Kaniti, Jehova ubata kuli batu babanyalani babe ni tabo ni kuli linyalo labona liine kuya kuile. (Mat. 19:4-6) Haiba mubata kukena mwa linyalo, mukona kufumana cwañi mutu yaswanela wa kunyalana ni yena? Ka kuba Mubupi waluna, Jehova waziba zekona kutusa batu kukondisa mwa libato labona ni kuba ni linyalo lelinde. Kacwalo, haiba musebelisa likuka zalufile, mukakondisa. Halunyakisiseñi likuka zeñwi zecwalo.

Pili, luswanela kuutwisisa taba ye: “Pilu yapuma kufita linto kaufela mi iziyelehile.” (Jer. 17:9) Batu bababata kunyalana habakala kuzibana ni kuba mwa libato, bakona kutabelana hahulu kapili mi kukona kubabela taata kueza likatulo zende. Batu habaikatulela kukena mwa linyalo ka libaka feela la mobaikutwela ka za mutu yomuñwi, hañata bakenanga mwa butata. (Liprov. 28:26) Ki lona libaka batu bababeli babasweli kuzibana habasa swaneli kumatukela kutalusezana za kuli balatana kamba kusepisana kuli bakaeza lika zeñwi isali kwa makalelo a libato labona pili basika zibana kale hande.

Liproverbia 22:3 ibulela kuli: “Yabutali ubona kozi mi waipata, kono babasina zibo bazwelapili cwalo mi hasamulaho bautwa butuku.” Ki butata mañi bwakona kukopana ni bona mutu haiba aitusisa mawebusaiti aketela batu mutu wa kunyalana ni yena? Ka bumai, babañwi nebakalile kuba mwa libato ni batu babañwi bone basazibi fa Intaneti, mi hasamulaho balemuha kuli mutu yene banahana kuli naali mwa libato ni bona naabapuma. Hape batu babasa sepahali bakwalululisize maakaunti a buhata fa Intaneti ilikuli bauzweze batu babasina temuho masheleñi abona. Fokuñwi, batu babasa sepahali babacwalo, nebaipapata kuli ki Lipaki za Jehova.

Halunyakisiseñi butata bobuñwi bwakona kukopana ni bona mutu. Mawebusaiti amañwi aitusisanga maprogilamu a fa kompyuta kunyalanisa batu bababonahala kuli baswanelana. Nihakulicwalo, hakuna bupaki bobubonisa kuli batu bababatanga mutu wa kunyalana ni yena ka linzila zecwalo bakondisanga. Haluswaneli kulibelela kuli maprogilamu a fa kompyuta aezizwe ki batu akona kulutusa kueza likatulo za butokwa, inge cwalo kulufumanela mutu yaswanela wa kunyalana ni yena. Nikamuta, maprogilamu a fa kompyuta haakoni kulutusa sina molikona kulutuseza likuka za mwa Bibele.—Liprov. 1:7; 3:5-7.

Liproverbia 14:15 ibulela kuli: “Mutu yasalemuhi  kozi ulumela litaba kaufela, kono yabutali unahanisisa mihato yahae kaufela.” Pili musika eza kale katulo ya kunyalana ni mutu yomuñwi, muswanela kuziba hande mutu yo. Kono kutaata kuziba hande mutu fa Intaneti. Niha mukatalusezana litaba ka za mina kamba kutanda nako yeñata inze muñolelana mashango, hamuna kukona feela kuzibana hande. Batu babañwi bane banahana kuli nebafumani mutu yaswanela luli fa Intaneti, nebakomokile hahulu mwanaabonahalela hane bakopani ni yena.

Muñoli yomuñwi wa samu naabulezi kuli: “Haniswalisani ni bapumi, mi niambuka babapata sebali sona.” (Samu 26:4) Batu babañata baanga kuli hakusika fosahala kuñola litaba za buhata ka za bona fa mawebusaiti aketela batu mutu wa kunyalana ni yena ilikuli batabelwe ki batu babañwi. Bakona kupata mikwa yabona yemaswe, mi batu babañwi mwendi habakoni kulemuha mikwa yeo mwa mashango abañolelana ni bona fa Intaneti. Batu babañwi bakona kuitibahaza kuli ki Lipaki za Jehova, kono kana luli ki Bakreste babakolobelizwe? Kana batiile kwa moya? Kana banani silikani sesitiile ni Jehova? Kana mizwale ni likaizeli babakuteka mwa puteho yahabo bona? Kamba kana baangiwa kuli habana mikwa yeminde kamba mwendi babalelwa kwa “liango zemaswe”? (1 Makor. 15:33; 2 Tim. 2:20, 21) Mi kana balukuluhile kunyala kamba kunyalwa ka kuya ka likuka za mwa Bibele? Ki kwa butokwa hahulu kuziba litaba zeo, kono hamukoni kuliziba haiba musabuzi Lipaki babañwi babaziba hande mutu yo. (Liprov. 15:22) Mi mutangaa Jehova yasepahala haana kulika nihaiba hanyinyani ‘kulwala coko iliñwi ni babasa lumeli, ili coko yesalikaneleli.’—2 Makor. 6:14; 1 Makor. 7:39.

Kunani linzila zende zakona kufumana ka zona Mukreste mutu wa kuba mwa libato ni kunyalana ni yena ka nzila yende mwa sibaka sa kuitusisa mawebusaiti aketela batu mutu wa kunyalana ni yena, ili akona kukenya batu mwa butata. Mukona kufumana cwañi mutu yaswanela yomukona kukena ni yena mwa linyalo? Butuku bobuyambukela bwa COVID-19 hase bufelile, mukakona kukopana hamoho ni Lipaki za Jehova babañwi ni kuzibana ni bona kwa mikopano ya puteho, mikopano ya mupotoloho, mikopano yemituna, ni mikopano yemiñwi.

Ka nako yelusa koni kukopana ni babañwi bakeñisa butuku bobuyambukela bwa COVID-19, luitusisanga maprogilamu a fa tupangaliko akonahalisa kuli lukopane ni mizwale ni likaizeli baluna ka nako ya mikopano ya puteho, mi munani kolo ya kuzibana ni Lipaki za Jehova babañwi ba makwasha. Mwakona kuikutwela lingambolo zabona ni mobafela likalabo kwa mikopano. (1 Tim. 6:11, 12) Mi hamulaho wa mikopano, musakona kuikambota ni muzwale kamba kaizeli yo ka kuitusisa tukiso ya fa zoom yebizwa breakout room. Ka kuitusisa maprogilamu acwalo, akonahalisa kuli Lipaki za Jehova babonane, mwakona kuziba mwainezi mutu yomutabela hanzaa ambola ni batu babañwi. (1 Pit. 3:4) Nako hainze iya, mukazibana hande ni mutu yo, hape mukalemuha haiba munani likonkwani zeswana ni kuziba haiba sibeli samina mukalumelelana mwa linyalo.

Bakreste ba makwasha hababata mutu wa kunyalana ni yena ka kulatelela likuka za mwa Bibele, bakaiponela buniti bwa manzwi a kwa Liproverbia, ali: “Yafumana musali yomunde [kamba muuna], ufumani nto yende, mi ushemubiwa ki Jehova.”—Liprov. 18:22.