1. Ki miinelo mañi yekona kulutahiseza sabo?

 HALUNYAKISISEÑI miinelo yemiñwi yene baipumani ku yona mizwale ni likaizeli babañwi. Bo Nestor ni bakubona bo María, nebabata kuyo sebeleza kone kutokwahala hahulu bakutazi. * Kono kuli baeze cwalo, nebatokwa kunolofaza bupilo bwabona. Niteñi, nebaikalelwa kuli mwendi nebasike baba ni tabo luli hane bakanolofaza bupilo bwabona. Muzwale yabizwa Biniam hanaabile yomuñwi wa Lipaki za Jehova mwa naha mo musebezi waluna neulwaniswa, naalemuhile kuli naakanyandiswa ka kuba yomuñwi wa batanga ba Mulimu. Naakenezwi ki sabo. Kono nto yenee mutahiselize hahulu sabo nikufita ki kunahanisisa mone lukaezeza lubasi lwahae hane lukaziba kuli sali yomuñwi wa Lipaki za Jehova. Kaizeli yabizwa Valérie naafumanwi kuli naakula mufuta omuñwi wa kansa yemaswe hahulu, mi naapalelwa kufumana mualafi yanaaka mualafa ka kukuteka tumelo yahae ya mwa Bibele ya kusapompelwa mali. Kusina kukakanya, kaizeli yo naaikalezwi kuli naakashwa.

2. Ki kabakalañi haluswanela kufelisa sabo yelunani yona?

² Kana ni mina mukile mwaipumana mwa miinelo yecwalo yenee mitahiselize sabo? Buñata bwaluna lukile lwaipumana mwa miinelo yecwalo. Haiba lusafelisi sabo yaluna, lukona kueza likatulo zemaswe zekona kusinya silikani saluna ni Jehova. Satani ki zona zabata zeo. Hape ulikanga kuitusisa sabo yaluna kuli alupaleliswe kumamela milao ya Jehova, kukopanyeleza cwalo ni taelo ya kukutaza taba yende.  (Sin. 12:17) Satani umaswe, unani situhu, mi umaata. Kono mwakona kuisileleza ku yena. Ka mukwa ufi?

3. Ki nto mañi yeka lutusa kufelisa sabo yaluna?

³ Haiba lukolwa kuli Jehova walulata—u kwa lineku laluna—haluna kusabiswa ki Satani. (Samu 118:6) Ka mutala, muñoli wa Samu 118 naakopani ni miinelo yenee muziyelize hahulu. Naanani lila zeñata, kukopanyeleza cwalo ni bane banani litulo zetuna (litimana 9,10). Fokuñwi, naaikutwanga kuziyeleha hahulu (timana 13). Mi naakalimezwi hahulu ki Jehova (timana 18). Niteñi, muñoli wa samu yo naañozi kuli: “Hanina kusaba sesiñwi.” Ki nto mañi yenee mutusize kuikutwa kusilelezwa? Naaziba kuli nihaike kuli Jehova naamukalimezi, Ndatahe wa kwa lihalimu yo naamulata hahulu. Muñoli wa samu yo naakozwi kuli kusina taba ni muinelo wanaaka kopana ni ona, Mulimu wahae yalilato kamita naaka mutusa.—Samu 118:29.

4. Ki lika mañi zeluka tuhela kusaba haiba lusepa kuli Mulimu walulata?

⁴ Lutokwa kukolwa kuli Jehova walulata ka butu. Kuba ni buikolwiso bo kuka lutusa kutiyela lika zetaalu ze, zetahisezanga batu sabo, ili (1) kuikalelwa kuli haluna kukona kufumanela lubasi lwaluna lika zebatokwa, (2) kusaba batu, ni (3) kusaba lifu. Mizwale ni likaizeli bababulezwi mwa paragilafu yapili nebakonile kufelisa sabo yabona bakeñisa kuli nebakozwi kuli Mulimu wabalata.

5. Ki lika mañi zakona kuikalelwa hahulu toho ya lubasi? (Mubone siswaniso sesi fa kava.)

⁵ Toho ya lubasi yali Mukreste uunga buikalabelo bwa kubabalela lubasi lwahae kwa mubili kuba bwa butokwa hahulu. (1 Tim. 5:8) Haiba mu toho ya lubasi, mwendi ka nako ya butuku bobuyambukela bwa COVID-19 nemuikalezwi kuli mukazwisiwa musebezi. Mwendi nemuikutwile kuli nemusike mwakona kufumanela lubasi lwamina lico kamba kutelela ndu momuina. Mwendi hape nemuikalezwi kuli hane mukazwisiwa musebezi, nemusike mwakona kufumana usili. Kamba sina bo Nestor ni bo María, bababulezwi kwamulaho, mwendi nemuikutwa kuli nemusike mwakona kunolofaza bupilo bwamina. Satani uitusisize sabo yeo kupaleliswa babañata kusebeleza Jehova.

6. Satani ubata kuli lukolwe taba mañi?

⁶ Satani ubata kuli lukolwe kuli Jehova haalulati mi haana kulutusa kubabalela lubasi lwaluna. Kacwalo, lukona kuikutwa kuli luswanela kueza molukonela kaufela kubukeleza musebezi waluna, nihaike kuli kueza cwalo kukona kutahisa kuli lutule likuka za mwa Mañolo.

7. Jesu naabuleziñi ka za Ndatahe?

⁷ Jesu, yena yaziba hande Ndatahe kufita mutu ufi kamba ufi, naabulezi kuli Mulimu waluna “uziba [zelutokwa] mane [luna lusika] likupa kale.” (Mat. 6:8) Mi Jesu waziba kuli Jehova utabela kulufa lika zelutokwa. Ka kuba Bakreste, lu mwa lubasi lwa Mulimu. Jehova ki yena Toho ya lubasi lwaluna, mi lunani buikolwiso bwa kuli ukaeza feela sina mwabatela kuli litoho za mabasi kaufela lieze sina mokuboniselizwe kwa 1 Timotea 5:8.

8. (a) Ki lika mañi zekona kulutusa kufelisa sabo ya kuli haluna kukona kufumanela lubasi lwaluna lika zelutokwa? (Mateu 6:31-33) (b) Sina mokuboniselizwe mwa siswaniso, lukona kulikanyisa cwañi mutala wa bo mutu ni musalaa hae babatiseza kaizeli yomuñwi lico?

⁸ Haiba lukolwa kuli Jehova walulata ni kuli walata lubasi lwaluna, kuka lubela bunolo kukolwa kuli uka lutusa kufumana lika zelutokwa. (Mubale Mateu 6:31-33.)  Jehova ubata kulutusa kufumana zelutokwa, mi ki Mufani yomutuna luli! Hanaabupa lifasi, naasika lukisa feela kuli kube ni lika zeka lutusa kupila. Hape naabupile lika zeñata zelutusa kuikola bupilo. (Gen. 2:9) Nihaike kuli fokuñwi lukona kuba feela ni lika lisikai za kuipilisa ka zona, luswanela kuitebuha kuli lunani lika zeo. Jehova ki yena yalufile zona. (Mat. 6:11) Luswanela kuhupula kuli Mulimu uka lufa lika zeñata hahulu kufita lika za kwa mubili zeluitombozi, ka nako ya cwale ni kwapili. Bo Nestor ni bo María nebaiponezi buniti bwa taba yeo.—Isa. 65:21, 22.

9. Muitutañi kwa mutala wa bo Nestor ni bo María?

⁹ Bo Nestor ni bo María nebanani ndu yende ni misebezi yene bafumanisa masheleñi amañata kwa Colombia. Batalusa kuli: “Nelubata kunolofaza bupilo bwaluna ni kueza zeñata mwa bukombwa kono neluikalezwi kuli kueza cwalo nekusike kwalutahiseza tabo.” Ki nto mañi yenee batusize kufelisa sabo yene banani yona? Nebanahanisisize mo Jehova naababoniselize lilato. Nebakozwi kuli Jehova naaka bababalela; kacwalo, batuhela kueza misebezi yene bafumanisa masheleñi amañata. Balekisa ndu yabona ni kututela kwa sibaka sisili mwa naha yeo kone kutokwahala hahulu bakutazi ba Mubuso. Baikutwa cwañi ka za katulo yene baezize? Bo Nestor batalusa kuli: “Luiponezi buniti bwa manzwi añozwi kwa Mateu 6:33. Halusika palelwa kufumana lika zelutokwa kwa mubili. Mi lunani tabo yetuna mwa bupilo cwale kufita kwamulaho.”

10. Ki kabakalañi batu habasabanga batu babañwi?

¹⁰ Kuzwa feela kwamulaho, batu baezize maswe batu babañwi. (Muek. 8:9) Ka mutala, batu babañwi baitusisanga maswe maata abona, likebenga liezanga lika zemaswe hahulu, bana ba sikolo babanani mukwa wa kutolisa babañwi balwahanga ni kubemba bana ba sikolo babañwi, mi batu babañwi mane bona baezanga ba lubasi lwabona ka situhu. Kuswanezi batu habasaba batu babañwi! Satani uitusisanga cwañi sabo yelunani yona ya kusaba batu kuli alulwanise?

11-12. Satani uitusisanga cwañi sabo ya kusaba batu kulwanisa?

¹¹ Satani uitusisanga sabo yelunani yona ya kusaba batu kuli alupaleliswe kueza lika  zeñwi zetabisa Jehova kamba kulutuhelisa kukutaza. Satani ukukuelize milonga kukwalela musebezi waluna ni kulunyandisa. (Luka 21:12; Sin. 2:10) Mwa lifasi la Satani le, batu babañata bahasanyanga litaba za buhata ni zemaswe ka za Lipaki za Jehova. Batu babalumela litaba za buhata zeo bakona kulusheununa kamba mane kulunyandisa. (Mat. 10:36) Halukomoki kuli Satani ululwanisa ka nzila yeo. Naaitusisize linzila zeswana ni mwa linako za baapositola.—Lik. 5:27, 28, 40.

¹² Sabo ya kusaba twaniso yezwa kwa milonga haki yona feela nzila yalulwanisa ka yona Satani. Babañwi bona baikalezwi hahulu mobaka ikutwela ba lubasi lwabona habaka ziba kuli sebali Lipaki za Jehova kufita kusaba nyandiso. Balata hahulu bahabo bona mi babata kuli bazibe Jehova ni kumulata. Baikutwanga hahulu bumaswe habautwa bahabo bona habashwaula Mulimu wa niti ni batanga bahae. Fokuñwi, bahabo luna bane balulwanisanga kwamulaho nebaitutile niti hasamulaho ni kuba batanga ba Jehova. Kono lukaeza cwañi haiba bahabo luna batuhela kuswalisana ni luna kabakala kuli seluli Lipaki?

13. Kuba ni buikolwiso bwa kuli Mulimu walulata kuka lutusa cwañi haiba ba lubasi lwaluna batuhela kuswalisana ni luna? (Samu 27:10)

¹³ Lwakona kuomba-ombiwa ki manzwi amande añozwi kwa Samu 27:10. (Mubale.) Haiba luhupula kuli Jehova ululata hahulu, haluna kuikalelwa halukopana ni twaniso. Mi lunani buikolwiso bwa kuli uka lufa mupuzo kabakala buitiiso bwaluna. Jehova uka lubabalela kwa mubili, kulutusa kusaikalelwa, ni kulutusa kuba bukaufi ni yena kufita mutu ufi kamba ufi! Muzwale Biniam yabulezwi kwamulaho naaiponezi buniti bwa taba yeo.

14. Muitutañi kwa mutala wa bo Biniam?

¹⁴ Muzwale Biniam naaikatulezi kuba yomuñwi wa Lipaki za Jehova niha naaziba kuli naakanyandiswa hahulu kabakala kueza cwalo. Halunyakisiseñi mo kuziba kuli Jehova naabalata nekutuselize bo Biniam kusasaba batu. Batalusa kuli: “Neninyandisizwe hahulu kufita mone ninahanela. Kono mane nto yene nisaba hahulu kufita kunyandiswa ki muuso neli kulwaniswa ki ba lubasi lwaka. Neniikalezwi kuli katulo yene niezize ya kuba yomuñwi wa Lipaki za Jehova neika swabisa bo ndate bane basi balumeli, mi ba lubasi lwaka nebaka tuhela kunikuteka.”  Nihakulicwalo, bo Biniam nebanani buikolwiso bwa kuli Jehova kamita ubabalelanga batu balata. Bo Biniam batalusa kuli: “Neninahanisisize mo Jehova naatuselize Bakreste babañwi kutiyela butata bwa kutokwa masheleñi, ketululo, ni kunyandiswa ki likwata za batu. Neniziba kuli hane nikazwelapili kusepahala ku Jehova, naaka nifuyaula. Mane hane nitamilwe hañata-nata ni kutukufazwa, neniiponezi kuli Jehova watusanga batanga bahae mwa linako zetaata haiba bazwelapili kusepahala ku yena.” Jehova naabile Ndate wa luli ku bo Biniam, mi batanga bahae nebabile lubasi lwa luli ku bona.

15. Ki kabakalañi kusaba lifu hakusika fosahala?

¹⁵ Bibele ibulela kuli lifu ki sila. (1 Makor. 15:25, 26) Lukana lwaikalelwa za kushwa sihulu haiba luna kamba mutu yomuñwi yolulata akula hahulu. Ki kabakalañi halusaba lifu? Kabakala kuli Jehova ulubupile ni takazo ya kupila kuya kuile. (Muek. 3:11) Kono sabo yeswanela ya lifu ika lutusa kusileleza bupilo bwaluna. Ka mutala, ika lutusa kueza likatulo zende ka za lico zeluca, kuezanga lipapali zetiisa mubili kamita, kuya kwa baalafi ni kufiwa likalafo hakutokwahala, ni kusabeya bupilo bwaluna mwa lubeta kabomu.

16. Satani uitusisanga cwañi sabo yelunani yona ya kusaba lifu kuli alulwanise?

¹⁶ Satani waziba kuli lwalata kupila. Kono upiha kuli lwakona kusiya lika kaufela—nihaiba silikani saluna ni Jehova—ilikuli lubukeleze bupilo bwaluna. (Jobo 2:4, 5) Satani ki lihata lelituna! Nihakulicwalo, bakeñisa kuli Satani ki “yena yanani maata a kutahisa lifu,” ulikanga kuitusisa sabo yelunani yona ya lifu kutahisa kuli lufulalele Jehova. (Maheb. 2:14, 15) Mwa miinelo yemiñwi, Satani uitusisa batu bahae kubemba batanga ba Jehova kuli bakabulaiwa haiba basalatuli tumelo yabona. Fokuñwi, Satani halemuha kuli lukulile hahulu, ukona kuitusisa muinelo wo kuli atahise kuli lulobe mulao wa Mulimu. Baalafi kamba ba lubasi babasi Lipaki bakona kuluhapeleza kupompelwa mali, ili kutula mulao wa Mulimu. Kamba mutu yomuñwi akana alukolwisa kuamuhela mualafelo omuñwi osalumelelani ni likuka za mwa Mañolo.

17. Ka kuya ka Maroma 8:37-39, ki kabakalañi halusa swaneli kusaba lifu?

¹⁷ Nihaike kuli halutabeli kushwa, lwaziba kuli Jehova haana kutuhela kululata niha selushwile. (Mubale Maroma 8:37-39.) Balikani ba Jehova habashwa, uzwelangapili kubahupula mane inge kuli basapila. (Luka 20:37, 38) Unyolelwa kubazusa kwa bafu. (Jobo 14:15) Jehova naalifile tifo yetuna “kuli . . . [lube] ni bupilo bobusa feli.” (Joa. 3:16) Lwaziba kuli ululata hahulu mi waluisa pilu luli. Kacwalo, kufita kufulalela Jehova halukula kamba halubembiwa kuli lukabulaiwa, luswanela kuitinga ku yena kuli aluomba-ombe, kulufa butali, ni kulufa maata. Zeo ki zona zene baezize bo Valérie ni bo muunaa bona.—Samu 41:3.

18. Muitutañi kwa mutala wa bo Valérie?

¹⁸ Bo Valérie hane banani lilimo ze 35, nebafumanwi kuli nebakula mufuta omuñwi wa kansa yemaswe hahulu, ili yenekuliwa feela ki batu babanyinyani. Halunyakisiseñi mo kuziba kuli Jehova naabalata neku batuselize kusasaba lifu. Batalusa kuli: “Bo mualafi hane banitaluselize kuli neba nifumani ni kansa, na ni bo muunaaka nelukakamalile hahulu. Nenitokwa kualafiwa ka kupazulwa kuli nipile. Nenibuza-buzize baalafi babañata kono kaufelaa bona nebahanile kunialafa kusina kunipompela mali. Neniikalezwi  hahulu, kono bakeñisa kuli nenibata kumamela mulao wa Mulimu, neniikatulezi kuli nenisike nalumela kupompelwa mali! Jehova unibonisize hahulu lilato mwahalaa bupilo bwaka kaufela. Mi cwale neninani kolo ya kubonisa Jehova kuli namulata. Nako kaufela baalafi hane banitalusezanga litaba zezwafisa ka za butuku bone nikula, naikatulela kuli nenika zwelapili kutabisa Jehova ni kusatuhelela Satani kutula. Hamulaho wa nako, napazulwa kusina kupompelwa mali. Nihaike kuli nisakula, Jehova uzwezipili kulufa lika zelutokwa. Ka mutala, kwa mukopano wa kwa mafelelezo a sunda pili nisika ziba kale kuli nenikula kansa, nelunyakisisize taba yeli, ‘Mu Ndumebe ha mu Kopana ni Butata.’ * Taba yeo nei lususuelize hahulu. Nelukuta-kutezi kuibala. Kubala litaba zeswana sina ye ni kuezanga lika za kwa moya kamita, kutusize na ni bakuluna kuba ni kozo ya mwa munahano, kuba ni mubonelo oswanela, ni kueza likatulo zende.”

19. Ki lika mañi zekaezahala hona cwale-cwale fa?

¹⁹ Ka tuso ya Jehova, Bakreste mwa lifasi kaufela, bakonile kutiyela miinelo yetaata ni kuhanela Diabulosi. (1 Pit. 5:8, 9) Ni mina mwakona kueza cwalo. Hona cwale-cwale fa, Jehova ukalaela Jesu ni bababusa ni yena “kuli [basinye] misebezi ya Diabulosi.” (1 Joa. 3:8) Hamulaho wa fo, batanga ba Mulimu baba musebeleza fa lifasi ‘hakuna sebaka saba mi hakuna nto yeka batahiseza luwewe.’ (Isa. 54:14; Mika 4:4) Kono pili taba yeo isika ezahala kale, luswanela kueza molukonela kaufela kufelisa sabo yelunani yona.

20. Ki lika mañi zeka lutusa kufelisa sabo yelunani yona?

²⁰ Luswanela kuzwelapili kuikolwisa kuli Jehova ulata batanga bahae mi wabasileleza. Nto yeka lutusa kueza cwalo ki kunahanisisa ni kubulelela babañwi ka za mo Jehova naasilelelize batanga bahae kwamulaho. Mi luhupulange mo Jehova naalutuselize ka butu kutiyela miinelo yetaata. Ka tuso ya Jehova, lwakona kufelisa sabo yelunani yona.—Samu 34:4.