Kana mubalile ka tokomelo limagazini za Tawala ya Mulibeleli za silimo se? Hamubone nji mwakona kualaba lipuzo zelatelela:

Lukatuseha cwañi haiba lutanda nako kuambola ni Jehova, kuteeleza ku yena ni kunahanisisa ka za hae?

Lukaeza likatulo zende, lukaba baluti babande, tumelo yaluna ikatiya, mi lukalata hahulu Jehova.—w22.01, make. 30-31.

Lukatuseha cwañi haiba lusepa Jehova ni batu baketile kuluetelela?

Ye ki yona nako ya kusepa mwaezeza lika Mulimu ni kusakakanya ketelelo yelufiwa ki baana-bahulu ni likatulo zebaeza. Ñalelwa yetuna haika kalisa, lukaba babaitukiselize kumamela nihaiba litaelo zeluka fiwa zelusike lwautwisisa kamba zekabonahala kuli mwendi halikoni kulutusa.—w22.02, make. 4-6.

Lingeloi nelitalusañi hane libulelezi Zakaria ka za ‘muhala wa kumishalisa limota one uli mwa lizoho la [Mubusisi] Zerubabele’? (Zak. 4:8-10)

Pono ye neitusize batanga ba Mulimu kulemuha kuli tempele yenca yeneyahiwa neika fezwa kuyahiwa mi neikaba feela sina mwanaatokwela Jehova.—w22.03, make. 16-17.

Lukona kuba cwañi “mutala . . . mwa kubulela”? (1 Tim. 4:12)

Ka kuitusisa lipulelo zende ni kubulela ka likute haluli mwa bukombwa, kuopela ka pilu yaluna kaufela, kualabanga kamita kwa mikopano ya puteho, kubulela niti ni kuitusisa manzwi atiisa babañwi, ni kuambuka lipulelo zemaswe.—w22.04, make. 6-9.

Ki kabakalañi likalulo za libatana zeene (mibuso) zetalusizwe kwa Daniele kauhanyo 7 halikopanyizwe hamoho kuba sibatana silisiñwi sina mokutaluselizwe kwa Sinulo 13:1, 2?

Sibatana sesibulezwi kwa Sinulo 13 hasiyemeli feela mubuso ulimuñwi inge cwalo mubuso wa Roma. Kono siyemela mibuso kaufela ya lipolitiki yesebusize batu.—w22.05, like. 9.

Ki nzila ifi ya butokwa yelukona kubonisa ka yona kuli lusepile katulo ya Mulimu yelukile?

Haiba mutu yomuñwi alutapaula ni kulufoseza, haluswaneli kunyema ni kuba ni ndimbelela, kono luswanela kusiya taba mwa mazoho a Jehova. Ukafelisa butata kaufela bobutahisizwe ki sibi.—w22.06, make. 10-11.

Ki lika mañi zaswanela kuhupula muzwale yafilwe tohonolo ya kulapela ka nako ya mukopano wa puteho?

Tapelo haiswaneli kuitusiswa kwa kukalimela puteho kamba kufa lizibiso. Muzwale yakupilwe kulapela haaswaneli kuitusisa “manzwi amañata” sihulu haiba ki tapelo ya kukwalula mukopano. (Mat. 6:7)—w22.07, make. 24-25.

Batu “bane baezize lika zemaswe” ‘bakazuhela katulo’ ka mukwa ufi? (Joa. 5:29)

Habana kufiwa koto kabakala lika zene baezize basika shwa kale. Bakatatubiwa ka kuya ka lika zebaka eza hamulaho wa kuzusiwa kwa bafu.—w22.09, like. 18.

Ki susuezo mañi yanaafile Muzwale J. F. Rutherford kwa mukopano omutuna one ubile teñi mwa September 1922?

Kwa mukopano omutuna one uezelizwe kwa Cedar Point, mwa Ohio, kwa America, naabulezi kuli: “Mulena wa busa! Ki mina bazibahazi ba mubuso wa hae. Kamukwaocwalo, mu zibahaze, mu zibahaze, mu zibahaze, Mulena ni mubuso wa hae!”—w22.10, make. 3-5.

Isaya kauhanyo 30 italusa linzila mañi zetaalu zalutusa ka zona Mulimu kutiyela miinelo yetaata?

Kauhanyo ye ibonisa kuli (1) wateelezanga ni kualaba litapelo zaluna, (2) ulufanga ketelelo, ni (3) kulufuyaula cwale ni kwapili.—w22.11, like. 9.

Ki kabakalañi halukona kubulela kuli manzwi a kwa Samu 37:10, 11, 29 naatalelelizwe kwamulaho mi akatalelezwa ni kwapili?

Manzwi a Davida abonisa lika zende zene baikola Maisilaele ka nako yanaabusa Salumoni. Jesu naabulezi za paradaisi yekaba teñi kwapili mi naaamile kwa timana 11. (Mat. 5:5; Luka 23:43)—w22.12, make. 8-10, 14.