1-2. (a) Ki lili sihulu foluhupulelanga mulatiwa waluna yashwile? (b) Jesu naakalile nto mañi fa busihu bone butatamiwa ki lizazi lanaashwile?

 LUZWELANGAPILI kuhupula balatiwa baluna babashwile kusina taba kuli sekufitile nako yetelele kuzwa fobashwela. Sihulu lubahupulanga fa lizazi lene bashwile.

² Silimo ni silimo, luswalisananga hamoho ni batu babañwi kuhupula lifu la mutu yomuñwi yolulata hahulu, yena Jesu Kreste. (1 Pit. 1:8) Lukopananga hamoho kumuhupula, yena yanaafile bupilo bwahae sina tiululo kuli aluliulule kwa sibi ni lifu. (Mat. 20:28) Jesu mane naabata kuli balateleli bahae bahupulange lifu lahae. Fa busihu bone butatamiwa ki lizazi lanaashwile, naakalile kueza mulalelo oipitezi, mi naalaezi kuli: “Muezange cwalo kuli munihupule.”—Luka 22:19.

3. Lukanyakisisañi mwa taba ye?

³ Sikwatanyana sa batu babafumanehanga kwa Kupuzo ya Lifu la Kreste banani sepo ya kuyo pila kwa lihalimu. Kono batu babañata babanani sepo ya kupila fa lifasi ni bona bafumanehanga. Mwa taba ye, lukanyakisisa libaka batu ba mwa likwata zepeli zeo habanyolelwanga kufumaneha kwa Kupuzo silimo ni silimo. Hape lukanyakisisa molutusezwa ka kufumaneha kwa Kupuzo. Halukaleñi ka kunyakisisa libaka Bakreste babatozizwe habafumanehanga kwa Kupuzo.

4. Ki kabakalañi Bakreste babatozizwe habacanga kwa sinkwa ni kunwa kwa waine fa Kupuzo?

⁴ Silimo ni silimo, Bakreste babatozizwe banyolelwanga kufumaneha kwa Kupuzo ilikuli bace kwa sinkwa ni kunwa kwa waine. Ki kabakalañi hakuswanela kuli bacange kwa sinkwa ni kunwa kwa waine? Kuli lualabe puzo yeo, halunyakisiseñi zeneezahezi fa busihu bwa mafelelezo a bupilo bwa Jesu fa lifasi. Hamulaho wa kuca Paseka, Jesu naakalisize mukiti obizwa cwale kuli Mulalelo wa Mulena. Naafile baapositola bahae babasepahala ba 11 sinkwa ni waine kuli bace ni kunwa. Jesu naabulezi za kueza tumelelano ni bona, ili tumelelano yenca ni tumelelano ya Mubuso. * (Luka 22:19, 20, 28-30) Litumelelano zepeli zeo nelika konahalisa kuli baapositola bao ni palonyana ya batu babañwi babe malena ni baprisita kwa lihalimu. (Sin. 5:10; 14:1) Bo masiyaleti babatozizwe * baba mwa litumelelano zepeli ze ki bona feela babaswanela kuca kwa sinkwa ni kunwa kwa waine fa Kupuzo.

5. Bakreste babatozizwe bazibañi ka za sepo yebanani yona?

⁵ Libaka leliñwi Bakreste babatozizwe habanyolelwa kufumaneha kwa Kupuzo kikuli, mukiti wo ubafa kolo ya kunahanisisa za sepo yabona. Jehova ubafile mpo yemakaza, ili tohonolo ya kuba ni bupilo bobusa shwi ni bobusa boli kwa lihalimu, kusebeza hamoho ni Jesu Kreste yazusizwe kwa bafu hamohocwalo ni babañwi kaufela ba 144,000, mi sa butokwa nikufita kikuli, banani tohonolo ya kubona Jehova Mulimu ka sibili! (1 Makor. 15:51-53; 1 Joa. 3:2) Bakreste babatozizwe baziba kuli bakaikola tohonolo yeo habakaya kwa lihalimu. Kono kuli balumelezwe kukena mwa lihalimu, batokwa kusepahala kuisa lifu. (2 Tim. 4:7, 8) Bakreste babatozizwe babanga ni tabo yetuna habanahanisisa za sepo yabona ya kwa lihalimu. (Tite 2:13) Ba “lingu zeñwi” bona bo? (Joa. 10:16) Ki kabakalañi habafumanehanga kwa Kupuzo?

6. Ki kabakalañi ba lingu zeñwi habafumanehanga kwa Kupuzo silimo ni silimo?

⁶ Ba lingu zeñwi bafumanehanga kwa Kupuzo kono habacangi kwa sinkwa ni kunwa kwa waine; bona ki bashalimeli feela. Ka silimo sa 1938, Bakreste babanani sepo ya kupila fa lifasi nebamemilwe kufumaneha kwa Kupuzo lwapili. Tawala ya Mulibeleli ya March 1, 1938 ya Sikuwa neibulezi kuli: “Kwaswanela mi kulukile kuli [ba lingu zeñwi] bafumanehe kwa mukopano wo ni kubona mouezezwa. . . . Mukiti wo ubatahiseza tabo ni bona.” Sina feela batu babamemilwe kwa mukiti wa linyalo hababanga ni tabo kufumaneha kwateñi, ba lingu zeñwi ni bona babanga ni tabo habafumaneha kwa Kupuzo niha basacangi kwa sinkwa ni kunwa kwa waine.

7. Ki kabakalañi ba lingu zeñwi habanyolelwanga kuteeleza kwa ngambolo ya Kupuzo?

⁷ Ba lingu zeñwi ni bona banahanisisanga za sepo yabona. Banyolelwanga kuteeleza kwa ngambolo ya Kupuzo, kakuli iambolanga hahulu za mo Kreste ni bakabusa ni bona ba 144,000 bakafuyaulela  batu babasepahala ka nako ya Puso ya Lilimo ze 1,000. Ka kuetelelwa ki Mulenaa bona Jesu Kreste, babusi babaka buseza kwa lihalimu bao bakatusa mwa musebezi wa kufetula lifasi kuba paradaisi ni kutusa batu babaipeya kuutwa kuba babapetahalile. Kaniti luli, batu babañata-ñata babafumanehanga kwa Kupuzo babanga ni tabo yetuna habanahanisisa limbuyoti zeñata zebaka ikola muta bupolofita bwa mwa Bibele bobucwale ka bobuñozwi kwa Isaya 35:5, 6; 65:21-23; ni Sinulo 21:3, 4 butalelezwa! Habanze baipona mwa lifasi lelinca ni balatiwa babona, sepo yabona ya za kwapili yatiyanga, mi kueza cwalo kubatusanga kuzwelapili kusebeleza Jehova.—Mat. 24:13; Magal. 6:9.

8. Ki lifi libaka leliñwi ba lingu zeñwi habafumanehanga kwa Kupuzo?

⁸ Halunyakisiseñi libaka leliñwi ba lingu zeñwi habafumanehanga kwa Kupuzo. Babata kubonisa kuli balata Bakreste babatozizwe mi babata kubatusa. Linzwi la Mulimu nelipolofitile kuli Bakreste babatozizwe ni Bakreste babanani sepo ya kupila fa lifasi nebaka swalisana hahulu. Ka mukwa ufi? Halunyakisiseñi mitala isikai.

9. Bupolofita bobuñozwi kwa Zakaria 8:23 bubonisa cwañi mobaikutwela ba lingu zeñwi ka za Bakreste babatozizwe?

⁹ Mubale Zakaria 8:23. Bupolofita bo, butalusa hande mobaikutwela ba lingu zeñwi ka za mizwale ni likaizeli babona babatozizwe. Linzwi la “Mujuda” ni la “mina” leliitusisizwe mwa bupolofita bo liama kwa sikwata sesiswana, bona bo masiyaleti babatozizwe. (Maro. 2:28, 29) “Baana baalishumi babazwa mwa lipuo kaufela za macaba” bayemela ba lingu zeñwi. ‘Baswalelela’ Bakreste babatozizwe ka kuzwelapili kuswalisana ni bona ka busepahali kulapela Mulimu ka nzila yelukile. Kacwalo, manzibwana, fa lizazi la Kupuzo, ba lingu zeñwi babonisanga kuli baswalisana hahulu ni Bakreste babatozizwe ka kufumaneha kwa Kupuzo ni bona.

10. Ki lika mañi zaezize Jehova kuli ataleleze bupolofita bobu kwa Ezekiele 37:15-19, 24, 25?

¹⁰ Mubale Ezekiele 37:15-19, 24, 25. Jehova utalelelize bupolofita bo ka kukopanya babatozizwe ni ba lingu zeñwi ilikuli baswalisane hahulu. Bupolofita bo, bubulela za milamu yemibeli. Babanani sepo ya kuyo pila kwa lihalimu ki bona babataluswa kuli mulamu “wa Juda” (lona lusika mone baketiwanga malena ba Isilaele), mi babanani sepo ya kupila fa lifasi ki bona babataluswa kuli mulamu “wa Efraimi.” * Jehova naakaswalisanisa likwata zepeli zeo kuli libe “mulamu ulimuñwi.” Taba yeo italusa kuli nebaka swalisana ka kuetelelwa ki Mulenaa bona alimuñwi, yena Kreste Jesu. Silimo ni silimo, Bakreste babatozizwe ni ba lingu zeñwi bafumanehanga kwa Kupuzo, isiñi sina likwata zepeli, kono sina “mutapi ulimuñwi” oetelelwa ki “mulisana alimuñwi.”—Joa. 10:16.

11. “Lingu” zebulezwi kwa Mateu 25:31-36, 40 sihulu litusa cwañi banyani ba Kreste?

¹¹ Mubale Mateu 25:31-36, 40. “Lingu” zebulezwi mwa nguli ye liswaniseza babalukile babapila mwa nako ya mafelelezo, ili babanani sepo ya kupila fa lifasi, bona ba lingu zeñwi. Bazwelapili kuswalisana ni banyani ba Kreste babatozizwe ka moya wa Mulimu babasali fa lifasi sihulu ka kubatusa kueza musebezi omutuna wa kukutaza ni kuluta batu kuba balutiwa mwa lifasi kaufela.—Mat. 24:14; 28:19, 20.

12-13. Ki mwa linzila lifi zeñwi mo ba lingu zeñwi batusanga banyani ba Kreste?

 ¹² Silimo ni silimo, lisunda lisikai pili Kupuzo isika fita kale, ba lingu zeñwi batusanga banyani ba Kreste ka kuswalisana ni bona mwa mungendenge oezwanga mwa lifasi kaufela wa kumemela batu babatabela kaufela kwa Kupuzo. (Mubone mbokisi yeli, “ Kana Musweli Mwaitukiseza Kupuzo?”) Hape balukisanga kuli Kupuzo ikone kuezwa mwa liputeho kaufela, nihaike kuli mwa liputeho zeñata hakuna yacanga kwa sinkwa ni kunwa kwa waine. Ba lingu zeñwi batabile hahulu kuli batusa banyani ba Kreste mwa linzila zeo. Baziba kuli Jesu uunga kuli habatusa banyani bahae, batusa yena ka sibili.—Mat. 25:37-40.

¹³ Ki afi mabaka amañwi halufumanehanga kwa Kupuzo kusina taba ni sepo yelunani yona?

14. Jehova ni Jesu balubonisize cwañi lilato lelituna?

¹⁴ Lwaitebuha lilato lalubonisize Jehova ni Jesu. Jehova ulubonisize lilato mwa linzila zeñata, kono kunani nzila yeñwi yetuna yabonisize ka yona kuli walulata. Mulimu naalubonisize lilato lelituna ka kuluma Mwanaa hae yalatwa kuli ato nyandiswa ni kulushwela. (Joa. 3:16) Mi Jesu ni yena naabonisize lilato lelituna ka kuitoboha bupilo bwahae bakeñisa luna. (Joa. 15:13) Halukoni kukutiseza Jehova ni Jesu kabakala lilato leba lubonisize. Kono lwakona kubonisa buitumelo bwaluna ka molupilela bupilo bwaluna zazi ni zazi. (Makolo. 3:15) Mi lufumanehanga kwa Kupuzo bakeñisa kuli kueza cwalo kulufa kolo ya kunahanisisa lilato leba lubonisize ni kubonisa kuli lwabalata.

15. Ki kabakalañi Bakreste babatozizwe ni ba lingu zeñwi habaitebuha hahulu mpo ya tiululo?

¹⁵ Luitebuha hahulu mpo ya tiululo. (Mat. 20:28) Bakreste babatozizwe baitebuha tiululo, ili nto yekonahalisa kuli bafiwe tohonolo ya kuyo pila kwa lihalimu. Bakeñisa kuli banani tumelo mwa sitabelo sa Kreste, Jehova ubabeile kuba babalukile mi ubaañuzi sina bana bahae. (Maro. 5:1; 8:15-17, 23) Ba lingu zeñwi ni bona baitebuha tiululo. Bakeñisa kuli banani tumelo mwa sitabelo sa Kreste, baangiwa kuba babakenile fapilaa Mulimu, bakona kumuezeza sebelezo yekenile, mi banani sepo ya kupunyuha “ñalelwa yetuna.” (Sin. 7:13-15) Nzila yeñwi yebabonisa ka yona Bakreste babatozizwe ni ba lingu zeñwi kuli baitebuha tiululo ki ka kufumanehanga kwa Kupuzo silimo ni silimo.

16. Ki lifi libaka leliñwi halufumanehanga kwa Kupuzo?

¹⁶ Libaka leliñwi halufumanehanga kwa Kupuzo kikuli lubata kumamela taelo ya Jesu. Kusina taba ni sepo yelunani yona kwapili, mañi ni mañi waluna ubata kumamela taelo yanaafile Jesu fa busihu bwanaakalisize mukiti wa Kupuzo, yeli: “Muezange cwalo kuli munihupule.”—1 Makor. 11:23, 24.

17. Kufumaneha kwa Kupuzo kulutusa cwañi kusutelela ku Jehova?

¹⁷ Lusutelela ku Jehova. (Jak. 4:8) Sina molunyakisiselize mwa taba ye, Kupuzo ilufa kolo ya kunahanisisa sepo yalufile Jehova ni lilato lelituna lalubonisize. (Jer. 29:11; 1 Joa. 4:8-10) Haiba lunahanisisa sepo yende yalufile Jehova ni lilato lelituna lalubonisize, luka mulata hahulu mi silikani saluna ni yena sikatiya.—Maro. 8:38, 39.

18. Kunahanisisa mutala walutomezi Jesu kulususueza kuezañi?

 ¹⁸ Lususuezwa kulikanyisa mutala wa Jesu. (1 Pit. 2:21) Mazazinyana pili Kupuzo isika fita kale, lubalanga litaba za mwa Bibele zebonisa miinelo yanaakopani ni yona Jesu asika bulaiwa kale, lifu lahae, ni zuho yahae. Mi manzibwana fa lizazi la Kupuzo, luhupuliswanga za lilato lanaa lubonisize Jesu mwa ngambolo ya Kupuzo yefiwanga. (Maef. 5:2; 1 Joa. 3:16) Halunze lubala litaba zebonisa mo Jesu naalutomezi mutala omunde wa buitomboli ni kunahanisisa mutala wahae, lususuezwanga “kuzamaya sina mwanaazamaezi.”—1 Joa. 2:6.

19. Lukona cwañi kuzwelapili kuba mwa lilato la Mulimu?

¹⁹ Lutusiwa kuzwelapili kuba mwa lilato la Mulimu. (Juda 20, 21) Luzwelapili kuba mwa lilato la Mulimu ka kumamela milao yahae, kukenisa libizo lahae, ni kueza molukonela kaufela kuli lumutabise. (Liprov. 27:11; Mat. 6:9; 1 Joa. 5:3) Kufumaneha kwa Kupuzo kulutusa kuikatulela kupila ka nzila yebonisa kuli lubata kuba mwa lilato la Jehova kuya kuile.

20. Ki mabaka afi amande elunani ona a kufumaneha kwa Kupuzo?

²⁰ Ibe kuli sepo yaluna ki ya kupila kwa lihalimu kamba fa lifasi kuya kuile, lunani mabaka amande halutokwa kufumanehanga kwa Kupuzo. Silimo ni silimo halukopana hamoho ni babañwi fa lizazi leo, luhupulanga mutu yomuñwi yolulata, yena Jesu Kreste. Mi sa butokwa nikufita kikuli, luhupulanga lilato lelituna lalubonisize Jehova ka kuluma Mwanaa hae kuli ato luliulula kwa sibi ni lifu. Silimo se, Kupuzo ikaezwa manzibwana la Bufaifi, April 15, 2022. Lwalata Jehova ni Mwanaa hae; kacwalo, fa lizazi leo lelizamaelela ni lizazi lanaabulailwe Jesu, haluna kutuhelela nto ifi kamba ifi kulupaleliswa kufumaneha kwa Kupuzo.