1. Ki lika mañi zene muitutile hamukalisa kuituta Bibele?

 KANA musahupula lika kaufela zene muitutile hamukalisa kuituta Bibele? Mwendi nemukomokile hahulu hane muitutile kuli Mulimu unani libizo. Mwendi nemutabile hane muitutile kuli Mulimu haatukufazangi batu mwa lihele. Mi kubonahala kuli nemutabile hahulu hane muitutile kuli mukabonana hape ni balatiwa bamina babashwile ni kupila ni bona mwa paradaisi fa lifasi.

2. Kwandaa feela kuituta litaba za niti za mwa Bibele, ki zwelopili ifi yeñwi yene muezize? (Maefese 5:1, 2)

² Lilato lamina ku Jehova nelizwezipili kuhula hane muzwelapili kuituta Linzwi la Mulimu. Lilato leo neli misusuelize kusebelisa zene muituta. Likuka za mwa Bibele neli mitusize kueza likatulo zende. Nemuitutile kunahana ni kueza lika zende bakeñisa kuli nemubata kutabisa Mulimu. Sina feela mwanana halikanyisanga mushemi ya lilato, ni mina nemulikanyisa Ndataa mina ya kwa lihalimu.—Mubale Maefese 5:1, 2.

3. Ki lipuzo mañi zelukona kuipuza?

³ Mwendi lwakona kuipuza kuli: ‘Kana nilata hahulu Jehova ka nako ya cwale kufita mone nimulatela hanikolobezwa? Kuzwa feela fonikolobelezwa, kana ninahana ni kueza lika sina Jehova, sihulu kwa neku la kubonisa lilato kwa mizwale ni likaizeli baka?’ Haiba ‘lilato lene munani lona sapili’ kikale lifokola, musike mwazwafa. Nto yeswana neiezahezi kwa Bakreste ba mwa linako za baapositola. Jesu naasika bahana, mi ni luna haana kuluhana. (Sin. 2:4, 7) Waziba kuli lusakona kuba ni lilato lene lunani lona sapili haluituta niti.

4. Lukanyakisisañi mwa taba ye?

 ⁴ Mwa taba ye, lukanyakisisa molukona kuzwelapili kulatela hahulu Jehova ni batu. Hasamulaho, lukanyakisisa limbuyoti zeñwi zeluka fumana ni zebaka fumana babañwi haiba lulata hahulu Jehova ni batu.

5-6. (a) Ki miinelo mañi yetaata yanaakopani ni yona muapositola Paulusi ka nako ya bukombwa bwahae? (b) Ki lika mañi zene mususuelize kuzwelapili kusebeleza Jehova?

⁵ Nihaike kuli muapositola Paulusi naanani tabo mwa sebelezo yahae ku Jehova, naakopani ni miinelo yetaata yemiñata. Paulusi hañata naazamayanga misipili yemitelele, mi kueza cwalo nesi nto yebunolo ka nako yeo. Mwa misipili yahae, Paulusi fokuñwi naakopananga ni “likozi za mwa linuka” ni “likozi za kutasezwa ki masholi.” Hape fokuñwi naanatakiwanga ki balwanisi. (2 Makor. 11:23-27) Mi fokuñwi mizwale bahae nebasa itebuhangi buikatazo bwanaaezanga kuli abatuse.—2 Makor. 10:10; Mafil. 4:15.

⁶ Ki lika mañi zenetusize Paulusi kuzwelapili kusebeleza Jehova? Paulusi naaitutile zeñata ka za mwainezi Jehova kuzwelela mwa Mañolo ni ku zeneezahezi ku yena. Paulusi naakozwi kuli Jehova Mulimu naamulata. (Maro. 8:38, 39; Maef. 2:4, 5) Mi ni yena alata hahulu Jehova. Paulusi naabonisize lilato lahae ku Jehova “ka kusebeleza babakenile ni kuzwelapili kubasebeleza.”—Maheb. 6:10.

7. Ki nto mañi yekona kulutusa kulata hahulu Jehova?

⁷ Lwakona kulata hahulu Mulimu ka kuitutanga Linzwi lahae ka tokomelo. Hamubala Bibele mulike kulemuha zemuituta ka za Jehova kwa taba ni taba yemubala. Muipuze kuli: ‘Taba ye ibonisa cwañi kuli Jehova wanilata? Taba ye initusa cwañi kulata Jehova?’

8. Tapelo ikona kulutusa cwañi kulata hahulu Mulimu?

⁸ Nto yeñwi yekona kulutusa kulata hahulu Jehova ki kulapelanga ku yena kamita kumutaluseza kaufela ze mwa pilu yaluna. (Samu 25:4, 5) Mi Jehova ukaalaba litapelo zaluna. (1 Joa. 3:21, 22) Kaizeli yabizwa Kayla yapila kwa Asia, utalusa kuli: “Sapili nenilata Jehova kabakala zibo yene ninani ka zahae, kono nenifitile fa kumulata hahulu hane niboni mwanaa alabela litapelo zaka. Taba yeo nei nisusuelize kueza lika zemutabisa.” b

9. Manzwi a Paulusi abonisa cwañi kuli Timotea naaikataza kulata hahulu batu?

⁹ Lilimonyana kuzwa fabela Mukreste, Paulusi naakopani ni mutangana yabizwa Timotea. Timotea naalata Jehova, mi naalata ni batu. Paulusi naabulelezi Bakreste ba kwa Filipi kuli: “Hanina yomuñwi yanani moya oswana ni [wa Timotea] yakatokomela zamina ka pilu yahae kaufela.” (Mafil. 2:20) Paulusi fa, naasika ama kwa buikoneli bwa Timotea bwa kuba muonga-ongi kamba mubuleli wa fa nyangela, kono naatabisizwe ki kubona kuli Timotea naalata hahulu mizwale ni likaizeli bahae. Kusina kukakanya, mizwale ni likaizeli ba mwa liputeho zanaapotelanga Timotea, nebanyolelwanga hahulu kupotelwa ki yena.—1 Makor. 4:17.

10. Bo Anna ni bakubona nebabonisize cwañi kuli nebalata mizwale ni likaizeli babona?

¹⁰ Ni luna lubatanga linzila za kutusa ka zona mizwale ni likaizeli baluna. (Maheb. 13:16) Halunyakisiseñi zeneezahezi ku kaizeli Anna yanaabulezwi mwa taba yefelile. Hamulaho wa liñungwa lelituna, bo Anna ni bakubona nebapotezi lubasi loluñwi lwa Lipaki, mi nebafumani kuli situwa sa ndu ya lubasi lo, nesisinyehile. Kacwalo, lubasi lo  nelusina liapalo zekenile. Bo Anna batalusa kuli: “Nelushimbile liapalo zabona, lwayo litapisa, kulihaina, ni kuliputa hande kihona lubakutiseza zona. Neku lubezi hahulu bunolo kueza musebezi wo, kono kueza cwalo nekutahisize kuli lube balikani babatuna kuto fita ni ka nako ya cwale.” Lilato lene banani lona bo Anna ni bakubona kwa mizwale ni likaizeli babona neli basusuelize kubatusa.—1 Joa. 3:17, 18.

11. (a) Batu babañwi bakona kuamiwa cwañi habalemuha kuli lwababonisa lilato? (b) Ka kuya ka Liproverbia 19:17, Jehova uikutwanga cwañi halubonisa babañwi sishemo?

¹¹ Halubonisa babañwi lilato ni sishemo, bakalemuha buikatazo bolueza bwa kulikanyisa mwanahanela Jehova ni mwaezeza lika. Mi mwendi bakaitebuha hahulu sishemo seluba bonisize nihaike kuli ka linako zeñwi mwendi habana kuba ni kolo ya kulutaluseza. Bo Kayla bababulezwi kwamulaho, basahupula hande batu bane babatusize. Batalusa kuli: “Niitumela hahulu kwa likaizeli kaufela bane bayanga ni na mwa bukombwa. Nebato nishimbanga fa ndu, neba nimemanga kuli niyo ca ni bona sico, mi neba nikutisanga kuto nisiya fa ndu. Nifitile fakulemuha kuli nebaikatazanga hahulu. Mi nebaezanga cwalo kabakala kuli neba nilata.” Niti kikuli, haki batu kaufela babaka itumela ku luna kabakala zelu baezelize. Bo Kayla babulela cwana ka za batu bane babatusize, bali: “Nenika tabela kubaezeza lika zeñwi kabakala sishemo sene banibonisize, kono hanizibi feela kobapila kaufelaa bona. Nihakulicwalo, Jehova waziba kobapila, mi nilapela kuli abakutiseze kulikana ni sishemo sene banibonisize.” Bo Kayla babulela niti. Jehova walemuhanga nihaiba lika zenyinyani zebonisa sishemo zeluezeza babañwi. Uunga lika zeo kuba za butokwa hahulu mi kuswana feela inge kuli lumukolotisize mi uka lukutiseza.—Mubale Liproverbia 19:17.

12. Mizwale bakona kubonisa cwañi lilato mwa puteho? (Mubone ni maswaniso.)

 ¹² Haiba mu mizwale, mukona kubonisa cwañi babañwi lilato ni kubaezeza lika zeka batusa? Muzwale wa mukulwani yabizwa Jordan naakupile muuna-muhulu yomuñwi kuli amutaluseze lika zeñwi zanaakona kueza kuli atuse mizwale ni likaizeli mwa puteho. Muuna-muhulu yo naamubabalize kabakala zwelopili yanaaezize, mi amutaluseza lika zeñwi zanaakona kueza kuli atuse hahulu mwa puteho. Ka mutala, naakalelize kuli, muzwale Jordani afitange kwa Ndu ya Mubuso ka nako ni kulumelisa babañwi, kualaba kwa mikopano, kukutazanga kamita ni ba mwa sikwata sahae sa sebelezo ya mwa simu, ni kubata linzila zeñwi za kutusa ka zona babañwi. Muzwale Jordan hanaasebelisize liakalezo zeo, naasika ituta feela mwa kuezeza lika zeñwi kono hape naaitutile mwa kuboniseza hahulu lilato kwa mizwale ni likaizeli bahae. Muzwale Jordan naatutile kuli muzwale haketiwa kuba sikombwa sa puteho hakalisi kutusa babañwi kono uzwelapili kueza cwalo.—1 Tim. 3:8-10, 13.

13. Lilato nelisusuelize cwañi muzwale yabizwa Christian kukwanisa zetokwahala kuli asebeze sina muuna-muhulu hape?

¹³ Kucwañi haiba kwamulaho nemusebeza sina sikombwa sa puteho kamba muuna-muhulu? Jehova wahupula musebezi one muezize kwamulaho ni lilato lene limisusuelize kueza musebezi wo. (1 Makor. 15:58) Hape walemuha lilato lemuzwelapili kubonisa. Muzwale yabizwa Christian naaikutwile hahulu bumaswe hanaazwisizwe fa buuna-buhulu. Niteñi, ubulela kuli: “Neniikatulezi kueza nto ifi kamba ifi yene nikona kuli nisebeleze Jehova kabakala lilato laka ku yena—ibe kuli ninani buikalabelo bobuñwi kamba kutokwa.” Hamulaho wa nako, naketiwa kusebeza sina muuna-muhulu hape. Bo Christian batalusa  kuli: “Nenisaba kusebeza sina muuna-muhulu hape. Kono naikatulela kuli bakeñisa kuli Jehova, ka sishemo sahae, unilumelelize kumusebeleza sina muuna-muhulu hape, nikaeza cwalo kabakala lilato laka ku yena ni kwa mizwale ni likaizeli baka.”

14. Muitutañi ku zanaabulezi kaizeli wa kwa Georgia?

¹⁴ Batanga ba Jehova hape babonisanga lilato kwa batu babayahile ni bona. (Mat. 22:37-39) Ka mutala, kaizeli yabizwa Elena yapila kwa Georgia, utalusa kuli: “Sapili, nto yene inisusuezanga feela kukutaza neli lilato laka ku Jehova. Kono lilato laka ku Ndate ya kwa lihalimu hane lihulile, nakala kulata hahulu ni batu babañwi. Nenilikile kunahanisisa miinelo yetaata yene bakopana ni yona ni litaba zenekona kubafita kwa pilu. Kunahanisisa hahulu za batu bao, neku nisusuelize hahulu kubatusa.”—Maro. 10:13-15.

15-16. Sina mokuboniselizwe mwa maswaniso, ki limbuyoti mañi zeluka fumana kabakala kubonisa lilato kwa batu?

¹⁵ Halubonisa lilato kwa mizwale baluna, haki bona feela banosi babaka tuseha. Butuku bobuyambukela bwa COVID-19 habukalisa, muzwale yabizwa Paolo ni musalaa hae nebatusize likaizeli babañata ba basupali kuziba mwakuitusiseza tupangaliko twabona kuli bakutaze. Kaizeli yanaasa zibi mwakuitusiseza kapangaliko kahae, naafitile fa kuziba mwakuitusiseza kona. Naaitusisize kona kumemela ba mwa lubasi lwahae kwa Kupuzo.  Ba 60 kubona nebafumanehile ka kuitusisa progilamu yekonahalisa kuli batu babonane! Buikatazo bone baezize bo Paolo ni bakubona nebutusize kaizeli yo ni ba lubasi lwahae. Hasamulaho, kaizeli yo naañolezi bo Paolo kuli: “Lwaitumela kwa kululuta luna basupali. Hanina kulibala mwaboniselize Jehova kuli waluisa pilu ni buikatazo bomuezize bwa kulutusa.”

¹⁶ Zebonwi zeswana sina zeo nelilutile bo Paolo tuto yeñwi ya butokwa hahulu. Nebaitutile kuli lilato ki la butokwa hahulu kufita zibo kamba kuba ni buikoneli bobuñwi. Batalusa kuli: “Nenisebezanga sina muokameli wa mupotoloho. Nilemuhile kuli nihaike kuli bahasanyi mwendi balibezi lingambolo zene nifanga, basahupula lika zene niezize kuli nibatuse.”

17. Ki bo mañi babañwi babaka tusiwa halubonisa lilato?

¹⁷ Haiba lubonisa lilato kwa batu babañwi, ni luna lukatuseha mwa linzila zelusika libelela. Bo Jonathan babapila kwa New Zealand nebaiponezi buniti bwa taba yeo. Zazi leliñwi la Mukibelo musihali hane kucisa, nebaboni paina inze akutaza kwatuko ni mukwakwa. Bo Jonathan baikatulela kusebezanga ni paina yo sunda ni sunda la Mukibelo musihali. Ka nako yeo, nebasa zibi mone bakatusezwa kabakala kubonisa sishemo. Bo Jonathan batalusa kuli: “Nenisa ikolangi hahulu kukutaza ka nako yeo. Kono hane niteelezanga ku paina yo hanzaa luta ni kubona zende zenezwa mwa bukombwa bwahae, nakalisa kuikola kukutaza. Hape muzwale yo naabile mulikanaaka yomutuna mi naanitusize kuhula kwa moya, kuikola kukutaza, ni kutiisa silikani saka ni Jehova.”

18. Jehova ubata kuli luezeñi?

¹⁸ Jehova ubata kuli kaufelaa luna lumulate hahulu ni kulata batu. Sina molunyakisiselize, lukalata hahulu Jehova haiba lubala Linzwi lahae ni kunahanisisa zelubala, ni kulapelanga ku yena kamita. Lukalata hahulu mizwale ni likaizeli baluna haiba lubatusa. Lilato laluna halinze lihula, silikani saluna ni Jehova ni mizwale ni likaizeli baluna sika tiya. Mi bakaba balikani baluna kuya kuile!