1. Jehova ubata kuli luezeñi kacenu?

 KACENU, Mulimu ubata kuli taba yende ya Mubuso ikutazwe mwa lifasi kaufela. (Mare. 13:10; 1 Tim. 2:3, 4) Musebezi wo ki wa Jehova mi ki wa butokwa hahulu ku yena kuli mane uketile Mwanaa hae kuli auzamaise. Lunani buikolwiso bwa kuli musebezi wo ukafezwa kupetiwa pili mafelelezo asika taha kale bakeñisa kuli Jesu usweli waluetelela.—Mat. 24:14.

2. Lukanyakisisañi mwa taba ye?

² Mwa taba ye, lukanyakisisa mo Jesu asweli kuitusiseza “mutanga yasepahala yanani kutwisiso” kuli afe lico za kwa moya balateleli bahae ni kubaonga-onga kuli baeze musebezi wa butokwa wa kukutaza mwa libaka zeñata kufita lili kaufela. (Mat. 24:45) Hape lukanyakisisa zelukona kueza kuli lulatelele ketelelo ya Jesu ni ya mutanga yasepahala.

3. Jesu ufilwe maata a kuezañi?

³ Jesu usweli wazamaisa musebezi wa kukutaza. Luziba cwañi cwalo? Nakonyana pili asika kutela kale kwa lihalimu, Jesu naakopani ni balateleli bahae babañwi babasepahala kwa lilundu la kwa Galilea. Naababulelezi kuli: “Nifilwe maata kaufela mwa lihalimu ni fa lifasi.” Mulemuhe zanaabulezi hamulaho wa kubulela manzwi ao: “Ka mukwa ocwalo, hamuye, mi mulute batu ba macaba kaufela kuba balutiwa.” (Mat. 28:18, 19) Kacwalo, nto yeñwi yafilwe Jesu ki maata a kuzamaisa musebezi wa kukutaza.

4. Ki kabakalañi halunani buikolwiso bwa kuli Jesu usazamaisa musebezi wa kukutaza?

 ⁴ Jesu naabulezi kuli musebezi wa kukutaza ni kuluta batu kuba balutiwa neuka ezwa mwa “macaba kaufela” mi naakaba ni balateleli bahae “mazazi kaufela kuisa nako ya kufela kwa lifasi.” (Mat. 28:20) Manzwi ao abonisa hande fokusweu kuli Jesu naakazwelapili kuzamaisa musebezi wa kukutaza kuto fita ni mwa mazazi aluna.

5. Lutusa cwañi kuli bupolofita bobu kwa Samu 110:3 butalelezwe?

⁵ Jesu naasika ikalelwa kuli mwendi nekusike kwaba ni batu bane bakaeza musebezi wo ka nako ya kufela kwa lifasi. Naaziba kuli manzwi anaapolofitile muñoli yomuñwi wa samu naakatalelezwa, yanaaize: “Batu bahao bakaifana ka kuitatela mwa lizazi leuka etelela mpi yahao kwa ndwa.” (Samu 110:3) Haiba mwaezanga musebezi wa kukutaza, uzibe mutusa Jesu ni mutanga yasepahala mi mutusa kuli bupolofita bo, butalelezwe. Musebezi wo usweli waeziwa, kono kunani butata bolukopananga ni bona halunze luueza.

6. Ki butata mañi bobakopana ni bona bakutazi ba Mubuso kacenu?

⁶ Butata bobuñwi bobakopana ni bona bakutazi ba Mubuso ki twaniso. Bakwenuheli, baeteleli ba bulapeli, ni ba lipolitiki babulelanga litaba za buhata ka za musebezi waluna. Haiba bahabo luna, batu boluziba, ni batu bolubeleka ni bona balumela litaba za buhata zeo, bakona kulika kulutuhelisa kukutaza ni kusebeleza Jehova. Mwa linaha zeñwi, lila zaluna zabembanga mizwale ni likaizeli baluna, kubatama, mane nihaiba kubakenya mwa tolongo. Taba yeo hai lukomokisi. Jesu naapolofitile kuli: “Mukatoiwa ki macaba kaufela kabakala libizo laka.” (Mat. 24:9) Batu haba lutoya ki bupaki bwa kuli lulikanyisa mutala wa Jesu mi lutabisa Jehova. (Mat. 5:11, 12) Diabulosi ki yena yatahisa twaniso yeo. Kono Jesu unani maata amatuna hahulu kufita Satani! Ka ketelelo ya Jesu, taba yende izwelapili kukutazwa kwa macaba kaufela.

7. Ki bupaki bufi bobubonisa kuli liñolo la Sinulo 14:6, 7 lisweli latalelezwa?

⁷ Butata bobuñwi bolukopana ni bona halunze lukutaza Mubuso kikuli batu babulela lipuo zeshutana-shutana. Mwa sinulo yanaafile muapositola Joani, Jesu naapolofitile kuli mwa linako zaluna bakutazi ba taba yende nebaka tula butata bo. (Mubale Sinulo 14:6, 7.) Ka mukwa ufi? Lueza molukonela kaufela kukutaza kwa batu babañata taba yende ya Mubuso. Mwa lifasi kaufela kacenu, batu sebakona kuipalela litaba zetomile fa Bibele fa webusaiti yaluna ya jw.org mwa lipuo zefitelela 1,000! Ba Sitopa Sesietelela nebafile tumelezo ya kuli buka ya Muikole Bupilo Kuya Kuile!, yona buka yeluitusisanga hahulu mwa musebezi wa kuluta batu kuba balutiwa, itolokiwe mwa lipuo zefitelela 700! Hape lico za kwa moya lilukisizwe mwa mufuta wa mavidio alukiselizwe kutusa bo susu ni lihatiso ze mwa muñolo wa libofu. Lusweli lwaiponela mo bupolofita bwa mwa Bibele butalelelezwa. Batu “babazwa mwa lipuo kaufela za macaba” basweli baituta “puo yekenile” ya litaba za mwa Bibele. (Zak. 8:23; Zef. 3:9) Lika ze kaufela lisweli kupetiwa ka ketelelo ya muokameli waluna yomunde, yena Jesu Kreste.

8. Ki lika mañi zelukonile kupeta mwa musebezi waluna wa kukutaza?

⁸ Kacenu, batu babafitelela 8,000,000 mwa linaha ze 240 baswalisana ni kopano ya Jehova, mi silimo ni silimo, batu babañata-ñata bakolobezwanga! Kono mane sa butokwa  nikufita kikuli, balutiwa babanca bao baapalanga “butu bobunca,” tona tulemeno twa Sikreste. (Makolo. 3:8-10) Babañata batuhezi muzamao wa buhule, mifilifili, ketululo, ni kulata hahulu naha yabona. Bupolofita bobuñozwi kwa Isaya 2:4 busweli bwatalelezwa; ‘habasa ituta ndwa.’ Halunze lueza molukonela kaufela kuapala butu bobunca, lutusa batu kusutelela kwa kopano ya Mulimu, mi lubonisa kuli lulatelela ketelelo ya muokameli waluna Kreste Jesu. (Joa. 13:35; 1 Pit. 2:12) Lika ze haliikezahalelangi feela. Jesu ki yena yalutusa.

9. Ka kuya ka Mateu 24:45-47, ki lika mañi zanaapolofitile Jesu kuli nelika ezahala ka nako ya kufela kwa lifasi?

⁹ Mubale Mateu 24:45-47. Jesu naasepisize kuli ka nako ya kufela kwa lifasi, naakaketa “mutanga yasepahala yanani kutwisiso” kuli alukise sico sa kwa moya. Kacwalo, luswanela kulibelela kuli mutanga yo ukapateha hahulu kulukisa sico seo kacenu. Mi kubile honacwalo luli. Muokameli waluna uitusisize sikwatanyana sa baana babatozizwe kuli balukiseze batanga ba Mulimu ni batu babatabela “lico zabona [za kwa moya] ka nako yeswanela.” Baana bao habaangi kuli babusa tumelo ya babañwi. (2 Makor. 1:24) Kono baanga Jesu Kreste kuba “mueteleli ni muzamaisi” wa sicaba sahae.—Isa. 55:4.

10. Ki hatiso ifi kwa lihatiso zebonisizwe mwa maswaniso yene mitusize kukala kusebeleza Jehova?

¹⁰ Kuzwa feela ka silimo sa 1919, mutanga yasepahala salukisize lihatiso zeshutana-shutana zetusize batu babatabela kufumana lico za kwa moya zetabusa lwapili. Ka silimo sa 1921, mutanga yasepahala naalukisize buka ya Harepa ya Mulimu (The Harp of God) kuli ituse batu babatabela kuituta litaba za matatekelo za mwa Bibele. Hamulaho  wa nako, nekulukisizwe lihatiso zeñwi. Ki hatiso ifi yene mitusize kuziba ni kulata Ndataa luna yalilato ya kwa lihalimu? Kana neli buka ya, “Mulimu Afumanwe Kuba Yanani Niti,” (Let God Be True) Niti ye Isa Kwa Bupilo Bwa Kamita, Wa Kona Ku Pila Ku Ya Ku Ile mwa Paradaisi fa Lifasi-mubu, Zibo Ye Isa kwa Bupilo bo Bu Sa Feli, Bibele I Lutañi Luli?, Bibele Ilulutañi?, kamba ki buka yaluna yenca ya Muikole Bupilo Kuya Kuile? Lihatiso zeo kaufela nelilukiselizwe kuli lilutuse mwa musebezi wa kutusa batu kuba balutiwa mi nelitile ka nako yeswanela.

11. Ki kabakalañi hakuli kwa butokwa kuli kaufelaa luna lucange lico za kwa moya?

¹¹ Batu babatabela kuituta niti haki bona feela babatokwa lico zetiile za kwa moya. Kaufelaa luna lwalitokwa. Muapositola Paulusi naañozi kuli: “Lico zetiile ki za batu babahulile.” Paulusi naaekelize kubulela kuli kuca lico zeo kuka lutusa ‘kutaluhanya zelukile ku zesika luka.’ (Maheb. 5:14) Kacenu, kukona kulubela hahulu taata kumamela likuka za Jehova bakeñisa kuli batu babañata bapila ka muzamao wa buhule. Kono Jesu ubonanga teñi kuli lunani lico zende za kwa moya zeelutusa kutiyela muinelo wo. Lico zeo lizwa mwa Linzwi la Mulimu, yona Bibele. Mutanga yasepahala ulukisanga lico zeo ni kuliabela ka ketelelo ya Jesu.

12. Ka kuswana ni Jesu, lubonisize cwañi kuli lwakuteka libizo la Mulimu?

¹² Ka kuswana ni Jesu, ni luna lukutekile libizo la Mulimu. (Joa. 17:6, 26) Ka mutala, ka silimo sa 1931, nelukalile kuitusisa libizo la mwa Mañolo la Lipaki za Jehova, mi ka kueza cwalo, nelubonisize kuli libizo la Ndataa luna ya kwa lihalimu ki la butokwa hahulu ku luna. (Isa. 43:10-12) Mi kuzwa feela mwa October ka silimo seo, libizo la Mulimu  nelikalile kufumanehanga fa kava ya magazini ye. Kuzwa fo, mwa Bibele ya Toloko ya Lifasi Lelinca libizo la Mulimu likutiselizwe mwa libaka zeswanela mwa Linzwi lahae. Taba yeo ishutanela kwahule ni zeliezize likeleke zeipapata kuba za Sikreste zezwisize libizo la Jehova mwa Libibele zazona zeñata!

13. Ki lika mañi zemikolwisa kuli Jesu uitusisa “mutanga yasepahala yanani kutwisiso” kacenu? (Joani 6:68)

¹³ Ka kuitusisa “mutanga yasepahala yanani kutwisiso” Jesu ulukisize kopano fa lifasi kuli ituse batu kulapela Mulimu ka nzila yelukile. Muikutwa cwañi ka za kopano yeo? Mwendi muikutwa sina mwanaaikutwezi muapositola Pitrosi, yanaaalabile Jesu kuli: “Lukaya ku mañi? Unani manzwi a bupilo bobusa feli.” (Joa. 6:68) Kaniti luli, nelusike lwaziba mwakulapelela Jehova ka nzila yelukile kambe haluyo mwa kopano yahae. Ka kuitusisa kopano yeo, Kreste ubonanga teñi kuli lwafepiwa kwa moya. Hape ululuta molukona kupetela hande musebezi waluna wa kukutaza. Kuzwa fo, ulutusa kuapala “butu bobunca” ilikuli lutabise Jehova.—Maef. 4:24.

14. Kuba mwa kopano ya Jehova ka nako ya butuku bobuyambukela bwa COVID-19 kumitusize cwañi?

¹⁴ Jesu uzwelapili kulufa ketelelo yende ka nako yelukopana ni miinelo yetaata. Kulatelela ketelelo yeo neku lutusize, butuku bobuyambukela bwa COVID-19 habukalisa. Ka nako yeo batu babañata mwa lifasi nebasa zibi za kueza, Jesu naaboni teñi kuli lwafiwa litaelo zene lutusize kuziba hande za kueza kuli luisileleze. Nelususuelizwe kuapalanga tusila totukwahela mulomo ni ngo haluli mwahalaa batu ni kusiya pakani mwahalaa luna ni batu babañwi. Baana-bahulu nebasusuelizwe  kuambolanga ni bahasanyi kaufela mwa puteho ni kuziba zene batokwa kuli baisileleze, kuba ni buikangulo bobunde, ni kutiisa silikani sabona ni Jehova. (Isa. 32:1, 2) Nelufilwe ketelelo yeñwi mi nelutiisizwe hahulu ki lipiho za ba Sitopa Sesietelela.

15. Ki litaelo lifi zenefilwe ka za mwakuezeza mikopano ni mwakukutaleza ka nako ya butuku bobuyambukela, mi kueza cwalo kutusize cwañi?

¹⁵ Hape ka nako ya butuku bobuyambukela, nelufilwe litaelo zenongile ka za mwakuezeza mikopano ya puteho ni musebezi wa kukutaza. Mwa nako yekuswani feela, lwakala kueza mikopano ya puteho, mikopano ya mupotoloho, ni mikopano yemituna ka kuitusisa lipangaliko zetusa kuli lubonane ni babañwi. Hape nelukalile kuitusisa hahulu mukutalezo wa kuñola mañolo ni kuliza mafoni. Jehova naafuyauzi buikatazo bwaluna. Liofisi za mutai zeñata lifile lipiho zebonisa kekezeho kwa palo ya bahasanyi. Mane, mizwale ni likaizeli babañata baikozi lika zeñata mwahalaa nako ye.—Mubone mbokisi yeli, “ Jehova Ufuyaula Musebezi Waluna wa Kukutaza.”

16. Ki buikolwiso mañi bolunani bona?

¹⁶ Babañwi mwendi nebaikutwa kuli kopano neibonisize tokomelo yetulile tikanyo ka za butuku bobuyambukela. Kono neluiponezi hande fokusweu kuli ketelelo yene lufilwe neiswanela. (Mat. 11:19) Mi halunze lunahanisisa mo Jesu aetelela balateleli bahae ka lilato, lunani buikolwiso bwa kuli kusina taba ni zeluka kopana ni zona kwapili, Jehova ni Mwanaa hae yalatwa bakaba ni luna.—Mubale Maheberu 13:5, 6.

17. Muikutwa cwañi ka za kuli Jesu ki muokameli waluna?

¹⁷ Kaniti luli, lutabile hahulu kuli Jesu ki muokameli waluna! Luswalisana ni kopano mokufumaneha batu babapilisana ka kozo kusina taba kuli ki ba lizo zeshutana-shutana, bazwa mwa linaha zeshutana, mi babulela lipuo zeshutana-shutana. Lwafepiwanga hande kwa moya ni kufiwa lituto zelutusa kueza hande musebezi wa kukutaza. Mañi ni mañi waluna usweli watusiwa kuapala butu bobunca, mi lusweli kuituta mwakuboniseza lilato ku babañwi. Kaniti luli, lunani libaka lelinde la kuitumba kabakala kuli Jesu ki muokameli waluna!