1. Balutiwa ba Jesu nebataluselize buñata bobutuna bwa batu kuezañi?

BUÑATA bobutuna bwa batu, ili baana ni basali bane bazwa mwa linaha zeñata ni bane babulela lipuo zeshutana-shutana nebakopani hamoho. Nto yeñwi yemakaza neiezahezi lizazi leo. Majuda babañwi bakala kubulela mwa lipuo za batu bao bane bazwa kwa linaha lisili! Taba yeo nei bakomokisize luli, kono mane nebakomokile hahulu nikufita hane bautwile litaba zene bababulelezi Majuda bao ni zanaabulezi muapositola Pitrosi kwa batu kaufela. Nebaitutile kuli nebaka piliswa hane bakabonisa tumelo ku Jesu Kreste. Taba yeo nei banyangumuzi. Batu nebafitilwe kwa pilu kuli mane babuza, bali: “Baana, mizwale, luswanela kuezañi?” Pitrosi aalaba kuli: “Yomuñwi ni yomuñwi wa ku mina akolobezwe.”—Lik. 2:37, 38.

2. Lukanyakisisañi mwa taba ye? (Mubone siswaniso sesi fa kava.)

² Zeneezahezi hasamulaho nelikomokisize hahulu. Batu bababato eza 3,000 nebakolobelizwe lizazi leo ni kuba balutiwa ba Kreste. Ao neli ona makalelo a musebezi omutuna wa kuluta batu kuba balutiwa, ili wanaalaezi Jesu balateleli bahae kuli baeze. Musebezi wo uzwezipili mane kuto fita ni kacenu le. Kacenu, halulibeleli kuli mutu wakona kuunga muhato wa kukolobezwa hamulaho wa kukutaza ku yena ka lihora lisikai feela. Kukona kumuungela nako yetelele kuli aange muhato wo, mwendi cwalo likweli, silimo kamba kufitelela. Haki nto yebunolo kuluta mutu kuba mulutiwa wa Kreste, mi mwendi mwaziba taba yeo sihulu haiba musweli mwaituta Bibele ni mutu ka nako ya cwale. Mwa taba ye, lukanyakisisa zemukona kueza kuli mutuse muituti wamina wa Bibele kuba mulutiwa yakolobelizwe.

3. Ka kuya ka Mateu 28:19, 20, muituti wa Bibele uswanela kuezañi kuli aeze zwelopili ni kukolobezwa?

³ Pili muituti wa Bibele asika kolobezwa kale, uswanela kusebelisa zaituta mwa Bibele. (Mubale Mateu 28:19, 20.) Haiba asebelisa zaituta, ukaswana sina “mutu yabutali” yanaayepile hahulu mwa mubu ni kuyo yahela mutomo fa licwe, yanaabulezi Jesu mwa swanisezo yahae. (Mat. 7:24, 25; Luka 6:47, 48) Lukona kutusa cwañi muituti wa Bibele kusebelisa zaituta? Halunyakisiseñi liakalezo zetaalu.

4. Lukona kutusa cwañi muituti wa Bibele kueza zwelopili ilikuli akolobezwe? (Mubone ni mbokisi yeli, “ Mutuse Muituti Wamina Kuitomela Likonkwani ni Kulipeta.”)

⁴ Mutuse muituti wamina kuitomela likonkwani. Ki kabakalañi hamuswanela kueza cwalo? Halunyakisiseñi mutala wo: Haiba munahana za kutama musipili omutelele, mwendi mukalukisa kuli hamufita fa sibaka sesiñwi sesinde muyeme ni kuikatulusa. Kueza cwalo kukatusa kuli musike mwaikutwa kuli musipili ki omutelele hahulu. Ka mukwa oswana, haiba muituti wa Bibele aitomela likonkwani zabata kupeta ka nako ya cwale mi alipeta, mwendi ukalemuha kuli wakona kupeta sikonkwani sa kukolobezwa. Muitusise kalulo yeli, “Za Kueza” yefumaneha mwa buka ya Muikole Bupilo Kuya Kuile! kuli mutuse muituti wamina kuitomela likonkwani. Kwa mafelelezo a tuto ni tuto, munyakisise ni muituti wamina mo sikonkwani sesibulezwi mwa taba yeli, “Za Kueza” sikona kumutuseza kusebelisa zaitutile. Haiba mubata kuli muituti wamina aitomele sikonkwani sisili, mwakona kuñola mwa kalulo yeli, “Zeñwi.” Kamita muitusisange kalulo yeo kuikambota ni muituti wamina ka za likonkwani zabata kupeta ka nako ya cwale ni zabata kupeta kwapili.

5. Sina mokuboniselizwe kwa Mareka 10:17-22, Jesu naabulelezi muuna wa mufumi kuezañi, mi ki kabakalañi?

⁵ Mutuse muituti wamina wa Bibele kueza licinceho mwa bupilo bwahae. (Mubale Mareka 10:17-22.) Jesu naaziba kuli nekuli  taata hahulu ku muuna wa mufumi kulekisa zanaaluwile kaufela. (Mare. 10:23) Nihakulicwalo, naamususuelize kueza cinceho yetuna yeo. Libaka ki lifi? Kakuli Jesu naamulata. Fokuñwi, lukona kupalelwa kususueza muituti waluna kusebelisa zaituta kabakala kuli luikutwa kuli nako haisika fita ya kuli aeze cinceho yeo. Kukona kuunga nako kuli batu batubule butu bwakale ni kuapala butu bobunca. (Makolo. 3:9, 10) Kono haiba musaliyehi kuikambota ni muituti wamina ka za licinceho zatokwa kueza, ukaeza licinceho zeo kapili. Haiba muikambota ni yena litaba zeo, mukabonisa kuli mwamuisa pilu.—Samu 141:5; Liprov. 27:17.

6. Ki kabakalañi haluswanela kubuza muituti waluna lipuzo zemutokwa kuli ataluse mubonelo wahae?

⁶ Ki kwa butokwa hahulu kubuza muituti waluna lipuzo zemutokwa kuli ataluse mubonelo wahae fa taba yelunyakisisa. Kueza cwalo kuka mitusa kuziba haiba muituti wamina wautwisisa zemuituta mi mukaziba zalumela. Haiba mueza cwalo kamita, kuka mibela bunolo kuikambota ni yena litaba zeñwi zekona kumubela taata kulumela. Buka ya Muikole Bupilo Kuya Kuile! inani lipuzo zeñata zetokwa kuli batu bataluse mubonelo wabona. Ka mutala, mwa tuto 4, kunani puzo yeli: “Mubona cwañi, Jehova uikutwanga cwañi hamuitusisa libizo lahae?” Mwa tuto 9 kunani puzo yeli: “Ki lika mañi zemubata kutaluseza Jehova hamulapela?” Kwa makalelo, mwendi muituti wamina kukona kumubela taata kualaba lipuzo zecwalo. Kacwalo, mumutuse kunahanisisa mañolo ni maswaniso abonisizwe mwa buka.

7. Lukona kuitusisa hande cwañi zeezahezi mwa bupilo bwa batu babañwi?

⁷ Muituti hasaazibile muhato watokwa kuunga, muitusise zeezahezi mwa bupilo bwa batu babañwi kuli mumutuse kuunga muhato wo. Ka mutala, haiba muituti wamina hafumanehangi kwa mikopano ya puteho kamita, mwakona kumubuhisa vidio yeli, Jehova Naanibabalezi, yebonisizwe mwa kalulo ya “Mubone Litaba Zeñwi” mwa tuto 14. Mwa lituto zeñata za buka ya Muikole Bupilo Kuya Kuile! mukafumana litaba zecwalo mwa kalulo ya “Mubatisise” kamba ya “Mubone Litaba Zeñwi.” * Mutokomele kuli hamubapanyi muituti wamina ku mutu yomuñwi ka kubulela kuli: “Haiba mutu yolubuhile mwa vidio ukonile kuunga muhato wo, uzibe ni mina mwakona.” Mutuhele muituti wamina kuli aitemuhele taba yeo yena muñi. Kono mukoñomeke lika zetusize mutu yomubuhile mwa vidio kusebelisa zaitutile mwa Bibele. Mwendi mwakona kutalusa liñolo leliñwi lanaasebelisize kamba muhato wanaangile. Hakukonahala, mukoñomeke mo Jehova naatuselize mutu yo.

8. Lukona kutusa cwañi muituti waluna kulata Jehova?

⁸ Mutuse muituti wamina kulata Jehova. Mukona kueza cwañi cwalo? Hamuituta ni yena, kamita mumutalusezange za tulemeno twa Jehova. Mutuse muituti wamina kuutwisisa kuli Jehova ki Mulimu yatabile mi watabela kutusa baba mulata. (1 Tim. 1:11; Maheb. 11:6) Mumutuse kulemuha kuli haiba asebelisa litaba zaituta, ukatuseha mi mumutaluseze kuli yeo ki nzila yeñwi yabonisa ka yona Jehova kuli wamulata. (Isa. 48:17, 18) Muituti wamina hanzaa zwelapili kulata hahulu Jehova, ukasusuezwa kueza licinceho.—1 Joa. 5:3.

9. Ka kuya ka Mareka 10:29, 30, ki nto mañi yekona kutusa mutu kuitoboha lika zeñwi kuli abe mulutiwa yakolobelizwe?

⁹ Kuli muituti wamina wa Bibele aeze zwelopili ni kukolobezwa, uswanela kuitoboha lika zeñwi. Sina muuna wa mufumi yelunyakisisize  kwamulaho, baituti ba Bibele babañwi batokwanga kuitoboha sifumu sabona. Haiba musebezi obaeza walwanisana ni likuka za mwa Bibele, bakatokwa kubata musebezi usili. Babañata batuhelanga kueza siango ni batu babasa lati Jehova. Babañwi bayubekiwanga ki ba lubasi lwabona babatoile Lipaki za Jehova. Jesu naabulezi kuli nekuka bela taata batu babañwi kuitoboha lika zecwalo. Kono naasepisize kuli baba mulatelela, habana kuinyaza. Jehova uka bafuyaula ka kubafa lubasi lolunde lwa kwa moya loluka babonisa lilato. (Mubale Mareka 10:29, 30.) Mutokwa kuezañi kuli muituti wamina wa Bibele atusiwe ki mpo yende ye?

10. Muitutañi kwa mutala wa bo Manuel?

¹⁰ Mube mulikanaa muituti wamina. Ki kwa butokwa hahulu kubonisa muituti wamina wa Bibele kuli mwamuisa pilu. Kabakalañi? Mulemuhe zanaabulezi muzwale yabizwa Manuel, yapila kwa Mexico. Hahupula nako yanaasa ituta Bibele, uli: “Nako kaufela pili lusika kala kale kuituta Bibele, muzwale yanaaituta ni na naabatanga kuziba monizuhela. Naanitusize kulukuluha kumutaluseza nto ifi kamba ifi. Nenilemuhanga kuli naaniisa pilu luli.”

11. Baituti baluna ba Bibele bakona kutusiwa cwañi haiba batanda nako ni luna?

¹¹ Mutandange nako ni baituti bamina ba Bibele, sina feela Jesu hanaatandanga nako ni balutiwa bahae. (Joa. 3:22) Haiba kwaswanela, mumeme muituti wamina yaeza zwelopili kwa ndu yamina kuli munwe tii ni yena kamba kuca sico ni yena kamba kubuha yeñwi ya maprogilamu a ka kweli a JW Broadcasting. Muituti wamina mwendi ukaitumela hahulu haiba amemiwa ka nako yeo balikani bahae kamba ba lubasi lwahae baeza mukiti osimuluha kwa bulapeli bwa buhata fa lizazi la pumulo. Kueza cwalo kukatusa kuli asike aikutwa bulutu. Muzwale yabizwa Kazibwe yapila kwa Uganda utalusa kuli: “Kutanda nako ni muzwale yanaaitutanga Bibele ni na neku nitusize kuituta lika zeñata ka za Jehova sina feela mone kubelanga ka nako yene luituta Bibele. Neniiponezi kuli Jehova waisa pilu batanga bahae luli mi batanga bahae banani tabo yetuna. Mi ni na nenibata kuba ni tabo yecwalo.”

12. Ki kabakalañi haluswanela kuyanga ni bahasanyi babashutana-shutana kwa tuto yaluna ya Bibele?

 ¹² Mumemange bahasanyi babashutana-shutana kwa tuto yamina ya Bibele. Fokuñwi, lukona kutabela kuyanga lunosi kwa tuto yaluna ya Bibele kamba kuya ni muhasanyi yaswana. Niha lukona kutabela kueza cwalo, baituti baluna ba Bibele bakatuseha hahulu haiba luyanga kwa tuto ni bahasanyi babashutana-shutana. Muzwale yabizwa Dmitrii yapila kwa Moldova utalusa kuli: “Muhasanyi ni muhasanyi yanaataha kwa tuto naatalusanga litaba ka nzila yende. Nto yeo nei nitusize kuziba linzila zeñwi zene nikona kusebelisa ka zona litaba zene niituta. Hape nenisika uikutwa buenyi hane niile kwa mikopano ya puteho lwapili kakuli nese nizibani kale ni mizwale ni likaizeli babañata.”

13. Ki kabakalañi haluswanela kutusa muituti waluna wa Bibele kufumaneha kwa mikopano?

¹³ Mutuse muituti wamina wa Bibele kufumanehanga kwa mikopano ya puteho. Kabakalañi? Kabakala kuli Jehova ufile taelo ya kuli balapeli bahae baswanela kukopananga hamoho; mikopano ki kalulo ya bulapeli bwaluna. (Maheb. 10:24, 25) Hape mizwale ni likaizeli baluna ki lubasi lwaluna lwa kwa moya. Haluli kwa mikopano hamoho ni bona kuswana feela inge kuli luca sico sesinde hamoho ni bona. Hamutusa muituti wamina wa Bibele kufumaneha kwa mikopano, mumutusa kuunga omuñwi wa mihato ya butokwa hahulu yekona kumutusa kukolobezwa. Kono kukona kumubela taata kukalisa kufumanehanga kwa mikopano. Buka ya Muikole Bupilo Kuya Kuile! ikona kutusa cwañi muituti wamina kutula butata bobukona kumupaleliswa kufumaneha kwa mikopano?

14. Lukona kususueza cwañi muituti waluna kufumaneha kwa mikopano ya puteho?

¹⁴ Kuli mususueze muituti wamina kukala kufumaneha kwa mikopano ya puteho, muitusise tuto 10 ya buka ya Muikole Bupilo Kuya Kuile! Bahasanyi babayezi seli bane bakupilwe kuitusisa litaba zefumaneha mwa tuto yeo kubona nji zasebeza, pili buka ye isika zwisiwa kale, nebakonile kutusa baituti babona ba Bibele babañata kufumaneha kwa mikopano. Nihakulicwalo, hamutokwi kulibelela kuli konji hamuka fita fa tuto 10 kihona mukamema muituti wamina kwa mikopano. Mumumeme kwa mikopano isali kwa makalelo, mi muzwelepili kueza cwalo. Baituti ba Bibele bapaleliswanga ki lika zeshutana-shutana. Kacwalo, mulike kuziba zepaleliswa muituti wamina kufumaneha kwa mikopano mi mubone haiba kunani zemukona kueza kuli mumutuse. Musike mwazwafa haiba muituti wamina kumuungela nako kuli akalise kufumaneha kwa mikopano. Mube ni pilu-telele kono musike mwatuhela kumumema.

15. Ki lika mañi zakona kuikalelwa muituti wamina?

¹⁵ Kana mwahupula kuli kwa makalelo nemusabanga kuba yomuñwi wa Lipaki za Jehova? Mwendi nemuikutwanga kuli nemusike mwakona kukutaza kwa batu. Kamba mwendi nemuikalezwi kuli ba lubasi lwamina kamba balikani bamina nebaka milwanisa. Haiba ki cwalo, uzibe mwautwisisa mwaikutwela muituti wamina wa Bibele. Jesu naabulezi kuli batu babañwi nebaka ikutwa cwalo. Nihakulicwalo, naasusuelize balateleli bahae kusatuhelela sabo kubapaleliswa kusebeleza Jehova. (Mat. 10:16, 17, 27, 28) Jesu naatusize cwañi balateleli bahae kufelisa sabo yene banani yona? Mukona kumulikanyisa cwañi?

16. Lukona kuluta cwañi muituti waluna mwakona kutaluseza babañwi litaba zalumela?

¹⁶ Muzwelepili kuluta muituti wamina kuziba mwakona kutaluseza babañwi litaba zalumela. Balutiwa ba Jesu mwendi nebaikalezwi hanaa balumile kuyo kutaza. Kono Jesu naabatusize  ka kubataluseza batu bane baswanela kukutaza ku bona ni zene baswanela kubulela. (Mat. 10:5-7) Mukona kulikanyisa cwañi Jesu? Mutuse muituti wamina kuziba batu bakona kukutaza ku bona. Ka mutala, mumubuze haiba kunani mutu yomuñwi yaziba yakatusiwa ki taba yeñwi ya mwa Bibele. Kihona muka mutusa kuziba mwakona kutaluseza taba yeo ka nzila yebunolo ku mutu yo. Ka nako yeswanela, muitusise kalulo ya “Babañwi Babulelanga Kuli” ni ya “Mutu Yomuñwi Ukona Kumibuza Kuli,” zefumaneha mwa buka ya Muikole Bupilo Kuya Kuile! kuli mumutuse kuziba mwakona kukutaleza ku mutu yomuñwi. Hamunze mueza cwalo, mutuse muituti wamina kuziba mwakona kuitusiseza Bibele kufa likalabo ka nzila yebunolo ni ka maseme.

17. Lukona kusebelisa cwañi sikuka sesi kwa Mateu 10:19, 20, 29-31 kuli lutuse muituti waluna kusepa Jehova?

¹⁷ Mutuse muituti wamina kusepa Jehova. Jesu naataluselize balutiwa bahae kuli Jehova naaka batusa kabakala kuli naabalata. (Mubale Mateu 10:19, 20, 29-31.) Muhupulise muituti wamina kuli Jehova uka mutusa ni yena. Mumutuse kuitinga ku Jehova ka kulapela ni yena ka za likonkwani zahae. Muzwale yabizwa Franciszek yapila kwa Poland utalusa kuli: “Hañata, muhasanyi yanaaitutanga Bibele ni na naalapelanga ka za likonkwani zaka ka nako ya tuto. Hane nilemuhile kuli Jehova naaalabile litapelo za muhasanyi yo, honafo feela ni na nakala kulapelanga. Nenilemuhile kuli Jehova naaalabile tapelo yaka ya kuli nifiwe tumelezo kwa musebezi waka omunca ya kuli nifumanehange kwa mikopano ya puteho ni kwa mukopano omutuna.”

18. Jehova uikutwa cwañi ka za musebezi wa kuluta batu obaeza batanga bahae?

¹⁸ Jehova uiyakatwa hahulu baituti baluna ba Bibele. Waziba kuli batanga bahae basebezanga ka taata kuli batuse batu kusutelela ku yena, mi wabalata kabakala buikatazo bwabona. (Isa. 52:7) Haiba ka nako ya cwale hamuna tuto ya Bibele, musakona kutusa baituti ba Bibele kueza zwelopili ni kukolobezwa ka kuyanga ni bahasanyi babañwi kwa lituto zabona.