeñata ka za taba yeo, lwaziba kuli batu babaka zusiwa kwa bafu bakatokwa kutusiwa kufumana lico, maino, ni liapalo. Mukona kubonisa cwañi nihaiba ka nako ya cwale kuli mubata kuto tusa? Ki ze lipuzo zemukona kunyakisisa.

Haiba kufiwa zibiso ya kuli muokameli wa mupotoloho uto potela puteho yamina, kana mwaitatelanga kumumema kuli ato ca lico ni mina? Mizwale ni likaizeli baba mwa sebelezo yeipitezi ya nako kaufela habakupiwa kuzwa fa Betele mi bakala kuswalisana ni puteho yamina kamba muokameli wa mupotoloho hakupiwa kutuhela musebezi wa kupotela liputeho wanaaezanga, kana mwakona kubatusa kufumana kwa kuina? Haiba mukopano omutuna kamba mukopano omutuna oipitezi ukaezezwa mwa sibaka semupila ku sona, kana mwakona kuitatela kutusa mwa musebezi okatokwa kueziwa pili mukopano wo usika kalisa kale kamba hasamulaho kamba kutusa kuamuhela babaka taha kwa mukopano wo?

Ka kuya ka Likezo 24:15, lulibelela kuli batu babañata-ñata bakazusiwa kwa bafu. Buñata bwabona nebasina kolo ya kuituta ka za Jehova pili basika shwa kale. Bakafiwa kolo ya kuituta ka za Jehova habaka zusiwa kwa bafu. a Batanga ba Mulimu babasepahala ni babanani yeloseli bakatusa mwa musebezi wa kuluta batu wo. (Isa. 11:9) Kaizeli yabizwa Charlotte, yanaakutalelize kwa Europe, South America, ni mwa Africa, unyolelwa kuto eza musebezi wo. Ka tabo, utalusa kuli: “Ninyolelwa kuto luta batu babaka zusiwa kwa bafu. Hanibalanga ka za batu babañwi bane bapilile kwamulaho, hañata niipulelisanga kuli: ‘Kambe mutu yo naaziba Jehova bupilo bwahae nebusike bwaba cwana.’ Ninyolelwa hahulu kuto taluseza batu babaka zusiwa kwa bafu lika zeneezahezi hase bashwile.”

Mane nihaiba batanga ba Jehova bane basepahala bane bapilile pili Jesu asika taha kale fa lifasi bakatokwa kulutiwa lika zeñata. Munahanisise ka za tabo ni tohonolo yemukaba ni yona kutaluseza Daniele ka za mo bupolofita bwanaañozi ili bwanaasa utwisisi nebutalelelizwe. (Dan. 12:8) Mi lukatokwa kutaluseza Ruti ni Naomi kuli mwa lusika lwabona ki mona mone kupepezwi Mesia. Munahane feela tabo yetuna yelukaba ni yona haluka tusa mwa musebezi wa kuluta batu okaeziwa mwa lifasi kaufela, mi ka nako yeo, haluna kubilaezwa ki miinelo yetaata yelukopana ni yona mwa lifasi lelimaswe le!

Mukona kubonisa cwañi ka nako ya cwale kuli mubata kuto tusa mwa musebezi wo? Nzila yeñwi yende hahulu yemukona kueza cwalo ka yona ki kuekeza kwa buikoneli bwamina bwa kuluta ni kuabananga kamita mwa musebezi wa kukutaza oeziwa mwa lifasi kaufela kacenu. (Mat. 24:14) Nihaike kuli hamusa kona kuabana hahulu mwa musebezi wo sina mone muezezanga kwamulaho kabakala busupali kamba miinelo yemiñwi, buikatazo bwamina bukabonisa kuli muitukiselize kuto luta batu babaka zusiwa kwa bafu.

Kaniti, muswanela kuipuza lipuzo za butokwa hahulu ze: Kana luli munyolelwa kuluwa lifasi? Kana munyolelwa kuto tusa kuli lifasi libe paradaisi, hamohocwalo ni kutusa batu babaka zusiwa kwa bafu kufumana lika zebaka tokwa ni kubaluta? Lwakona kubonisa ka nako ya cwale kuli luitukiselize kueza misebezi yeo ka kueza misebezi yeswana ni yeluka eza haluka luwa lifasi!