1. Luswanela kuunga cwañi taba ya kuli Jehova walulumeleza kulapela ku yena?

 LUFILWE tohonolo yetuna luli ya kuatumela Mubupi wa lihalimu ni lifasi ka tapelo. Munahane feela taba ye: Lwakona kutaluseza Jehova lika kaufela ze mwa pilu yaluna ka nako ifi kamba ifi ni mwa puo ifi kamba ifi, kusina kulibelela kuli alufe nako ya kueza cwalo. Lwakona kulapela ku yena haluli mwa sipatela kamba mwa tolongo, mi Ndataa luna yalilato ukateeleza ku luna. Luitebuha hahulu tohonolo ye.

2. Mulena Davida naabonisize cwañi kuli naaitebuha tohonolo ya tapelo?

² Mulena Davida naaitebuhile hahulu tohonolo ya tapelo. Naaopelezi Jehova kuli: “Haike tapelo yaka ibe sina insense yelukisizwe fapilaa hao.” (Samu 141:1, 2) Mwa linako za Davida, insense yekenile yeneitusiswanga mwa bulapeli bwa niti ki baprisita neilukiswanga hande ka tokomelo. (Exo. 30:34, 35) Kuitusisa linzwi la insense kubonisa kuli Davida naabata kunahanisisa zanaaka bulela mwa tapelo ku Ndatahe ya kwa lihalimu. Ni luna lubata kueza nto yeswana. Lubata kuli litapelo zaluna litabise Jehova.

3. Luswanela kulapela cwañi ku Jehova, mi ki kabakalañi?

³ Halulapela ku Jehova, luswanela kubonisa likute lelituna. Munahane feela lipono zekomokisa zanaaboni Isaya, Ezekiele, Daniele, ni Joani. Nihaike kuli lipono zeo zashutana, zaswana ka nzila yeñwi. Kaufelaa zona libonisa kuli Jehova ki Mulena yapahami hahulu. Isaya “[naaboni] Jehova ainzi mwa lubona lolupahami hahulu.”  (Isa. 6:1-3) Ezekiele naaboni Jehova ainzi mwa koloi yahae ya kwa lihalimu, inzaa potolohilwe ki “liseli lelituna lene liswana sina liseli la nambwamutalati.” (Ezek. 1:26-28) Daniele naaboni “Yomuhulu wa Mazazi” inzaa apezi liapalo zesweu, mi malimi a mulilo naazwa kwa lubona lwahae. (Dan. 7:9, 10) Mi Joani naaboni Jehova ainzi mwa lubona lolupotolohilwe ki nto yeswana ni nambwamutalati yende yenebonahala inge emeralda. (Sin. 4:2-4) Kunahanisisa kanya yetuna yanani yona Jehova kuswanela kulutusa kuitebuha hahulu tohonolo yelunani yona ya kumuatumela ka tapelo ni butokwa bwa kulapela ku yena ka likute. Kono luswanela kulapela cwañi?

4. Luitutañi kwa manzwi apili a mwa tapelo yeli mutala yefumaneha kwa Mateu 6:9, 10?

⁴ Mubale Mateu 6:9, 10. Mwa Ngambolo ya fa Lilundu, Jesu naalutile balutiwa bahae mwakulapelela ka nzila yetabisa Mulimu. Hamulaho wa kubulela kuli “mi cwale mina mulapele cwana,” Jesu naakalile ka kubulela litaba za butokwa zeama mulelo wa Jehova: ili kukeniswa kwa libizo lahae; kutaha kwa Mubuso wahae, okayundisa balwanisi bahae kaufela; ni lika zende zebaka ikola batu fa lifasi kwapili. Haiba lulapelela lika zeo, lukabonisa kuli luunga tato ya Mulimu kuli ki ya butokwa.

5. Kana kulukile kulapelela lika za ka butu?

⁵ Jesu hasaabulezi lika za butokwa zeluswanela kulapelela, naabonisize kuli hakusika fosahala kulapelela lika za ka butu. Lwakona kukupa Jehova kuli alufe sico sa ka zazi, kuluswalela libi zaluna, kulusileleza kuli lusike lwakomiwa ki muliko, ni kululamulela ku yamaswe. (Mat. 6:11-13) Halukupa Jehova lika zeo, lubonisa kuli luitingile ku yena mi lubata kumutabisa.

6. Kana luswanela kulapelela feela litaba zebulezwi mwa tapelo yeli mutala? Mutaluse.

⁶ Jesu naasabati kuli balateleli bahae habalapela baitusise manzwi aswana ni anaaitusisize mwa tapelo yeli mutala. Mwa litapelo zeñwi zanaalapezi Jesu, naabulezi litaba zeñwi zeneli za butokwa ku yena ka nako yeo. (Mat. 26:39, 42; Joa. 17:1-26) Ka  mukwa oswana, ni luna lwakona kulapelela nto ifi kamba ifi yelubilaeza. Halubata kueza katulo, lwakona kulapela kuli lufiwe butali ni kutwisiso. (Samu 119:33, 34) Halufilwe musebezi otaata, lwakona kulapela kuli lufiwe butali ni temuho. (Liprov. 2:6) Bashemi bakona kulapelela bana babona, bana bakona kulapelela bashemi babona, mi kaufelaa luna luswanela kulapelelanga baituti baluna ba Bibele ni batu bolukutazanga ku bona. Kono halulapela, haluswaneli feela kukupanga Jehova kuli aluezeze lika zeñwi.

7. Ki kabakalañi haluswanela kulumbeka Jehova mwa litapelo zaluna?

⁷ Luswanela kulumbeka Jehova mwa litapelo zaluna. Mulimu waluna ki yena yaswanela kulumbekwa hahulu kufita mutu ufi kamba ufi. Ki “yomunde mi ulata kuswalela.” Hape ki “yanani makeke ni mukekecima, yasaakufi kuhalifa ni yatezi lilato lelisa feli ni busepahali.” (Samu 86:5, 15) Kaniti luli, lunani mabaka amande a kulumbeka Jehova kabakala mwainezi ni zaluezeza.

8. Ki lika mañi zeñwi zelukona kuitumela ku Jehova? (Samu 104:12-15, 24)

⁸ Kwandaa kulumbeka Jehova mwa litapelo zaluna, hape luswanela kuitumela ku yena kabakala lika zende zaluezeza. Ka mutala, lwakona kuitumela ku yena kabakala lipalisa zebuheha, lico zeñata zetabusa za mifuta-futa, ni siango sesinde seluikola ni balikani baluna. Ndataa luna yalilato ulufanga lika zecwalo ni lika zeñwi zeñata kuli lube ni tabo. (Mubale Samu 104:12-15, 24.) Kono sa butokwa nikufita kikuli, lwaitumela ku Jehova kabakala lico za kwa moya zeñata zalufa ni kabakala sepo yende yelunani yona ya za kwapili.

9. Ki lika mañi zeka lutusa kuhupula kuitumela ku Jehova? (1 Matesalonika 5:17, 18)

⁹ Fokuñwi lukona kulibala ka bunolo kuitumela ku Jehova kabakala lika kaufela zaluezelize. Kono ki lika mañi zekona kulutusa kuhupula kuitumela ku yena? Mwakona kuñola mukoloko wa lika zene mukupile Jehova ka kunonga mi nako ni nako mutalimange fa mukoloko wamina kubona  molialabezwi litapelo zamina. Kihona mukalapela ku yena kuitumela kwa tuso yahae. (Mubale 1 Matesalonika 5:17, 18.) Munahane taba ye: Lubanga ni tabo ni kuikutwa kulatiwa batu babañwi habaitumela ku luna. Ka mukwa oswana, haiba luhupula kuitumela ku Jehova kabakala kualabanga litapelo zaluna, ubanga ni tabo. (Makolo. 3:15) Kono kunani libaka leliñwi la butokwa haluswanela kuitumela ku Mulimu waluna.

10. Ka kuya ka 1 Pitrosi 2:21, ki kabakalañi haluswanela kuitumela ku Jehova kabakala kuluma Jesu fa lifasi?

¹⁰ Mubale 1 Pitrosi 2:21. Luswanela kuitumela ku Jehova kabakala kuli naalumile Mwanaa hae yalatwa kuto luluta. Haiba lubala litaba zeama bupilo bwa Jesu, lukaituta zeñata ka za Jehova ni mwaku mutabiseza. Haiba lubonisa tumelo mwa sitabelo sa Kreste, lukaba ni silikani sesitiile ni Jehova Mulimu mi lukaba mwa kozo ni yena.—Maro. 5:1.

11. Ki kabakalañi halulapelanga ku Jehova ka libizo la Jesu?

¹¹ Lwaitumela ku Jehova kuli lukona kulapela ku yena ka Mwanaa hae. Jehova ualabanga litapelo zaluna ka Jesu. Wateelezanga ni kualaba litapelo zefilwe ka libizo la Jesu. Jesu naabulezi kuli: “Semukupa kaufela ka libizo laka, nika sieza, kuli Ndate akanyiswe ka Mwana.”—Joa. 14:13, 14.

12. Ki libaka lifi leliñwi lelunani lona la kuitumela ku Jehova kabakala kulufa Mwanaa hae?

¹² Jehova waswalelanga libi zaluna kabakala sitabelo sa tiululo sa Jesu. Bibele italusa Jesu kuli ki “muprisita [waluna] yapahami . . . [yainzi] ku la bulyo la lubona lwa Bulena mwa mahalimu.” (Maheb. 8:1) Jesu ki “mutusi [waluna] yali ku Ndate.” (1 Joa. 2:1) Lwaitumela luli ku Jehova kabakala kulufa Muprisita Yapahami yaluutwela butuku mwa bufokoli bwaluna ni “yalukupela ka taata”! (Maro. 8:34; Maheb. 4:15) Bakeñisa kuli halusika petahala, nelusike lwakona kuatumela Jehova ka tapelo kambe Jesu naasikafa sitabelo sa tiululo. Kaniti luli, lukazwelapili kuitumela ku Jehova kabakala mpo ya butokwa yalufile, yona ya Mwanaa hae yalatwa!

13. Fa busihu bwahae bwa mafelelezo pili asika bulaiwa kale, Jesu naabonisize cwañi kuli naalata balutiwa bahae?

¹³ Fa busihu bwahae bwa mafelelezo pili asika bulaiwa kale, Jesu naalapelezi balutiwa bahae ka nako yetelele, kukupa Ndatahe kuli ‘abasileleze kabakala yamaswe.’ (Joa. 17:15) Taba yeo neibonisa kuli Jesu naalata hahulu balutiwa bahae! Kusina taba kuli naatuha anyandiswa maswe, naaiyakatwa za buiketo bwa baapositola bahae.

14. Lukona kubonisa cwañi kuli lwalata mizwale ni likaizeli baluna?

¹⁴ Ka kulikanyisa Jesu, haluisangi pilu ku zelutokwa feela luna bañi. Kono kamita lulapelelanga mizwale ni likaizeli baluna. Ka kueza cwalo, lubonisa kuli lwamamela taelo ya Jesu ya kuli lulatane mi lubonisa Jehova kuli lulata hahulu mizwale baluna. (Joa. 13:34) Kulapelela mizwale ni likaizeli baluna kuka batusa. Linzwi la Mulimu lilutaluseza kuli “kupo ya mutu yalukile inani maata amatuna.”—Jak. 5:16.

15. Ki kabakalañi haluswanela kulapelelanga mizwale ni likaizeli baluna?

¹⁵ Luswanela kulapelelanga mizwale ni likaizeli baluna bakeñisa kuli bakopana ni  miinelo yetaata yemiñata. Lwakona kukupa Jehova kuli abatuse kutiyela makulanu, likozi za ka taho, lindwa, nyandiso, ni miinelo yemiñwi yetaata. Hape lwakona kulapelela mizwale ni likaizeli baluna babaifananga ilikuli batuse babawezwi ki likozi. Mwendi mwaziba batu babakopana ni miinelo yecwalo. Mwakona kubapundanga fa mabizo mwa litapelo zamina za ka butu. Lubonisa kuli lwalata mizwale ni likaizeli baluna habuniti halukupa Jehova kuli abatuse kuitiisa.

16. Ki kabakalañi haluswanela kulapelela babaetelela mwahalaa luna?

¹⁶ Mizwale babaetelela mwa liputeho baitebuhanga hahulu halu babeya mwa litapelo zaluna mi litapelo zeo zabatusanga. Muapositola Paulusi naaitebuha litapelo za babañwi. Naañozi kuli: “Munilapelele ni na, kuli hanikaatumulusa mulomo waka nifiwe manzwi, kuli nikone kubulela ka bundume haninze nizibahaza kunutu yekenile ya taba yende.” (Maef. 6:19) Ni kacenu, lunani mizwale babañata baba luetelela babasebeza ka taata mwahalaa luna. Lubonisa kuli lwabalata halukupa Jehova kuli afuyaule musebezi wabona.

17-18. Ki lili folukona kukupelwa kuyemela babañwi mwa tapelo, mi luswanela kuhupulañi?

¹⁷ Fokuñwi, lukana lwakupiwa kuyemela babañwi mwa tapelo. Kaizeli yazamaisa tuto ya Bibele, ukona kukupa kaizeli yasebeza ni yena kuli abayemele mwa tapelo. Kaizeli yasindeketile kaizeli yomuñwi mwendi haazibi hande muituti yo; kacwalo, ukona kutabela kufa tapelo ya mafelelezo. Kueza cwalo kukona kumutusa kuziba hande zakona kubulela halapelela muituti yo.

¹⁸ Muzwale ukona kukupiwa kulapela kwa mukopano wa kuzwela mwa simu kamba mukopano wa puteho. Mizwale babafilwe tohonolo yeo baswanela kuhupula mulelo wa mukopano wo. Tapelo haiswaneli kuitusiswa kwa kukalimela puteho kamba kufa lizibiso. Kwa mikopano ya puteho yemiñata, pina ni tapelo lifilwe mizuzu yeketalizoho; kacwalo, muzwale yakupilwe kufa tapelo haaswaneli kuitusisa “manzwi amañata,”  sihulu haiba ufa tapelo ya makalelo.—Mat. 6:7.

19. Ki lika mañi zeka lutusa kuitukiseza lizazi la Jehova la katulo?

¹⁹ Luswanela kuunga tapelo kuba nto ya butokwa hahulu mwa bupilo bwaluna, sihulu haluziba kuli lizazi la Jehova la katulo lisutelezi. Ki lona libaka Jesu hanaabulezi kuli: “Ka mukwa ocwalo, muzwelepili kutona, munze mufitisa likupo ku Mulimu ka nako kaufela kuli mukone kubanduka kwa lika zeo kaufela zekaezahala.” (Luka 21:36) Kaniti, kulapelanga kamita kuka lutusa kuzwelapili kutona kwa moya, ilikuli lizazi la Mulimu lisike lalupatisa.

20. Litapelo zaluna likona kuba cwañi sina insense yenunka hande?

²⁰ Ki lika mañi zelunyakisisize? Luitebuha hahulu tohonolo yelunani yona ya tapelo. Litaba za butokwa hahulu zeluswanela kulapelela ki zeama mulelo wa Jehova. Hape luitumelanga kuli Mulimu ulufile Mwanaa hae ni Mubuso wahae, mi lulapelelanga mizwale ni likaizeli baluna. Kono hape lusakona kulapelela lika za ka butu ni za kwa moya. Haiba lunahanisisa pili lusika lapela kale, lubonisa kuli lwaitebuha hahulu tohonolo ya butokwa ye. Manzwi aluna akaba sina insense yenunka hande ku Jehova, ‘aka munyakalalisa.’—Liprov. 15:8.