1. Jesu naabuleleziñi balutiwa bahae ka za nako ya kufela kwa lifasi, mi ki temuso mañi yanaa bafile?

 MAZAZI asikai pili Jesu asika shwa kale, balutiwa bahae babane neba mubuzize kuli: “Ki sifi sesikaba sisupo . . . sa nako ya kufela kwa lifasi?” (Mat. 24:3) Kubonahala kuli balutiwa bao nebabata kuziba nako yene ukasinyiwa muleneñi wa Jerusalema ni tempele. Jesu hanaa baalaba, naasika bulela feela za nako fone ukasinyezwa muleneñi wo ni tempele kono hape naabulezi ni “nako ya kufela kwa lifasi” lelupila ku lona le. Jesu naabulezi cwana ka za nako ya kufela kwa lifasi: “Haili ka za lizazi kamba nako yeo, hakuna yaliziba, ibe mangeloi a kwa lihalimu kamba Mwana, konji Ndate.” Hasamulaho, alemusa balutiwa bahae kuli: “Muzwelepili kutona.”—Mare. 13:32-37.

2. Ki kabakalañi hane kuli kwa butokwa kuli Bakreste ba kwa makalelo bazwelepili kutona?

² Bakreste ba Majuda ba kwa makalelo nebatokwa kuzwelapili kutona; nebatokwa kueza cwalo kuli bapiliswe. Jesu naataluselize balutiwa bahae zeneka batusa kuziba nako fone ukasinyezwa muleneñi wa Jerusalema ni tempele. Naaize: “Hamuka bona Jerusalema inze apotolohilwe ki limpi, muzibe kuli kusinyeha kwahae ku fakaufi.” Ka yona nako yeo, nebaswanela kumamela temuso ya Jesu ni ‘kukala kusabela kwa malundu.’ (Luka 21:20, 21) Bane bamamezi temuso yeo nebapunyuhile Maroma hane basinyize Jerusalema.

3. Lukanyakisisañi mwa taba ye?

 ³ Kacenu, lupila mwa nako ya mafelelezo a lifasi lelimaswe le. Kacwalo, ni luna luswanela kuba ni kutwisiso ni kuzwelapili kutona. Mwa taba ye, lukanyakisisa zekona kulutusa kuba ni mubonelo oswanela halubona zeezahala mwa lifasi, molukona kutokomelela, ni molukona kuitusiseza hande nako yesiyezi.

4. Ki kabakalañi haluswanela kubata kuziba mo lika zesweli kuezahala mwa lifasi litaleleleza bupolofita bwa mwa Bibele?

⁴ Lunani mabaka autwahala halubatanga kuziba mo lika zeezahala mwa lifasi litaleleleza bupolofita bwa mwa Bibele. Ka mutala, Jesu naabulezi lika zeneka ezahala zelutusa kuziba kuli nako ya kufela kwa lifasi la Satani i fakaufi. (Mat. 24:3-14) Muapositola Pitrosi naalususuelize kuisa pilu kwa bupolofita bobusweli kutalelezwa kuli tumelo yaluna izwelepili kutiya. (2 Pit. 1:19-21) Buka ya Bibele ya mafelelezo ikala ka manzwi ali: “Sinulo yefilwe ka Jesu Kreste, yeo Mulimu naamufile, kuli abonise batanga bahae lika zelukela kuezahala hona cwale-cwale fa.” (Sin. 1:1) Kacwalo, lubatanga hahulu kuziba zesweli kuezahala mwa lifasi ni mo litaleleleza bupolofita bwa mwa Bibele. Mi lubatanga kuambola ni babañwi ka za teñi.

5. Ki lika mañi zeluswanela kuambuka, kono ki lika mañi zeluswanela kueza? (Mubone ni maswaniso.)

⁵ Nihakulicwalo, haluambola za bupolofita bwa mwa Bibele, luswanela kuambuka mukwa wa kunuhelela. Kabakalañi? Kabakala kuli halubati kubulela nto ifi kamba ifi yekona kutahisa kuli kusike kwaba ni swalisano mwa puteho. Ka mutala, lukana lwautwa baeteleli ba lifasi habaambola za mobakona kufeliseza mufilifili omuñwi ni kutusa kuli kube ni kozo ni buiketo. Haluswaneli kumatukela kubulela kuli taba yeo italeleza bupolofita bobu kwa 1 Matesalonika 5:3, kono luswanela kuziba litaba zenca zehatisizwe. Haiba litaba zeluambola litomile fa litaba zehatisizwe ki kopano ya Jehova, lukatusa kuli mizwale ni likaizeli mwa puteho baswalisane ni kuba ni “muhupulo ulimuñwi.”—1 Makor. 1:10; 4:6.

6. Ki lituto mañi zeluituta kwa liñolo la 2 Pitrosi 3:11-13?

⁶ Mubale 2 Pitrosi 3:11-13. Muapositola Pitrosi ulutusa kuba ni mubonelo oswanela halunyakisisa bupolofita bwa mwa Bibele. Ulususueza “kuhupula kubateñi kwa lizazi la Jehova.” Kabakalañi? Haki kabakala kuli lubata kuziba “lizazi ni nako yeo” fo Jehova akatahiseza Armagedoni, kono ki kabakala kuli lubata kuitusisa hande nako yesiyezi kuba ni ‘likezo zekenile za muzamao ni likezo za busepahali ku Mulimu.’ (Mat. 24:36; Luka 12:40) Ka mubulelelo omuñwi, lubata kuzwelapili kuba ni muzamao okenile ni kubona teñi kuli zelueza mwa sebelezo yaluna ku Jehova libonisa kuli lumulata hahulu. Kuli lueze cwalo, luswanela kutokomela zelueza.

7. Lukona kubonisa cwañi kuli lwatokomela lika zelueza? (Luka 21:34)

⁷ Jesu naataluselize balutiwa bahae kusaisa feela pilu kwa lika zeneezahala mwa lifasi kono hape naabasusuelize kuli batokomele lika zene baeza. Taba yeo yaiponahalela hande mwa temuso yanaa bafile kwa Luka 21:34. (Mubale.) Mulemuhe manzwi anaabulezi Jesu a, ali: “Mutokomele.” Mutu  yatokomela lika zaeza ulemuhanga lika zekona kusinya silikani sahae ni Jehova, mi uunganga mihato ya kuambuka lika zeo. Ka kueza cwalo, uzwelapili kuba mwa lilato la Mulimu.—Liprov. 22:3; Juda 20, 21.

8. Muapositola Paulusi naasusuelize Bakreste kuezañi?

⁸ Muapositola Paulusi naasusuelize Bakreste kutokomela lika zene baeza. Ka mutala, naataluselize Bakreste ba kwa Efese kuli: “Mutokomele hahulu momuzamaela kuli hamuzamayi sina likuba kono sina batu bababutali.” (Maef. 5:15, 16) Satani uzwelapili kululwanisa kuli asinye silikani saluna ni Jehova; ki lona libaka Bibele hai lususueza ‘kuzwelapili kulemuha tato ya Jehova’ ilikuli lukone kuisileleza kwa twaniso ifi kamba ifi ya Satani.—Maef. 5:17.

9. Lukona kulemuha cwañi tato ya Jehova?

⁹ Bibele hai lutalusezi lika kaufela zekona kusinya silikani saluna ni Jehova. Hañata lutokwanga kueza likatulo mwa litaba zesika bulelwa ka kunonga mwa Bibele. Kuli lueze likatulo zende, lutokwa kulemuha “tato ya Jehova.” Lukona kueza cwalo ka kubalanga Linzwi la Mulimu kamita ni kunahanisisa zelubala. Haiba luutwisisa hande tato ya Jehova ni kuba ni “munahano wa Kreste,” lukakona kuzamaya “sina batu bababutali,” nihaikaba kuli hakuna milao yenongile yelutaluseza zeluswanela kueza. (1 Makor. 2:14-16) Fokuñwi, kubunolo kulemuha lika zeluswanela kuambuka, kono fokuñwi, lika zeñwi likona kusalemuseha ka bunolo.

10. Ki mikwa mañi yemiñwi yeluswanela kuambuka?

¹⁰ Luswanela kuambuka mikwa yecwale ka linyawe, kunwa maswe, kuca maswe, kuitusisa lipulelo zeutwisa butuku, hamohocwalo ni kuitabisa ka lika za mifilifili, kubuha maswaniso a mapunu, ni lika zeñwi zecwalo. (Samu 101:3) Sila saluna, yena Diabulosi, uzwelapili kubata linzila zakona kusinya ka zona silikani saluna ni Jehova. (1 Pit. 5:8) Haiba lusatokomeli, Satani wakona kulukukueza kuli lube ni muna, lusike lwasepahala, lube ni mukwañuli, sitoyo, buikuhumuso, ni kuba ni ndimbelela. (Magal. 5:19-21) Kwa makalelo, lukona kuikutwa kuli hakusika fosahala kuba ni mikwa yeo. Kono haiba lusaangi muhato wa kufelisa mikwa yeo kapili-pili, yakona kuzwelapili kuhula sina simela sa sifanu ni kutahisa butata.—Jak. 1:14, 15.

11. Ki nto mañi yesalemusehi yekona kutahisa butata, ili yelutokwa kuambuka, mi ki kabakalañi?

¹¹ Nto yeñwi yesalemusehi yekona kutahisa butata ki liango zemaswe. Halunyakisiseñi mutala wo. Luungeñi kuli musebeza ni mutu yomuñwi yasi Paki ya Jehova. Mumubonisa sishemo mi mumuezeza lika zende kakuli mubata kuli abe ni mubonelo omunde ka za Lipaki za Jehova. Mi fokuñwi mane mwacanga sico sa musihali ni yena. Hamulaho wa nako, mukala kuezanga cwalo kamita. Ka linako zeñwi, uambolanga litaba za buhule mi kwa makalelo hamuikenyi mwa makande ao. Hamulaho wa nako, mufita fa kutwaela hahulu lingambolo zecwalo kuli mane semuikutwa kuli halisika fosahala. Mi zazi leliñwi, mutu yemusebeza ni yena yo umimema kuyo nwa ni yena lino zeñwi hamulaho wa kukotoka kwa musebezi mi mwalumela. Hamulaho wa nako, mukala kulumelelana mwa lika ni mutu yemusebeza ni yena yo. Hakuna kuunga nako kuli mukalise kueza lika zeswana zaezanga mutu yemusebeza ni yena yo. Ki niti kuli lubata kubonisa batu kaufela sishemo ni kubakuteka, kono luswanela kuhupula kuli lukona kukukuezwa hahulu ki batu bolutanda nako ni  bona. (1 Makor. 15:33) Haiba lutokomela lika zelueza, sina mwanaa lususuelize Jesu, haluna kueza siango ni batu babasa pili ka likuka za Jehova. (2 Makor. 6:15) Lukalemuha butata bobukona kulutahela mi luka butokolomoha.

12. Ki lika mañi zene baswanela kueza balutiwa ba Jesu hane banze balibelela nako ya kufela kwa lifasi?

¹² Balutiwa ba Jesu nebasa swaneli kunama feela wa toze hane banze balibelela nako ya kufela kwa lifasi. Jesu naabafile musebezi wa kueza. Naabalaezi kuli bakutaze taba yende “mwa Jerusalema, mwa Judea kaufela ni mwa Samaria, ni kuyo fita kwa libaka za kwahule hahulu za lifasi.” (Lik. 1:6-8) Kaniti, musebezi wanaafile Jesu kwa balutiwa bahae neli omutuna luli! Ka kutukufalelwa kueza musebezi wo, nebaitusisize hande nako yabona.

13. Ki kabakalañi haluswanela kuitusisa hande nako yaluna? (Makolose 4:5)

¹³ Mubale Makolose 4:5. Kuli lutokomele zelueza, luswanela kunyakisisa moluitusiseza nako yaluna. “Likezahalo zesika libelelwa” likona kuezahala ku mañi ni mañi waluna. (Muek. 9:11) Lwakona kushwa ka sipundumukela.

14-15. Lukona kuitusisa cwañi hande nako yaluna? (Maheberu 6:11, 12) (Mubone ni siswaniso.)

 ¹⁴ Lukona kuitusisa hande nako yaluna ka kueza tato ya Jehova ni kutiisa silikani saluna ni yena. (Joa. 14:21) Luswanela ‘kutiya, lusasuti, kamita lupatehe kueza zeñata mwa musebezi wa Mulena.’ (1 Makor. 15:58) Mi mafelelezo haakataha, ibe kuli ki mafelelezo a bupilo bwaluna kamba mafelelezo a lifasi lelimaswe le, haluna kuinyaza kuli halusika eza zeñata mwa sebelezo yaluna ku Jehova.—Mat. 24:13; Maro. 14:8.

¹⁵ Kacenu, Jesu uzwelapili kuetelela balutiwa bahae habanze bakutaza ka za Mubuso wa Mulimu mwa lifasi kaufela. Utalelelize sepiso yahae. Ka kuitusisa kopano ya Jehova, Jesu ululuta mwakukutaleza ni kulufa lihatiso zelutokwa kuli lushaele taba yende. (Mat. 28:18-20) Lubonisa kuli lwamamela taelo ya Jesu ka kusebeza ka taata mwa musebezi wa kukutaza ni kuluta batu ni ka kuzwelapili kutona halunze lulibelela kuli Jehova afelise lifasi le. Kusebelisa kelezo ye kwa Maheberu 6:11, 12, kuka lutusa kukumalela sepo yaluna “kuisa kwa mafelelezo.”—Mubale.

16. Luikatulezi kuezañi?

¹⁶ Jehova utomile lizazi ni nako fakayundiseza lifasi la Satani. Lizazi leo halika fita, Jehova ukataleleza lika kaufela zasepisize kuluezeza mwa lifasi lelinca sina mokuboniselizwe mwa Linzwi lahae. Kono fokuñwi kukona kubonahala inge kuli lifasi le laliyeha kufela. Nihakulicwalo, lizazi la Jehova “halina kuliyeha!” (Hab. 2:3) Kacwalo, haike luikatulele ‘kuzwelapili kulibelela Jehova,’ ili ‘kubonisa moya wa kulibelela ku Mulimu [yalupilisa].’—Mika 7:7.