MULAO neubonisa kuli Maisilaele nebakona kufa Jehova matabelo a maiba kamba linkwilimba. Linyunywani zepeli zeo kamita nelipundiwanga hamoho mwa milao ya za kufa matabelo, mi nyunywani yeñwi neikona kufiwa mwa sibaka sa yeñwi. (Liv. 1:14; 12:8; 14:30) Ki kabakalañi taba yeo hane ili yende? Libaka leliñwi kikuli, maiba fokuñwi naasafumanehangi. Kabakalañi?

Maiba ki linyunywani zesapili kulokulikuñwi, mi mwa Israel, maiba afumanehanga mwa naha kaufela ka nako yekucisa. Silimo ni silimo mwa October, litutelanga kwa linaha za kwa mboela, ili kokucisa, mi likutelanga kwa Israel mwa mbumbi. (Pina 2:11, 12; Jer. 8:7) Kacwalo, nekuli taata kuli Maisilaele ba kwa ikale bakone kufa matabelo a maiba ka nako ya maliha.

Kono linkwilimba zona hañata halitutelangi kwa linaha lisili; kacwalo, nelifumanehanga mwa Isilaele silimo kaufela. Mi sa butokwa nikufita kikuli linkwilimba zona nelipila ni batu. (Mubapanye Joani 2:14, 16.) Buka yeñwi (Bible Plants and Animals) italusa kuli “mwa minzi kaufela ni mwa litolopo za mwa Palestine, batu nebauta linkwilimba. Fa ndu ni ndu nekunani mandu anaalukiselizwe linkwilimba.”—Mubapanye Isaya 60:8.

Kacwalo, Jehova naabonisize lilato ni kutwisiso ka kuamuhela matabelo ane bafanga Maisilaele a linyunywani zenefumanehanga silimo mukatumbi.