1-2. Ki kabakalañi halufumanehanga kwa Kupuzo silimo ni silimo?

 IBATO ba lilimo ze 2,000 kwamulaho, Jesu naafanile bupilo bwahae kabakala luna kuli alutuse kufumana bupilo bobusa feli. Fa busihu bone butatamiwa ki lizazi lanaabulailwe, Jesu naalaezi balateleli bahae kuhupula kezo yebonisa lilato yeo ka kuezanga mukiti osatokwi lika zeñata kwandaa feela sinkwa ni waine.—1 Makor. 11:23-26.

² Lumamela taelo ya Jesu bakeñisa kuli lumulata hahulu. (Joa. 14:15) Silimo ni silimo ka nako ya Kupuzo, lubonisanga buitumelo bwaluna ku zaluezelize Jesu ka kubanga ni nako ya kulapela ni kunahanisisa ka za molutusezwa ki lifu lahae. Hape lutabelanga kuekeza kwa bukombwa bwaluna, ni kumema batu babañata kuli baswalisane ni luna kueza mukiti oipitezi wo. Mi luikatulezi kuli haluna kutuhelela nto ifi kamba kulupaleliswa kufumaneha kwa Kupuzo.

3. Lukanyakisisañi mwa taba ye?

³ Mwa taba ye, lukanyakisisa lika zetaalu zebonisa mo batanga ba Jehova baezelize buikatazo bobutuna kuli bahupule lifu la Jesu: (1) ka kueza Kupuzo sina feela mwanaaezelize Jesu, (2) ka kumemela babañwi kwa Kupuzo, ni (3) ka kueza Kupuzo kusina taba ni miinelo yetaata yebakopana ni yona.

4. Ki litaba mañi zeluitutanga kwa Kupuzo silimo ni silimo, mi ki kabakalañi halusa swaneli kukeshebisa litaba zeo? (Luka 22:19, 20)

⁴ Silimo ni silimo kwa Kupuzo, luteelezanga kwa ngambolo yetomile fa Bibele yealabanga hande lipuzo lisikai. Luitutanga  libaka batu habatokwa tiululo ni mo lifu la mutu alimuñwi likona kukwahelela libi za batu babañata. Luhupuliswanga zesiyemela sinkwa ni waine ni babaswanela kuca sinkwa ni kunwa kwa waine yeo. (Mubale Luka 22:19, 20.) Mi luitutanga za limbuyoti zebaka ikola babanani sepo ya kuto pila fa lifasi. (Isa. 35:5, 6; 65:17, 21-23) Haluswaneli kukeshebisa litaba zeluitutanga zeo. Batu babañata-ñata haba liutwisisi, mi habazibi libaka sitabelo sa Jesu hasili sa butokwa hahulu. Hape habaezangi Kupuzo ya lifu lahae sina mwanaaezelize. Ki kabakalañi hakuli cwalo?

5. Buñata bwa baapositola ba Jesu hase bashwile, batu nebakalile kuezanga cwañi mukiti wa kuhupula lifu la Jesu?

⁵ Hamulaho feela wa lifu la buñata bwa baapositola ba Jesu, kwakala kuba ni Bakreste ba buhata mwa puteho. (Mat. 13:24-27, 37-39) Babulela “litaba zekopami kuli bayembulule balutiwa, babalatelele.” (Lik. 20:29, 30) Yeñwi ya “litaba zekopami” zene bakalile kuluta Bakreste ba buhata neli ya kuli Jesu naasikafa mubili wahae “hañwi kuli alwale libi za babañata,” sina moibulelela Bibele, kono kuli sitabelo sahae siswanela kufiwa ka kukuta-kutela. (Maheb. 9:27, 28) Kacenu, batu babañata balumela tuto ya buhata yeo. Bakopananga hamoho mwa likeleke kamita—fokuñwi baezanga cwalo zazi ni zazi—kueza mukiti wa “Sitabelo sa Misa.” b Mwa likeleke zeñwi mona, lifu la Jesu lihupulwanga ka siwela, kono buñata bwa batu babaswalisana ni likeleke zeo baziba feela litaba lisikai ka za sitabelo sa Jesu ni zesipetile. Babañwi bakona kuipuza kuli: ‘Kana luli lifu la Jesu lakona kutusa kuli libi zaka liswalelwe?’ Ki kabakalañi hababuzanga puzo yeo? Kukona kuba kuli batu bao bakukuelizwe ki batu babakakanya ka za haiba sitabelo sa Jesu sakona kutusa kuli libi za batu liswalelwe. Ki lika mañi zebaezize balateleli ba Jesu ba niti kuli batuse batu kuba ni mubonelo oswanela ka za sitabelo sahae?

6. Ka 1872, ki taba mañi yene balemuhile baituti ba Bibele?

⁶ Kwa mafelelezo a lilimo za ma 1800, sikwata sa baituti ba Bibele sene sietelelwa ki Muzwale Charles Taze Russell, bakala kuituta Mañolo ka tokomelo. Nebabata kuziba niti ka za sitabelo sa Jesu ni mo mukiti wa kuhupula lifu lahae neuswanela kuezezwa. Ka 1872, nebalemuhile kuli Bibele iluta kuli Jesu naafile sitabelo sa tiululo kuli aliulule batu kaufela. Nebasika ipulukela litaba zene baitutile zeo. Kono neba lizibahalize ka kuitusisa libuka, mitende, ni limagazini. Nakonyana kuzwa fo, bakala kuezanga Kupuzo hañwi ka silimo ka kulikanyisa Bakreste ba mwa linako za baapositola.

7. Lipatisiso zene baezize baituti ba Bibele ba kwa makalelo lilutusa cwañi?

⁷ Lipatisiso zene baezize Bakreste bao lilimo zeñata kwamulaho zalutusa ni luna kacenu. Ka mukwa ufi? Ka tuso ya Jehova, luzibile niti ka za sitabelo sa Jesu ni zesisweli kupeta. (1 Joa. 2:1, 2) Hape luitutile kuli Bibele ibonisa kuli kunani likwata zepeli za batu babatabisa Mulimu—sikwata sapili ki sa batu babanani sepo ya kuyo pila kwa lihalimu basashwi mi sikwata sabubeli ki sa batu babañata-ñata babanani sepo ya bupilo bobusa feli fa lifasi. Lukasutelela hahulu ku Jehova haiba lunahanisisa mwalulatela hahulu ni mo sitabelo sa Jesu Kreste silutuseza ka butu. (1 Pit. 3:18; 1 Joa. 4:9) Kacwalo, ka kuswana ni mizwale baluna ba kwamulaho  bane basepahala, lumemanga batu babañwi kuswalisana ni luna kueza Kupuzo sina mwanaaezelize Jesu.

8. Ki lika mañi zebaezize batanga ba Jehova kuli bameme batu babañwi kwa Kupuzo? (Mubone maswaniso.)

⁸ Kuzwa feela kwamulaho, batanga ba Jehova bamemanga batu babañwi kwa Kupuzo. Ka 1881, mizwale ni likaizeli kwa America nebamemilwe kukopana hamoho mwa ndu ya muzwale kwa Allegheny, mwa Pennsylvania, kuli baeze mukiti oipitezi wo. Hamulaho wa fo, puteho ni puteho neikalile kuikezezanga Kupuzo. Mwa March ka 1940, bahasanyi nebataluselizwe kuli nebakona kumema batu kaufela mwa kalulo yabona ya simu bane batabela. Ka 1960, ofisi ya mutai neilumezi liputeho mapampili a kumemela batu kwa Kupuzo ahatisizwe, mi neli lwapili kueza cwalo. Kuzwa feela ka nako yeo, mapampili amañata-ñata a kumemela batu kwa Kupuzo ahasanyizwe. Ki kabakalañi halutandanga nako yeñata ni kueza buikatazo bobutuna kumema batu babañwi kwa Kupuzo?

9-10. Ki bo mañi babatusehanga halueza buikatazo bwa kumema batu kwa Kupuzo? (Joani 3:16)

⁹ Libaka leliñwi halumemanga batu babañwi kuto eza ni luna mukiti wa Kupuzo kikuli lubata kuli batu babafumaneha kwa mukiti wo lwapili bazibe zabaezelize Jehova ni Jesu. (Mubale Joani 3:16.) Lubanga ni sepo ya kuli zebaka bona ni kuutwa kwa Kupuzo lika basusueza kuituta zeñata ka za Jehova ni kuba batanga bahae. Kono batu babañwi batusehanga ni bona.

¹⁰ Hape lumemanga batu bane basebelezanga Jehova kono cwale bafokozi kwa moya.  Luezanga cwalo kuli lubahupulise kuli Mulimu usa balata. Babañata baamuhelanga memo yeo, mi lubanga ni tabo yetuna halu babona. Kufumaneha kwa Kupuzo kubahupulisanga tabo yene banani yona hane basebeleza Jehova kwamulaho. Halunyakisiseñi mutala wa kaizeli yomuñwi yabizwa Monica. c Nebatusizwe kukalisa kukutaza hape ka nako ya butuku bobuyambukela bwa COVID-19. Hamulaho wa kufumaneha kwa Kupuzo mwa 2021, nebabulezi kuli: “Kupuzo ye ibile ya butokwa hahulu ku na. Nikonile kukutaza kwa batu ni kubamemela kwa Kupuzo mi hanisika eza cwalo ka lilimo ze 20 zefelile. Neniezize mone nikonela kaufela kumema babañwi bakeñisa kuli niitumela hahulu ku zaniezelize Jehova ni Jesu.” (Samu 103:1-4) Ibe kuli batu baamuhela memo yaluna kamba kutokwa, luezanga molukonela kaufela kumema batu babañwi kwa Kupuzo, ka kuziba kuli Jehova waitebuha buikatazo bwaluna.

11. Jehova ufuyauzi cwañi buikatazo bwaluna bwa kumemela batu kwa Kupuzo? (Hagai 2:7)

¹¹ Jehova ufuyauzi hahulu buikatazo bwaluna bwa kumemela batu kwa Kupuzo. Mwa 2021, kusina taba kuli nelusa koni kueza lika zeñwi kabakala butuku bobuyambukela bwa COVID-19, nekufumanehile batu ba 21,367,603 kwa Kupuzo. Palo yeo iminahanya ibato ba habeli ni licika palo ya Lipaki za Jehova mwa lifasi kaufela! Nihakulicwalo, haki palo ya batu babafumaneha kwa Kupuzo yaanga Jehova kuba ya butokwa hahulu. Uiyakatwa mañi ni mañi wa batu babafumaneha kwa Kupuzo. (Luka 15:7; 1 Tim. 2:3, 4) Lunani buikolwiso bwa kuli Jehova uitusisanga musebezi waluna wa kumema batu kuli lufumane batu ba lipilu zende.—Mubale Hagai 2:7.

12. Ki miinelo mañi yekona kutahisa kuli kulubele taata kueza mukiti wa Kupuzo? (Mubone siswaniso.)

¹² Jesu naapolofitile kuli mwa mazazi a mafelelezo, lukakopana ni miinelo yetaata yeshutana-shutana yecwale ka kulwaniswa ki ba lubasi, nyandiso, lindwa, matuku ayambukela, ni miinelo yemiñwi yemiñata. (Mat. 10:36; Mare. 13:9; Luka 21:10, 11) Fokuñwi, miinelo yeo itahisanga kuli kulubele taata kueza mukiti wa kuhupula lifu la Jesu. Ki lika mañi zebaezize mizwale ni likaizeli baluna kuli batiyele miinelo yetaata yeo, mi Jehova ubatusize cwañi?

13. Jehova naafuyauzi cwañi bo Artem kabakala bundume ni buikatazo bone baezize kuli baeze mukiti wa Kupuzo hane bali mwa tolongo?

¹³ Kuba mwa tolongo. Mizwale baluna baba mwa tolongo kabakala tumelo yabona baezanga mobakonela kaufela kueza mukiti wa kuhupula lifu la Jesu. Halunyakisiseñi mutala wa muzwale yomuñwi yabizwa Artem. Mwa silimo sa 2020, ka nako ya Kupuzo, naabeilwe mwa sitokisi mi lineku ni lineku la sitokisi seo nelieza limita ze 17 mi nako ni nako mwa sitokisi seo, nekubanga mapantiti babane kamba baketalizoho. Kusina taba ni kuba mwa tolongo, naakonile kufumana lika zeñwi zanaaitusisize sina liswanisezo za Kupuzo, mi naalukisize kufa ngambolo ya Kupuzo kuli aituse yena muñi. Kono mapantiti babañwi banaali ni bona mwa sitokisi nebazubanga kwai mi nebaitusisanga lipulelo zemaswe. Ki muhato mañi wanaangile? Naabakupile kuli basike baitusisa lipulelo zemaswe kamba kuzuba nihaiba feela ka hora iliñwi. Mapantiti bao nebalumezi kusazuba kamba kuitusisa lipulelo  zemaswe ka nako ya Kupuzo, mi taba yeo neikomokisize bo Artem. Bo Artem batalusa kuli: “Neni bakupile kuli nibataluseze ka za Kupuzo.” Nihaike kuli mapantiti bao nebahanile kubataluseza ka za Kupuzo, hamulaho wa kubona ni kuutwa bo Artem inze baeza mukiti wa Kupuzo, babakupa kuli babataluseze litaba kaufela ka za teñi.

14. Ki buikatazo mañi bone buezizwe kuli Kupuzo ikone kueziwa kusina taba ni butuku bobuyambukela bwa COVID-19?

¹⁴ Butuku bobuyambukela bwa COVID-19. Butuku bobuyambukela bo habukalisa, batanga ba Jehova nebasa koni kukopana hamoho kueza Kupuzo. Kono butuku bo nebusika bapaleliswa kueza Kupuzo. d Liputeho zenenani lipangaliko zekonisa kukena fa Intaneti neliezize Kupuzo ka kuitusisa progilamu yekonahalisa kuli batu babonane. Kono kucwañi ka za batu babañata bane basina lipangaliko zebakonisa kukena fa Intaneti? Mwa linaha zeñwi, nekuezizwe litukiso za kuli ngambolo ya Kupuzo ibuhiswe fa TV ni kuliziwa fa wailesi. Kutuha fo, liofisi za mutai nelirekodile  lingambolo mwa lipuo zefitelela 500 ilikuli nihaiba batu babapila mwa libaka za matakanyani bakone kueza Kupuzo. Mi mizwale nebalukisize kuli lingambolo zerekodilwe zeo likone kuiswa ku bane balitokwa kaufela.

15. Muitutañi kwa mutala wa muituti yomuñwi wa Bibele yabizwa Sue?

¹⁵ Kulwaniswa ki ba lubasi. Babañwi, kubabelanga hahulu taata kueza Kupuzo bakeñisa kulwaniswa ki ba lubasi. Halunyakisiseñi mutala wa muituti yomuñwi wa Bibele yabizwa Sue. Mwa 2021, fa lizazi lene litatamiwa ki lizazi la Kupuzo, bo Sue bataluseza bane baitutanga ni bona Bibele kuli nebasike bafumaneha kwa Kupuzo bakeñisa kulwaniswa ki ba lubasi lwabona. Bane baitutanga Bibele ni bona bababalela Luka 22:44. Hasamulaho, babataluseza kuli halukopana ni miinelo yetaata, luswanela kulikanyisa mutala wa Jesu ka kulapelanga ku Jehova ni kumusepa ka kutala. Lizazi lene litatami, bo Sue balukisa liswanisezo ni kubuha tukiso yeipitezi ya kunyakisisa Liñolo la Zazi fa jw.org. Manzibwana a lizazi leo, bafumaneha kwa Kupuzo ka kuitusisa foni, inze bali mwa muzuzu wabona. Hamulaho wa fo, bo Sue bañolela bane baitutanga Bibele ni bona kuli: “Nemu nisusuelize hahulu mabani. Neniezize mone nikonela kaufela kuli nifumanehe kwa Kupuzo mi Jehova naanitusize luli. Nitabile hahulu mi niitumela ku Jehova luli!” Mubona cwañi, kana Jehova wakona kumitusa haiba mukopana ni muinelo oswana?

16. Ki kabakalañi halunani buikolwiso bwa kuli Jehova ukafuyaula buikatazo boluka eza kuli lufumanehe kwa Kupuzo? (Maroma 8:31, 32)

¹⁶ Jehova uitebuha hahulu buikatazo boluezanga kuli luhupule lifu la Jesu. Lunani buikolwiso bwa kuli uka lufuyaula haiba lubonisa kuli lwaitebuha zaluezelize. (Mubale Maroma 8:31, 32.) Haike luikatulele kufumaneha kwa Kupuzo silimo se ni kueza molukonela kaufela kuekeza kwa bukombwa bwaluna ka nako ya Kupuzo.