Kaufelaa luna lunani nako yenyinyani hahulu ya kueza tuto ya ka butu. Lukona kuitusisa cwañi hande nako yaluna? Sapili, musike mwabala ka kumata-mata. Mukatusiwa hahulu haiba muituta litaba zenyinyani ka tokomelo kufita kubala litaba zeñata ka kumata-mata.

Hasamulaho, mulemuhe lika za butokwa hahulu zemuswanela kuituta. (Maef. 5:15, 16) Halunyakisiseñi liakalezo zelatelela:

• Mubalange Bibele zazi ni zazi. (Samu 1:2) Mwakona kukala ka kuitusisa tomahanyo ya kubala Bibele sunda ni sunda ya mwa mukopano wa mwahalaa sunda.

• Muitukisezange Tuto ya Tawala ya Mulibeleli ni mukopano wa mwahalaa sunda. Muitukisezange hande kuli muyo alaba kwa mikopano yeo.—Samu 22:22.

• Haiba nako imilumeleza, mubuhange mavidio ni kubala litaba zeñwi zenca za kwa moya, inge cwalo limagazini za nyangela, ni litaba zeñwi za fa jw.org.

• Muitute taba yemutabela hahulu. Mwakona kueza patisiso ka za butata bo mukopana ni bona, puzo yemunani yona, kamba taba yeñwi ya mwa Bibele yemubata kuutwisisa hande. Kuli muzibe liakalezo zeñwi, mubone kalulo yeli, “Bible Study Activities” ye fa jw.org.