BASIZANA bababeli nebanze bazamaya hamoho mwa Muleneñi wa Baguio, kwa Philippines. Babona kakalani ka lihatiso kane katomilwe fa sibaka sesiñwi, kono nebasikaya kwateñi. Kaizeli yanaayemi kwa kakalani kao, wa libizo la Helen, abamenyeza luli. Basizana bao bazwelapili kuzamaya, kono nebasika libala lumenyo lwa kaizeli yo.

Hasamulaho, basizana bababeli bao hane banze bakutela kwa mandu abona ka mbasi, babona litaku zeneñozwi ka muñolo omutuna za jw.org fa Ndu ya Mubuso. Bahupula kuli nebaboni litaku zeswana zeo fa kakalani ka lihatiso. Sibeli sabona batuluka mwa mbasi ni kuya kwa Ndu ya Mubuso. Habafitile kwateñi, babona fone kubeilwe mukoloko one ubonisa mikopano yeneeziwanga mwa Ndu ya Mubuso yeo ni nako ya mikopano.

Basizana bababeli bao nebafumanehile ku omuñwi wa mikopano yeneezizwe hamulaho wa fo. Mi basakena feela mwa Ndu ya Mubuso, balemuha kuli kaizeli Helen ni yena naaliteñi! Honafo feela bahupula kuli ki yena musali yani yanaa bamenyelize. Bo Helen batalusa kuli: “Basizana bao haba niatumela, naikalelwa. Nanahana kuli mwendi kunani nto yeñwi yene nifosize.” Kono basizana bao bataluseza bo Helen zeneezahezi.

Basizana bababeli bao nebaikozi mukopano, mi nebaikozi siango ni mizwale ni likaizeli. Hane baboni kuli mizwale ni likaizeli babañwi nebakenisa Ndu ya Mubuso hamulaho wa mukopano, ni bona baitatela kutusa mwa musebezi wo. Yomuñwi wa basizana bao, ututile mwa naha ya Philippines, kono yomuñwi yena safumanehanga kwa mikopano mi ukalile kuituta Bibele. Zeo kaufela nelitahisizwe ki kaizeli yani yanaamenyize!