1-2. Mukreste ukona kuba cwañi sina muyaho omutelele? (1 Makorinte 15:58)

 KWA mafelelezo a lilimo za ma 1970, nekuyahilwe muyaho omutelele hahulu mwa Tokyo, kwa Japan. Batu nebakakanyize ka za haiba muyaho wo neusike wawiswa ki lizikinyeho za lifasi zeneezahalanga hahulu mwa muleneñi wo. Ki lika mañi zenekona kutusa muyaho wo kusawa? Bo manjinela nebalukisize kuli muyaho wo uyahiwe ka nzila yeneka ukonisa kuba otiile, kusikama hanyinyani kono usawiswi ki zikinyeho ya lifasi. Bakreste ni bona baswana sina muyaho wo. Ka mukwa ufi?

² Mukreste uswanela kutiya ni kucinca ka bunolo. Utokwa kutiya ni kusasuta hakutaha kwa kumamela milao ya Jehova ni likuka zahae. (Mubale 1 Makorinte 15:58.) ‘Uitukiselize kuutwa’ mi uzwelapili kusepahala. Utokwa ‘kuba ni kutwisiso,’ kamba kucinca ka bunolo, haiba muinelo utokwa kuli aeze cwalo. (Jak. 3:17) Mukreste yaitutile kuba ni mubonelo oswanela wo, hahapelezangi batu kueza lika honacwalo feela sina mwabatela kamba kutuhelela mafosisa kaufela. Mwa taba ye, lukanyakisisa zekona kulutusa kuli lusike lwasuta. Hape lukanyakisisa lika zeketalizoho zaezanga Satani kuli alupaleliswe kusepahala ni zelukona kueza kuli lumuhanele.

3. Ki milao ifi ya Mutomi wa Mulao Yapahami ka Kufitisisa yefumaneha kwa Likezo 15:28, 29?

³ Ka kuba Mutomi wa Mulao Yapahami ka Kufitisisa, Jehova uzwezipili kufa batu bahae milao yeutwahala. (Isa. 33:22) Ka mutala, ba mwa sitopa sesietelela sa mwa linako za baapositola nebatalusize lika zetaalu zenekona kutusa Bakreste  kuzwelapili kutiya: (1) kuhana kulapela milimu ya maswaniso ni kulapela feela Jehova, (2) kuunga mali kuba akenile, ni (3) kupila ka likuka za mwa Bibele zepahami za muzamao. (Mubale Likezo 15:28, 29.) Ki lika mañi zekona kutusa Bakreste kacenu kuzwelapili kuutwa Jehova mwa lika zetaalu zeo?

4. Lukona kubonisa cwañi kuli lulapela feela Jehova? (Sinulo 4:11)

⁴ Luhana kulapela milimu ya maswaniso, mi lulapela feela Jehova. Jehova naalaezi Maisilaele kuli balapele feela yena anosi. (Deut. 5:6-10) Mi Jesu hanaalikilwe ki Diabulosi, naabulezi ka kuutwahala kuli ki Jehova feela yeluswanela kulapela. (Mat. 4:8-10) Kacwalo, halulapelangi milimu ya maswaniso. Mi hape halulapelangi batu, ibe kuli ki baeteleli ba bulapeli, babusi ba lifasi, kamba babatumile mwa lipapali ni mwa lika za kuitabisa ka zona. Luikatulezi kuyema ka kutiya kwa lineku la Jehova ni kulapela feela yena ‘yabupile lika kaufela.’—Mubale Sinulo 4:11.

5. Ki kabakalañi haluswanela kumamela mulao wa Jehova obonisa kuli bupilo ki bwa butokwa ni kuli mali akenile?

⁵ Lumamela milao ya Jehova yebonisa kuli bupilo ki bwa butokwa ni kuli mali akenile. Libaka? Kakuli Jehova ubulela kuli mali ayemela bupilo, yona mpo ya butokwa yezwa ku yena. (Liv. 17:14) Jehova hanaalumelelize batu bapili kuli bakona kuca nama ya lifolofolo, naabalaezi kuli basike baca mali azona. (Gen. 9:4) Naakutezi taelo yeo hanaafile Maisilaele Mulao wa Mushe. (Liv. 17:10) Mi naaetelezi ba mwa sitopa sesietelela sa mwa linako za baapositola kuli balaele Bakreste kaufela ‘kuli baambuke . . . mali.’ (Lik. 15:28, 29) Lumamela taela yeo halueza likatulo zeama likalafo. b

6. Ki buikatazo mañi boluezanga kuli lupile ka likuka za Jehova zepahami za muzamao?

⁶ Lueza molukonela kaufela kumamela likuka za Jehova zepahami za muzamao. (Maheb. 13:4) Muapositola Paulusi naaitusisize puo ya swanisezo yeutwahala, kulueleza kuli ‘mubulaye’ lilama za mubili waluna, fo kikuli kueza molukonela kaufela kufelisa litakazo za nama. Halutalimangi kamba kueza nto ifi kamba ifi yekona kutahisa kuli luikenye mwa muzamao wa buhule. (Makolo. 3:5; Jobo 31:1) Halulikiwa, luhananga kapili-pili kunahana kamba kueza nto yekona kusinya silikani saluna ni Mulimu.

7. Ki lika mañi zeluswanela kuikatulela kueza, mi ki kabakalañi?

⁷ Jehova ubata kuli lumuutwe “kuzwelela kwa pilu.” (Maro. 6:17) Lika zalutaluseza kuli lueze kamita lilelezwi kulutusa, mi halukoni kucinca milao yahae. (Isa. 48:17, 18; 1 Makor. 6:9, 10) Luezanga molukonela kaufela kutabisa Jehova, ni kuba ni mubonelo oswana wanaanani ona muñoli yomuñwi wa lisamu, yanaaize: “Niikatulezi kumamela litaelo zahao ka nako kaufela, kuisa kwa mafelelezo.” (Samu 119:112) Nihakulicwalo, Satani ulikanga kulupaleliswa kuzwelapili kusepahala ku Mulimu. Uezanga cwañi cwalo?

8. Satani uitusisanga cwañi nyandiso kuli alupaleliswe kuzwelapili kusepahala ku Mulimu?

⁸ Nyandiso. Diabulosi uitusisanga mifilifili ni sineneketo kuli alupaleliswe kuzwelapili kusepahala ku Mulimu. Mulelo wahae ki kusinya silikani saluna ni Jehova. (1 Pit. 5:8) Bakreste ba mwa linako za baapositola, nebabembilwe, kunatakiwa, ni kubulaiwa kakuli nebaikatulezi kuzwelapili kusepahala ku Mulimu. (Lik. 5:27, 28, 40; 7:54-60) Ni kacenu, Satani uzwezipili kuitusisa nyandiso. Luiponela taba yeo  kuzeezahala kwa Russia ni mwa linaha zeñwi ili ko mizwale ni likaizeli baluna baezwa maswe ni kulwaniswa ka linzila zeñwi.

9. Mutaluse libaka haluswanela kutokomela sineneketo yesalemusehi ka bunolo.

⁹ Sineneketo yesalemusehi ka bunolo. Kwandaa kuitusisa nyandiso, Satani hape uitusisanga “milelo yemaswe.” (Maef. 6:11) Ka mutala, halunyakisiseñi zeneezahezi ku muzwale yabizwa Bob yanaaswelwi mwa sipatela kuli apazulwe. Naataluselize baalafi kuli naasike alumela kupompelwa mali mwa muinelo ufi kamba ufi. Mualafi yanaaka mupazula naalumezi kukuteka katulo yahae. Nihakulicwalo, fa busihu bone butatamiwa ki lizazi lene baswanela kupazulwa, bo Bob nebalekuzwi ki mualafi yomuñwi, ba lubasi lwabona hase bakutezi kwa ndu. Naataluselize bo Bob kuli kubonahala kuli nebasike bapompelwa mali, kono naakaba kwatuko kuli aitusiswe hanaaka tokwahala. Mwendi mualafi yo naanahana kuli bo Bob nebaka lumela kupompelwa mali haubona ba lubasi lwabona nebasiyo. Kono bo Bob nebazwezipili kutiya, ni kutalusa kuli nebasike balumela kupompelwa mali mwa muinelo ufi kamba ufi.

10. Ki kabakalañi mibonelo ya batu haikona kulutahiseza butata? (1 Makorinte 3:19, 20)

¹⁰ Mibonelo ya batu. Haiba luunga lika sina moba liingela batu, lukona kupalelwa kuutwa Jehova ni kukeshebisa likuka zahae. (Mubale 1 Makorinte 3:19, 20.) “Butali bwa lifasi le” hañata bukukuezanga batu kueza lika ka kuya ka litakazo za nama. Bakreste basikai mwa Pergamo ni Tiyatira nebakukuelizwe ki batu ba mwa mileneñi yeo kulapela milimu ya maswaniso ni kuikenya mwa muzamao wa buhule. Jesu naakalimezi hahulu ba mwa liputeho zepeli zeo bakeñisa kuli nebatuhelela muzamao wa buhule. (Sin. 2:14, 20) Kacenu, batu bolupila ni bona bakona kulukukueza kuba ni mibonelo yefosahalile. Ba lubasi ni balikani baluna bakona kulutaluseza kuli luisa hahulu pilu kwa lika zabata Mulimu ni kuli hakusika fosahala kuloba milao ya Jehova. Ka mutala, bakona kulutaluseza kuli hakusika fosahala kukulisa litakazo zaluna ni kuli likuka za mwa Bibele za muzamao ki zakale hahulu mi haluswaneli kuli latelela.

11. Ki lika mañi zeluswanela kutokolomoha kuli luyeme inze lutiile?

¹¹ Fokuñwi, lukona kuikutwa kuli litaelo zalufa Jehova halisika likana. Mwendi mane lukona kukenelwa ki muliko wa ‘kuikezeza kufita zeñozwi.’ (1 Makor. 4:6) Baeteleli ba bulapeli ba mwa linako za Jesu nebanani mulatu wa kueza sibi seo. Nebaekelize milao yeezizwe ki batu kwa Mulao, ili nto yenetahisize kuli kubele hahulu taata batu-tu feela kumamela Mulao. (Mat. 23:4) Jehova ulufanga litaelo zeikutwahalela ka kuitusisa Linzwi lahae ni kopano yahae. Haluswaneli kuekeza kwa litaelo zalufanga. (Liprov. 3:5-7) Kacwalo, haluikezezi kufita zeñozwi mwa Bibele kamba kutomela mizwale baluna milao mwa lika za ka butu.

12. Satani uitusisanga cwañi “bupumi”?

¹² Bupumi. Satani uitusisanga “bupumi” ni “lituto za lifasi za makalelo” kuli akeluse batu ni kubakauhanya. (Makolo. 2:8) Mwa linako za baapositola, lika zeo nelikopanyeleza tuto ya butali bwa batu yetomile fa mihupulo ya batu, lituto za Majuda zenesika toma fa Mañolo, ni tuto ya kuli Bakreste baswanela kumamela Mulao wa Mushe. Mibonelo yeo neifosahalile bakeñisa kuli neikelusa batu kwa Simbule sa niti sa butali, yena Jehova. Kacenu, Satani uitusisa mitai ya makande ni mawebusaita a kulumelana ka ona mashango kuhasanya litaba zesina hande bupaki ni makande a buhata ili zezwelela kwa baeteleli ba lipolitiki. Neluiponezi taba yeo ka nako ya butuku  bobuyambukela bwa COVID-19. c Lipaki za Jehova bane balatelezi ketelelo yene ifilwe ki kopano yaluna, nebasika ikalelwa hahulu sina batu bane bateelelize kwa litaba za buhata.—Mat. 24:45.

13. Ki kabakalañi haluswanela kueza molukonela kaufela kuli lusike lwayaululwa?

¹³ Kuyaululwa. Luswanela kuzwelapili kuisa pilu kwa “lika za butokwa hahulu nikufita.” (Mafil. 1:9, 10) Haluyaululwa ki lika zeñwi, lukapalelwa kufumana nako yeñata ya kueza lika za butokwa hahulu nikufita. Lika zeluezanga ka zazi zecwale ka kuca, kunwa, kuitabisa, ni mubeleko zakona kuluyaulula haiba luliinga kuba za butokwa hahulu mwa bupilo bwaluna. (Luka 21:34, 35) Kutuha fo, zazi ni zazi luutwanga makande a mañata ka za kusalumelelana mwahalaa batu ni litaba za lipolitiki. Luswanela kueza molukonela kaufela kuli lusike lwayaululwa ki lika zeo. Hakusi cwalo lwakona kukala kuyemela babañwi ba batu bao. Satani uitusisanga lika zeo kaufela zetalusizwe fahalimu kuli alupaleliswe kuzwelapili kueza lika zelukile. Halunyakisiseñi zekona kulutusa kumuhanela ni kuzwelapili kutiya.

14. Ki nto mañi yekona kulutusa kuzwelapili kutiya ni kuba kwa lineku la Jehova?

¹⁴ Munahanisise libaka hane muneezi bupilo bwamina ku Jehova ni kukolobezwa. Nemungile mihato yeo kakuli nemubata kuba kwa lineku la Jehova. Muhupule zene mitusize kukolwa kuli mufumani niti. Nemufitile fa kuziba niti yenepahezi ka za Jehova mi mwakala kumukuteka ni kumulata sina Ndataa mina ya kwa lihalimu. Nemubile ni tumelo, mi tumelo yeo nei misusuelize kubakela libi zamina. Nemutuhezi kueza lika zesatabisi Jehova mi mwakala kupila ka kulumelelana ni tato yahae. Nemubile ni tabo hane muzibile kuli Mulimu uswalezi libi zamina. (Samu 32:1, 2) Nemufumanehanga kwa mikopano ya Sikreste mi mwakala kutaluseza babañwi lika zende zene muitutile. Ka kuba Mukreste yaineezi ni kukolobezwa, ka nako ya cwale muzamaya mwa nzila yelibisa kwa bupilo, mi muikatulezi  kuzwelapili kuzamaya mwa nzila yeo.—Mat. 7:13, 14.

15. Kuituta Linzwi la Mulimu ni kunahanisisa zeluituta kukona kulutusa cwañi?

¹⁵ Muitute Linzwi la Mulimu ni kunahanisisa zemuituta. Sina feela kota yetungisize mibisi yayona haikona kuzwelapili kutiya, ni luna lukazwelapili kutiya haiba luba ni tumelo yetiile ku Jehova yetomile fa Linzwi lahae. Kota hainze ihula, mibisi yayona ikakena hahulu mwa mubu ni kuyanduluka hahulu. Haiba luituta Linzwi la Mulimu ni kunahanisisa zeluituta, tumelo yaluna ikatiya hahulu mi lukakolwa luli kuli linzila za Mulimu kamita zalutusa. (Makolo. 2:6, 7) Munahanisise mo litaelo za Jehova, ketelelo yahae, ni silelezo yahae, nelituselize batanga bahae kwamulaho. Ka mutala, Ezekiele naaisize hahulu pilu kwa lingeloi hane limishala tempele yanaaboni mwa pono. Pono yeo neitiisize Ezekiele, mi kwateñi luituta lituto za butokwa ka za molukona kumamelela likuka za Jehova zeama kumulapela ka nzila yelukile. d (Ezek. 40:1-4; 43:10-12) Ni luna lukatusiwa haiba luba ni nako ya kuituta lika zetungile za mwa Linzwi la Mulimu ni kulinahanisisa.

16. Kuba ni pilu yetiile nekusilelelize cwañi bo Bob? (Samu 112:7)

¹⁶ Mube ni pilu yetiile. Mulena Davida naabonisize kuli naasike atuhela kulata Jehova ni kamuta hanaaopezi kuli: “Pilu yaka itiile, wena Mulimu.” (Samu 57:7) Ni luna lwakona kuba ni pilu yetiile ni kusepa Jehova ka kutala. (Mubale Samu 112:7.) Halunyakisiseñi mo kuba ni pilu yetiile nekutuselize bo Bob bababulezwi kwamulaho. Hane bataluselizwe kuli nekuka lukiswa kuli kube ni mali anaaka itusiswa hane kukatokwahala, honafo feela baalaba kuli hane kukaba ni muinelo one ukatokwa kuli bapompelwe mali, nebaka zwa mwa sipatela kapili-pili. Hasamulaho, bo Bob nebabulezi kuli: “Neniziba zene niswanela kueza mi nenisika ikalelwa ka za zeneka ezahala.”

17. Luitutañi ku zeneezahezi ku bo Bob? (Mubone ni siswaniso.)

¹⁷ Bo Bob nebatiile kakuli nebaikatulezi kuzwelapili kusepahala ku Mulimu pili basika  swalwa kale mwa sipatela. Sapili, nebabata hahulu kutabisa Jehova. Sabubeli, nebaitutile ka tokomelo zeibulela Bibele ni lihatiso zaluna zetomile fa Bibele ka za butokwa bwa bupilo ni bukeni bwa mali. Sabulaalu, nebakozwi kuli Jehova naaka bafuyaula kabakala kumamela milao yahae. Ni luna lwakona kuba ni pilu yetiile kusina taba ni miliko yelukona kukopana ni yona.

18. Mutala wa Baraki ululutañi ka za kusepa Jehova? (Mubone siswaniso sesi fa kava.)

¹⁸ Musepa Jehova. Halunyakisiseñi mo Baraki naakondiselize kabakala kusepa litaelo za Jehova. Nihaike kuli tebe kamba lilumo nelisa bonwi mwa naha kaufela, Jehova naamulaezi kuyo lwanisa Sisera muzamaisi wa mpi ya Makanana yanaanani lilwaniso zeñata. (Baat. 5:8) Mupolofita wamusali Debora naataluselize Baraki kuya mwa libala lelipatami kuli ayo kopana ni Sisera ni likoloi zahae ze 900. Nihaike kuli Baraki naaziba kuli likoloi nelikona kumata ka lubilo lolutuna mwa libala lelipatami ni kuli nekukona kubela Maisilaele taata kutula mwa ndwa, naautwile Mulimu. Masole hane bashetumuka fa Lilundu la Tabori, Jehova anelisa pula yetuna. Likoloi za Sisera zatotobela mwa sileze, mi Jehova afa Baraki tulo. (Baat. 4:1-7, 10, 13-16) Ka mukwa oswana, Jehova uka lufa tulo haiba lumusepa ni kumamela litaelo zalufa ka kuitusisa kopano yahae.—Deut. 31:6.

19. Ki kabakalañi hamubata kuzwelapili kutiya?

¹⁹ Mwa lifasi lelimaswe le lelupila ku lona, lukatokwa kuikataza kuli luzwelepili kutiya. (1 Tim. 6:11, 12; 2 Pit. 3:17) Haike luikatulele kusa nyanganyiswa ki nyandiso, sineneketo yesalemusehi ka bunolo, mibonelo ya batu, bupumi, ni lika zeyaulula. (Maef. 4:14) Kono luswanela kuzwelapili kutiya, kulata Jehova, ni kuutwa litaelo zahae. Ka nako yeswana, lutokwa kuba ni kutwisiso. Mwa taba yetatama, lukanyakisisa mo Jehova ni Jesu balutomezi mutala omunde hahulu wa kubonisa kutwisiso.