1-2. Manzwi a Jehova a kwa Isaya 65:16, 17, alutusa cwañi kuzwelapili kuitiisa?

MUKOPANO OMUTUNA wa silimo sa 2017 neunani toho ya taba yesusueza yeli, “Musike Mwazwafa!” Mukopano wo neu lutusize kuziba molukona kuitiiseza halukopana ni miinelo yetaata. Sekufitile lilimo zeene kuzwa folubela ni mukopano wo, mi lusazwelapili kuitiisa mwa lifasi lelimaswe le.

² Ki miinelo mañi yetaata yemutalimani ni yona cwanoñu fa? Kana mushwezwi ki yomuñwi wa lubasi lwamina kamba mulikanaa mina yalatwa? Kana mukula butuku bobuñwi bobutuna? Kana munani mapongo bakeñisa kuli semusupala? Kana muwezwi ki kozi ya ka taho kamba kana mwa sibaka semupila ku sona kunani mifilifili kamba mwendi musweli mwanyandiswa? Kana muamilwe ki butuku bobuñwi, inge cwalo butuku bobuyambukela bwa COVID-19? Lunyolelwa hahulu nako yeo muta lika zeo kaufela halina kubateñi—lukabe lulilibezi mi halisana kuezahala hape!—Mubale Isaya 65:16, 17.

3. Ki lika mañi zeluswanela kueza cwale, mi ki kabakalañi?

³ Bupilo mwa lifasi le butaata, mi mwendi kwapili lukatokwa kuitiisa bakeñisa kuli lukakopana ni miinelo yetaata hahulu nikufita. (Mat. 24:21) Kacwalo, luswanela kuzwelapili kuitiisa. Kabakalañi? Kabakala kuli Jesu naabulezi kuli: “Ka kuitiisa kwamina mukapilisa bupilo bwamina.” (Luka 21:19) Haiba lunyakisisa zetusize babañwi kutiyela miinelo yetaata yeswana ni yelukopana ni yona, lukazwelapili kuitiisa.

4. Ki kabakalañi halubulela kuli Jehova ki yena mutala omunde hahulu wa buitiiso?

⁴ Ki mañi yalutomezi mutala omunde hahulu wa buitiiso? Ki Jehova Mulimu. Mwendi mwakomoka kuutwa cwalo. Kono haiba munahanisisa taba yeo, mukautwisisa libaka hakulicwalo. Lifasi  le lizamaiswa ki Diabulosi, mi litezi lika zemaswe. Jehova unani maata a kufelisa lika zemaswe zeo honafa, kono ulibelezi nako yeswanela yakaeza cwalo kwapili. (Maro. 9:22) Ka nako ya cwale, Mulimu uzwelapili kuitiisa kufitela nako yeo yatomile ifita. Halunyakisiseñi miinelo ye 9 yazwelapili kutiyela Jehova.

5. Libizo la Mulimu lisinyizwe cwañi, mi muikutwa cwañi ka za taba yeo?

⁵ Kusinyiwa kwa libizo lahae. Jehova walata libizo lahae, mi ubata kuli likutekiwe ki mañi ni mañi. (Isa. 42:8) Kono mwa lilimo ze 6,000 zefelile, libizo lahae lelinde lisinyizwe. (Samu 74:10, 18, 23) Taba yeo neikalezi mwa simu ya Edeni muta Diabulosi (ili linzwi lelitalusa “Lisawana”) naatamile Mulimu taba ya buhata ya kuli naatimile Adama ni Eva nto yeñwi yene batokwa kuli babe ni tabo. (Gen. 3:1-5) Kuzwa feela nako yeo, Jehova utamilwe taba ya buhata ya kuli utimanga batu lika zebatokwa hahulu. Jesu naabilaelizwe hahulu ki taba ya kuli Ndatahe naasinyizwe libizo. Ka lona libaka leo, naalutile balutiwa bahae kulapela kuli: “Ndataa luna ya kwa mahalimu, libizo lahao likeniswe.”—Mat. 6:9.

6. Ki kabakalañi Jehova halibelezi nako yetelele kuli atatulule taba ya bubusi bwahae?

⁶ Kulwaniswa kwa bubusi bwahae. Jehova ki yena feela yanani tukelo ya kubusa mahalimu ni lifasi, mi puso yahae ki yona yende ka kufitisisa. (Sin. 4:11) Kono Diabulosi ulikile kukelusa mangeloi ni batu kulumela kuli Mulimu haana tukelo yecwalo. Taba ya kuli Jehova unani tukelo ya kubusa neisa koni kutatululwa mwa lizazi feela lililiñwi. Bakeñisa kuli Mulimu unani butali, utuhelezi batu kuipusa ka nako yetelele kuli bakone kuiponela kuli habakoni kuipusa kusina kutusiwa ki Mubupi wabona. (Jer. 10:23) Kabakala pilu-telele ya Mulimu, taba yeo ikatatululwa ka kutala. Kukaiponahalela hande kuli Mulimu ki yena yanani tukelo ya kubusa mi ki Mubuso wahae feela okona kutahisa kuli kube ni kozo ni buiketo fa lifasi.

7. Ki bo mañi babakwenuhezi Jehova, mi ukaezañi ku bona?

⁷ Bana bahae babañwi baiketezi kumukwenuhela. Jehova naabupile bana bahae ba kwa lihalimu ni ba fa lifasi inze bapetahalile. Kono hasamulaho, mwanaa hae wa lingeloi, yena Satani (ili linzwi lelitalusa “Muhanyezi”) amukwenuhela mi atahisa kuli batu babapetahalile, bo Adama ni Eva bakwenuhele Jehova. Mangeloi ni batu babañwi ni bona baswalisana ni yena kukwenuhela Mulimu. (Juda 6) Hamulaho wa nako, mane babañwi mwahalaa sicaba sa Maisilaele, bona batu banaaiketezi Mulimu, neba mukwenuhezi mi bakala kulapela milimu ya buhata. (Isa. 63:8, 10) Kusina kukakanya, Jehova naaikutwile hahulu bumaswe. Nihakulicwalo, uitiisize mi ukazwelapili kuitiisa kufitela nako yakatimeza bakwenuheli kaufela. Ka nako yeo, batanga bahae babasepahala bakaikutwa kuimuluha, mi bona ni Jehova bakaba ni tabo bakeñisa kuli hakusana lika zemaswe zeezwa mwa lifasi!

8-9. Ki litaba mañi za buhata zesweli kuhasanywa ka za Jehova, mi ki lika mañi zeluswanela kueza ka za teñi?

⁸ Litaba za buhata zazwelapili kuhasanya Diabulosi. Satani naapihile kuli Jobo mutangaa Jehova yasepahala naasebeleza Mulimu kabakala lika zanaa mufile, ni kuli batanga ba Jehova babasepahala kaufela ni bona bamusebeleza ka libaka leliswana. (Jobo 1:8-11; 2:3-5) Diabulosi uzwezipili kutameleza batu taba yeswana kuto fita ni kacenu le. (Sin. 12:10) Haiba lutiyela miinelo yetaata yelukopana ni yona ni kuzwelapili kusepahala ku Jehova kabakala kuli lwamulata, lukabonisa kuli taba yapiha Satani ki ya buhata. Mi sina Jehova hanaafuyauzi Jobo, ni luna uka lufuyaula kabakala buitiiso bwaluna.—Jak. 5:11.

 ⁹ Satani uitusisa baeteleli ba bulapeli bwa buhata kuhasanya taba ya kuli Jehova unani situhu mi ki yena yatahisa kuli batu banyande. Babañwi mane babulelanga kuli banana habashwa, ki Mulimu yabaangile bakeñisa kuli naabata mangeloi amañwi kwa lihalimu. Taba yeo inyefulisa Mulimu luli! Kono luna lwaziba kuli Jehova ki Ndate yalilato. Halukula butuku bobutuna kamba mutu yomuñwi yolulata hashwa, halunyazangi Mulimu. Kono lunani tumelo ya kuli zazi leliñwi, ukafolisa babakula ni kuzusa babashwile. Lubulelelanga batu kaufela babatabela kuteeleza ku luna kuli Jehova ki Mulimu yalilato. Halueza cwalo, lutusa kuli Jehova akone kualaba yamunyefula.—Liprov. 27:11.

10. Samu 22:23, 24 ibulelañi ka za Jehova?

¹⁰ Kubona manyando a batanga bahae balata hahulu. Jehova ki Mulimu yanani mukekecima. Uikutwanga hahulu bumaswe haalubona inze lunyanda kabakala nyandiso, makulanu, kamba kusapetahala. (Mubale Samu 22:23, 24.) Jehova wautwisisa manyando aluna; ubata kuafelisa mi ukaeza cwalo luli. (Mubapanye Exoda 3:7, 8; Isaya 63:9.) Nako yataha muta Mulimu “[akatakula] miyoko kaufela kwa meeto [aluna], mi lifu halisana kubateñi, nihaiba kutahelwa ki maswabi kamba kulila kamba kuutwa butuku.”—Sin. 21:4.

11. Jehova uikutwa cwañi ka za batanga bahae babasepahala babashwile?

¹¹ Kuutwa butuku kabakala kukauhana ni batanga bahae babashwile. Jehova uikutwa cwañi ka za batanga bahae babasepahala babashwile? Unyolelwa kubabona hape! (Jobo 14:15) Munahane feela Jehova mwanyolelelwa kubona mulikanaa hae Abrahama! (Jak. 2:23) Kamba mwanyolelelwa kubona Mushe yanaabulezi ni yena “pata ka pata.” (Exo. 33:11) Mi kusina kukakanya, unyolelwa hahulu kubona mulikanaa hae Davida ni bañoli babañwi ba samu  habaopela lipina zende za kumulumbeka! (Samu 104:33) Nihaike kuli balikani ba Mulimu ba, baitobalezi ka lifu, Jehova haasika balibala. (Isa. 49:15) Wahupula lika kaufela ka za butu bwabona. Bibele ibulela kuli “ka mubonelo wahae, kaufelaa bona bapila.” (Luka 20:38, litaluso ze kwatasi) Zazi leliñwi, uka bazusa kwa bafu mi ukautwa litapelo zabona zezwelela kwatasaa pilu ni kuamuhela sebelezo yabona. Haiba mushwezwi ki mutu yomuñwi yomulata, kuziba litaba ze kwakona kumiomba-omba.

12. Ki nto mañi sihulu yeutwisa Jehova bumaswe mwa mazazi a mafelelezo amaswe a?

¹² Kubona batu babamaswe habahatelela babañwi. Adama ni Eva hane bakwenuhezi Mulimu, Jehova naaziba kuli bumaswe nebuka ekezeha hahulu nikufita kono hamulaho wa nako, lika nelikaba hande hape. Jehova utoile bumaswe, kusaluka, ni mifilifili yeliteñi mwa lifasi kacenu. Kamita uiyakatwa hahulu batu babacwale ka ba mayemo a kwatasi, babasina yabatusa, lindiala ni limbelwa. (Zak. 7:9, 10) Jehova sihulu uikutwanga hahulu bumaswe habona batanga bahae babasepahala habanyandiswa ni kulengiwa mwa litolongo. Mukolwe kuli wamilata kaufelaa mina hamunze muitiisa sina yena.

13. Ki muzamao ocwañi omaswe wazwelapili kubona Mulimu kwa batu, mi ukaezañi ka za taba yeo?

¹³ Muzamao wa batu omaswe ozwelapili kutotobela. Satani ubata kuli batu bababupilwe ka siswaniso sa Mulimu babe ni muzamao omaswe. Mulimu ‘hanaaboni kuli bumaswe bwa mutu nebuekezehile hahulu’ mwa mazazi a Nuwe, “ainyaza kuli naaezize batu mwa lifasi, mi autwa butuku kwa pilu yahae.” (Gen. 6:5, 6, litaluso ze kwatasi; Gen. 6:11) Kana lika mwa lifasi libile hande kuzwa feela nako yeo? Kutokwa nihanyinyani! Diabulosi ulukela kuba yatabile hahulu kubona kuli batu bazwelapili kuba ni muzamao wa buhule wa mufuta kaufela ocwale ka baana kulobala ni basali babasika nyalana ni bona kamba kulobala ni baana ka bona kamba basali kulobala ni basali ka bona! (Maef. 4:18, 19) Satani sihulu ubanga ni tabo yetuna kubona batu babalapela Jehova habaeza sibi sesituna. Nako yatomile Jehova haika fita, ukabonisa kuli utoile muzamao wa buhule ka kuyundisa batu kaufela babasa lati kucinca.

14. Ki lika mañi zebasweli kueza batu kwa lifasi ni lifolofolo zabupile Mulimu?

¹⁴ Kubona lifasi halisinyiwa. Batu habasikaba feela ni ‘maata a kuhatelela babañwi, kubaeza maswe,’ kono hape bazwelapili kusinya lifasi ni kusababalela lifolofolo zanaa bafile Jehova kuli balibabalele. (Muek. 8:9; Gen. 1:28) Licaziba ba sayansi babañwi batalusa kuli likezo za batu likona kutahisa kuli mwa lilimo feela lisikai, lifolofolo ni limela zeñata za mifuta-futa lishwe. Kuswanezi batu habaikalezwi kuli lifasi lisweli lasinyeha! Niteñi, Jehova usepisa kuli ‘ukasinya babasinya lifasi’ mi ukafetula lifasi kaufela kuba paradaisi.—Sin. 11:18; Isa. 35:1.

15-16. Ki nto mañi yelususueza kuzwelapili kuitiisa sina Jehova? Mufe mutala.

¹⁵ Munahane feela miinelo kaufela yemaswe yazwezipili kutiyela Ndataa luna wa kwa lihalimu ka lilimo zeñata-ñata. (Mubone mbokisi yeli, “ Zasweli Kutiyela Jehova.”) Jehova wakona kufelisa bumaswe kaufela mwa lifasi le ka nako ifi kamba ifi. Kono bakeñisa kuli uzwelapili kubonisa pilu-telele, lwatuseha luli! Halunyakisiseñi mutala wo. Luungeñi kuli bo mutu ni musalaa hae bataluselizwe kuli mwanaa bona yasika pepwa kale unani butata bobutuna, haana kuba ni buikangulo bobunde haakapepwa, mi ukashwa inzaa sali mwanana. Nihakulicwalo, bashemi bao baba ni tabo mwanaa bona hapepwa niha baziba kuli kukaba taata hahulu kumubabalela. Bakeñisa kuli balata mwanaa bona, bakatiyela muinelo otaata ufi kamba ufi obakona kukopana ni ona habanze bamubabalela.

 ¹⁶ Ka mukwa oswana, batu kaufela babasimuluha ku Adama ni Eva bapepilwe inze basika petahala. Nihakulicwalo, Jehova wabalata mi wabaisa pilu. (1 Joa. 4:19) Mi ka kushutana ni bashemi bababulezwi mwa mutala waluna, Jehova wakona kufelisa manyando abakopana ni ona bana bahae. Utomile lizazi lakafelisa manyando kaufela abakopana ni ona batu. (Mat. 24:36) Kaniti luli, lilato lanani lona Jehova ku luna lilususueza kuzwelapili kuitiisa sina yena kufitela nako yeo.

17. Mutala wa Jesu obonisizwe kwa Maheberu 12:2, 3 ukona kulutusa cwañi kuzwelapili kuitiisa?

¹⁷ Jehova ki yena mutala omunde hahulu wa buitiiso. Jesu naalikanyisize mutala wa Ndatahe wa buitiiso ka kutala. Jesu hanaali fa lifasi, naatiyezi lipulelo za kumulwanisa, lishubu ni kota ya linyando kabakala luna. (Mubale Maheberu 12:2, 3.) Kusina kukakanya, mutala wa Jehova wa buitiiso neutusize Jesu kuitiisa. Mutala wo ni luna wakona kulutusa.

18. Liñolo la 2 Pitrosi 3:9 lilutusa cwañi kuitebuha pilu-telele ya Jehova?

¹⁸ Mubale 2 Pitrosi 3:9. Jehova waziba nako yeswanela ya kufelisa bumaswe kaufela mwa lifasi le. Bakeñisa pilu-telele yahae, buñata bobutuna bwa batu bafitile fa kumuziba mi seba musebeleza ni kumulumbeka. Kaufelaa bona baitebuha kuli Jehova uzwezipili kuba ni pilu-telele ka lilimo zeñata-ñata kakuli taba yeo ibafile kolo ya kupepiwa, kuituta ka za hae ni kumulata, ni kuneela bupilo bwabona ku yena. Kukaiponahalela hande kuli katulo yaezize Jehova ya kuzwelapili kuitiisa ka nako yetelele neli yende kakuli kwapili batu babañata-ñata bakafuyaulwa!

19. Luswanela kuikatulela kuezañi, mi lukafuyaulwa cwañi haiba lueza cwalo?

¹⁹ Mutala wa Jehova wa buitiiso ulutusa kutiyela miliko yelukopana ni yona inze lutabile. Nihaike kuli zaezize Satani liutwisize Jehova butuku bobutuna, Jehova uzwezipili kuba “Mulimu yatabile.” (1 Tim. 1:11) Ni luna lwakona kuzwelapili kuba ni tabo halunze lulibelela kuli Jehova akenise libizo lahae, kubonisa kuli bubusi bwahae bulukile, kufelisa bumaswe kaufela ni miinelo yetaata yelukopana ni yona kacenu. Haike luikatulele kuzwelapili kuitiisa ka kuziba kuli Ndataa luna ya kwa lihalimu ni yena usweli waitiisa. Haiba lueza cwalo, lukaiponela buniti bwa manzwi a, aali: “Unani tabo mutu yazwelapili kutiyela manyando, kakuli hasatabezwi ki Mulimu ukaamuhela kuwani ya bulena ya bupilo, yeo Jehova asepisize babazwelapili kumulata.”—Jak. 1:12.