Batili. Davida naasatalusi cwalo.

Halunyakisiseñi zanaañozi mwa timana yeo ni litimana zeñwi zeambola za taba yeswana, naaize: “Nikaopelela libizo lahao milumbeko kuya kuile haninze nipeta buitamo bwaka zazi ni zazi.” “Nakulumbeka ka pilu yaka kaufela, wena Jehova Mulimu waka, mi nikakanyisa libizo lahao kuya kuile.” “Nikalumbeka libizo lahao kamita ni kuya kuile.”—Samu 61:8; 86:12; 145:1, 2.

Davida naasatalusi kuli naasike ashwa. Naaziba kuli Jehova naabulezi kuli batu nebaka shwanga kabakala sibi sene baezize, mi Davida naaitumelezi kuli naali muezalibi. (Gen. 3:3, 17-19; Samu 51:4, 5) Naaziba kuli nihaiba baana bane balatiwa ki Mulimu babacwale ka Abrahama, Isaka, ni Jakobo nebashwile. Mi Davida naaziba kuli ni yena naakashwa. (Samu 37:25; 39:4) Kono manzwi afumaneha kwa Samu 61:8 abonisa takazo yetuna yanaanani Davida ya kulumbeka Mulimu kuya kuile, fo kikuli, ka nako ya bupilo bwahae kaufela.—2 Sam. 7:12.

Litaba zeñwi zanaañozi Davida libonisa zanaakopani ni zona mwa bupilo ka nako yeo, sina mokuboniselizwe mwa manzwi a fahalimu a Samu 18, 51, ni 52. Kwa Samu 23, Davida utalusa Jehova sina mulisana yamuetelela, yamukatulusa, ni yamusileleza. Davida naali mulisana yacwalo. Mi naabata kusebeleza Mulimu mwa ‘mazazi kaufela a bupilo bwahae.’—Samu 23:6.

Hape muhupule kuli Jehova ki yena yanaasusumelize Davida kuñola litaba zeo. Zanaañozi nelikopanyeleza bupolofita bwa lika zeneka talelezwa kwapili. Ka mutala, kwa Samu 110, Davida naañozi ka za nako yeo muta Mulenaa hae ‘naaka ina kwa lizoho [la Mulimu] la bulyo’ kwa lihalimu ni kufiwa maata amatuna. Kuli aezeñi? Kuli atule lila za Mulimu ni ‘kuatula macaba’ fa lifasi. Davida neli kukululu wa Mesia, yena yanaaka busa kwa lihalimu ni yanaakaba “muprisita kuya kuile.” (Samu 110:1-6) Jesu naabonisize kuli bupolofita bobu kwa Samu 110 nebusupa ku yena mi ni kuli nebuka talelezwa kwapili.—Mat. 22:41-45.

Kaniti, Davida naasusumelizwe ki moya wa Mulimu kuñola ka za nako ya bupilo bwahae ni za nako ya kwapili hanaaka zusiwa kwa bafu ni kuikola kulumbeka Jehova kuya kuile. Taba yeo ilutusa kuutwisisa kuli manzwi a kwa Samu 37:10, 11, 29 abonisa mone liinezi lika mwa Isilaele wa kwaikale mi hape abonisa molika bela mwa lifasi kaufela kwapili Mulimu hakataleleza lisepiso zahae.—Mubone paragilafu 8 ya taba yeli, “Ukaba ni na Mwa Paradaisi,” yefumaneha mwa magazini ye.

Samu 61:8 ni litimana zeñwi libonisa kuli Davida naabata kulumbeka Jehova mwa Isilaele wa kwaikale kuisa lifu. Litimana zeo hape libonisa zakaeza Davida kwapili Jehova haaka muzusa kwa bafu.