1. Kunahanisisa sepiso yalufile Jehova ya bupilo bubusa feli kukona kulutusa cwañi?

 JEHOVA usepisa kuli batu baba muutwa bakaba ni “bupilo bobusa feli.” (Maro. 6:23) Haiba lunahanisisa zalusepisize Jehova, luka mulata hahulu. Munahane feela taba ye: Ndataa luna wa kwa lihalimu ululata hahulu kuli mane usepisa kulufa mpo yeo kuli lusike lwakauhanywa ku yena nikamuta.

2. Sepiso ya Mulimu ya kulufa bupilo bobusa feli ilutusa cwañi?

² Sepiso ya Mulimu ya kulufa bupilo bobusa feli ilutusa kutiyela miliko yelukopana ni yona ka nako ya cwale. Mane nihaiba lila zaluna halika lubemba kuli lika lubulaya, haluna kutuhela kusepahala ku Mulimu. Kabakalañi? Libaka leliñwi kikuli lwaziba kuli haiba lushwa inze lusepahala ku Jehova, uka luzusa kwa bafu mi lukaba ni sepo ya kusashwa nikamuta. (Joa. 5:28, 29; 1 Makor. 15:55-58; Maheb. 2:15) Ki kabakalañi halukona kuba ni buikolwiso bwa kuli lwakona kupila kuya kuile? Halunyakisiseñi mabaka alatelela.

3. Ki kabakalañi halukona kuba ni buikolwiso bwa kuli Jehova wakona kulutusa kupila kuya kuile? (Samu 102:12, 24, 27)

³ Lwaziba kuli Jehova wakona kulutusa kupila kuya kuile bakeñisa kuli ki yena Simbule sa bupilo mi upila kuya kuile. (Samu 36:9) Halunyakisiseñi litaba lisikai feela za mwa Bibele zebonisa kuli Jehova ubile teñi kuzwa feela kwamulaho mi ukazwelapili kubateñi. Samu 90:2 ibulela kuli Jehova ubile teñi “kuzwa linako zesina makalelo kuisa linako zesina mafelelezo.” Liñolo la Samu 102 ni lona libulela taba yeswana. (Mubale Samu 102:12, 24, 27.) Mi mupolofita Habakuki naañozi ka za Ndataa luna wa kwa lihalimu kuli: “Wena Jehova,  kana hausika bateñi kamita? Wena Mulimu waka, Yakenile waka, haushwi.”—Hab. 1:12.

4. Kana lwaswanela kubilaezwa ki taba ya kuli Jehova ubile teñi kamita? Mutaluse.

⁴ Kana kumibela taata kuutwisisa taba ya kuli Jehova ubile teñi “kamita”? (Isa. 40:28) Batu babañata ni bona baikutwa cwalo. Elihu naabulezi ka za Mulimu kuli: “Palo ya lilimo zahae haiutwisisehi.” (Jobo 36:26) Kono kusautwisisa nto yeñwi hakutalusi kuli nto yeo haki ya niti. Ka mutala, kana kusautwisisa hande mwasebeleza malaiti kutalusa kuli malaiti haayo? Batili! Ka mukwa oswana, luna batu haluna feela kuutwisisa ka kutala taba ya kuli Jehova ubile teñi kuzwa feela kwamulaho mi ukazwelapili kubateñi. Kono taba yeo haitalusi kuli Mulimu haki wa kamita. Niti ka za Mubupi waluna haisika itinga fa litaba zelukona kuutwisisa kamba zelusa utwisisi. (Maro. 11:33-36) Ubile teñi pili pupo kaufela isika bakale teñi, kukopanyeleza cwalo ni lika zetahisa liseli inge cwalo lizazi. Lwalumela kuli Jehova ki yena “Muezi wa lifasi ka maata ahae.” Kaniti, ubile teñi pili asika ‘yandulula mahalimu.’ (Jer. 51:15; Lik. 17:24) Ki lifi libaka leliñwi leli lukolwisa kuli lwakona kupila kuya kuile?

5. Ki sepo mañi yene banani yona bo mutu ni musalaa hae bapili?

⁵ Jehova naabupile lika zepila fa lifasi kuli lipile nako yekuswani, kono batu naababupile kuli bapile kuya kuile. Naafile feela bona sepo ya kupila kuya kuile. Nihakulicwalo, Jehova naafile Adama temuso ye, yeli: “Haili kwa kota ya kuziba bunde ni bumaswe, usike waca kwateñi, kakuli zazi leuka ca kwateñi ukashwa luli.” (Gen. 2:17) Kambe Adama ni Eva nebautwile Jehova, nebasike bashwa. Kubonahala kuli nako hane inze iya, Jehova mwendi naaka balumeleza kuca kwa “kota ya bupilo.” Taba yeo neika bonisa kuli ‘nebaka pila kuya kuile.’ b—Gen. 3:22.

6-7. (a) Ki lika mañi zeñwi zebonisa kuli Mulimu naasabati kuli batu bashwange? (b) Ki lika mañi zemunyolelwa kueza mwa lifasi lelinca? (Mubone maswaniso.)

⁶ Kwakomokisa kuli babatisisi babañwi bafumani bupaki bwa sayansi bobubonisa kuli booko bwaluna bukona kubuluka litaba zeñata hahulu kufita zebukona kubuluka mwahalaa bupilo bwaluna kaufela. Mwa 2010  magazini yeñwi (Scientific American Mind) neibulezi kuli booko bwaluna bukona kubuluka litaba zebato eza 2.5 milioni GB, ili zelikana ni vidio yekona kulekodiwa ka lihora ze 3 milioni (yekona kufezwa kubuhiwa ka lilimo zefitelela 300). Kono mane booko bwaluna bukona kubuluka litaba zeñata hahulu nikufita. Nihakulicwalo, taba yeo ibonisa kuli Jehova naabupile booko bwaluna kuli bukone kubuluka litaba zeñata hahulu kufita zebukona kubuluka mwa lilimo feela ze 70 kamba ze 80 za bupilo bwaluna.—Samu 90:10.

⁷ Jehova hape ulubupile ni takazo yetuna ya kupila kuya kuile. Bibele ibulela kuli Mulimu ‘ubeile nako ya kamita mwa lipilu’ za batu. (Muek. 3:11) Ki lona libaka haluunga lifu sina sila. (1 Makor. 15:26) Haiba lukula butuku bobuñwi bobutuna, kana lukaitulela feela lusaezi sesiñwi? Batili. Hañata luyanga kwa baalafi mi mwendi luyo nganga mulyani okona kulutusa kufola. Mane luezanga molukonela kaufela kuli lusike lwashwa. Mi haiba mutu yomuñwi yolulata ashwa, ibe kuli ki yomuhulu kamba ki mwanana, lutomohanga hahulu pilu ka nako yetelele. (Joa. 11:32, 33) Kaniti luli, Mubupi waluna yalilato naasike alufa takazo ya kuzwelapili kupila ni booko bobukona kubuluka litaba zeñata-ñata kambe naasabati kuli batu bapile kuya kuile. Kono kunani mabaka amañwi halulumela kuli lwakona kupila kuya kuile. Halunyakisiseñi lika zeñwi zanaaezize Jehova kwamulaho ni zaeza cwale zebonisa kuli mulelo wahae wa kwa makalelo hausika cinca.

8. Liñolo la Isaya 55:11, lilufa buikolwiso mañi ka za mulelo wa Jehova?

⁸ Nihaike kuli Adama ni Eva nebaezize sibi ni kutahiseza bana babona lifu, Jehova  naasika cinca mulelo wahae. (Mubale Isaya 55:11.) Usabata kuli batu babasepahala bapile kuya kuile. Luziba cwalo kabakala zanaabulezi Jehova ni zanaaezize kuli mulelo wahae utalelezwe.

9. Ki lika mañi zasepisize Mulimu? (Daniele 12:2, 13)

⁹ Jehova usepisize kuli ukazusa batu babashwile ni kubafa kolo ya kuba ni bupilo bobusa feli. (Lik. 24:15; Tite 1:1, 2) Muuna yanaasepahala Jobo naanani buikolwiso bwa kuli Jehova unyolelwa kuzusa batu babashwile. (Jobo 14:14, 15) Mupolofita Daniele naaziba kuli batu banani sepo ya kuzusiwa kwa bafu ni kuba ni kolo ya kupila kuya kuile. (Samu 37:29; mubale Daniele 12:2, 13.) Majuda ba mwa linako za Jesu ni bona nebaziba kuli Jehova naakafa batanga bahae babasepahala “bupilo bobusa feli.” (Luka 10:25; 18:18) Jesu naakuta-kutezi kubulela za sepiso yeo, mi yena kasibili naazusizwe kwa bafu ki Ndatahe.—Mat. 19:29; 22:31, 32; Luka 18:30; Joa. 11:25.

10. Mitala ya batu bane bazusizwe kwa bafu kwamulaho ibonisañi? (Mubone siswaniso.)

¹⁰ Jehova ki yena Mufani wa Bupilo mi unani maata a kuzusa batu babashwile. Naafile mupolofita Elia maata a kuzusa kwa bafu mwana wamushimani wa mbelwa wa kwa Sarepta. (1 Mal. 17:21-23) Hasamulaho, Mulimu naatusize mupolofita Elisha kuzusa kwa bafu mwana wamushimani wa musali wa Mushunami. (2 Mal. 4:18-20, 34-37) Mitala ya batu bane bazusizwe kwa bafu yeo ni yemiñwi ibonisa kuli Jehova unani maata a kuzusa batu babashwile. Jesu hanaali fa lifasi, naabonisize kuli Ndatahe naamufile maata a kuzusa batu babashwile. (Joa. 11:23-25, 43, 44) Ka nako ya cwale, Jesu u kwa lihalimu mi ufilwe “maata kaufela . . . mwa lihalimu ni fa lifasi.” Kacwalo, wakona kutaleleza sepiso ya kuzusa “batu kaufela babali mwa mabita a kupulo” mi bakaba ni sepo ya kupila kuya kuile.—Mat. 28:18; Joa. 5:25-29.

11. Tiululo ikonahalisa cwañi kuli lupile kuya kuile?

¹¹ Ki kabakalañi Jehova hanaatuhelezi Mwanaa hae yalatwa kushwa lifu lelibutuku? Jesu naatalusize libaka ka kubulela kuli: “Mulimu naalatile hahulu lifasi kuli mane naafile Mwanaa hae wa libanda, kuli mutu kaufela yabonisa tumelo ku yena asike atimezwa kono abe ni bupilo bobusa feli.” (Joa. 3:16) Ka kufa Mwanaa hae sina tiululo yekwahela libi zaluna, Mulimu ukonahalisize kuli kwapili lufumane bupilo bubusa feli. (Mat. 20:28) Muapositola Paulusi naatalusize kalulo ya butokwa ye ya mulelo wa Mulimu hanaabulezi kuli: “Sina lifu hane litile ka mutu alimuñwi, zuho ya bafu ni yona itaha ka mutu alimuñwi. Kakuli sina batu kaufela habashwa ka Adama, ka mukwa oswana, kaufela bakazuha ka Kreste.”—1 Makor. 15:21, 22.

12. Jehova ukataleleza cwañi mulelo wahae?

¹² Jesu naalutile balateleli bahae kulapela kuli Mubuso wa Mulimu utahe. (Mat. 6:9, 10) Mulelo wa Mulimu omuñwi kikuli batu bapile kuya kuile fa lifasi. Kuli apete mulelo wo, Jehova uketile Mwanaa hae kuli abe Mulena wa Mubuso wa Mesia. Mulimu uzwezipili kukubukanya batu ba 144,000 fa lifasi kuli baswalisane ni Jesu kueza tato ya Mulimu.—Sin. 5:9, 10.

13. Ki lika mañi zaeza Jehova ka nako ya cwale, mi muswanela kuezañi?

¹³ Ka nako ya cwale, Jehova usweli kukubukanya “buñata bobutuna bwa batu” ni kubaluta kuli babe babusiwa ba Mubuso. (Sin. 7:9, 10; Jak. 2:8) Nihaike kuli bapila mwa lifasi lelialuhani kacenu kabakala sabo ni lindwa, batu baba mwa sikwata se, baeza  mobakonela kaufela kuswalisana kusina taba ni naha kobasimuluha, mushobo wabona, ni butu bwabona. Basweli kutula mikwale yabona kuieza malimi a likekele. (Mika 4:3) Habaikenyi mwa lindwa zetahisa mafu amañata, kono basweli kutusa batu kufumana “bupilo sakata” ka kubaluta ka za Mulimu wa niti ni mulelo wahae. (1 Tim. 6:19) Ba lubasi lwabona bakona kubalwanisa kamba bakona kuba ni butata bwa kutokwa masheleñi bakeñisa kuli bayemela Mubuso wa Mulimu, kono Jehova ubonanga teñi kuli banani lika zebatokwa. (Mat. 6:25, 30-33; Luka 18:29, 30) Litaba zeo libonisa kuli Mubuso wa Mulimu ki wa luli ni kuli ukazwelapili kupeta mulelo wa Jehova.

14-15. Sepiso ya Jehova ya kuyundisa lifu kuya kuile ikatalelezwa cwañi?

¹⁴ Jesu ka nako ya cwale ubusa sina Mulena kwa lihalimu mi ukataleleza lika kaufela zasepisize Jehova. (2 Makor. 1:20) Kuzwa feela ka 1914, Jesu uzwezipili kutula mwahalaa lila zahae. (Samu 110:1, 2) Hona cwale-cwale fa, Jesu ni batu babaka busa ni yena bakafeleleza tulo yabona ni kuyundisa babamaswe.—Sin. 6:2.

¹⁵ Ka nako ya Puso ya Jesu ya Lilimo ze 1,000, batu babashwile bakazusiwa mi batu babautwa Mulimu bakatusiwa kuba babapetahalile. Hamulaho wa tiko ya mafelelezo,  batu bakaatula Jehova kuli balukile, “bakaluwa lifasi, mi bakapila ku lona kuya kuile.” (Samu 37:10, 11, 29) Lukaba ni tabo, “sila sa mafelelezo, lona lifu,” hasika ‘yundiswa.’—1 Makor. 15:26.

16. Ki lifi libaka la butokwa hahulu halusebeleza Jehova?

¹⁶ Sina molunyakisiselize, sepo yaluna ya kupila kuya kuile itomile luli fa Linzwi la Mulimu. Sepo yeo yakona kulutusa kuzwelapili kusepahala ku Jehova mwa mazazi a mafelelezo ataata a. Kono haluswaneli kueza feela lika zetabisa Jehova kabakala kuli lubata kufumana bupilo bobusa feli. Libaka la butokwa hahulu halubata kusepahala ku Jehova ni Jesu kikuli, lubalata hahulu. (2 Makor. 5:14, 15) Lilato leo lilususueza kubalikanyisa ni kueza musebezi wa kutaluseza babañwi ka za sepo yaluna. (Maro. 10:13-15) Haiba luambuka moya wa buitati mi luituta kuba ni bufani, Jehova ukabata kuli lube balikani bahae kuya kuile.—Maheb. 13:16.

17. Ki buikalabelo mañi bolunani bona ka butu? (Mateu 7:13, 14)

¹⁷ Kana lukaba babañwi ba batu babaka fumana bupilo bobusa feli? Jehova ulufile kolo ya kufumana bupilo bo. Kono cwale kuitingile ku luna kuzwelapili kuba mwa nzila yeisa kwa bupilo. (Mubale Mateu 7:13, 14.) Bupilo bukaba cwañi haluka pila kuya kuile? Lukanyakisisa kalabo ya puzo yeo mwa taba yetatama.