1. (a) Ki sepiso mañi yalufile Jehova? (b) ‘Kusepa Jehova’ kutalusañi? (Mubone “Taluso ya Manzwi.”)

 JEHOVA ufile batu kaufela baba mulata sepiso yende. Hona cwale-cwale fa, ukafelisa makulanu, maswabi, ni lifu. (Sin. 21:3, 4) Ukatusa “babaishuwa” baba musepile kufetula lifasi le kuli libe paradaisi. (Samu 37:9-11) Mi ukatusa mañi ni mañi waluna kuba ni silikani sesinde hahulu ni yena kufita selunani sona kacenu. Yeo ki sepiso yende luli! Kono luziba cwañi kuli Mulimu ukataleleza lisepiso zahae? Jehova kamita watalelezanga lisepiso zahae. Kacwalo, lunani libaka leliutwahala haluswanela ‘kusepa Jehova.’ * (Samu 27:14) Lubonisa kuli lunani sepo ka kulibelela ka pilu-telele ni ka tabo kuli Mulimu waluna ataleleze lisepiso zahae.—Isa. 55:10, 11.

2. Ki lika mañi zasaezize kale Jehova?

² Jehova ubonisize kale kuli watalelezanga lisepiso zahae. Halunyakisiseñi mutala ulimuñwi obonisa buniti bwa taba yeo. Mwa buka ya Sinulo, Jehova naasepisize kuli mwa nako yaluna, naaka kubukanya batu babazwa mwa macaba kaufela ni mishobo ni malimi kuli bamulapele ka nzila yelukile. Kacenu, sikwata sa batu babaipitezi bao bazibahala sina “buñata bobutuna bwa batu.” (Sin. 7:9, 10) Nihaike kuli mwa sikwata seo kufumaneha baana, basali, ni banana babazwa kwa libaka zeshutana-shutana, bababulela lipuo zeshutana, ni ba lisimuluho zeshutana, bapilisana ka kozo mi baswalisani mwa  lifasi kaufela. (Samu 133:1; Joa. 10:16) Buñata bobutuna bwa batu hape bakutaza ka kutukufalelwa. Baitukiselize kutaluseza batu kaufela babatabela kuteeleza ka za sepo yabona ya kuli kwapili lika likaba hande mwa lifasi. (Mat. 28:19, 20; Sin. 14:6, 7; 22:17) Kusina kukakanya, haiba mu mwa sikwata sa buñata bobutuna bwa batu, sepo ya kuli lika likaba hande kwapili ki ya butokwa hahulu ku mina.

3. Ki lika mañi zabata Satani?

³ Diabulosi ubata kufelisa sepo yemunani yona. Ubata kuli mulumele kuli Jehova haamiisi pilu mi haana kubuluka lisepiso zahae. Haiba Satani akona kufelisa sepo yelunani yona, haluna kuba ni bundume, mi mane lukana lwatuhela kusebeleza Jehova. Sina moluka nyakisiseza, Diabulosi naalikile kufelisa sepo yanaanani yona Jobo ni kutahisa kuli atuhele kusebeleza Jehova.

4. Lukanyakisisañi mwa taba ye? (Jobo 1:9-12)

⁴ Mwa taba ye, lukanyakisisa zanaaezize Satani kuli alike kupaleliswa Jobo kuzwelapili kusepahala ku Jehova. (Mubale Jobo 1:9-12.) Hape lukanyakisisa zelukona kuituta kwa mutala wa Jobo ni libaka halutokwa kuhupula kuli Mulimu walulata mi ukataleleza lisepiso zahae.

5-6. Ki miliko mañi yanaakopani ni yona Jobo mwa nako yekuswani feela?

⁵ Jobo naaikola bupilo. Naanani silikani sesinde ni Jehova. Naanani lubasi lolutuna, loluswalisani, mi naafumile hahulu. (Jobo 1:1-5) Kono mwa lizazi lililiñwi feela, Jobo asinyehelwa ibato ba ki lika kaufela zanaanani zona. Sapili, asinyehelwa ki sifumu sahae. (Jobo 1:13-17) Hasamulaho, bana bahae kaufela bashwa. Mulike kunahanisisa mwanaaikutwezi hanaawezwi ki kozi yeo. Bashemi batomohanga hahulu pilu yomuñwi wa bana babona hatimela. Kacwalo, munahane feela mwanaatomohezi hahulu pilu Jobo ni musalaa hae hane bataluselizwe kuli bana babona kaufela balishumi bashwile. Kuswanezi Jobo hanaapazuzi liapalo zahae ni kuwela fafasi hanaalila bana bahae!—Jobo 1:18-20.

⁶ Hasamulaho, Satani atahisa kuli Jobo akule butuku bobumaswe bobushubulisa. (Jobo 2:6-8; 7:5) Kwamulaho, batu nebakutekanga hahulu Jobo. Batu nebayanga ku yena kuyo kupa kelezo. (Jobo 31:18) Kono ka nako yeo, neba mushengoka. Naafulalezwi ki bana bahabo yena, balikani bahae babatuna, mane nihaiba batanga bahae bane basebeza mwa lapa lahae!—Jobo 19:13, 14, 16.

7. (a) Jobo naanahana kuli ki mañi yanaa mutahiseza manyando, kono naasika ezañi? (b) Ki butata mañi bwakona kukopana ni bona Mukreste bobuswana ni bobubonisizwe mwa siswaniso?

⁷ Satani naabata kuli Jobo alumele kuli naanyanda kabakala kuli naafoselize Jehova. Ka mutala, Satani Diabulosi naaitusisize moya omutuna kuwisa ndu mone bainzi bana ba Jobo baalishumi kaufela, ili bane baikola sico. (Jobo 1:18, 19) Hape naatahisize kuli mulilo uwe kuzwa kwa lihalimu ni kucisa lingu za Jobo hamohocwalo ni batanga bahae bane balibabalela. (Jobo 1:16) Bakeñisa kuli moya ni mulilo wo neuzwa kwa lihalimu, Jobo naanahanile kuli neuzwa ku Jehova Mulimu. Kabakaleo, Jobo anahana kuli mwendi naafoselize Jehova. Nihakulicwalo, Jobo ahana kukuta Ndatahe wa kwa lihalimu. Jobo naatalusize kuli Jehova naamuezelize lika zende zeñata kwamulaho. Kacwalo, naalumela kuli sina feela hanaaamuhelanga lika zende kuzwa ku Mulimu, naaswanela kuitatela kuamuhela nihaiba lika zemaswe kuzwa ku yena. Kacwalo, abulela kuli: “Haike libizo la Jehova lizwelepili kulumbekwa.” (Jobo 1:20, 21; 2:10)  Kusina taba kuli Jobo naasinyehezwi ki sifumu sahae, bana bahae nebashwile, mi naakula butuku bobumaswe, naazwezipili kusepahala ku Jehova. Kono Satani naasika tuhela kumulika.

8. Satani naalwanisize cwañi Jobo hape?

⁸ Satani hape naaitusisize baana babalaalu bane baipapata kuba balikani ba Jobo kuli batahise kuli Jobo aikutwe kuli naasina tuso. Baana bao nebapihile kuli Jobo naanyanda kabakala kuli naaezize lika zemaswe zeñata. (Jobo 22:5-9) Hape nebalikile kumukolwisa kuli kusina taba ni lika zende zeñata zanaaezize, Mulimu naasina taba ni busepahali bwahae. (Jobo 4:18; 22:2, 3; 25:4) Ka kubulela cwalo, nebabata kuli Jobo anahane kuli Mulimu naasa mulati, naasike amubabalela, mi naasina taba ni busepahali bwahae. Manzwi abona aswanela kuba anaatahisize kuli Jobo aikutwe kuli naakazwelapili kunyanda honacwalo.

9. Ki lika mañi zenetusize Jobo kuba ni bundume ni kuitiisa?

⁹ Mueze inge babautwa zeezahala. Jobo uinzi mwa mufuse, mi utwa butuku luli. (Jobo 2:8) Baana babaipapata kuba balikani bahae bazwelapili kubulela kuli ki mutu yamaswe mi lika kaufela zaezize halina tuso. Uikutwa kuimezwa ki miliko yahae inge yashimbile macwe abukiti, mi utomohile hahulu pilu kabakala kushwelwa ki bana bahae. Kwa makalelo, Jobo ukuzize feela. (Jobo 2:13–3:1) Haiba baana babaipapata kuba balikani ba Jobo banahana kuli libaka Jobo hakuzize kikuli ubata kufulalela Mubupi wahae, uzibe babushize luli! Jobo mwendi cwale uinula toho yahae mi utalimela baana bao ni kubulela kuli: “Hanina kutuhela kusepahala kufitela nishwa!” (Jobo 27:5) Ki lika mañi zenetusize Jobo kuba ni bundume cwalo ni kuitiisa kusina taba ni miliko kaufela yanaakopani ni yona? Jobo niha naazwafile hahulu cwalo, naasepile  kuli Mulimu wahae yalilato naaka mutusa. Naaziba kuli niha naakashwa, Jehova naaka muzusa kwa bafu.—Jobo 14:13-15.

10. Luitutañi kwa likande la Jobo?

¹⁰ Likande la Jobo liluluta kuli Satani haakoni kuluhapeleza kufulalela Jehova ni kuli Jehova waziba lika kaufela zelukopana ni zona. Likande leo hape likona kululuta lituto zeñwi za butokwa. Halunyakisiseñi lituto zeñwi zelukona kuituta kwa mutala wa Jobo.

11. Lukatusiwa cwañi haiba luzwelapili kusepa Jehova? (Jakobo 4:7)

¹¹ Zanaaipumani ku zona Jobo libonisa kuli haiba luzwelapili kusepa Jehova, lukakona kutiyela muliko ufi kamba ufi oluka kopana ni ona mi lukakona kuhanyeza Satani. Mi kueza cwalo kuka lutusa cwañi? Bibele ilusepisa kuli Diabulosi ukasaba ku luna.—Mubale Jakobo 4:7.

12. Kuba ni sepo ya kuli kukaba ni zuho nekutusize cwañi Jobo?

¹² Luswanela kuzwelapili kuba ni sepo ya kuli kukaba ni zuho ya bafu. Sina molunyakisiselize mwa taba yefelile, Satani hañata uitusisanga sabo yelunani yona ya lifu kulika kutahisa kuli lutuhele kusepahala ku Jehova. Satani hanaalika Jobo, naapihile kuli Jobo naakona kueza nto ifi kamba ifi, mane nihaiba kutuhela kusepahala ku Jehova ilikuli abukeleze bupilo bwahae. Satani naabushize luli! Jobo naasika tuhela kusepahala ku Jehova nihaiba ka nako yanaaikutwile kuli naatuha ashwa. Kukolwa kuli Jehova ki yomunde ni kuzwelapili kusepa kuli naaka mutusa neku mutusize kuitiisa hanaakopana ni miliko. Jobo naanani tumelo ya kuli haiba Jehova naasike amutusa ka nako yanaasa pila, naaka muzusa kwa bafu kwapili. Jobo naanani sepo yetiile ya kuli kukaba ni zuho. Haiba sepo yeo ki ya luli ku luna, lukazwelapili kusepahala ku Mulimu bupilo bwaluna niha bukaba mwa lubeta.

13. Ki kabakalañi haluswanela kuziba linzila zanaaitusisize Satani kulika Jobo?

¹³ Luswanela kuziba linzila zanaaitusisize Satani kulika Jobo kakuli uitusisa linzila zeswana ni kacenu kuli alulike. Mulemuhe taba ya buhata ye yanaabulezi Satani: “Mutu [isiñi feela Jobo] ukafa zaluwile kaufela kuli abukeleze bupilo bwahae.” (Jobo 2:4, 5) Ka kubulela cwalo, Satani naatalusa kuli halulati Jehova Mulimu luli mi luka mufetuhela kuli lubukeleze bupilo bwaluna. Satani hape upiha kuli Mulimu haalulati mi haana taba ni busepahali bwaluna ku yena. Bakeñisa kuli lwaziba milelo ya Satani, luna babasepile Jehova halulumeli litaba za buhata zabulela.

14. Miliko ikona kulutusa kuzibañi ka za moluinezi. Mufe mutala.

¹⁴ Halukopana ni miliko, luswanela kuunga miliko yeo sina kolo ya kuituta sesiñwi ka za moluinezi. Miliko yanaakopani ni yona Jobo nei mutusize kuziba bufokoli bwanaanani bona ni kueza licinceho. Ka mutala, naaitutile kuli naatokwa kubonisa hahulu kalemeno ka buikokobezo. (Jobo 42:3) Ni luna lwakona kuituta zeñata ka za moluinezi halukopana ni muliko. Muzwale yabizwa Nikolay, * yanaakenyizwe mwa tolongo kusina taba ni mapongo anaanani ona, utalusa kuli: “Kuba mwa tolongo kubile sina kuba kwa mushini wa X-ray; kunitusize kuziba moniinezi mwahali, tulemeno tonitokwa kusebeleza ku tona.” Hase luzibile bufokoli bolunani bona, kuka lubela bunolo kueza licinceho.

15. Ki mañi yeluswanela kuteeleza ku yena mi ki kabakalañi?

 ¹⁵ Luswanela kuteeleza ku Jehova isiñi kwa lila zaluna. Jobo naateelelize ka tokomelo Jehova hanaaambola ni yena. Mulimu hanaaambola ni Jobo, nekuswana feela inge yanaa mubulelela kuli: ‘Kana wabona maata aka mwa lika zenibupile? Naziba lika kaufela zeukopani ni zona. Kana unahana kuli nakona kupalelwa kukubabalela?’ Jobo naaalabile ka buikokobezo ni kubonisa kuli naaitebuha hahulu bunde bwa Jehova. Naabulezi kuli: “Mazebe aka autwile zahao, kono cwale nakubona ka meeto aka.” (Jobo 42:5) Kubonahala kuli Jobo hanaabulezi manzwi ao, naasainzi mwa mufuse, mubili wahae kaufela neunani litombo, mi bana bahae nebali mwa libita. Nihakulicwalo, Jehova naabonisize Jobo kuli naasa mulata mi naamukatelwa.—Jobo 42:7, 8.

16. Ka kuya ka Isaya 49:15, 16, ki lika mañi zeluswanela kuhupula halukopana ni miliko?

¹⁶ Ni kacenu, batu bakona kulutapaula ni kulueza inge kuli haluna tuso. Bakana balika kulusinya libizo kamba kusinya libizo la kopano yaluna ni “[kulutameleza] bumaswe bwa mifuta kaufela.” (Mat. 5:11) Likande la Jobo, liluluta kuli Jehova unani buikolwiso bwa kuli lukazwelapili kusepahala ku yena halukopana ni miliko. Jehova walulata mi haana kuyubeka batu baba musepile. (Mubale Isaya 49:15, 16.) Musike mwaisa pilu kwa litaba za buhata zelihasanya lila za Mulimu! Muzwale wa kwa Turkey, ili yo lubasi lwahae nelukopani ni miliko yemituna, utalusa kuli: “Nelulemuhile kuli kuteeleza kwa litaba za buhata ka za batu ba Mulimu nekuka luzwafisa.  Kacwalo, neluisize hahulu pilu kwa sepo yaluna ya kuli Mubuso uka lutahiseza lika zende mi neluzwezipili kuba ni tukufalelo mwa sebelezo yaluna ku Jehova. Kueza cwalo neku lutusize kuzwelapili kuba ni tabo.” Sina Jobo, luswanela kuteeleza ku Jehova! Haiba lueza cwalo, litaba za buhata zelihasanya lila zaluna halina kukona kufelisa sepo yaluna.

17. Muitutañi kwa mutala wa baana ni basali babasepahala bababulezwi kwa Maheberu kauhanyo 11?

¹⁷ Jobo ki yomuñwi wa batanga ba Jehova bane bazwezipili kubonisa bundume ni buitiiso hane bakopani ni miliko yemituna. Mwa liñolo lanaañolezi Bakreste ba Maheberu, muapositola Paulusi utalusa kuli nekunani babañwi bane baezize cwalo, mi ubabiza kuli ki “lilu lelituna la lipaki.” (Maheb. 12:1) Kaufelaa bona nebakopani ni miliko yetaata; niteñi, nebazwezipili kusepahala ku Jehova. (Maheb. 11:36-40) Kana buitiiso bwabona ni sebelezo yabona neli za mbango? Kutokwa nihanyinyani! Nihaike kuli nebasika bona lisepiso za Mulimu kaufela halitalelezwa mwa linako zabona, nebazwezipili kusepa Jehova. Mi bakeñisa kuli nebaziba kuli Jehova naabakatelwa, nebanani buikolwiso bwa kuli nebaka bona lisepiso zahae halitalelezwa. (Maheb. 11:4, 5) Mutala wabona ulususueza kuzwelapili kusepa Jehova.

18. Muikatulezi kuezañi? (Maheberu 11:6)

¹⁸ Kacenu, lupila mwa lifasi ili mo miinelo izwelapili kutotobela. (2 Tim. 3:13) Satani usazwelapili kulika batu ba Mulimu. Kusina taba ni miinelo yetaata yeluka kopana ni yona kwapili, haike luikatulele kusebeleza Jehova ka molukonela kaufela, inze “lusepile Mulimu yapila.” (1 Tim. 4:10) Muhupule kuli zanaaezelize Mulimu Jobo hasamulaho libonisa kuli “Jehova unani lilato lelituna ni makeke.” (Jak. 5:11) Haike ni luna luzweleñipili kusepahala ku Jehova, inze lusepile kuli ukafa mupuzo “ku babatukufalezwi kumubata.”—Mubale Maheberu 11:6.